Amos Uram 6
6
“Tiya ati mangkau kubkwandum,” ebmou uram deyok
6:1-14
1Sun Sion mutuk dub ai ara, “Mangkau kuramib,” teneraming nang ara wenen dinyi dobdobkwaming.
Ani, “Nun Samaria mutuk konkon ai kuroramib nang ara mangkau kuroramib,” teneraming nang ababyi wenen dinyi dobdobkwaming.
Tonda, sun Israel sien nang akatei dama yuma nunungdeiriraming nang ababyi wenen dinyi dobdobkwaming.
Ara, sun Israel nang yuk nang aryi, “Nun miliboka lebdobsindarur,” eboka moloryangaramingnyi nang ababyi wenen dinyi dobdobkwaming.
2Sun Israel sien nang aryi sun talen mutuk dam kun nang yuk nang asi ato enung, “Mutuk koubkaboknin banmamunyi ani, weik atei Kalne mutuk dam donung atei ab,
Hamat atei weik atei donung ab,
Filistin nang mutuk atei si Gat donunga ab asi bindoka dibdendarur.
Akatei bindoka dibdemunyi ura, kanya teneibdendarur.
A si sibmab atei nang asi iya mikib ilinto atei nang kunung ba, nun Israel nang ara malyi mitang atei nang kunub kum?
Sun yuk mutuk nang atei asi ilila atei donung ba, nun Israel nang mutuk dam donub atei ara mitik-mitik atei donub kum?
Nun Israel nang asi iya mikib atei nang kunub ati, sun ilil kusina mem,” enung.
3We, sunda, “Malyi, wenen uki tum ara ola kum kunubkwande,” tenerandum bok, weik wenen uki tum ola sun dam douryankwansir.
Ara, sun mar ordana nang aryi mar iyandoka sunsi obkiribkwansing.
4Sun amsuna teleb marandum nang ab,
bun sokon teleb burandum nang ab ara wenen dinyi dobdobkwandum.
Ani, ukuryok nerkalkalirlonmaci bisam kambing domba oboka kwalibde yiramunyi nang ababyi wenen dinyi dobdobkwandum
Tonda, bisam lembu ukuryok nerkalkalirlonmaci bisam yuk bisam kankan aryi wiboka obde yiramunyi nang ababyi wenen dinyi dobdobkwandum.
5Ani, Daud biryi gitar ato dinyi si gambus oboka mot liboka semdoramwe.
Ato kuboka sunbabyi kanya kilkil kuboka gambus oboka mot semnandum nang bok, wenen dinyi dobdobkwandum.
6Ani, Yusuf deibdoba yala nang kum dansekwaming ati, engeboka urum buna kum kundarur.
Bok, anggur du yung me kwen meyok aryi langkarikoka kibdeiboka dikyibde bundarur.
Ani, tong teleb erande co yung me aryi dikoka likdani bundarur nang ara wenen dinyi dobdobkwandum.
7A deyok aryi ukuryok ara yuma yuboka ara sunsi yuk mutuk boboka deirlorbinkwansing.
Ba, sokon teleb bukdaboka kwaliboka mot sebde yirandum dinyi ara deiblobkwandum.
8Nun Nai Imtamnyi, Er Iya Erebdobnyi biryi Erbiramnyi si deici aryi uram diboka ebkatabum ebdeibmou.
“Niryi Yakub yala nang wingdana dirdena ara Ni duknasi kunurur.
Ani, sun kunung atei ara iya Ni li kunurur.
Ati, Niryi akatei donunga ab, akatei dam kurur dinyi nirya ab ara sun mar ordana nang taruk dam dobkarebkwan,”
eboka Er Iya Erebdobnyi, nun Nai Imtamnyi im ton tukwe ton kiknibmounyi biryi ato ebmou.
9Ba, ai tentok asi ninyi takubaryi tuba kunmangnyi ura, sunbabyi nirya dibsekwaming. 10Ba, a dibmangnyi nang sun ainyi tentok yandoka tukwe dongobkwamaci ati din nang tukwe baitam bosangkweteriryi, akai dongtam kuramingnyi nang ninyi tentok dam asi ato eboka asibdenkwande. “Kan kikwe kunmarim do? Yuk nang da ton kunmang do?” eboka asibdenkwande. Uca, anyi biryi ato ebkwande, “Ninyi kum, ni yuk tuba kunman,” ebci ura, erci ato ebkwande, “Ura, uram ena mem. Nunci Er Iya Erebdobnyi si asi talyi si sibkwamanim ara kikiman kum ati kilikokwanim,” ebkwande.
11“Ara, diba aryi ato kubkwande. Er Iya Erebdobnyi biryi arukci uca,
ilila ai doramingnyi ara dakoka ai olong dem kubkwande.
Ba, mitik-mitik ai doramingnyi ara dakoka iya kum daneibkwande.
12Bisam kuda ara keil dem bukanci mutuk yim ara ton cungyibarur do? Ara, ukubman kum.
Ani, weik me kwan umbura asi bisam lembu aryi ikin co taleboka kilinmaci uca, tukwe nyam-nyam eboka wa ton inung do? Ara, ukubman kum.
Ato kuboka kikimanto kunun dinyi asi dangubminikoka iba orminingna dinyi kibdeibkwamating do?
Diba ati, atoto ukun dinyi ara ukubman kum dinyi kurur.
Bok, sunda kikimanto kunun dinyi asi dangubminikoka iba orminingna dinyi kimdeirindarur.
Ani, dib dinyi asi dangubminikoka sik dinyi kuna tukwe ai deirlorandum.
13We, sun mitik atei Lodabar nang asi muna kibdongobdau ati, sun kilkil aryi wingdan kanya bondarur nang.
Ani, sun ato endarur nang, ‘Nun mikib aryi, mikib ilinto atei Karnaim nang ababyi obkiriboka arabdoboubwe ara yuk nang ton kum milibsei,’ endarur nang e.
14We, Israel mutuk nang e.
Diba ati, Niryi sunsi mar bobkwansing atei nang asi mar bon ibarya tikeibkwan.
Ba, sunci mar bobokabsingiryi, sunsi muna obdongobsingnyi ura, era mutuk bobinkwansing.
Sunsi yuk mutuk bobanmasingnyi ura, mambul bobdeibnin binkwansing.
Ara, Hamat atei ban bisik aryi kuboka bobdeibnin binansingnyi ani, Araba mutuk dam yibiu me kin weik me kin dam sirya bordeirirkwansing.”
Er Iya Erebdobnyi imtam yin doun nang sienyi biryi ato ebmou.
Currently Selected:
Amos Uram 6: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
