Amos Uram 5

Israel nang ati boukwe eiboka engebmou uram deyok

5:1-3

1We, Israel yala nang a. Ni Amos biryi sunti boukwe einmasiniryi urumna enmanyi deib aryi uram ebkwaman ati diboka kekebdarur.

2“Israel ner sal ara tukwe ai sakoka maryibei ara tubto burongna kum kubkwaming.

Sun mining tukwe deici maryurbindau ara,

ton taleboka kum bukeibkwansing.

3Niryi sunsi ato ebmasin ara, ‘Sun Israel nang yala ati,

Er Iya Erebdobnyi, Imtamnyi biryi ato ebdeibmasir,’ ati ebmasin.

‘Ninyi weik yubwa 1.000 baryi anaboka mar bobinmangnyi ura,

dara orkirinmangnyi ani, ninyi 100 baryok taklobkwansing.

Ba, ton atei nang ninyi 100 baryi nang mar bobinmangnyi ura,

dara obde banmangnyi ani, ninyi takubaryok dem taklobkwansing,’ ebmasir,” ebmou.

Kam kun dinyi doron bisik uram deyok

5:4-6

4Ati, sun Israel nang yala ati, Er Iya Erebdobnyi biryi tonda ato ebmasir,

“Sunci Nisi ingkirikdobnumunyi ura, kam kubdobkwandum.

5Betel atei ara kum dankwande ati,

sunda Betel atei bindoka Nisi molorbanina mem.

Ani, Gilgal atei nang ara boboka yuk mutuk deirlorbinkwaming ati, sunda Gilgal atei bindoka Niti sun dama deirirbana mem.

Ani, bisibkaboka Bersyeba atei dam ababyi sun dama deiriryurbana mem.

6Eda, sunda kam kubdobkwandum ati, Er Iya Erebdobnyi bisi diboka-diboka ingkirikdobdarur.

Sun kanya tamuboka Er Imtamnyi dam yangarona kum kubmunyi ura,

Erci sun Yusuf deibdoba nang asi uk dinirdongoraming to kubkwansir.

Ba, nirya yaleboka yinmasici ura,

Betel atei dam aryi ninyi tentok yandoka tangabdeibman kum kubkwande,” ebmasir.

Sun teleb kun dinyi asi malyi kiminingna nang ati ebmou uram deyok

5:7-13

7“We, sunda yuk nang asi diboka u dikum dinyi kunubdeibmanto bok, dangubminikoka iba orminingdarur nang ara wenen dinyi dobdobkwandum.

Ani, sunda diboka kunubmanto dinyi asi dangubminikoka ikin dinyi kuna tukwe ai deirlorandum nang ara wenen dinyi dobdobkwandum.

8Er Imtamnyi bira imtam neik ai longororaming kurya si Kartika kiknibmounyi kurur.

Tonda, Erda milil uk asing du ato kurande kurya neik ai longoraming kurya si Belantik kwebdeibmounyi kurur.

Ani, Erci kunuk ilinto dinyi asi berengdeirirurnyi kurur.

Ani, kitingtam asi lukunda ato kimdeirurnyi kurur.

Erci weik me kwan asi nabokabdiryi tukwetam turdeirirurnyi kurur.

Anyi Er si ara atiba, Er Iya Erebdobnyi nun Nai Imtamnyi kurur.

Er si ara a kunum.

9Erci sun mikib nang asi orminingdur ba, orminingna dinyi ara

sun lilirdaron ai dobdamingnya dub ai asi sikliboka orminingdur.

10Uram sisingni ai, atei wengyangan bisik bublan dam aryi bukeiboka sunti yan memen uram ena ara sun li kusurur.

Ani, sun kuraminyi to diboka lak kibdeiboka wenena ara sun duknasi kusurur.

11Ato kusurur deyok aryi, sun utotoa kum nang asi yan yanibokabmunci,

sun gandum du mitikto anun bok arung-arung eboka dobde yindarur.

Ati, sunda keil aryi dukdandoka ai teleb dorondarur bok,

akai ara kum kubdobkwandum.

Ani, co anggur du teleb wa ara irondarur bok,

a co anggur du yung ara sun kum yibdobkwandum.

12Ara, sunci yu dinyi ilinto ukundarur ara Ni sirya bingsunun.

Ani, sun malyi kun dinyi ara nukman kum Ni sirya bingsunun.

We, sun teleb dinyi kunuraming nang asi tiklim darardeindarur nang a.

Ani, sunda malyi kuna siklin dengna co bok dobde yindarur nang a.

Ani, atei wengyangan bisik bublan dam aryi utotoa kum nang asi dong kimdarur nang a.

Sun ukundarur dinyi ara Ni bingsunun.

13A deyok aryi a talak ara sun diboka etekdob kanya boramingnyi nang ara uram kum ebkwaming.

Ara, sunci, ‘A berengdur talak ara yu uki berengdur,’ tenen bikdobmangiryi uram ena kumkum ur kilikoka bukokwaming.”

Kam kun uram ab din uram ab libdeibmou uram deyok

5:14-17

14“Sun kam kubdobkwandum ati, sunci yu dinyi ara ukuna mem.

Eda, teleb dinyi akwe ingkirikdobdarur.

