Daniel Uram 11

1Mutuk si Media mutuknyi si Darius biryi yuma sienyi kibmou talak aryi, Niryi Mikhael bisi mar dobmilibdobmase to, erbabyi nisi mar dobmilibmanou.

Mesir mutuk sienyi ab Aram mutuk sienyi ab uram

11:2-45

2Ura, a malaikat aryi ato ebmou, “Niryi kansi a ebkwinkin dinyi ara iya dib sirik uram ebkwinkin. Persia mutuk sien nang ara yuma tikanci ani, liki bitinyi dinyi unubmaci ani, liki winiryi dinyi tikwaming. Ba, liki dumbaryi dinyi tikwandanyi bira er bona talena ilinto taleranci deyok aryi er mikib asa sasiboka talebkwande. Ura, er bona mak aryi mikib kibkarebci ba, mikib asa aryi Yunani yala nang mutuk mar bobkwande.

3Ani, ukubingnyi talak ara mikib ilinto sienyi nun bukdiryi, a mutuk nirya er tenebdobmaci tok kunuboka, ercok akwe to kuboka talebkwande. 4Ura, a sienyi bira ukuryok tikoka talebmaci bok, a taleanci mutuk ara meici kukoka kitingbantam yuk, yaletam yuk, me youkwetam yuk, me utam mutuk yuk kiboka sien nang yuk-yuk talebkwaming. Ba, er olong unubkwande sienyi bira er yala nang kum uca, yuk yala nang aryi sienyi kiboka talebkwande. Ba, yumanyi mikib asa taleanci to kum uca, er unubkwande sienyi bira mitang asa talebkwande.

5Ani, me youkwetam mutuk Mesir sienyi bira mikib ilintonyi nun sienyi kibkwande. Uca, a sienyi er yin doun nang sien nang kankan aryi ninyi tentok asi mikib ilintonyi nun kibkwande. Ba, anyi erci mikib asa aryi talebdiryi, a mutuk nirya er dinyi akwe ilinto kibkwande. 6Ani, kwalina o kwalibde bangnyi talak ara, me youkwetam Mesir mutuk sienyi ab, me utam Aram mutuk sienyi ab antaniboka uram sisikdobkwanding. ‘Ni ab, kan ab antanibdobkwanim,’ eboka uram sisikdobkwanding. Ukuboka uram sisikdobdingnyi ura, a sisikdobmaringnyi dinyi asi, ‘Kununa kum kubnimnyei,’ tenebdingnyi ura, me youkwetam sienyi er nebnyi ara me utam sienyi biti iniboyandoka kabdeibkwande. Uca, a ner ara iya kuna kum kubkwande. A ner ab, er akenyi ab, er deibmaci mi ab, er iniboka yanamingnyi ninyi ab nirya obkiribkwande. 7Ura, a talak aryi a oamingnyi ner yala aryi Mesir sienyi kibkwande. Ura, anyi biryi me utam Aram mutuk sienyi ab, er yin doun nang ab asi mar bobkwande. Ura, a mutuk weik atei lika akoka wekingnyi ura, a kuramingnyi nang nirya asi oboka erebdobkwamaci ati, akatei arabdobkwande. 8Ani, sun kwemdeina kiboka ninyi atoa ab, dengna weik keil emas toto ab, perak toto ab deiriramingnyi dinyi ab nirya daluboka, boboka Mesir dam bobinkwaming. Ura, kwalina mikbaryi nirya ara me utam mutuk nang asi mar bona kum uca, ur kubkwaming. 9Ani, me utam mutuk Aram mutuk sienyi biryi me youkwetam mutuk Mesir sienyi bisi mar bobmaci uca, Aram sienyi tam nang asi Mesir tam nang aryi oboka erebdobci ba, tamuboka er mutuk Aram yankwande.

