Daniel Uram 5

Babel sienyi Nebukadnezar mi si Belsyazar biryi weikto li dobmou ba, me yibmai deyok

5:1-30

1Sienyi si Belsyazar biryi weik li dobmouci, er wa iramnyi sien nang nirya yubwa 1.000 baryi nang ab buluboka tonkwa me yinmai. A bulubmai karin aryi sienyi Belsyazar bira walina talerande me yinmou. 2Ura, a sienyi Belsyazar bira walina talebmouci, ninyi ton arukmou. Ara, er abwe Nebukadnezar biryi Yerusalem atei Imtamnyi ai me yin moyok, emas aryi kikniamnyi moyok toto, perak aryi kikniamnyi moyok toto asi daluboka er ai yandoka deiamwe moyok asi dorbinkwamai ati, arukmou ba, dorbinmai. Ba, a moyok aryi weik sien nang ab, sun amwetam kuboka wa in nang ab, sun nerabwe kobdoba ab, sun aminda dortabangni nerabwe ab, tonkwa a moyok aryi walina talen me yinkwamai ati, a moyok borbinmai. 3Ani, ola a moyok a sienyi Belsyazar dam boyanmai ura, anda moyok aryi walina talen me yinmai. 4Ato kuboka walina talen me yinmaici, sun kwemdeina kiboka moloramnyi dinyi asi molonmai. A molonmai dinyi ara emas aryi kikniramnyi dinyi ab, perak aryi kikniramnyi dinyi ab, kat dinyi besi aryi kikniramnyi dinyi ab, co aryi kikniramnyi dinyi ab, keil aryi kikniramnyi dinyi ab asi moloboka si weik eboka ererdeirinmai.

5Uca, lukdandoka a sienyi ai dam asi, akai uk ubna aryi berekmou a deyok dam, abilinga deici asi ninyi taruk du atoanun aryi biling-biling eboka sekmou. Ba, a sienyi dinmou uca, er damuka kerek a sengmou taruk du amnyok lingdona asi lak asing eibmou. 6Ura, a sienyi bira er urasin kurubdobmouci, er ilil aryi er yok kum dandoka tub dem takmou aryi sirim talebmou. 7Ura, a sienyi Belsyazar bira uram iboka dobmou. Ara, yuk-yuk mirei nirya bingni nang asi nabmou. Ba, anda mirei bikoka lak ebman to nang er dam boboka buluryanmai. Ura, a sienyi biryi Babel mutuk dam mirei yala nirya bingnamnyi nang asi ato ebmou, “Sun mirei bingni nang aryi er damuka kerek a sekmar sengna asi nukoka, ‘Ato kunubkwande to ati sekmar,’ eboka lak kibdeibnindarur! Unanyi biryi a dinyi lak ebdeibmanici ura, anyi bira sien nang ongoraming aling, bol kuruta aling ongobdeibkwan. Ani, anyi bisi emas aryi kikniraming kweirya ngang karakdeibkwan. Ani, anyi bisi ni sienyi kiboka talebse amwetam bun sokon asi winiryi dinyi bukoka talebkwande,” ebmou. 8Uca, a boyanmai mirei bingna nang yandoka ukurdenmai uca, sun nukoka, “Ato kubkwande ati kubmar,” eboka sienyi bisi ton lak erdeirina kum kubmai. 9Ato kubmai ura, sienyi Belsyazar bira er urasin kurubdobmou. Ba, er dam wa in nang sunbabyi kanyi walwal danmou ba, sun kanyi tabtabukmou.

10Ura, a sienyi er kwin kekenmou uca, sienyi ab er dam kuboka wa iramnyi nang ab ngalukoka lilim ilinto enmai asi kekebmou. Ura, sienyi er kwin bira me yinmai ai wengyandoka ato ebmou, “Ni nai, sienyi, kanci sienyi kiaminyi tok iya talebkwandim. Nai, sienyi malyi urasin boboka kan ilil kunmakira mem! 11Nai, kan a mutuk sienyi kiboka talebumwe mutuk dam ara sal tentok Er Iya Leknyi bisi Molorurnyi Kanya er dam kururnyi nun kurur. Nai, kan nai minob sienyi kiboka taleamwe talak ara anyi biryi er etekdob bingni dinyi lak kibdanamwe asi asing eianse. Anyi er etekdob bingna bingdur a nirya ara etekdob dinyi ilinto bingdurnyi nun kurur. A ebmananyi bira nai kan nai, Nebukadnezar sienyi kiamwe talak aryi anyi bisi a mutuk mirei yala yuk-yuk bingni nang sienyi kibdeiamwe. 12Anyi bira yuk nang mangkikibman kum kanya, er Molorururnyi Kanya er koukwe dam kurur aryi er bingna dinyi ab kisok yongon dinyi ab dororur. Ba, lak kibman kum lengdera ababyi lak kimdeirirurnyi kurur. A deyok aryi anyi er si ara Daniel kurur. Anyi Daniel er uruma si ara kan nai sienyi Nebukadnezar biryi, ‘Beltsazar,’ eboka si doamwe. Ati, Daniel bisi ur nabdum. Ba, erci yandoka a sekmar kerek asi nukoka, ‘Ato kubkwande to ati a kerek sekmakir,’ ebkwande!” ebmou.