Ato kubmunyi uca, Er Iya Erebdobnyi nun Nai Imtamnyi bira im ton tukwe ton kiknibmounyi biryi,

sun erandum to sun kankan dam iya kubkwande.

15Yu dinyi ara nun li tenebmunyi ura, teleb dinyi asi kanya deibdobdarur.

Ura, uram sisingni ai atei wengyangan bisik bublan dam ara diboka teleb dinyi akwe lilibdeibdarur.

Ato kubmunyi uca, Er Iya Erebdobnyi nun Nai Imtamnyi bira im ton tukwe ton kiknibmounyi biryi

Yusuf deibdoba nang ton kabdongoamingnyi nang asi boukwe kibkwande.”

16Diba ati, Er Imtamnyi Iya Erebdobnyi bira im ton tukwe ton kiknibmounyi ni Nai biryi ato ebdeibmar.

“Niryi sun kankan dam yandoka wenebkwansin.

Ba, bakan mutuk bisik ai nirya ara engena lilim dem akwe kibkwande.

Ba, ai ningkan-ningkan bisik aryi ato ebkwaming,

‘We kob se, we kob se,’ eboka boukwe eibkwaming.

Ura, wa in dam wa iramingnyi nang nabingnyi ba, boukwe boboka burmiliryankwaming.

Ani, urumna ena bingna nang nabingnyi ba, urumna eboka engebkwaming.

17Ani, co anggur wa in dam nirya engena dem kibkwande.

Ara, Niryi sun obkwasin ba, ato kubkwandum,”

eboka Iya Erebdobnyi biryi ebdeibmasir.

Er Iya Erebdobnyi biryi ninyi wenebkwande uki tum berekwande uram deyok

5:18-20

18“Sun Er Iya Erebdobnyi uki berekwande tum ati, ‘Ola kunubte,’ tenen dibde buramingnyi nang ara wenen dinyi dobdobkwaming.

Er Iya Erebdobnyi uki berekte ba, sunsi teleb kubdeibkwamasute dinyi ara unato dinyi asi do?

A uki tum berekwande ara sunti lemna dinyi karebkwansir ati berekwande kuma.

Eda, a uki tum berekwande ara sunti wenen dinyi karebkwansir tum berekwande.

19A uki tum ara bai kam singa ilil ati cungdorbanmangnyi uca,

yu weik weinya si beruang si tam karerdarbaraming ato uki tum berekwande.

Ani, baitam aryi cungdonmaci isin ati, ‘Ai abilinga taruk talebdongoboka isin sebkwan,’ tenen kuci asi

kwatima taruk si torande ato uki tum berekwande.

20A uki tum, Er Iya Erebdobnyi uki tum berekwande ara berengna tum kuma, eda kunuk tum berekwande.

A tum ara berengna milil aran tum kuma, eda kunuk dakmiting en tum berekwande.”

Sun Israel nang aryi sun dama deiboka moloramnyi dinyi ara Er Iya Erebdobnyi bira Er li kuramwe uram deyok

5:21-27

21Er Imtamnyi biryi ato ebmasir,

“Sunci kwaliboka Niti molorandum dinyi ara Ni urasin dina ara Ni li, Ni duknasi kunurur.

Ani, sunci buluboka Nisi molon ai wengyangarandum uki tum ara Nira teleb kum kuranir.

22Diba ati, sunci Niti uk dan dinyi boboka uk daryangarandum dinyi ab,

gandum du boboka kiknirdeiryangarandum dinyi ab ara Ni kanya kum deirinun.

Ani, sunci, ‘Lebkwansir,’ tenen sun winin dinyi nong ukuryok buruk-buruk eboka nenmaci dinyi asi

boboka uk daryangarandum dinyi ara Ni asing dirdena Ni li kunurur.

23Sunci Ni ai dam yandoka mot tulim-walim ebde semnandum dinyi ara Ni urasin dam semni kum, takdarur.

Sunci bilul si gambus oboka semnandum mot ara Ni kekena kum kunkwansin.

24Eda, sunci kikimanto kuboka kunun dinyi asi me tuba ormururande to kuboka kunubdarur.

Ani, u dikum dinyi kununa asi yiban me aryi yibarmururande to kuboka kunubdarur,” ebmasir.

25Ani, tonda ato ebmasir, “We, Israel nang e, sun minob yini mutuk bisik ai yangarandau talak kwalina 40 baryi ara Niryi sunsi, ‘Niti sun dama deiboka uk dan dinyi ab koubdoba Ni ai umbura dam kiknirminingna dinyi ab boyandarur,’ eboka arukansise ba, boyangarandau bok, diboka kum kunurandau. 26Ato kurandau cok, ukuryok ara sunci sun taruk aryi kiknindarur kwemdeina asi molondarur. Ara, sun mutuk talesin weik sienyi si Sakut kikniboka molondarur. Tonda, sunci tuba si sirandum kurya si Kewan ababyi molondarur. Ani, tonda yuk-yuk molon dinyi sun taruk aryok kiknibdeiboka molondarur. 27Ati, Niryi sunsi boboka era mutuk Damsyik mutuk bisiboka yuk mutuk deirlobinkwansin,” eboka Er Iya Erebdobnyi bira Er si ara imtam yin doun nang sienyi biryi ato ebdeibmasir.

Currently Selected:

Amos Uram 5: MTG

Highlight

Copy

Compare