2Samuel Uram 9

Daud ab, Mefiboset ab deyok

9:1-13

1Uki tentok tum aryi Daud biryi ato ebmou, “Saul ai ninyi yala ton da tuba kunung do? Da ton kuramingnyi ura, niryi Yonatan bisi ni kanyi deianse bok, obyi ba, ni boukwe tuba kunurur ati, sunsi teleb-teleb kibkwan,” ebmou. 2Uca, Saul er wa irmiliramunyi si Ziba tentok a kuramwe. Ura, anyi Ziba bisi yuk nang aryi, “Daud biryi nabmakir,” ebmai. Ba, Ziba bira Daud dam binmou. Ura, Daud biryi ato eboka asibmou, “Kanda Ziba do?” eboka asibmou. Uca, erci, “Yo diba nai, nira Ziba, kan wa irmilinanyi kunun,” ebmou. 3Ani, weik sienyi Daud biryi, “Saul er ai ninyi ton da kunung do? Kan a tentok kurum do? Ton da kuramingnyi ura, Er Iya Erebdobnyi biryi boukwe kimnansir to niryi sunsi boukwe kibkwan,” ebmou. Ura, Ziba biryi weik sienyi Daud bisi ato ebmou. “Saul mi Yonatan biryi deiamwe mi tentok tuba a kurur. Anyi bira er yan bulakwe aryi camdingdurnyi nun kurur,” ebmou. 4Ba, weik sienyi Daud biryi ersi ato eboka asibmou, “Anyi bira dan dikum kunmar do?” eboka asibmou. Uca, Ziba biryi, “Erda Amiel mi Makhir ai Lodebar mutuk dam kunmar,” ebmou.

5Ba, weik sienyi Daud biryi ato ebmou, “Anyi inirbindarur,” ebmou ba, Lodebar dam bindoka Amiel mi Makhir ai kuramwe asi iniboka boyanmai. 6Saul biryi Yonatan deiamwe. Ba, Yonatan biryi Mefiboset deiamwe. Ato kuboka deiamnyi mi Mefiboset biryi weik sienyi Daud dam yandoka, kisok luknubdongoboka kibdobmou. Uca, Daud biryi ersi, “Kanda Mefiboset do?” eboka asibmou. Ba, Mefiboset biryi, “Yo, Nai weik sienyi, ni Mefiboset kan wa irmilikinanyi bitiba,” ebmou. 7Ura, Daud biryi ato ebmou, “Kan ilil kukina mem. Kan nai Yonatan bira ni kanyi deianse deyok aryi, kanda ni boukwe kunurur. Ati, kansi boukwe kimkwankin ati nabmakin. Ani, niryi kan abwe Saul taleamwe mutuk wa nirya kansi eterebkwamakin. Ara, kanda ni ab yina tonkwa yibde kunkwanim,” ebmou. 8Ato ebmou ura, Mefiboset kisok luknubdongoboka, Daud bisi kibdobmouci, ato ebmou, “Nai weik sienyi ni malinyi bok asi, kanci teleb-teleb kibmanirim akiryok?” ebmou.

9Ura, weik sienyi Daud biryi minob Saul wa irmilinanyi kiamunyi si Ziba bisi nabmou. Ura, ato ebmou, “Utotoa nirya kan nai, weik sienyi Saul er bobde taleramwe dinyi nirya ara er mi Yosafat mi Mefiboset dinyi kibkwande,” ebmou. 10Anyi Ziba bira mabwe sal akwe 15 baryi deiamwe. Ba, er wa il dimna nang ara 20 baryi kuramnyi. A deyok aryi Daud biryi ato ebmou, “Ziba kan ab, kan mabwe ab, kan wa irmilin nang ab aryi a wa tukwe asi iboka koubdeibkwandarur. Ba, a wa iamunya sirya du moubci ura, Saul er ai ninyi ati, kiboka deirin dikum deirirbinkwandarur. Ba, a bindoka deiamunyi aryi Saul er ai ninyi ara a yibde kuronkwanung. Uca, kan nai Saul mi Mefiboset bira ni ab tonkwa iya yibde kunkwanim,” ebmou. 11Ba, Ziba biryi weik sienyi Daud bisi ato ebmou, “Nai weik sienyi, nira kan ebmarim to kunubkwan,” ebmou. Ba, Mefiboset bira weik sienyi mi ato kuboka Daud ab yina tonkwa yirandei. 12Mefiboset bira mi tentok deiamwe, a mi si ara Mikha eboka si doamwe. A mi ara kum nebdamwe eda, mitik tuba kuramwe. Ba, Ziba mabwe ab, er ai kuramnyi ninyi nirya ara Mefiboset er wa irmilin nang akwe kuramnyi. 13Ato kuramnyi bok, Mefiboset bira yan dina-dina camdingnamuryok, weik sienyi ab yina tonkwa yibde kurandei. A deyok aryi Yerusalem atei dam akwe iya kuramwe.

Currently Selected:

2Samuel Uram 9: MTG

Highlight

Copy

Compare