Kolose Uram 1
1
Paulus ab Timotius ab aryi sun Kolose atei kuramnyi dib tenen nang asi, “Ni kwit yabwe,” eboka kibdobmarei uram
1:1-2
1Teleb nun kwit yabwe, ni Paulus ab nun kwit Timotius ab aryi sunsi, “Teleb,” eboka kibmasinim. Nun Nai Imtamnyi biryi ni Paulus biti teleb teneanou to wibdeibnou uca, nira nun Du Yesus Kristus biryi bokdonoknounyi kununci, Teleb Uram eterebde banun. 2Ura, ni ab Timotius ab aryi sun Kolose atei kurandum dib tenen nang asi kibdobmasinim. Ara, sun nun kwit yabwe Er Imtamnyi dam kun nang ab, nun Du Yesus Kristus bisi tanglona kum uca milin nang ab asi, “Teleb,” eboka kibdobmasinim. Nun Nai Imtamnyi biryi sunsi kisal dakoka, antanibdeibsici uca, kilkil kanya karesina teleb.
Paulus biryi sun Kolose atei nang ati Er Imtamnyi bisi, “Ei nun Nai,” ebmou uram
1:3-14
3Nunci sunti molormiliransinimci, nunci nun Nai Imtamnyi ab nun Du Yesus Kristus ab asi tuba-tuba, “Ei nun Nai,” enunum. 4Ara, sun Kolose nang aryi nun Du Yesus Kristus bisi dib tenerandum en uram asi kekebmanoumwe ati, nunci Er Imtamnyi bisi, “Ei nun Nai,” eboka kinunum. Tonda, sunci Er Imtamnyi dam kun nang nirya asi boukwe weik kimnandum en uram asi kekebmasunoumwe deyok aryi, nunci, “Ei nun Nai,” enunum. 5Sunci nun Nai biryi aminda iya kam kun dinyi karebkwansir dinyi asi dibde burandum deyok aryi, sunci katabum eboka nun Du Yesus bisi dib tenerandumci, sun dib tenen nang asi boukwe kurandum ati ebman. A dibde burandum iya kam kun dinyi ara sunci minob kekerandau. Ara, nun Du Yesus uram Teleb Uram ara dib en uram sirya kekenmandauci, sunci a kam kun dinyi ara sirya kekebmandau. A dibde burandum iya kam kun dinyi ara nun Nai biryi kiknibminikamwe uca, imtam aryi kuboka tuba kalingdur ba, Erci sunsi aminda karebkwansir. 6Nun Du uram Teleb Uram ara sun dam sirya yanmou ati ebman. A uram ara im dangna tukwe dangna kuraming nang nirya ati yanmou to, sun Kolose atei kurandum nang ababyi yanmasou. Teleb Uram ara dantam-dantam mutuk nirya yandoka du mourande to, sun kankan dam ababyi du mouransir. Tonda, a uram asi dantam-dantam nang nirya aryi tabakdongo-tabakdongo dororaming to, sun kankan dam ababyi tabakdongo-tabakdongo dororandum. Ara, minob uca Teleb Uram kekebkalibmandauci, sunci “Er Imtamnyi biryi nunsi kisal dangsurur,” tenen diboka bikalibmandau uki tum aryi kuboka Teleb Uram sun kankan du mouransou ani, ukuryok ababyi du mouransir. 7A uram ara nun kwit Epafras biryi minob uca etereransou ba, sunci Teleb Uram dobdobmandau. Nun kwit boukwe weik kunubnyi bira nun ab tonkwa wa inubci, tanglona kum uca busul kuboka nun Du Yesus Kristus wa irmilinanyi kurur aryi erci sunsi Teleb Uram etereransou. 8Ura, Er Imtamnyi Kanya Roh Kudus aryi sun Kolose nang asi karebmasou uca, boukwe weik kimdarandum dinyi asi nun dam nukmou ba, kekebmasunoumwe.
