Kolose Uram 3
3
“Er Imtamnyi dam kun nang kuramuncok, ato-ato kubde bindarur,” eboka eterebmou uram
3:1-17
1Nun Nai Imtamnyi biryi nun Du Yesus Kristus bisi kam bukeibmou to, Erci sun Kristus dam kun nang ababyi nun Du Yesus ab tonkwa kam bukeiboka lebdeibmasou. A deyok aryi, sunci imtam dinyi akwe teneiboka ingkirikwandarur. Ara, sunci, “Nun Du Kristus imtam welebinmou ura, nun Nai Imtamnyi siriktam burur,” tenen imtam dinyi akwe ingkiringdarur. 2Sunci sun kanya dam ara tukwetam dinyi ati kanya teneina mem. Eda, imtam dinyi akwe kanya teneibkwandarur. 3Nun Du Kristus biryi sunsi lebdeibmasou uca, sunda tukwetam dinyi ati dian nang ato kurandum. A deyok aryi, sunci tukwetam dinyi ingkiringna mem. Sunda nun Du Yesus Kristus dam kun nang kibmandau uca, ukuryok kam kun nang ato kurandum. Sun iya kam kurandum dinyi ara laktoto kum kibmar. Eda, nun Du Yesus ab tonkwa Er Imtamnyi bukwe dam tuba kubmar. 4Ura, nun Du Yesus Kristus aminda aryi yuryangariryi, Erdamnyi biti, “Nira Iya Weik Sienyi kunun,” eboka lak kibdankwande tum aryi Erci nunsi iya kam kimdeirisina deyoknyi biryi karebsici uca, sunbabyi Er ab tonkwa weik sien nang ato kubkwandum.
5A deyok aryi, sunci, “Tukwetam tenen dinyi ara taklobmoubwe ati dian nang ato kibdobmoubwe,” tenen tukwetam dinyi nirya asi taklobdarur. Ara, “Ner talyi yobtinyi,” tenen dinyi ara taklobdarur. Tonda, “Talyi yobniting,” tenen dinyi ara taklobdarur. Tonda, “Den kwat atan ati malyi kun dinyi utotoa kubtinyi,” tenen dinyi taklobdarur. Tonda, “Bona utotoa-utotoa labtalebtinyi,” tenen dinyi ara taklobdarur. “Bona utotoa-utotoa labtalebtinyi,” tenen dinyi ara Er Imtamnyi bisi dongtam kimna dinyi ato kurur ati, iya malyi kun dinyi, kwemdeina molon dinyi ato kurur ati, “Taklobdarur,” ebman. 6Nun Nai Imtamnyi biryi a dinyi nirya ati, “Ni li,” tenerur ati, Erci sun a malyi dinyi kuramingnyi nang asi diba ati wenebkwande. A nang ara Er Imtamnyi Uram ati, “Nun li,” teneraming ati ato ebman. 7Sun Kolose atei nang ara minob kurandauci, sunbabyi neiktoto a malyi kun dinyi nirya kubde barandau. A talak kurandau ara sunbabyi a malyi kun dinyi ingkirikde barandau. 8Bok, ukuryok ara sunci a malyi kun dinyi nirya asi taklobdarur. Ara, yu tenen kanya taklobdarur. Tonda, bimsa tenen kanya taklobdarur. Tonda, “Yuk nang asi malyi kibtinyi,” tenen dinyi taklobdarur. Tonda, tola ati tatab-tatab en dinyi taklobdarur. Tonda, yuk nang asi si talyi ablanglon dinyi nirya ara sunci ebmunyei. 9Tonda, sunci tola uram erdana mem. Sunda nun Du Yesus dam kun nang kurandumci, sunci malyi tenen kanya ab malyi dinyi kuna ara sirya taklobmarum ati ato ebman. 10Minob tenerandau dinyi malyi dinyi ara sirya takloboka ukuryok tenen dinyi sirya dobdobmarumci, teleb dinyi akwe kunubde barandum. A ukuryok kanya ara nun Nai Imtamnyi biryi nun kanyatam asi ukuryok kiknibde uca, nunda Er Imtamnyi bito nang kimnubci, tabakoka Er Imtamnyi bisi diboka bikde banub. 11Nunda ukuryok kanya bon nang ara yuk-yuk tuba kum kunub. Ara, Yunani yala nang yuk, Yahudi yala nang yuk, tuba kum kunub. Tonda, den bama sengsina nang yuk, den bama sengsina kum nang yuk, tuba kum kunub. Tonda, Yunani yala nang yuk, Yunani yala kum nang yuk, tuba kum kunub. Tonda, bai nang si Skit yala nang yuk tuba kum kunub. Tonda, sun ikin wa bona nang ab, sun ikin wa bona kum nang ababyi, yuk-yuk kum kunub. Eda, nun Du Yesus Kristus biryi nun nirya asi antanibdeibsou ura, Erda Iya Weik Sienyi kururci, nun nirya kunub nang dam kunanyi kurur.
12A deyok aryi, sun Er Imtamnyi dam kun nang ton, Er Imtamnyi biryi boukwe kusurur nang aryi sun mamun boukwe kibdandarur. Ara, “Er Imtamnyi biryi nunsi wibdeibsou,” tenen teleb dinyi akwe kunubde bindarur. Ati, sunci yuk nang boukwe kiboka namin kanya bobdarur. Tonda, luknubdob kanya boboka yuk nang asi namin kibdarur. Tonda, ninyi aryi sunsi mambul kubdeibsingnyi ababyi, sunda yu minola wengna kanya bona mem. 13Yuk nang aryi sunsi malyi kibsingnyi ababyi, sun kanya yu kubsicei. Eda, sunci a dinyi ara luba kiboka malyi kibdongobmasingnyi nang ab tonkwa antanirdana teleb. Nun Du biryi nun malyi kun dinyi kilibmasou to, nunbabyi neiktoto yuk nang aryi malyi kibmasingnyi dinyi luba kimna teleb. 14Ura, a teleb dinyi yuk-yuk asi kunuramunci, sunci sun mamun boukwe kibdandarur. Boukwe kimdan dinyi aryi yuk-yuk teleb dinyi asi tonkwa mururdeirirur ati, boukwe kimdan dinyi ara iya bikdob dinyi kurur ati ebman.