13Ura, Daniel bisi inirbinmai ani, sienyi dam sirya boyanmai ura, a sienyi Belsyazar biryi Daniel bisi asibmou, “Kanda, Daniel a kunum do? Kanda Yahudi yala nang bok, yuk mutuk ni nai biryi Yehuda mutuk aryi bobde yanankounyi a kunum yanmarim tenebman. 14Kanda ni kekekunun uca, ‘Er Molorurnyi Kanya er dam kurur,’ ena kekekunun. Ani, kanti, ‘Anyi er kisok yongon ab, etekdob bingna bikwe dinyi ab ara er bikdobnyi,’ ekunung asi kekenun ati nabmakin. 15Ara, a mutuk dam etekdob bingna bingni nang ab, mirei bingni nang ab ni dam boyanmang. Ba, a nang asi, ‘A kerek sengna nukeibnumunci, “A kerek sengna ara ato ati sekmar,” eboka lak kibdeibnindarur,’ ebdenman. Uca, a kerek sengna nukoka, ‘Ato dinyi ati sekmar,’ eboka lak kum ebdeibmaning. A dinyi sun ukubman kum kubmar ati kansi nabmakin. 16Kan bingdum dinyi ab, inibdob dinyi asi lak kimdeirirum dinyi ab ara sirya nisi nukarebmaning ba, sirya bikmakin. Ati, kanci a kerek sengna asi nukdeiboka, ‘Ato dinyi kunubkwande to ati a kerek sekmar,’ eboka lak ebdeibnurum. Ba, kansi sien nang ongoraming aling bol kuruta aling ongobdeibkwamakin. Ani, kan ngang karakna keil si emas aryi kikniamingnyi karakna ton ongobdeibkwamakin. Ani, tonda ni sienyi kiboka a talebse dam winiryi sokon ara kanti karebkinyi ba, kan bukwandim,” ebmou.

