Kolose Uram 2
2
1Ni kwit yabwe, ni Paulus bira busul weik kuboka sun Kolose atei nang ati molormiliransin ara sunci diboka bikdarur. Tonda, sun Laodikia atei nang ab sun ni ab ebdana kum kuramoubwe nang yuk nang ababyi ati busul weik kuboka molormiliran. 2Ara, “Sunci dib teneramingiryi, sun kanya yuk-yuk aryi katabum ena teleb,” tenen ton, “Boukwe weik kibdandoka neik kanya bona teleb,” tenen ton, niryi sun nirya ati molormiliransin. Tonda, “Dib en uram bikdob dinyi nirya asi katabum eboka bingna teleb,” tenenun. Tonda, “Nun Du Kristus dam kun nang kiboka Ersi diboka biknung,” tenen molormiliransin. “ ‘Nun Du Kristus biti minob uca kum bingdamnyi ani, nun Nai Imtamnyi biryi Ersi ukuryok lak kibdeibsou,’ tenen bikting,” tenen ato molormiliransin. 3Nun Du bira bikdob dinyi nirya ati taleboka bingna deyoknyi kurur. Erda dib en uram bikdob dinyi utotoa taleboka bingna deyoknyi kurur. A dinyi nirya ara yuk nang aryi bingna kum bok, nukmana kum uca nun Du Yesus taruk dam aryi langdeiboka kurur ati ebman. 4Ato eboka eterebmasin ara, “Yuk nang aryi tola uram etereboka bowanikminikingnyei,” tenen niryi sunsi ato ebmasin. “Tola uram eteren nang aryi tola uram asi mikib kuboka eterebingnyi ba, dib tenebingnyei,” tenen ato ebman. 5Ni kwit yabwe, ni nong ara sun ab tonkwa kum kunub bok, ni tenen kanya ara sun ab tonkwa tuba-tuba kunub ati, niryi sunsi tuba-tuba molormiliransin. Sunda katabum eboka nun Du Yesus Kristus bisi dib tenerandum dinyi ara sun kanya darabdongoboka teleb dinyi kunubmurubde barandum ati, ni kanya kilkil weik kuranir ati ebman.
“Nun Du Kristus dam kun nang kimnub deyok aryi, nunci ninyi aryi, ‘Ato-ato kubdarur,’ en uram asi tuba kum kununub,” eboka eterebmou uram
2:6-23
6Sunci minob uca nun Du Yesus Kristus biti, “Nun Arungdeirisururnyi,” tenen dib tenebkalibmandau to, sunci Er dam kun nang kuramunci, Er Uram tuba-tuba kunubmurubde bindarur. 7Tonda, sunci katabum eboka nun Du Yesus dam kun nang kubmurubde bindarur. Tonda, nun Du Yesus dam kun nang kuboka kanya katabum ebtabakde baramunci, nun Du Yesus bisi milibmurubdarur. Ara, minob uca dib en uram asi katabum eboka dobdobmandau to, katabum eboka talebmurubde bindarur. Ato kuboka sunci sun kanya dam aryi langdeiboka nun Nai bisi, “Ei nun Nai,” tenena teleb.
8Ninyi tentok ababyi sunsi bowanikminiksicei. Ara, tola uram asi eterebokabsingiryi, “A uram ara iya bikdob en uram kurur,” ebsingnyi ba, sunci a uram asi dib tenebmunyei. A uram ara iya talyitam uram kurur ati ebman. Tonda, tukwetam nang aryi bikdob tenen dinyi ara ninyi tenen kanya deici aryok eteren dinyi akwe kurur. A uram ara tukwetam nang aryi tenen dinyi nun Du Yesus Kristus biryi eteresurur bikdob dinyi ato kum kurur. 9Er Imtamnyi mikib nirya ara nun Du Yesus Kristus ninyi kibdanmunyi dam langdeiboka kurur ati ebman. 10Ura, sun dib tenen nang ara nun Du Yesus Kristus dam kun nang kurandum ati, sunci nun Du Yesus dam kurur mikib iya mikib dinyi ara langdeiboka dobdobmandau. Nun Du bira iya weik sien nang nirya ab, mikib nang nirya ab kalingsururnyi biryi sunsi Er mikib ara langdeiboka karebmasou ati ebman. 11Nun Du boukwe dam nang kurandum ba, Erci sun malyi tenen dinyi nirya asi kilibkaboka bai donokmou. Den bama sengna nang ara den bama sekoka bai donongnaming to, nun Du Yesus biryi nun malyi tenen dinyi kiliboka bai donokmou. Nun Du biryi den bama sengsina ati kebdeiboka ebmasin. A dinyi ara ninyi taruk aryi den bama sengna dinyi kum kurur ati ebman. 12Sun nun Du Yesus dam kun nang ara nun Du Yesus si deib aryi me dongobmasei. Ati, sunda kebdeiboka nun Du Yesus ab tonkwa dibmandau ba, Er ab tonkwa tukwe umbura dongobmasei. Asi, nun Nai Imtamnyi biryi sunda nun Du Yesus ab tonkwa kam bukeibmasou. Ati, sunci Er Imtamnyi mikib asi dib tenebmandau ati, Erda nun Du Yesus bisi kam bukeibmounyi biryi sunbabyi kam bukeibmasou uca, nun Du Yesus dam kun nang kurandum.
