Amos Uram 7
7
Amos biryi yuma kobdob eibmou kunumna ara kwising asing eibmou uram deyok
7:1-3
1Amos biryi kunumna eibmou to asi nukmou. Ara ato eboka nukmou, “Er Imtamnyi Iya Erebdobnyi biryi kunumna ara ato lak kibdeibmou asi asing eibmase. Ara, Er Iya Erebdobnyi biryi kwising yubwa kiknibmou ba, ilinto kunmai asi eibmase. A kwising yubwa lak kibdeibmou ara ninyi aryi weik sienyi winin bisam mer yina ati sungsunga ya sekoka boyanamnyi ba, ukuryok tubto silingmou talak aryi lak kibdeibmou asi eibmase. 2Ura, niryi dinmase uca, a kwising mer aryi a mutuk tukwe dam aramwe sungsunga ab koubdoba ab nirya yirkirirongmai asi eibmase. Ura, niryi ato ebmase,
‘Nai Iya Erebdobnyi, Imtamnyi Kanci wibmomwe atei nang sun malyi kun dinyi ara kilibdum.
Sunda Kan urasin dam ara iya mitik mabwe ato kunung.
Ati, sun Yakub yaldangna nang ara Kan urasin dam asi darabdongoboka tikman kum nang kunung ati,
Kanci sunsi wenebminyei,’ eboka molobmase.
3Ba, Er Iya Erebdobnyi biryi a deyok ati, ‘Nai e, Niryi talya kubkwaman,’ tenebmou.
Ura, Erci ato ebmou, ‘A eibmarim to dinyi ara diba kum kunubkwande,’ ebmou,” eboka nukmou.
Amos biryi bitinyi dinyi eibmou kunumna ara uk akmou asi asing eibmou uram deyok
7:4-6
4Amos biryi kunumna bitinyi dinyi eibmou to asi nukmou. Ara, ato, “Er Imtamnyi Iya Erebdobnyi biryi kunum ara ato lak kibdeibmou asi eibmase. Ara, Er Imtamnyi biryi ninyi wenebkwansou ati, uk buk dobkwetebmou. Ba, a uk buk aryi weik me kwan nirya yaleboka yibkabokmou. Ani, wa in dam tukwe nirya yaleboka yibkwamouci, kubmou asi eibmase. 5Ura, niryi ato ebmase,
‘Nai Imtamnyi Iya Erebdobnyi, Kanci Yakub yaldangna nang ara Kan urasin dam ara iya mitik mabwe ato kunung.
Ati, sunda Kan urasin dam asi darabdongoboka tikman kum nang kunung.
Ati, Kanci sunsi wenebminyei,’ eboka molobmase.
6Ba, Er Iya Erebdobnyi biryi a deyok ati, ‘Nai e, Niryi talya kubkwaman,’ tenebmou.
Ura, Erci ato ebmou, ‘A eibmarim dinyi ara diba kum kunubkwande,’ ebmou,” eboka nukmou.
Amos biryi winiryi dinyi eibmou kunumna ara ai kiklin tabwe asi eibmou uram deyok
7:7-9
7Amos biryi kunumna liki winiryi dinyi eibmou to asi nukmou. Ara, ato eboka nukmou, “Niryi dinmase uca, Er Imtamnyi bira atei lika tentok asi tingim-kwalim erdena kum uca, u dikum sisikoka doamnyi lika dam asi tikmou asi eibmase. Ba, Er taruk deici ara ai kiklin tabwe doubmouci, tikmou asi eibmase. 8Ura, Er Iya Erebdobnyi biryi nisi ato eboka asibdenmanou, ‘Amos a, kanda ara unatoa asing eibmarim do?’ eboka asibdenmanou. Uca, niryi, ‘Ara, ai kiklin tabwe doubmarim asi asing eibman,’ ebmase. Ura, Er Imtamnyi biryi ato ebmou,
‘Diba ati, Niryi Ni wibmase atei nang kankan aryi sun malyi asi ai kiklin tabwe aryi kiklibdenkwan.
Niryi sun malyi kun dinyi ati, “Malyi, a kunmanunga,” teneboka eiboka kum taklobkwan.
Niryi sun malyi kun dinyi kikliboka sunsi wenebkwan tenebse to kunuboka wenebkwan.
9Ba, Ishak deibdoba nang aryi bisam oboka uk daryanganung mutuk kon ai nirya ara kum daneibkwan.
Ba, Israel nang aryi talyi beterdongona kum ai kiboka utotoa molonung ai ara nirya dalubsinibkwan.
