Kolose Uram 4
4
1Ura, sun yuk nang asi ikin wa takurdeirirandum nang ara sun ikin wa takurdeirirandum nang asi mambul kibdeibmunyei. Eda, sunci teleb kiboka kikib tenen dinyi akwe kunubdarur. Ati, sunci, “Nun Du bira imtam kururnyi nunbabyi arungdeirisurur ati, nunbabyi nun Du biryi ebdeibmasou to kunubde binkwayeb,” tenebmuncok, sun tukwetam aryi kuboka ikin wa bon nang asi teleb akwe kubdeibdarur.
“Ato-ato kunubde bindarur,” eboka eterebtabakmou uram
4:2-6
2Ura, ni kwit yabwe, sun nirya ara tanglona kum uca Er Imtamnyi bisi molobdarur. A molonmamunyi talak aryok, sunci kalikdandoka moloboka Er Imtamnyi bisi, “Ei nun Nai,” eboka kibkwandarur. 3Tonda, sunci nun Nai bisi molonmamunyi ura, nunbabyi molormilibsindarur. Ara, nun Nai Imtamnyi biryi bublan kukeibsici uca, nun Du Yesus uram Teleb Uram lak eterebkwayeb ati molobmilibsindarur. Nun Du Uram inibdeiamwe uram asi lak eterebde banub deyok ati, ninyi aryi nisi tabwe deanei ati ebman. 4Ba, niryi nun Du Yesus uram Teleb Uram kikibto kuboka lak eterebkwan ati, sunci nisi molormilinina teleb. 5Ura, sunci bikdob kanya boramunci, teleb dinyi akwe kunubde baramuncok, sun dib tenena kum nang ababyi teleb akwe kibdarur. Ara, sunci sun dib tenena kum nang ab tonkwa kuramunyi ura, “Yuk tum aryi Teleb Uram eterebkwan,” tenena mem. Erda sun ab tonkwa kunmamunyi uki tum ara sunti teleb uki tum a kunum berekmasiriryi, ati, Teleb Uram akiryok eterebkwandarur. 6Yuk nang asi uram eramunyi ura, sunci tuba-tuba namin uram akwe ebkwandarur. Tonda, sun eramunyi uram nirya ara diboka kanya teneibmuncok, kikib uram akwe ebkwandarur. Ara, ninyi aryi, “Yu uram akwe enung,” eboka tatab-tatab ebdongobsingnyi ababyi, sunci, “Tola ati enmanurum,” eboka sun damnyi limdarona teleb.
“Teleb ni kwit yabwe, a kunum sirya kerek sekeibmasin,” ebmou uram
4:7-18
7Ura, ni kwit yabwe, nun kwit Tikhikus bira sun dam yangaci ura, erci ni Paulus biti, “Ato-ato kurande,” eboka uram bobkirikwansir. Nun kwit Tikhikus bira nun boukwe kimnubnyi dib tenenanyi kururci, erci tanglona kum uca nun ab tonkwa nun Du Yesus Kristus bisi wa irmilinubnyi kurur. 8Nun kwit biryi nun kuramib to uram bobkiriksiryok, sun kanya yuk-yuk asi katabum ebdeibkwansir ati niryi ersi sun dam bokdonokmasin. 9Nun kwit Tikhikus bira nun kwit Onesimus ab milibdandoka sun Kolose atei nang dam yankwanding. Nun kwit Onesimus bira sun ateinyi kurur asi, nunci ersi boukwe weik kunubnyi kurur. Tonda, erda tanglona kum uca nun Du bisi dib tenenanyi kurur. A nang susuk aryi nun atam kuramib to nirya sunsi nukwansiring.
10Tonda, ni ab tonkwa tabwe deboka dongobsinyi, nun kwit Aristarkhus biryi sunsi, “Teleb,” ebmasir. Tonda, Barnabas er nai weitnyi mi si Markus bibabyi sunsi, “Teleb,” ebmasir. Erci sun dam yangaci ura, sunci ersi kibdobkwandarur. Ati, niryi sunsi sirya ebdeibmasise to, sunci ersi kibdobkwandarur. 11Tonda, Yesus er uruma si ara Yustus enungnyi bibabyi sunsi, “Teleb,” ebmasir. Aristarkhus ab, Markus ab, Yustus ab ara Yahudi yala nang aryi deiamnyi nang kunung aryi, ni wa inuna kankan kunungci, irmilinunung. Ni wa irmilin nang yuk nang nirya ara Yahudi yala nang kum kunung bok, a nang winiryi nang asi Yahudi yala nang kunung. A nang ara, “Ninyi nirya aryi Er Imtamnyi amwetam kun nang kibkwaming tum minola yarur,” tenen ni inun wa irmiliraning uca, ni kanya katabum eranir. 12Tonda, nun kwit Epafras bibabyi sunsi, “Teleb,” ebmasir. Erbabyi sun ateinyi kurur. Tonda, erci nun Du Yesus Kristus bisi wa irmilinanyi kurur. Nun kwit bira uram darab-darab erandiryok, sunti tuba-tuba molormiliransir. Ara, erci sunti, “Er Imtamnyi biryi erdeirisin uram nirya asi langdeiboka bikdobingiryi, katabum kanya boboka nun Nai Uram diboka kunubkwaming,” tenen erci sunti molormilisurur. 13Tola kuma. Nun kwit bira busul weik kuboka sun Kolose atei nang ati molormilisurur. Tonda, sun Laodikia atei nang ab, sun Hierapolis atei nang ababyi ati erci busul kuboka molormilirur. 14Tonda, nun kwit Lukas ninyi kwetenanyi nun boukwe kunubnyi biryi sunti, “Teleb,” ebmasir. Tonda, Demas bibabyi sunti, “Teleb,” ebmasir. 15Ura, ni kwit yabwe Kolose atei kurandum nang, sunci dam kuraming atei nang Laodikia nang asi, “Paulus ab, er ab tonkwa kunung nang ab aryi, ‘Teleb,’ eboka kibmasing,” ebdarur. Tonda, nun malner dib tenen ner Nimfa ab, dib tenen nang er ai buluraming nang nirya ab asi, “Paulus biryi, ‘Teleb,’ ebmasir,” ebdarur.
16Ura, sunda Kolose atei kurandum dib tenen nang dam asi a kerek sengna sirya nuksingnyi ura, sun Laodikia atei kuraming dib tenen nang ababyi nukde bana teleb. Ba, niryi sun Laodikia atei nang ababyi kerek sengna ton sekeibmase ati, a kerek sengna ara sun Kolose atei nang ababyi nukde basina teleb.
17Tonda, nun kwit Arkhipus bisi ato ebdarur. “Nun Du biryi kansi wa takubdeibkou ati, kanci a wa asi tanglona kum uca kunuboka inkwandum,” ebdarur.
18Ni Paulus bira sun nirya asi, “Teleb,” ebmasin. A teleb eboka sekmasin ara ni taruk kobdoba aryi kerek sekeibmasin. Nira tabwe deaneinyi kunun ati, sunci niti molormilina teleb. Nun Nai Imtamnyi biryi sun nirya asi kisal dangsina teleb. #4:18 Ati, sunci, “Tola kuma. Paulus biryi kerek sekeibmasir,” tenen bikwanurum ati, ni taruk aryi kerek sekeibsin.
Currently Selected:
Kolose Uram 4: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
