1Tesalonika Uram 1
1
Paulus biryi sun Tesalonika atei nang asi, “Ni kwit yabwe,” ebmou uram
1:1
1Nun kwit yabwe Tesalonika atei kuboka dib tenerandum nang, teleb! Nun Paulus ab Silwanus ab Timotius ab aryi sunda nun Nai Imtamnyi ab nun Du Yesus Kristus dam kundarur nang asi, “Teleb,” ebmasib. Nun Nai Imtamnyi ab nun Du Yesus Kristus ab aryi sunsi teleb kubdeiboka antanirdeirin dinyi karesina teleb.
“Sunda Tesalonika nang ara katabum eboka dib tenerandum ati kiklina ato nang kundarur,” ebmou uram
1:2-10
2Nun kwit yabwe, sun nirya ara teleb akwe ukurandum ati, nunci tanglona kum uca sunti teneiransibiryi, nun Nai Imtamnyi bisi, “Ei nun Nai,” enub. Ara, nunci sunti tuba-tuba Er Imtamnyi bisi molormiliransibiryi, nunci sun nirya ati, “Ei nun Nai,” enub. 3Sunci dib tenen kanya boramunci, nun Nai Imtamnyi biti teleb dinyi akwe kundarur ati, nun teneinub. Tonda, yuk nang asi boukwe weik kubmunci, busul weik kuboka yuk nang ati teleb dinyi utotoa karerandum ara nun teneinub. Tonda, ninyi aryi sunsi mambul weik kurdeiriransing ababyi, sunci tanglona kum uca dib tenerandum. Ara, sunci nun Du Yesus Kristus biti, “Imtam aryi kuboka yuryandoka lebkwansir,” tenen dibde bundarur. Nunci a dinyi nirya teneiboka nun Nai Imtamnyi bisi, “Ei nun Nai,” enub.
4Nun kwit yabwe, sunda nun Nai Imtamnyi biryi boukwe weik kusurur nang kundarur. Nun Nai Imtamnyi biryi sunti, “Ni mabwe nermabwe,” tenen wibdeibsou ati ebman. A deyok aryi, nunci nun Nai Imtamnyi bisi, “Ei nun Nai,” enub. 5Nun ab sun ab tonkwa kuramaburyi, Teleb Uram lak eterebmasoubwe ara nunci uram dem aryi kum etereransoubwe. Eda, Er Imtamnyi Kanya Roh Kudus aryi miliransou ba, nunci sunsi bikdob uram ton mikib uram ton akwe etereransoubwe. Ba, sunci a uram ara, “Dib en uram ati etereransing,” tenebmandau uram akikwe etereransoubwe. Ati, nunda sunti, “Er Imtamnyi biryi Teleb Uram deici namdur ati, Er Uram dobdobkwaming,” tenen bikmasuburyi, Teleb Uram ermururansoubwe. Sun nirya ara a dinyi sirya bikmarum. Tonda, nun ab sun ab tonkwa kuramoubwe ba, nunci una kuboka kuramoubwe ati sun bikmarum. Ati, nunci sunti, “Nun kwit yabwe ati teleb kubdeibkwayeb,” tenen kuramoubwe ati, sunbabyi bikmarum. 6Ura, sunci Teleb Uram dobdobmandau ura, nun kuramoubwe to sunbabyi milibkalibmandau. Tonda, nun Du Yesus Kristus biryi kunuramwe to sunci milirandau. Ara, ninyi aryi sunbabyi ikin dinyi takubdeibmasei bok, sunsi Er Imtamnyi Kanya Roh Kudus aryi karebsou ba, sun kanya kilkil kuboka Er Imtamnyi Uram sirya dobdobmandau. 7Uca, sun Tesalonika atei nang aryi Teleb Uram katabum eboka dobdobmandau uca, sun Makedonia mutuk dib tenen nang ab, sun Akhaya mutuk dib tenen nang ab ababyi kekebmasei. Kekebmasei ura, akatei nang aryi sunti, “Kiklina ato nang,” tenesunungci, akatei nang babyi ato tenenung. “Ninyi aryi mambul kubdeibsingnyi ura, nunbabyi Teleb Uram asi katabum eboka talebdobkwayeb,” tenenung. Ato tenenungci, sunda Tesalonika nang aryi kurandum to sunbabyi neiktoto milinung. 8Sunci deyok koubmandau ba, ninyi aryi Teleb Uram kekebmai uca, yuk atei-yuk atei nang bikmasici, a uram bobdoro baramnyi. Uca, sun Makedonia mutuk nang ton sun Akhaya mutuk nang ton aryi sun atei Tesalonika nang kundarur to sirya kekebmai. Nun Teleb Uram eterebde baramib ai sun eikatei-okatei nang nirya ara sun Tesalonika nang kurandum to nungsunung. Ara, sun yuk mutuk atei nang ababyi ato eboka nungsunung. “Nun kwit yabwe Tesalonika nang ara katabum eboka Er Imtamnyi bisi dib tenenung.” Uca, a nang ara sunti, “Dib tenenung,” sirya bingsunung ati, nunci sunti, “Dib tenenung,” lak ena kum kunub. 9Eda, nunci a nang asi lak eterebkubyi ba, sunci nunsi ato esunung. “Sun Tesalonika nang kunung to ara nun sirya bingnub. Ara, kanda Paulus ab kan kwit yabwe ab aryi Teleb Uram eterebmurubmandau ba, sun Tesalonika nang aryi dobdobmai. Sirya dobdobmaici, sun kwemdeina dinyi nirya bai donokmai ura, nun Nai Imtamnyi bira Er Iya Erebdobnyi bira ninyi nirya aryi Molonubnyi ton milinung.” Ato eboka sun yuk mutuk-yuk mutuk nang aryi sunda Tesalonika nang ati lak esunung. 10Tonda, sunci nun Nai Imtamnyi bisi milindarurci, sunci Er Imtamnyi Mi nun Du Yesus bisi dibde bundarur. Ara, sunci Er Imtamnyi biryi kam bukeibmounyi bira, “Lebkwansir ati imtam aryi tamuryankwamar do?” tenen nun Du Yesus bisi dibde bundarur. Sunci dibde bundarurnyi bira nun Du Yesus a kunum. Erci nunsi lemsurur uca, sirya kobdob uki tum berekci ura, nun Nai Imtamnyi biryi nunsi kum wenebkwansir.
Currently Selected:
1Tesalonika Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