10Ura, me utam mutuk sienyi er mabwe aryi ninyi mar bobkwamangnyi ati, yin doun nang yubwa ilinto naboka bulubkwaming. Ura, anyi er mi tentok ara menekoka mar bobinkwande. Ninyi mar ibanmangnyi ara me obde barande to kuboka walabde banmangnyi ani, bindoka obdankwaming. Ba, liki bitinyi dinyi mar ibinmangnyi tum ara sun mar ordan nang me youkwetam nang atei dam kobdob wengbindoka obdankwaming. 11Ba, me youkwetam mutuk sienyi bira er yu wekci ura, erci yin doboka me utam sienyi tam nang asi mar bobkwande. Ara, me utam mutuk sienyi mar iyanmangnyi yin doun nang ilinto asi mar bobmangnyi ani, a nang asi oboka erebdobkwaming. 12Ura, me youkwetam mutuk sienyi bira er tam nang aryi ninyi oboka erebdobmangnyi dinyi ab, ninyi yubwa-yubwa ilinto obmangnyi dinyi ab ati, er kanya erebdobkwande. Bok, a sienyi tubto ninyi mar bona ara er mitang yukwande. 13Ba, kuramingnyi ani, me utam mutuk sienyi biryi liki bitinyi dinyi mar bobkwamaici ura, yin doun nang buluboka olong yuk-yuk kiknirminikwaming. Ara, yuma mar ibinmangnyi nang yubwa ara mitik bok, a tum ibinkwamangnyi ati, kiknirminingmaci ara yin doun nang yubwa ilinto bulubkwaming. Ani, ninyi mar ordan keica ababyi ilinto kiknibminikwaming. 14Ura, a tum ara ninyi ilinto aryi me youkwetam mutuk sienyi bisi mar bobkwaming. Ba, Daniel kan mutuk nang yu ilinto nang ababyi dub erebdandoka neik mutuk Mesir nang akwe mar bobkwaming. Uca, Daniel kan kunumna deici asing eibmarim to lak kibkwande. Bok, mar ordanmangnya deici aryi sunsi obkiribkwaming. 15Ani, me utam Aram sienyi biryi weik atei lika sasiboka doamingiryi, kuramingnyi atei asi mar boboka arabdobkwamaci ati, damtoto weik atei lika baitam kuboka keil aryi morobkwaming. Ba, me youkwetam Mesir sienyi yin doun nang ara mikib kum daci ba, sasiboka lemdarona kum kubkwaming. Ani, mikib weik yin doun nang kuramingnyi ababyi iya mitang kibdeibkwaming. 16Ba, mar bobmaci sienyi biryi kanyi kinibdobdiryi, mar bobci ara yuk nang aryi ersi leboka obmang kum kubkwande. Me utamnya biryi sirya ukubci ura, tamuka Daniel kan atei nang er milibmangnyi nang mutuk sul teleb mutuk ababyi wengbindoka arabdobkwande. Arabdobci ura, a teleb mutuk ara er dinyi kiboka kubdobkwande. 17Ani, a sienyi Aram mutuk sienyi biryok Mesir mutuk sien nang atei ababyi nenemna ati, er nebnyi kabdeiboka, ‘A mutuk nirya arabdobkwan,’ tenen er nebnyi kabdeibmaci uca, kunuboka a mutuk ararona kum kubkwande. 18Ukubmaci uca, kununa kum kubci ura, ilila me kubkub mutuk kuramingnyi ninyi asi obkiriboka a mutuk nirya arabdobkwande. Uca, yuk atei yin doun nang sienyi tentok aryi anyi biryi ukuranci dinyi ara malyi kurur tenebci ura, a ukubde baranci dinyi bisik sekeibkwande. Ura, a ukuranci sienyi bisi erbabyi dekeibkwande. 19Ura, a sienyi er mutuk kuboka mikib weik atei tamuboka bici ura, erbabyi obkwaming. Ba, ‘A sienyi bira a dikum kurur,’ tenena ababyi bingna kum kubkwaming.

20Ani, a sienyi kuranci olong asi yuk sienyi tubto unubkwande. A unubmaci sienyi biryi yu ilintonyi nun wiboka tukwe dengna pajak molobde yibananyi bikdob wa nun tikeibkwande. Uca, a wa kareboka tukwe dengna bulurkiringnanyi bisi ordana ab, yu dinyi ab aryi ona kum uca, talyi obkabkwaming.

21Ani, tubto anyi olong ara sienyi ton unuboka Aram mutuk sienyi kibkwande. Anyi bira yuk nang aryi, ‘Anyi sienyi kimna ara nun li,’ teneramingnyi bok, er uram aryi taktak ebdeiboka Aram mutuk sienyi tikwande. Ani, anyi bira sienyi kimna kikiman kumnyi bok, sienyi tikwande. 22Ura, yin doun nang nirya buluboka ersi oryanganmangnyi bok erci sunsi obsekwande. Ani, Imtamnyi ai Bait Allah dam dama deirin nang sienyi bibabyi oboka kum dandeibkwande. 23Ani, a sienyi bira yuk sien nang aryi, ‘Nun ab antanibdobkwayeb,’ ebmangnyi uca, a sienyi biryi inina dokoka er biyuk ninyi mar bobkwande. Anyi bira mitikto mutuk asi ninyi ababyi mitikanun kuramingnyi mutuk taleanci sienyi biryi ukubkwande. Bok, er taleanci mutuk asi sasibkwande. 24Ura, a sienyi er uram aryi taktak ebdeiboka a mutuk dam asi mutuk tentok sul tororok eramwe mutuk asi mar bobokabdiryi, a mutuk wengbindoka arabdobkwande. Ato kuboka a mutuk arabdobkwande to ara er nai yabwe ab, er abwe yabwe ab ababyi, ton ukuna kum kuramingnyi bok, ercok liboka a mutuk arabdobkwande. Ara, a mutuk nang bona talena nirya daluboka bobde yandobci ura, er atei nang ati, yamum-yamum eboka bokeibkwande. Ani, a mutuk mikib weik atei ababyi mar bobkwandiryi, duknuboka mar moun yibkwande. Uca, uki kum kubkwande eda tiya atikwe ukunkwamarur.