13Ni kwit yabwe, minob ura sunda malyi tenen dinyi akwe kunurandau deyok aryi, dian nang ato kurandau. Tonda, malyi kun dinyi akwe kurandau deyok aryi, Er Imtamnyi dam kuna kum nang kuboka den bama sengsina kum nang ato kurandau ati ebman. Ba, dian nang ato kurandau bok, nun Nai Imtamnyi biryi nun malyi kun dinyi nirya kilibmasou ura, sunbabyi nun Du Yesus ab tonkwa kam bukeibmasou. 14Nun Du Yesus biryi nun malyi kun dinyi kilibmasou ura, “Ukubdarur-Ukuna mem,” eboka kerek sengna asi kum dandeibmou. A kerek sengna deici kuramwe uram ara nunsi tatab-tatab eransou asi nun Du Yesus biryi doboka kum dandeibmou. Ara, nun Du Yesus bisi co lase deici bing dakmai ba, Erci nunsi tatab-tatab eransou uram nirya asi kum dandeibmou. 15Nun Du bira co lase deici aryi dibmou uca, Erci Er ordana nang ara isa weik sien nang ab, mikib nang ab muna kibdongobmou. Ninyi nirya aryi asing dinmai bok, nun Du Yesus biryi, “Nira ninyi muna kirdongonanyi kunun,” eboka Erdamnyi lak kibdeibdanmou.
16Nun Du biryi muna kibdongobmou deyok aryi, ninyi tentok ababyi sunda Er milin nang asi tatab-tatab ebdongobsingnyei. Ara, sun yirandum yina ati, “Yina mem,” eboka wenebsingnyei. Tonda, sun yirandum me ati, “Yina mem,” eboka wenebsingnyei. Tonda, yuk nang aryi, “Musa Uram kunuboka kwalina kwalibde bindarur,” eboka aruksingnyei. Tonda, “Musa Uram kunuboka ukuryok wala kwalibdarur,” ebsingnyei. Tonda, “Ato-ato kuboka wa in kum uki tum si Sabat louboka tenebdarur,” eboka aruksingnyei. 17A “Ato-ato kubde bindarur,” en uram yuk-yuk ara bikdob dinyi kum kurur. Eda, minob uca kiklin dinyi kuramwe uca, nun Du Yesus biryi nunsi lebdeibkwansou ati lak kimdeiriramwe. Ura, ukuryok ara nun Du Yesus Kristus biryi a uram yuk-yuk asi sirya kunubmou ba, nunci a uram ara tuba kum kununub. 18Ura, ninyi ton nang ara, “Nun damnyi diboka luknubdongobdankwayeb,” tenen Er Imtamnyi bisi anmalakoka tuba kum moloraming. Eda, sunci, “Molormilibsiting,” tenen Er Imtamnyi Uram eryuryangan nang akwe namnaming. A nang ara, “Luknubdongon kanya bonub,” erdaramingiryok, wingdan nang kunung. Sunci sun damnyi erebdandoka, “Kunumna deici aryi ato-ato asing eibmoubwe,” eboka uram cang enung. Sunda tukwetam nang kanya akwe bonung cok, sun damnyi ererdaramingci, talyi dinyi akwe etereraming. Ati, a nang aryi sun dib tenen nang asi, “Sunda Er Imtamnyi bisi anmalakoka molobmunyei,” eboka wenebsingnyei. Tonda, “Er Imtamnyi Uram eryuryangan nang asi kum moloramunyi ura, iya kam kun dinyi wanikminiksicei,” eboka wenebsingnyei. A nang aryi ato eboka wenebsingnyi ababyi, sunci sun uram kekebmunyei. 19Sun ato kunuramingnyi nang ara nun Du Yesus Kisok atonyi dam kun nang tuba kum kunung. Nun Du bira Co Deyoknyi kurur ati, Erci mikib kareboka sun dib tenen nang ara er te ato kun nang asi katabum eboka mururdeirisurur ati ebman. Tonda, nun Nai Imtamnyi biryi karebci uca, sun dib tenen nang ara nun Du Yesus biriman aryi katabum ebtabaknin dib en uram asi talebnurubde baraming.
20Ba, sunda nun Du Yesus Kristus ab tonkwa dibmandau uca, tukwetam nang aryi tenen dinyi tuba kum kunurandum ati, sunda unato ati, “Ato-ato kubdarur,” en uram ara tuba kekerandum do? Sunci minob uca tukwetam nang aryi tenen dinyi kunurandau ara taklobmandau cok, ukuryok ara tuba kunubde barandum darib? 21Ara, “A dinyi talena mem.” Tonda, “O dinyi yina mem.” Tonda, “A dinyi bol libdena mem.” Sunci ato uram yuk-yuk asi tuba kunurandum darib? 22Ato en uram nirya ara ninyi aryok eteren uram aca kurur. Tonda, ninyi aryok arungna uram aca kurur. Ato en uram ara talyi kurur ati, nirya kum dandobkwande ati ebman. 23Ato en uram ati ninyi aryi, “Bikdob en uram,” minola tenenung bok, bikdob en uram diboka kum kurur. A etereraming uram ara Er Imtamnyi biryi kum arungdeirisurur. Eda, ninyi kanya aryok tenen dinyi kurur. A eteren nang ara sun kanya ara diboka kum luknurdongoramingiryok, si bambul dem aryi sun damnyi luknurdongoraming. A nang ara Er Imtamnyi bisi diboka kum milinung cok, “Er Imtamnyi biryi nunsi kisal daksute,” tenen sun nong asi mambul dinyi bordeirirdaraming. A nang ara sun kanya asi darab-darab ena kum kuramingiryok, sun kanya dam aryi kuboka malyi tenen dinyi akwe kubde baraming ati, sun eterena uram ara talyitam uram asi eterenung.
Currently Selected:
Kolose Uram 2: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
