Amos Uram 4
4
Sun Samaria mutuk nerabwe aryi malyi kuramnyi ati ebmou uram deyok
4:1-3
1Er Imtamnyi biryi sun Samaria mutuk nerabwe ati ato ebmou,
“We, sun Samaria mutuk kon dub ai kundarur nerabwe mer e, sun kekenmandarur.
Sunda Basan mutuk dam sungsunga yiboka nerande bisam lembu ato kundarur atei nerabwe mer e.
Sunda, mitang nang dinyi asi araboka dondarur nerabwe mer e.
Ani, sun utotoa kum nang asi malyi kiboka yan yanisitamdarur nerabwe mer e.
Ani, sun akenyi yabwe weik nang asi, ‘Nai yabwe a, anggur me tonkwa yironkwayeb ati, a bobde yasindarur!’ endarur nerabwe mer e.
A ebkwaman uram asi diboka-diboka kekenmandarur.
2Er Iya Erebdobnyi, Er Imtamnyi bira Er mining iya Erebdob si deib aryi uram ebkatabdeibwe.
Ara, ato ebdeibwe, diba ati, aminda ara Ni Imtamnyi biryi sunsi wenebkwansin uki berekwande.
A uki tum ara yuk mutuk nang aryi sunsi kat dinyi besi kwaburya aryi kwaribtaleboka bobinkwansing.
Ba, sun kankan aryi takdongobsingnyi ner sal ara mekinaia yun tabwe aryi youraming to kuboka youbtaleboka bobinkwansing.
3Sunda kilibtaleboka atei lika akdonokmangnyi bisik kuboka dobkwetebkwansing.
Dobkwetebsingnyi ura, sun nirya kilibtaleboka
Hermon mutuk ban bisik tam kuboka bobinkwansing,”
eboka Er Imtamnyi biryi ato ebmou.
“Sun Israel nang aryi buluboka molondarur to ara yu dinyi asi ukundarur,” ebmou uram deyok
4:4-5
4Er Imtamnyi biryi ton ato ebmou,
“We, sun Israel nang e, sunda Betel atei dam yandokabmunci ninyi dama deirin keil dungna dam asi yu dinyi ur ukubdarura.
Ani, Gilgal atei dam yandoka Er Imtamnyi bisi molon ai dam asi yu dinyi ur weikanun ukurtabakdarura.
Berentam ara ya sekoka uk dan dinyi boyandoka ur uk darandarura.
Ba, uki winiryi tum ara utotoa yuma ko ara meici kukdeiboka ur kareryangarandarura.
5Ani, ‘Nai, nun Nai, nun babya,’ eboka kininto dinyi roti kwaning uk ur dabdarura.
Ani, sun kanya teleb aryi mundu loboka karerandum dinyi deibmunyi ura,
a dinyi nirya ninyi urasin dam ur lak erandarura.
We, Israel nang a, sunda ato kun dinyi asi sun teleb tenendarur to yu ara ur ukurandarura,”
eboka Er Iya Erebdobnyi biryi Israel nang ati ato ebmou.
Sun Israel nang aryi, “Tamuboka Er Imtamnyi bisi yangarona ara nun li,” teneramnyi uram deyok
4:6-13
6Er Iya Erebdobnyi biryi ato ebmou,
“Sun mutuk dam kwaning atana li ara Niryi karebsise.
Ani, sun kurorandum atei dam asi roti kwaning mitikanun kimdeirina ara Niryi kubdeibsise.
Bok, asi, sunda tubto tamuboka Nisi yangarona kum kundarur.
7Ani, tonda sun wa irorandum dinyi asi mo obdeiboka nong mabdeibmasin to wala winiryi ara
Niryi mo cemna bisik ibdongobsise.
Ura, ton atei nang dam ara mo cemdeirinun.
Ba, ton yuk atei nang dam ara mo kum cemdeirinun.
Ba, ton nang mutuk gandum wa in dam ara mo cemdeirinun
Ura, ton nang mutuk ara mo kum cemdeirinun ba, gandum silal lemdur.
8Ba, me atana aryi mitang asa, ton bitinyi atei nang aryi ton okatei nang mutuk dam asi ingkirikde yangandarur.
Ba, ingkirikde yanmamunyi ani, yinmamunyi uca kum bousurur.
Niryi ato kusunun bok, sunci, ‘Ara, Er Imtamnyi biryi kurdeirisurura,’ teneboka Nisi tamuboka yangarona ton kum kundarur.
9Niryi sunsi u yin dinyi kareboka, gandum du yirkirin unamnyi kareboka wenesunun.
Ani, Niryi sun wa in dam koubdoba yalangna dinyi kareboka co anggur du yin belbela karesunun.
Ani, sun co si ara ab co zaitun ab kala kwiribde yin kwising karesunun.
Uca, sunci, ‘Ara, Er Imtamnyi biryi weneboka kurdeirisurur,’ teneboka Ni dam tamuboka yangarona kum kundarur.
10Niryi sunsi yabnyi youn karesunun ara minob Mesir mutuk nang asi kareanse to dinyi asi karesunun.
Sun bukoka mar borandum bisam kuda alaronmasingnyi tum aryi Niryi sun mabwe ukuryok nertabangna ninyi asi ya sekoka onun.
Niryi sun kurandum ai asi lunmaci uca, tong malyito enmaci asi bingnandum dinyi boboka dongoryangaransin.
Ato ukurdenun ababyi sunci tamuboka Ni dam yangarona kum kundarur,”
eboka Er Iya Erebdobnyi biryi sun Israel nang asi wenebmou.
11Ura, ton ato ebmou, “Niryi sun kurandum atei dangubminikoka ninyi kum danardeisunun.
Ara, Ni Imtamnyi biryi Sodom atei ab Gomora atei ab asi uk du mo kareboka ninyi kum daneianse to ukusunun.
Ba, Niryi sunsi wenesun cok, sun kam tuba kunmarum nang ara co sirika uk yinmaci lola kiblobmaci dinyi kilibtaleboka dordeiraming ato kurdeisunun.
Bok, sunda tamuboka Nisi yangarona kum kundarur.
12A deyok aryi we, Israel nang a.
Niryi sunsi weik wenen dinyi kareboka wenebkwansin.
We, Israel nang a, Niryi sunsi weik wenen dinyi kareboka wenebkwansin.
Ati, sunda Ni sun Nai Imtamnyi ab ebdankwayeb ati, sun kiknirorandarur,” ebmou.
13Ura, Amos biryi ato ebtabakdongobmou, “Dib kobdob aryi, Er Imtamnyi bira iya mikibnyi kurur.
Erci mutuk konkon ab kumwe ab kiknibmou.
Ani, Erci kanya teneibmou dinyi asi ninyi dam lak ebmou.
Ani, kiting urungnande dinyi ab kunuk dangnande dinyi ab kiknibmou.
Ani, tukwetam mutuk yim ai ara Erci yibarkiringdur.
Anyi Er si ara atiba, Er Iya Erebdobnyi, Er Imtamnyi im ton tukwe ton kiknibmou.
Er si ara a kunum,” eboka tabakdongobmou.
Currently Selected:
Amos Uram 4: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