25Ura, me utam sienyi er dukuta ab, er mikib ab boranci dinyi aryi er ibarya dobkarebci ba, me youkwetam mutuk yin doun nang ilinto ab, mikib weik nang ab akwe kiknibmangnya bok, Aram sienyi ab er yin doun nang ab aryi mar boboka obkiribkwaming. 26Ura, Mesir sienyi bisi er ab tonkwa yina yiramingnyi nang aryi kikiboka ersi Aram sienyi taruk dam dobkarebingnyi ba, obkwaming. Ani, Mesir sienyi yin doun nang ilinto nirya ababyi obkiribkwaming. 27Ton yuk talak ara, a me utam mutuk sienyi er mar ibinkwamaci tam me youkwe mutuk sienyi ab antanibdobdingiryi, neika tentok co lamna bukoka yina tonkwa yibkwanding. Ani, uram tonkwa sisikoka tola ati, ‘Ukubkwanim-ukubkwanim,’ eboka sisikwanding. Uca, sirya uki tum berengna kabul deyok aryi a sisikandingnyi dinyi ara kununa kum kubkwande. 28Ani, Aram mutuk sienyi bira Mesir atei nang bona ilinto daluboka bobci ura, er atei tamurbinkwande. Ura, a sienyi er bisik noutam banmaci uca, er kanyatam ara ato tenebkwande, ‘Er Imtamnyi bisi moloramingnyi ninyi asi obniryi binkwan,’ tenebkwande. Ura, Imtamnyi bisi dib tenen nang asi akatei bindoka ninyi onmaci ani, er mutuk me utam atei binkwande.

29Ani, Aram sienyi biryok uki kiknibdeianci talak sirya kubci ura, ‘Me youkwetam nang mutuk tubto mar boboka arabkwan,’ tenen kuranci uca, yuma kuanci to kum kubkwande. Eda, aminda wengbici dinyi ara yukto kubkwande. 30Yukto dinyi ara Kitim mutuk nang#11:30 Kitim mutuk nang ara Roma nang aryi me deici yiban aia bisik yandoka mar bobkwaming. aryi me dub yiban aia deici aryi ninyi yubwa kitingbantam aryi yandoka ersi mar bobkwaming. Ba, anyi er akata asa kuranci dinyi ara kum dankwande. A deyok aryi, anyi er kanyi dam yu wekci ura, Imtamnyi uram teleb uram kekeboka kunuramingnyi nang Israel nang asi mar bobkwande. Bok, Imtamnyi uram takloamingnyi nang ara er tam nang kibdobkwaming.

31Ura, a sienyi er yin doun nang anabkwaming. Ura, a yin doun nang aryi Imtamnyi biti dama deiboka moloramingnyi ai umbura asi malyi dinyi kunuboka betebsinibkwaming. Ani, Imtamnyi biti dama tuba-tuba deirina ara yandoka bisik sekoka kum danabdeibkwaming. Ura, sun moloramingnyi dinyi yuk yandoka kiknibdeibkwaming. A dinyi ara Imtamnyi biryi asing dina ara iya duknasi deyok aryi a moloramingnyi nang asi Imtamnyi biryi wenebkwande. 32Ba, a sienyi biryi Imtamnyi uram kununa kum kuramingnyi nang asi er uram aryi takeiboka nenerdeiriranci ba, er tam nang akwe kibsekwaming. Bok, Imtamnyi uram kekeboka diboka kunuramingnyi nang ara er uram tataboka mikib asa sasibdobkwaming. 33Ani, Imtamnyi uram keken nang ara sun kankan dam etekdob nang kuramingnyi nang aryi sun kwit yabwe yuk nang asi teleb dinyi eterebingnyi ba, ninyi ilinto bikdobkwaming. Bok, uki weikto nun ara ton ordaramingnyi uca, etekdob bingna nang asi obkwaming. Ani, mutuk ab atei ab nirya uk daramingnyi uca, sun etekdob bingna nang ababyi uk ton yibdankwande. Ato kubkwaming ara yuk sienyi yin doun nang aryi yandoka ninyi oboka bona daluboka kimdamingnyi uca, mambul dinyi doramingnyi talak aryi obkwaming. 34Ninyi obde yibaramingnyi talak ara Imtamnyi uram etekdob bingna nang asi sun yala nang ninyi mitikanun lebdeibkwaming. Bok, yubwa ilinto ara Er Imtamnyi uram etekdob bingna nang asi uram atikwe iliboka, ‘Nun sun tam nang aca,’ ebkwaming. 35Ani, tonda etekdob dinyi bikoka ninyi eteren nang ara nin ton obsekwaming. Ato kuboka obkwaming ara, ‘Yuk dib tenen nang asi sun kanya sasibdobyi do?’ tenen ukurden dinyi ukubdenkwaming. Ba, sun dib tenen dinyi kanyatam sasibkwande. Ato dinyi akwe ukuranci tok asi Imtamnyi biryi sirya kobdob tum kiknibdeibwe uki tum berekwande.

