Hosea Uram 1

Deyok

1:1

1Er Iya Erebdobnyi biryi sun Israel nang deyok ati, ninyi si Beeri mi si Hosea dam asi uram ebdeibmou. Er Iya Erebdobnyi biryi Hosea bisi uram ebdeibmou talak ara sun Yehuda mutuk nang taleramnyi weik sien nang si ara Uzia ab, Yotam ab, Ahas ab, Hizkia ab unubdandoka taleramnyi talak aryi uram ebdeibmou. Ba, sun Israel nang me utam mutuk taleamwe weik sienyi Yoas mi Yerobeam taleamwe talak aryi Hosea bisi uram ebdeibmou.

Sun Israel nang diboka kum kuramnyi dinyi ati, Hosea ai ninyi aryi kiklibdeibmai uram deyok

1:2-9

2Er Iya Erebdobnyi biryi Israel nang asi Hosea deici asi uram deyok kouboka ebkalibmou. Ara, Erci Hosea bisi ato ebmou, “A mutuk dam nang ara Er Imtamnyi bira dongtam kibdeibokingnyi ura, talyi yukut yordan dinyi asi nunungdeirinung. A deyok aryi kanci sun Israel nang kunung to kiklibkwandim ati, talyi yortamni ner asi dobdobdum. Ba, a dobdobminyi uca, deibkwandim mabwe nermabwe ara, talyi yortamni mabwe nermabwe deibkwandim ati,” eboka arukmou. 3Ba, Hosea biryi anaboka ninyi si Diblaim nebnyi si Gomer dobdobmou. Ura, a ner aryi mundu boboka erti yuma mi deibkarebmou. 4Ura, Er Iya Erebdobnyi biryi Hosea bisi uram tubto ato ebdeibmou. “Minob talak aryi Israel mutuk weik sienyi si Yehu biryi Yizreel mutuk dam aryi ninyi ining sakeibmou deyok aryi uki kuna kum uca, Niryi Yehu erbabyi kisok dakokabniryi er deibdoba nang nirya bung dakwabman. Ani, Niryi sun Israel nang talerdanung mikib ara kum daneibkwabman. Ati, a mi si ara, ‘Yizreel,’ eboka si dobdum. 5Ba, a talak aryi Niryi Yizreel mutuk bakan dam aryi sun Israel nang yin lakoka mar bulakoka sici kibkwan,” ebdeibmou.

6Ura, Hosea ner tubto mi mundu bobmouci, nebnyi deibmou. Ba, Er Iya Erebdobnyi biryi Hosea bisi ato ebmou, “Niryi sun Israel nang yala nirya asi boukwe kum kibkwan. Ani, Niryi sunsi kum boukwe kiboka sun malyi kun dinyi iya kum kilibkwan. Ati, a nebnyi si ara, ‘Lo-Ruhama,’ eboka si dobdum. 7Niryi sun Israel nang ara wenebkwan bok, Niryi sun Yehuda yala nang ara boukwe kiboka lebdeibkwan. Ara, Niryi sunsi lebdeibkwan ara ninyi on ya douboka kum lebdeibkwan. Ani, yuk dinyi mar ordan tum douraming dinyi ab, bisam kuda ab, kuda deici bukoka mar ibaraming nang ab aryi Yehuda nang asi kum lebdeibkwan. Eda, Ni Iya Erebdobnyi, sun Molonindarurnyi si deyok aryi sunsi lebdeibkwan,” ebmou. 8Ura, a ner aryi er nebnyi Lo-Ruhama sirya moum dakeibmou ura, tubto mi mundu boboka sal deibkarebmou. 9Ba, Er Imtamnyi biryi ato ebmou, “Sunda Ni mabwe nermabwe kuma. Ba, Nira sun Nai sun Molonanyi kuma. A deyok aryi a mi si ara, ‘Lo-Ami,’ eboka si dobdum,” eboka Er Imtamnyi biryi Hosea bisi ebdeibmou.

Sun Israel nang asi tubto teleb kubdeibkwamwe to ati, uram eboka kunubdeibmou uram deyok

1:10-12

10Er Imtamnyi biryi, “Sun Israel nang ara teleb kum kubkwandum. Bok, aminda talak ara sun Israel nang ninyi yubwa-yubwa ara me dala keil wininga asi nukman kum kurande to kubkwandum. Ani, sunsi Er Imtamnyi biryi, ‘Sunda Ni mabwe nermabwe kuma,’ eansinyi mutuk dam aryi sunsi tubto, ‘Sunda Ni Imtamnyi iya kam kununyi mabwe nermabwe kundarur,’ ebkwansin.#Rom. 9:26 11Sun Yehuda mutuk nang babyi, sun Israel mutuk nang babyi buluboka tonkwa kubdobkwaming. Tonkwa kubdobingnyi ura, sun mutuk kalingni weik sienyi ninyi tentok erebdeibdobkwaming. Ura, ninyi atei yuk mutuk tingbinsekamingnyi ani, tamuryandoka sun tonkwa antanibdobingiryi, a mutuk dam asi kubdobkwaming. Ato kubkwaming ara Yizreel uki ara sun weik uki tum kibkwande deyok aryi ukubkwaming. 12Ati, kan du weit yabwe sal nang ara, ‘Ami,’ ebkwandum. Ara, kanci sunsi, ‘Sunda tubto Er Imtamnyi mabwe kubkwandum,’ ebmaminci sunsi, ‘Ami,’ eboka si dobkwandum. Ba, kan malnerabwe ara, ‘Ruhama,’ ebkwandum. Ara, kanci sunsi, ‘Sunda tubto Er Imtamnyi biryi boukwe kibkwansir,’ ebmaminci sunsi, ‘Ruhama,’ eboka si dobkwandum,” eboka Er Imtamnyi biryi Hosea bisi arukmou.

Currently Selected:

Hosea Uram 1: MTG

Highlight

Copy

Compare