9A dinyi nirya kekebmasunoumwe deyok aryi, nunci nun Nai bisi, “Ei nun Nai,” eboka sunti molormiliransinim. Ara, nunci sun kun deyok kekenmasunoumwe uca, minob sunti molormiliransunoumwe ani, uku talak ababyi tanglona kum uca iya molormiliransinim. Ara, nun Nai Imtamnyi biryi langdeiboka karebsici uca, sunci Erci erdeirisurur dinyi nirya asi bikwandum ati nunci sunti molormiliransinim. Tonda, nun Nai biryi langdeiboka karebsici uca, sunci Er Imtamnyi Kanya Roh Kudus biriman aryi bikdob dinyi bingdona teleb. 10Ato molormiliransinim cok, nunci sunti ato tenesununum. “Nun kwit yabwe ara bikdob dinyi bikdobingiryi, nun Du Yesus bisi milibingiryok, Erci kikib teneransir to kununa akwe kuna teleb,” tenen ton molormiliransinim. Tonda, “Nun Du uram nirya kunubingnyi uca, nun Du Yesus kanya ara sunti kilkil weik kuna teleb,” tenen molormiliransinim. Tonda, “Du moubmurubsiribok, teleb dinyi akwe kunubingiryi, sunci nun Nai Imtamnyi dam kun nang kuboka Ersi tabakdongo-tabakdongo bikdobkwaming,” tenesunumci, sunti molormiliransinim. 11Tonda, nunci ato eboka molormiliransinim. “Nun Nai Imtamnyi bira Iya Erebdobnyi ton iya mikibnyi ton kurur to, Erci Er mikib nirya asi karebci uca, nun kwit yabwe kanya katabum erdeirina teleb. Ba, ninyi aryi sunsi mambul dinyi kurdeiriramingnyi ababyi, sunci kilkil kanya boboka tanglona kum uca nun Du Yesus bisi iya milirmurunkwaming,” tenen molormiliransinim. Tonda, “Sunci katabum kanya boboka nun Nai biryi karebkwansir dinyi dibde burmuruna teleb.” Ato tenenimiryi, sunti molormiliransinim. 12Ato tenesununumci, nun kanya kilkil asa aryi nun Nai Imtamnyi bisi, “Ei nun Nai,” enunum. Ara, nun Nai biryi sunti karebmasou uca, sunci Er Imtamnyi dam kun nang kibmandau ati, sunbabyi nun Nai biryi Er dam kun nang asi kiknibminikansou iya kam kun dinyi dobdobkwandum. Nun Nai biryi erebdeiboka iya berengna dinyi karebsir ba, sunci iya kam kun dinyi dobdobkwandum ati ato enunum. 13Ura, nun Nai Imtamnyi biryi nunsi kunuk kurande ai aryi borbindoka lebdeibokabsouci, Erci nunsi berengna dam boyasou. Ati, Erci nunsi lebdeiboka Er boukwe kurur Mi amwetam bun nang kibdeibsou uca, nunci nun Du Yesus Iya Weik Sienyi biryi erdeirisin uram kunubde banub. 14Nunda nun Du Yesus dam kun nang kunub deyok aryi, Er Imtamnyi biryi lebdeiboka nun malyi kun dinyi kilisurur.
“Nun Du Kristus bira Iya Erebdobnyi kuboka utotoa nirya kalingsurur,” eboka eterebmou uram
1:15-23
15Nun Du Yesus bira diboka nun Nai Imtamnyi bitonyi kurur. Nun Du bira asing eibmantonyi kurur bok, Erda Er Imtamnyi asing eibmanto kumnyi bitonyi kurur ati ebman. Tonda, nun Du Yesus bira Iya Erebdobnyi kuboka imtam tukwetam dinyi nirya kalingsurur. 16Ara, nun Du biriman aryi Er Imtamnyi biryi utotoa nirya kiknibmou. Ara, imtam kurande dinyi nirya ab, tukwetam kurande dinyi nirya ab ara nun Du Yesus biriman aryi kiknibmou. Tonda, asing eirinub dinyi ab, asing eibman kum dinyi ab, nirya ara nun Du Yesus biriman aryi kiknibmou. Tonda, sun imtam nang tukwetam nang kalingnaming weik sien nang ab, mikib nang ab, ninyi kalingna nang ab, sun erebdob nang yuk-yuk ab ababyi, Erci nun Du Yesus biriman aryi kiknibmou. Imtam tukwetam kurande dinyi nirya ara nun Nai biryi nun Du Yesus biriman aryi kiknibmouci, nun Du Yesus biti karebmou. 17Imtam tukwetam kurande dinyi nirya asi kiknina kabul talak aryi nun Du Yesus bira sirya minob kuramwe. Tonda, imtam tukwetam dinyi nirya ara antanibdeiboka nun Du Yesus taruk aryi talerur uca, imtam tukwetam nirya ara lulungdena kum uca katabum akwe erur. 18Tonda, nun Du Yesus bira sun dib tenen nang asi kalikoka antanirdeirisururnyi kururci, Erci sun dib tenen nang kisok atonyi kurur. Ba, nun dib tenen nang ara nun Du Yesus Er amwetam kun nang ato kunub. Nun Du bira nun dib tenen nang lemsina deyoknyi kurur. Tonda, Erda yuma deyok kouboka kam bukokmounyi kurur. Ati, utotoa dinyi nirya ati Erda deyok koururnyi kurur ati, nun Du Yesus bira Iya Erebdobnyi kurur. 19Ara, nun Nai biryi teleb teneamwe to karebmou uca, Er Imtamnyi bito kuna mikib nirya asi langdeiboka nun Du Yesus dam iya kurur. 20Tonda, nun Nai biryi teleb teneamwe to, Erci nun Du Yesus biriman aryi utotoa nirya Er ab tonkwa antanibdeibmou. Ara, nun Du Yesus co lase deici aryi Er ining diksakmou biriman aryi, nun Nai biryi imtam kurande dinyi ab tukwetam kurande dinyi ab nirya Er ab tonkwa antanibdeibmou.
