2Samuel Uram 10

Daud biryi Amon mutuk nang ab, Aram mutuk nang ab asi mar bobmou deyok

10:1-19

(1Taw. 19:1-19)

1A talak kunmai ani, do talak berekmou ura, Nahas bira Amon mutuk weik sienyi kiboka taleamwe ara sirya dibmou. Ura, er mi Hanun unuboka weik sienyi kibmou. 2Ba, Daud biryi ato ebmou, “Hanun er nai Nahas biryi nisi er kwit kianou to kuboka, er mi Hanun bisi ni kwit kibkwan,” ebmou. Ura, Hanun bisi er nai Nahas dibmou deyok ati, er Daud biryi er wa irmiliramnyi nang asi uram ebdeibmouci, ato ebmou, “Kan nai dibmar ara nibabyi boukwe eibde bukman,” ebmou. 3Ba, Daud er wa irmilin nang banmai ani, Amon yala nang mutuk dam sirya binmai. Ura, Amon mutuk weik nang aryi sun sienyi Hanun bisi ato ebmai, “Daud biryi er wa irmilin nang a bokdonokmar ara kan nai Nahas dibmar ati, dib boukwe eibde bukman kum ebmakir de? Eda, nunsi mar bobsingiryi, nun mutuk arabdobkwansing ati, Daud biryi er wa irmilin nang asi, ‘Meimbindarur,’ eboka Hanun kansi bokdonokmakir atiba,” ebmai.

4Ba, Daud biryi a bokdonokmou nang asi, Hanun biryi er wa irmilin nang ati ato eboka arukmou, “A nang asi taleboka sun otong kurubdarur,” eboka arukmou. Ba, Daud biryi a bokdonokmou nang asi taleboka sun bana otong dinatam bana akwe kurubmaici, dinatam bana ara teneboka taklobokmai. Ani, sun ongon aling noutumang kwilikde yurbinmai ani, bomok muturona bindoka dakdongobmai. Ura, a nang asi lobdeibmai ba, binmai. 5Ukubmai dinyi Daud bisi ebmai ba, kekebmou ura a nang, “Sun alyi kubcei,” tenen ninyi ton bokdonokmouci, ato ebdeibmou. “Minob ni dam yangana mem. Eda, Yerikho atei yandoka kuramunyi ba, sun bana otong tubto tiksici ba, yankwandarur,” ebdeibmou. Ura, a bana otong kurubmai ba, yanganmai nang dam asi ninyi ton erbinmai.

6Sun Amon ninyi aryi dinmai uca, ato kubmai dinyi eibmai ura, “Daud bisi malyi kibmang ara yu kibkarebmanga,” tenebmai. Ura, Amon yala mutuk nang aryi Aram-Bet-Rehob yin doun nang ab, Aram-Zoba mutuk yin doun nang ab asi, “Mar dobmilibsindarur ba, dekwansib,” ebmai. Ato ebmaici, yin doun nang tukwe bisik mar iban nang yubwa 20.000 baryi iniboka sun atei boyanmai. Ani, tonda Maakha mutuk nang yubwa 1.000 baryi iniboka boyanmai. Ani, Tob mutuk nang yubwa 12.000 baryi iniboka boyanmai. 7Daud a ukubmai dinyi kekebmou ura, Yoab ab er yin doun nang olong yuk-yuk nirya ab asi arukmou ba, mar ibinmai. 8Ba, Amon mutuk nang ara Daud tam nang asi mar iyankwamaici, weik atei bisik bublan dam asi yin deibmaici lelebmai. Ara, Aram mutuk weik atei-weik atei yuk-yuk yin doun nang atei si ara Zoba atei yin doun nang ab, Rehob atei yin doun nang ab, Tob atei yin doun nang ab, Maakha atei yin doun nang ab ara sun yuk mutuk lu tam asi yin deiboka kiknibmai. 9Ba, Yoab dinmou uca, urasin deiboka banmai tam babyi, dong deiboka banmai tam babyi nirya aknabmai asi asing eibmou. Ura, Israel yin doun nang ninyi dubse akwe Aram nang asi mar ibinkwamai ninyi wiboka bokmou. 10Ba, sirya wibmouci, er weit Abisai taleboka Amon ninyi asi mar bobkwamaici, sunbabyi weik atei bisik lika bublan dam yandoka yin deiboka lelebmai. 11Ura, Yoab biryi Abisai bisi ato ebmou, “Aram mutuk yin doun nang sun mikib weik kubci ura, nunsi lemdoryankwansindarur. Ba, sunbabyi, Amon ninyi sunsi mikib kubdiryi sun mitang kibsici ura, nunci lemdoryankwansunub. 12Ati, nun Israel nang ab, Er Iya Erebdobnyi atei ab deyok ati, nirya mikib sasibdobkwayeb. Ba, Imtamnyi biryi Er tenebmaci to kunubdeibkwansir,” ebmou. 13Ura, Yoab ab, er milibmai yin doun nang ab aryi Aram nang asi mar bobmai. Ba, Aram ninyi nirya cukoka, sun atei tamuboka binsekdobmai. 14Ani, Amon yala ninyi aryi dinmai uca, Aram ninyi ara Israel nang ilil ati, bai bukoka binsekdobmai asi asing eibmai. Ura, sunbabyi Abisai dam aryi bai bukoka weik atei dam wengdorbinmai. Ba, Yoab bira Amon yala nang asi mar ibinmou ani, Yerusalem atei yandobmou.

15Ura, sun Aram nang aryi diramnyi uca, Israel nang aryi ninyi oboka erebdobmai asi eibmai ura, tonkwa bulubdobmai. 16Ani, tonda Aram nang me Efrat kouboka otam kuramnyi nang asi Hadadezer biryi arukmou ba, Helam dam mar iyanmai. A nang ara weik sienyi si Hadadezer er yin doun nang sienyi si Sobakh bisi miliboka mar iyanmai. 17Ato kubmang ena Daud kekebmou ura, Israel nang nirya bulubdeiboka me Yordan koubkaboka yaletam kuboka Helam dam mar iyanmai. Uca, Aram ninyi ab, Daud tam ninyi ab dina-dina ebwanwanubdandoka obdanmai. 18Uca, Aram ninyi ara Israel nang dam aryi cukoka bai buki binsekdobmai. Ba, Aram ninyi sun kongkong ena biribdongoboka, boyiban bisam yubwa 700 baryi Israel nang aryi obmai. Ba, bisam kuda deici bun nang ara yubwa 40.000 baryi obmai. Ani, sun yin doun nang sienyi si Sobakh ninyi on ya aryi lukoka obmai ba, dibmou. 19Ura, weik sien nang dinmai uca, Aram mutuk sienyi Hadadezer biryi minob talak aryi sunsi amwetam nang kibdeiboka erebdamwe. Ba, sunda luknubdob nang kuramnyi asi Israel nang aryi ninyi ilinto obmai asi asing eibmaici, a sien nang nirya Israel nang tam kiboka tonkwa antanibdobmai. Sirya antanibdobmai ura, Aram ninyi aryi Amon ninyi asi, “Nun mar dobmilibsindarur,” ena sun ilil kuramwe.

Currently Selected:

2Samuel Uram 10: MTG

Highlight

Copy

Compare