17Uca, Daniel biryi sienyi bisi ato ebmou, “Nai sienyi, ‘Dekwankin,’ ebmarim dinyi nirya ara niti dengnina ara mem. Eda, yuk nang ati karebkwandum! Nira sienyi kanti, a kerek ur dem nukdeibkinyi ura, ‘Ato dinyi kubkwande ati a kerek sekmar,’ eboka lak ebdeibkwamakin. 18Yo, nai sienyi, teleb! Er Imtamnyi Iya Erebdobnyi biryi kan abwe Nebukadnezar bisi a mutuk mikib asa talebkwamwe ati mikib kareamwe ba, sienyi kiamwe. Tonda, sienyi kim ibarya ab, si eren dinyi ab kareamwe. 19Ani, Er Iya Erebdobnyi biryi kan nai Nebukadnezar bisi weik sienyi kibdeiamwe ba, sienyi bukamwe. A deyok aryi im dangna tukwe dangna nang ab, ninyi yala nirya ab, uram yuk-yuk eramnyi nang nirya ab aryi ersi ilil kuboka ninyi sirim taleramwe. Ani, erci, ‘Anyi obkun,’ tenebci ura, ninyi oramwe. Ba, ‘Anyi ona kum kubkun,’ tenebci tok, anyi ona kum kuramwe. Ani, tonda, ‘Anyi bisi erebdeibkun,’ tenebmaci tok anyi bisi ererdeiriramwe. Ba, ‘Anyi bisi dobkwetebkun,’ tenebci tok dorkweteramwe. 20Bok, er mining damnyi erebdandoka, dubnyi nongnong kibdandoka, yu dukuta mak aryi kisok kat biribokamwe. A deyok aryi sienyi kiboka bukamwe dinyi dobkwetebmou ba, dalukoka sakmou ake! 21Ani, er sienyi kiboka ninyi kankan kuramwe asi yakdonokmou ba, bai bisam keledai toto, bai kam toto, yuk-yuk kamyoa kankan binmou. Ura, ninyi sirik kanya boramwe dinyi Imtamnyi dobdobmou ura, bisam sapi kanya dongobdeibmou. Ba, bai bisam kanya boamuryi, maning murmuta asi bisam kuna yibde kuramwe. Ani, maning toto yuk-yuk murmuta yibde kunmaci ani, lak karintam a maramwe. Ba, mo ceboka taringnamwe. Ato kuamwe deyok aryi kan nai Nebukadnezar bira ato teneirbinamwe ara, ‘Er Imtamnyi Iya Erebdobnyi biryi tukwetam nang asi, “Anyi bisi sienyi kibdeibnyi ba, a sokon bukwande,” tenebmaci to sienyi kimnung,’ eboka dib teneamwe. 22Bok, nai sienyi Belsyazar, kan abwe Nebukadnezar dam ukuramwe dinyi a nirya ara bingdum cok, asi kanda tuba dub ererdarum. 23Ani, kanci wingdaboka Imtamnyi Er Iya Erebdobnyi bisi bisibkaboka dub ererdanmarim. Ani, kanci ilil kuna kum asa aryi akata kuboka ninyi arukmarim ba, Er Imtamnyi ai deiriramnyi moyok asi boyanmaking. Ba, kan ab, kan amwetam kuboka wa inung sien nang ab, kan nerabwe kobdoba ab, kan nerabwe aminda dortabangdum nerabwe ab a meyok aryi walina talen me yibmarum. A moyok aryi yibmarumci, ninyi aryi kikniraming dinyi atikwe kan kwemdeina kiboka molonmarum. Ara, emas ab, perak ab tembaga ab, kat dinyi besi ab, keil ab, co ab aryi kiknibdeiboka kan kwemdeina kiboka molonmarim. Kanci a si weik eboka molonmarim keica ara, asing eirina kum kukurur dinyi bok, molonmarim. Amol aryi kekeboka bingna kum kubkwamakir keica asi kan kwemdeina kiboka molonmarim. Bok, kan molobmantonyi bira Er Iya Erebdobnyi bisi si weik eboka molona kum kurum. Er Iya Erebdobnyi bira kan kam kurum dinyi babyi, dibkwandim dinyi babyi talebkounyi bisi molona kum kurum. 24A deyok aryi Er Iya Erebdobnyi biryi taruk dobkweteboka kanti, ‘A kerek sengna asing eiboka bikdur,’ tenen aryi eterebmakir. 25Ura, nai, a kerek sekmo dinyi nukwinkin ati kekerum! ‘Mene, Mene, Tekel Ufarsin,’ Aram nang uram aryi ato eboka sekmar. 26A kerek sekmar dinyi lak ebkwan ara, ‘Mene,’ eboka sekmar ara nai kan sienyi kiboka a mutuk talebumwe uki ukurum tok nirya nukde bakurur ani, sirya nungsungbinmakir. 27Ba, ‘Tekel,’ eboka kerek sekmar dinyi ara nai kansi, Er Imtamnyi biryi kan ukubde barum dinyi nirya, ‘Ikin do? Caknam do?’ tenen liliboka erebdenmakirci, kan ukurum to sirya bikmakir. Uca, kan kurum dinyi ara, ‘Erebtobman kum,’ tenebmakir. 28Ba, ‘Ufarsin,’ eboka kerek sekmar dinyi ara, ‘Meici dukoka bitinyi kimna,’ eboka sekmar. Ara, nai kan talebumwe mutuk asi meici kukoka bitinyi kibci ura, Media nang ton Persia nang ton kibdeibkwande ati a kerek sekmar,” ebmou.

29Ura, a mutuk sienyi Belsyazar biryi, “Daniel bisi sien nang ongoraming aling kuruta bol asi ongobdeibdarur,” ebmou ba, ongobdeibmai. Ani, er ngang karakna ara emas aryi kikniamnyi dinyi asi karakeibmai. Ura, er wa ara a mutuk talen mikib winiranyi karebmai ba, bukmou.

30Ura, a tum aryok mutuk si Kasdim mutuk sienyi Belsyazar obmai.

Currently Selected:

Daniel Uram 5: MTG

Highlight

Copy

Compare