Ba, sun weik sienyi Yerobeam ai ninyi ara mar bobniryi, ya der sekbukwan,’ ebmou asi kekebmase,”
eboka Amos biryi kunumna eibmou to nukmou.
Amos bisi weik sienyi taleamwe mutuk Israel dam aryi yakdonokmai uram deyok
7:10-17
10Amos biryi kunumna eibmou to nukmou asi Betel atei ninyi dama deirinanyi si Amazia kuramwe aryi kekebmou. Ura, Amazia biryi Israel nang mutuk taleamwe weik sienyi si Yerobeam bisi ninyi bokeiboka a kekebmou uram ebdeibmou. Ara, ato ebdeiboka bokeibmou. “Nai weik sienyi, ninyi si Amos bira kansi Israel nang kununga kankan aryi mar bobkwamakirci uram sirya sisikoka dobdeibmar. Ba, a mutuk dam kunung nang nirya ara erci enmar uram asi milinmang; yuk nang aryi sunsi bisik sekman kum kunmar. 11Ara, Amos biryi ato enmar,
‘Weik sienyi Yerobeam bira mar ordanmangnyi kankan aryi ya sekoka obkwaming ba, dibkwande.
Ba, er sienyi kiboka taleanci mutuk nang Israel nang ara sun mar ordana nang aryi boboka yuk mutuk dam deirlorbinkwaming,’ enmakir,” ebdeiboka bokdeibmou.
12Ura, Amazia biryi dangubokmou ura, Amos bisi ato ebdeibmou, “Asing kerketnyi a, kanda nun mutuk a kun kum, Yehuda mutuk dam bindobdum. Yehuda mutuk bindobminyi ura, a mutuk dam asi kunurminingdoraminci yina ingkiringdoraminyi ba, a mutuk nang aryi kansi yina yirkarenkwankunung. 13Bok, kanda Betel mutuk dam ara taba-taba kunurminingna mem. A mutuk ara weik sienyi mutuk iya teleb mutuk ati, bindobdum. Ani, a mutuk ara weik sienyi biryi Er Imtamnyi biti dama deiboka moloryangarur ati, a mutuk dam ara kunurminingna uram taba-taba eryangana mem,” ebmou. 14Uca, Amos biryi Amazia bisi ato eboka uram dekeibmou, “Nira, Er Imtamnyi uram ermurunanyi nabi kununa kuma. Nira sun yuk nang aryi Er Imtamnyi uram ermurun nang nungnunga kankan kununyi kuma. Eda, nira winin bisam kalingnanyi kunun. Ani, tonda nira co si ara du bai ai asi bulubde kuronunyi kunun. 15Bok, Er Iya Erebdobnyi biryi nisi ni wa bisam kambing domba mol kwabloboka kalikde kunun ai aryi nabnou. Ura, Er Iya Erebdobnyi biryi nisi ato ebdeibmou, ‘Kanda anabdobminyi ura, Niryi wibmase nang Israel nang dam asi kunurminingbirum,’ eboka bokdonoknou ba, yandoka enun.
16Ati, ukuryok Amazia kanda Er Iya Erebdobnyi uram asi diboka kekebdobdum.
Kanda diboka kekebdobmanto bok, kanci nisi, ‘Kunumna uram eboka Israel nang asi lulurdongonmarima mem.
Ani, sun Ishak yaldangna nang asi tatardongon uram ena mem,’ ebmanirim.
17A deyok aryi Er Iya Erebdobnyi biryi kanti ato ebdeibmakir,
‘Yuk atei nang aryi yandoka kan nong asi boboka sun Er Imtamnyi bisi bingna kum mutuk nang atei dam deirlorbinkwanking.
Ba, kan ner ara akatei nang talyi yortamni ner kibkwande.
Ba, kan mabwe babyi, kan nermabwe babyi ara mar ordanmangnyi kankan aryi ya sekoka obkwaming.
Ba, yuk mutuk nang aryi kan ibde yiraminyi tukwe asi cang kiklin tabwe aryi kikliboka-kikliboka wiliboka bokdobkwaming.
Kanda sun Er Imtamnyi bisi bingna kum mutuk nang atei dam dibkwandim.
Ba, Israel nang kan taleaminyi mutuk nang ara diba ati, kunuboka yuk mutuk boboka deirirlorbinkwaming,’ eboka kunubdeibmakir,”
eboka Amos biryi Amazia bisi kunubdeibmou.
Currently Selected:
Amos Uram 7: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
