Daniel Uram 12

Sirya uki tum berekwande deyok

12:1-13

1A tum aryi kait bol aling ongobmounyi biryi ato ebmanou, “A talak ara Imtamnyi uram eryuryangan nang sienyi er si ara Mikhael yankwande. A yankwande ara kan atei nang mambul weik dinyi kubkwande li dobkwande ati kalingyankwande. Aminda mambul weik dobkwaming talak berekwande to ara tukwetam ninyi kunung mutuk nirya ato ton kum kurur to asi ukubkwande. Bok, kan atei nang sun yuk-yuk Imtamnyi kerek sengna deici asi si sekdongoanci nang ara lebdeibkwande. Ba, si kerek sengdeirina kum nang ara mambul weik dinyi dobkwaming. 2Ba, diamingnyi ninyi ara tukwe umbura aryi kam bukokingnyi ura, anaboka yankwaming. Ura, a kam bukmangnyi ninyi ara ton ninyi ara iya kam kubde binkwamingnyi ati kam bukoka yankwaming. Ba, ton ninyi ara u sik weik dikum iya kuboka mambul donkwamingnyi ati kam bukoka yankwaming. 3Ba, etekdob bingna bikoka yuk nang asi teleb dinyi etereramingnyi nang sun nong kamuk ara imtam kurande kurya milil ato kuboka milil iya arabmurubkwande.

4Uca, Daniel kanda, a asing eibmarim kunumna ara kerek sekoka a talak aryok sekeiboka duknubdeibdum. A dinyi duknubdeibminyi ura, dangdeina deibdongobdum. A duknubdeiaminyi tok ani, sirya kobdob tum berekci tum aryi lak kibkwandum. Ba, ninyi nirya aryi a asing eibmarim kunumna nirya, ‘Ato dinyi kubkwande ati kunubdeibwe,’ tenen liliboka ingkiringnamingnyi deici aryi sun bingni dinyi ababyi tabakoka bikdoro binkwaming,” ebmanou.

5Ni, Daniel bira ukuboka dirongse uca, Imtamnyi uram eryuryangan nang bitinyi tubto a yandoka tikmarei asi eibmase. Ara, tonyi bira me atam kuboka yandoka tikmou. Ba, tonyi bira me kouboka otam yandoka tikmou. 6Ura, me dinatam yandoka tikmounyi biryi kait ongon aling si lenan ongobmounyi bisi ato eboka asibmou, “Una talak aryi a ilil tenen dinyi kunuranci ani, sirya kunurbinkwande do?” eboka asibmou. 7Uca, me utam yandoka tikmouci, kait aling ongobmounyi biryi er taruk siriktam babyi, kwanimtam babyi imtam erebmou. Ura, Er Iya Erebdobnyi, Iya Kam Kururnyi si deici aryi dib en uram aryi ato ebmou. “Dib tenen nang asi orminingdanci ba, mambul weik doramingnyi talak ara kwalina tentok bisibkwande, ton bitinyi bisibkwande, ton winiryi bisibkwande, dumbaryi dinyi ara mabterberekingnyi bok asi a mambul dinyi kum dankwande,” ebmou.

8Ura, nira a ebmou uram kekebse ura, ni diboka kum bikmase deyok aryi ersi ato eboka asibdenmase. “A mambul dinyi nirya ara kum dandobkwande do?” eboka asibmase. 9Uca, erci nisi ato ebmanou, “Daniel, a uram ara ukuca lak kimna kum kubkwande, eda inibdeianci ani, sirya kobdob tum berekci uca, lak kibkwande ati ur barorum!” ebmanou. 10“A ukubkwande talak ara mambul doramingnyi deici aryi ninyi ilinto asi sun dib tenen dinyi ati ukubdenkwande. Tonda, malyi dinyi kunuramingnyi uca, malyi bol deianci asi a deici aryi sun bol kwit deboka bol debum ebdeibkwande.#12:10 Sun bol kwit deboka bol debum ena ara Er Imtamnyi dib tenen nang mambul dinyi doramingnyi dinyi deici aryi sun bol imtam ai wengbana kikiman kibkwande Bok, sun diboka tenena kum kuramingnyi nang ara wanok malyi kibci ba, malyito dinyi akwe kunubkwaming. Bok, etekdob kanya boboka teleb dinyi akwe kunuramingnyi nang ara minob bikoka kanyi wisibdobkwaming. 11Sun dib tenen nang aryi Imtamnyi biti sun dama tuba deiriramingnyi dinyi asi kum dandeiboka kwemdeina asi Imtamnyi moloramingnyi ai yandoka kiknibkwaming uki ara yubwa 1.290 baryi berekwande. 12Ati, unanyi biryi er dib tenen dinyi iya talebnuruanci asi uki yubwa 1.335 baryi uki nirya sasibokandinyi bira karyi asa kuna teleb. 13Yo teleb Daniel, atei ur bindobdum. Bindoka kuraminyi ababyi mangkau asa aryi busul kanya bobde kurandum. Diaminyi ababyi, sirya kobdob tum aryi kam bukeibkwankir. Kam bukeibkici ura, kanti kiknibdeiankici dinyi dobdobkwandim,” ebmanou.

Currently Selected:

Daniel Uram 12: MTG

Highlight

Copy

Compare