36Ura, a sienyi bira er tenebmaci tok akwe kunubde binkwande. Ani, a sienyi biryi erebdandoka yuk-yuk kwemdeina ab, Er Imtamnyi Iya Erebdobnyi ab ababyi nirya uram dubto eboka malyi kibkwande. A sienyi bira mambul dinyi dobkwaming talak ara iya a wingdabde kuranci tok asi a talak sirya kum dankwande. Ato kubkwande dinyi ara Er Imtamnyi biryi, ‘Aminda sirya uki berengna kum kubmaci talak ara mambul dinyi weik dobkwaming,’ ebdeibwe. Ati, a dinyi tangna kum kubkwande eda, iya dib kunubkwande. 37Ani, a sienyi bira er nong ninyi moloramingnyi kwemdeina asi malyi kiboka er mining damnyi bisi erebdankwande. Ani, yuk-yuk kwemdeina nirya ara malyi kibkwande. Nerabwe aryi si ereboka moloramingnyi kwemdeina ababyi amwetam kibdeiboka erebdeibdankwande. 38Ani, tonda er nong ninyi molona kum kuramingnyi kwemdeina ara, mar iyangana ati sasiboka lika dorande kwemdeina asi, er kwemdeina kiboka molobde binkwande. Ani, er bona-bona si emas babyi, perak babyi, yuk-yuk keica dengna weik dengnaming keica nirya dama deiboka molobde binkwande. 39Ani, erci a kwemdeina atoa moloramingnyi yin doun nang asi nabci ura, mikib sasiboka dodaramingnyi atei asi mar bobkwande. Ani, tonda ato ebkwande, ‘Unanyi biryi a kwemdeina dib tenebdiryi molobci ura, erda si erebdeibkwan. Ani, a kwemdeina dib teneboka molobmarinyi bisi erebdob wa kareboka mutuk damnyi kibdeibkwan,’ ebkwande.

40Aminda sirya uki tum berekwamaca dam kubmaci talak ara, me youkwetam sienyi biryi me utam sienyi bisi mar bobkwande. Uca, me utam sienyi bira erbabyi mar bobkwamaci ati, er kongkong eboka bobaraming keica deici ab, kuda deici ab, me deici yibaraming aia ab boboka a mutuk nirya ilila me kwan deiboka obde yirande to kuboka mar bobkwande. 41Ani, sul teleb mutuk lu ababyi wengbici ura, a mutuk nang yubwa ilinto obkwande. Bok, Amon yala nang sun mutuk bikdob mutuk ab, Edom mutuk ninyi ab, Moab mutuk ninyi ab ara te deirirdena kum kubkwande. 42Bok, Mesir mutuk ab, yuk-yuk mutuk ab ara tangna kum kubkwande, eda anda mutuk nirya mar bobkwande. 43Ba, ukuboka Mesir mutuk kururanci bona si emas bona, si perak bona, dengna weik dinyi nirya ercok arabdobkwande. Ani, Libia mutuk ninyi ab, Etiopia ninyi nirya ababyi er tam nang akwe kibsekwaming. 44Ani, me utam mutuk nang uram ab, yaletam mutuk nang uram ab kekebci ura, a sienyi er kanya ikin kibci ura, a sienyi er yu weik wekwande. Ura, a sienyi bira yu asa aryi anaboka a mutuk nang asi ninyi ilinto obkiribkwande. 45Ukubci ura, a sienyi biryi tiya ati ilila keis ol ai doboka kun atei ara, Imtamnyi ai teleb ai doamnyi mutuk kon tam kan, ilila me kwan tam kan noutumang asi ai dobkwande. Ba, erda iya kuranci ani, erda ninyi aryi lemdeirina kum uca, er yuk da kuranci tok kum dankwande,” ato eboka malaikat biryi ebmou.

Currently Selected:

Daniel Uram 11: MTG

Highlight

Copy

Compare