21Minob ura, sun nirya ababyi Er Imtamnyi dam kun nang kum kurandau. Eda, sun kanya dam ara malyi kun dinyi akwe teneiboka Er Imtamnyi ab ordana nang ato kurandauci, malyi kun dinyi akwe kurandau. 22Bok, ukuryok ara nun Nai biryi sun ab Er ab tonkwa antanibdeibsou. Ara, nun Du Yesus ninyi kibdanmou ura, Erdamnyi karebdandoka dibmou biriman aryi nun Nai biryi sunda malyi kurandau nang ab Er ab tonkwa antanibdeibsou. Ba, nun Nai biryi sunti, “Ni dam kun nang kibdeibnyi uca, teleb dinyi akwe kunubde binkwaming,” tenen antanibdeibsou. Tonda, “Malyi kun dinyi mitik ababyi tubto kum kubkwaming,” tenen antanibdeibsou. Tonda, “Tatab-tatab ebman to nang tuba kum kubkwaming,” tenen Nun Nai biryi sunsi Er ab tonkwa antanibdeibsou. 23Ura, sunci tanglona kum uca katabum eboka dib teneramunyi uca, sunda Er Imtamnyi dam kun nang kubkwandum ati ebman. Ai don nang ara, “Ai dobkwayeb,” tenen abyokomna ab kwakwa ab diboka ikamingnyi uca, ai ara lulungdena kum uca katabum erande to sunda dib tenen nang ababyi neiktoto kuna teleb. Ara, ai abyokomna ab kwakwa ab ara lulungdena kum kurande ato, sun dibde buna ababyi neiktoto lulungdena kum uca katabum ermuruna teleb. A dibde bun dinyi ara nun Du Yesus Kristus uram Teleb Uram aryi eteresurur asi sun Kolose nang ara sirya kekebmandau. Tonda, a uram ara im dangna tukwetam nang nirya asi lak kubmar. Ura, nun Nai Imtamnyi biryi wibdeibnou uca, ni Paulus biryi a uram Teleb Uram eterebde banun.
Paulus biryi busul kuboka sun dib tenen nang asi dirniliramwe uram
1:24–2:5
24Ura, ni Paulus bira nun Du Yesus uram Teleb Uram eterebde banun asi ninyi aryi mambul dinyi kurdeiriraning. Ni nong ab ni kanya ab mambul kurdeiriraning bok, ni kanya ara kilkil kuranir. Ara, nun Du Yesus Kristus biryi, “Sun dib tenen nang asi teleb kubdeibkwan,” tenen Er nong ab kanya ab asi mambul weik dinyi boramwe to, nibabyi neik dinyi tenen mambul dinyi bormilinun. Ati, niryi sun dib tenen nang ati, “Nun Du dam kun nang kunung ati, sun dib tenena asi katabum ebdeibkwan,” tenen niryi nun Du Yesus bisi milinun cok, Ersi tabakoka takubdeibmating mambul dinyi langdeiboka bormilinun. 25Tonda, nun Nai Imtamnyi biryi nisi takubdeibnou to, niryi sun dantam-dantam kurandum nang nirya asi Er Imtamnyi biryi nun Du Yesus biryi eteresurur uram langdeiboka lak kimdeirisunun. 26A lak kimdeirisunun uram ara ato, “Sun minob talak ara Er Imtamnyi Uram kum bingdamnyi nang ara Teleb Uram kekeroraming uca, nun Du Yesus Kristus dam kun nang kimdaronung.” A dinyi ara nun abwe yabwe minob uca kubde baramnyi nang nirya aryi kum bingnamnyi ani, nun Nai biryi nun Er dam kun nang asi ukuryok lak kibdeibmasou. 27Ati, nun Nai biryi wibdeibsou uca, Erci nun Du Yesus biriman aryi a ilil weik tenen dinyi langdeiboka kiknibmouci, nun Er dam kun nang asi lak kibdeibmasou. Ara, “Sun Er Imtamnyi Uram kum bingdamnyi nang ara Teleb Uram dororaming uca, Kristus dam kun nang kimnung,” eboka lak kibdeibmasou. Ura, nun Du Yesus Kristus bira sun dam kunanyi kurur ati, sunci Erti, “Iya kam kubdeiboka erebdeibkwansir,” tenen katabum eboka dibde bunkwandarur.
28Nun Du bisi nunci ninyi urasintam nirya aryi lak eterebde banub. Tonda, nunci ninyi nirya asi, “Malyi dinyi taklobdarur,” eboka wenebibiryok, bikdob uram eboka nirya eterebde banub. Ati, nunci, “Ninyi nirya ara nun Du Yesus Kristus dam kun nang kiboka teleb dinyi kununa akwe kubkwaming,” tenen nun Du Yesus Uram lak eterebde banub. 29A dinyi ati niryi, “Nun Du dam kun nang kibting,” tenen mambul kanya bobdobmaniryi, busul kuboka Er Imtamnyi wa inun. Tonda, Er Iya Mikibnyi biryi ni kanya dam mikib kuboka wa inurur to, niryi mikib kuboka Er Imtamnyi wa irmilinun.
Currently Selected:
Kolose Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