15Tonda, nun Du Yesus Kristus biryi antanibdeibsou dinyi aryi sun kanya yuk-yuk teleb akwe kuna teleb. Nun Nai biryi sunsi nabmasou ara, “Neik kanya boboka antanibdandoka kubkwaming,” tenen nabmasou. Tonda, sunci nun Nai nabmasounyi bisi, “Ei, nun Nai,” eboka kina teleb. 16Ura, nun Du Yesus Kristus Uram ara sun kanya dam langdeiboka kubsiribok, sunci a uram asi tuba-tuba teneiboka kununa teleb. Ato kuramunci, sunci bikdob uram eboka sun mamun etererdana teleb. Tonda, nun Du Yesus Uram teneramunci, sun mamun wenerdana teleb. Tonda, nun Du Yesus Uram sun kanya dam langdeiboka kuransiribok, sunci sun kanya dam aryi, “Ei nun Nai,” tenebokabmunci, nun Nai Imtamnyi si weik en mot yuk-yuk semna teleb. Tonda, Er Imtamnyi Kanya Roh Kudus aryi eteresurur mot asi semna teleb. 17Tonda, utotoa-utotoa uram ebkwamamunyi ura, sunci, “Nun Du Yesus si weik ebkwan,” tenen dinyi asi ebkwandarur. Tonda, utotoa-utotoa dinyi kunubkwamamunyi ura, sunci, “Nun Du Yesus si weik ebkwan,” tenen dinyi akwe kunubkwandarur. Ara, nun Du Yesus biryi karebsici uca, sunci nun Nai Imtamnyi bisi, “Ei, nun Nai,” eramuncok, ato kunubkwandarur.
“Sun dib tenen nang sun nermabwe silib ara ato-ato kunubde bindarur,” eboka eterebmou uram
3:18–4:1
18Sun ninyi don nerabwe ara sun akenyi yabwe uram kunubde bindarur. Ara, nun Du Yesus biryi kikib tenesurur dinyi takubdeibsingnyi ura, sunci ato dinyi kunubdarur. 19Ba, nerabwe sun akenyi yabwe ara sun nerabwe asi boukwe kibdarur. Yu kanya boboka kerebmunyei.
20Ba, sun mabwe nermabwe ara sun nai yabwe sun kwin yabwe erdeirin uram nirya asi kunubde bindarur. Ato kunuramunyi uca, nun Du Yesus kanya ara sunti teleb kubkwansir. 21Ura, sun nai yabwe ara sun mabwe nermabwe asi weneramuncok, erekoka wenebmunyei. Erekoka wenebmunyi ura, sun mabwe nermabwe ara mambul kuboka sunti tulum kanya bobsingnyei.
22Ura, sun yuk nang aryi ikin wa takurdeiriransingnyi nang ara sun arungdansingnyi nang uram nirya asi diboka kunubde bindarur. Tukwetam kuraming arungdeirisin nang ati ato ebman. Ara, sun wa takurdeirisin nang aryi kalikoka asing diransingnyi ababyi, asing diransina kum ababyi, sunci busul kuboka wa ibde bindarur. Tonda, sunci, “Wa diboka ibibyi uca, nun arungdeirisin nang aryi nunsi kisal daksiting,” tenena mem. Eda, busul kanya diboka boramuncok, sunci ato tenena teleb. “Nun Du biryi arungdeirisurur to, nunci tukwetam aryi kuboka wa takurdeirisin nang uram kunubde binkwayeb,” tenena teleb. Ati, sunci nun Du Yesus biti, “Nun Du bira imtam aryi kuboka arungdeirisururnyi,” teneramunci, sunci nun Du Yesus biryi arungdeirisurur to, sun tukwetam aryi kuboka arungdeirisin nang uram kunubde bindarur. 23Tukwetam wa utotoa wa asi sunci busul kuboka iboka kunubde bindarur. Tonda sunci, “Tukwetam nang aryi takubdeibmasei deyok aryi, tukwetam wa ibde binkwayeb,” tenen kuma. Eda, sunci ato tenena teleb. “Nun Du biryi takubdeibmasou deyok aryi, tukwetam wa ababyi ibde binkwayeb,” tenebkwandarur. 24Ati, sunci, “Nun Du biryi nunsi dekoka iya kam kun dinyi karebkwansir,” tenen bingnamun cok, tukwetam wa kunubde bindarur. Sunda yuk nang aryi ikin wa takurdeirisin nang ara nun Du Yesus wa irmilin nang kurandum ati ato ebman. 25Ba, sun malyi dinyi kuramingnyi nang ara wenen dinyi dobdobkwaming ati ebman. Tonda, nun Nai Imtamnyi bira ninyi urasintam kum wimdeirisurur. Ati, Erci, “Anyi dobdobkwan, onyi yakdonokwan,” kum tenesurur. Eda, sun malyi kuramingnyi nang asi wenebdiryok, Erci sun Er Uram kunubde baramingnyi nang asi dobdobkwande.
Currently Selected:
Kolose Uram 3: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
