2Samuel Uram 8

Er Daud biryi ninyi mar boboka, Ninyi ilinto oboka erebdobmou deyok

8:1-14

(1Taw. 18:1-13)

1Sun Filistin ninyi asi Daud biryi mar boboka obkiribmou. Ba, sun Filistin nang ara mitang dululung ebmaici, Israel nang sun amwetam nang kibdeibmai. Ba, a nang minob a kuramnyi mutuk asi arabdobmou.

2Ani, ton yuk talak ara Daud biryi Moab nang asi tabwe deboka kulanmou ani, “Tukwetam mabdarur,” ebmou. Ba, mabmai ura, tabwe aryi sun mabmai to kuboka kiklibmou. Ura, kiklibdeboka ninyi bitinyi obne ura, ninyi tentok tangdongonmou. Ato kubmou deyok aryi Moab ninyi er Daud uram akwe kunuboka tukwe dengna tuba dengnamnyi.

3Akiryi kuboka Rehob mi si Hadadezer Zoba atei#8:3 Zoba atei ara Damsyik mutuk dam asi kuramnyi. Damsyik atei ara Israel mutuk me utam eratoto kuramnyi. weik sienyi kiamwe asi taleboka kulabmou. Ato kubmou talak ara ato. Hadadezer er minob weik sienyi kiboka a mutuk taleamwe dikum wiliba, “Me Efrat kin yandoka tubto talebkwan,” tenen yanganmou asi Daud biryi bisik sekoka talebmou. 4Ura, Daud biryi Hadadezer tam yin doun nang yubwa 1.700 baryi nang bisam kuda biribdongoboka kongkong ena deici yiban nang asi ton talebmou. Ani, tukwe bisik yiban yin doun nang yubwa 20.000 baryi talebmou. Ura, Daud biryi a yin doun nang sun bisam biribdongoboka kongkong eryiban bisam nirya asi, “Yan melmel sekabdarur,” ebmou. Ba, kunuboka melmel sekaboknin yibinmai. Ba, ton bisam ara kongkong ena biribdongoboka a bisam deici bukoka mar ordankwamnyi ati, yubwa 100 baryi ara yan melmel kum sekmai.

5Ura, Aram mutuk ninyi Damsyik atei dam aryi yandoka Zoba mutuk weik sienyi Hadadezer lemdoryanmai. Uca, Daud biryi Aram mutuk ninyi a yanmai ninyi yubwa 22.000 baryi obmou. 6Ura, Daud biryi Aram ninyi mutuk asi Damsyik dam asi er yin doun nang a mutuk kalikde kunkwamnyi ati araboka sunti ebmou. Ura, Daud biryi, “Tukwe dengna dengkwandarur,” eramwe to kunuboka dengnamnyi. Ba, Daud dantam-dantam ninyi mar bobinmaci dikum nirya ara Iya Erebdobnyi miliramwe aryi ninyi ilinto oboka ereroramwe.

7Ba, Daud biryi Hadadezer miliramnyi yin doun nang obmouci, a nang sun mar lisingna ati douramnyi dinyi keil emas aryi kikniamnya ara buluboka Yerusalem atei deirirbinmou. 8Ba, Hadadezer minob weik sienyi kiboka taleamwe atei si Betah ab, Berotai ab mutuk dam aryi, Daud biryi dengna weik keil si tembaga ilinto dororamwe.

9Ura, Hamat mutuk weik sienyi si Tou kekenmou uca, “Daud biryi Hadadezer milin yin doun nang nirya taleboka kulabmar,” ena kekebmou. 10Ura, Tou biryi er mi Yoram bokeibmouci, dengna weik keil si emas toto, perak toto, tembaga toto deibmou ba, bobinmou. Minob talak ara Tou er tam ninyi asi Hadadezer tam ninyi aryi obkiriamnyi deyok ati, Tou biryi, “A obmarim ninyi ara ni oranungwe ninyi asi kisok dakeibmanirim. Ati, niryi kansi teleb eboka kibdobmakinci, dengna deibmakin,” eboka Daud bisi uram ab dengna ab deibmou ba, bobinmai.

11Ura, weik sienyi Daud biryi anyi biryi deibmou ba, erti bobinmai dengna ab, yuk atei-yuk atei mar bobmariryi, er amwetam nang kibdeibmou nang bona asi daluramwe. A bona Er Iya Erebdobnyi biti yuk wiboka dama deibmou. Ara, emas ab, perak ab, tembaga ab nirya buluboka dama deibmou. 12Anda bona daluboka buluramwe mutuk ara Aram mutuk ninyi bona ab, Moab mutuk ninyi bona ab, Amon yala ninyi bona ab, Filistin mutuk ninyi bona ab, Amalek ninyi bona ab, Zoba mutuk weik sienyi Rehob mi Hadadezer onmouci, buluamwe bona ab wibdeibmou. Ara, emas ab, perak ab, tembaga ab, nirya buluboka Imtamnyi biti yuk wiboka dama deibmou.

13Tonda, ninyi sirya obkiriboka, er atei baronmouci, mutuk si Asin Mutuk Lu dam aryi Edom mutuk nang asi yubwa 18.000 baryi obmou. Ato kuramwe deyok aryi Daud si ara erebmou. 14Ura, Daud biryi Edom ninyi mutuk asi er yin doun nang a mutuk kalikde kunkwamnyi ati araboka sunti eterebmou. Ba, Edom ninyi kobdoba a nirya Daud biryi sun il dimna nang kibdeibmou. Er Daud dantam-dantam mar bobmaci tok nirya Er Iya Erebdobnyi miliramwe ba, ninyi ilinto oboka ereroramwe.

Weik sienyi Daud er wa irmilin nang deyok

8:15-18

(2Sam. 20:23-26; 1Taw. 18:14-17)

15Ato kuboka Daud biryi weik sienyi kiboka sun Israel yala ninyi nirya taleamwe. A taleamwe talak ara telebto dinyi akwe diboka lilirdeiramwe ba, telebto akwe kuramnyi. 16Ba, Daud biryi er wa in nang tikeibmou nang si ara Zeruya mi Yoab bira yin doun nang sienyi tikeiamwe. Ba, Ahilud mi Yosafat bira sienyi ebdeibci uram boboka, akatei ninyi asi, “Sienyi biryi ato ebmar,” erbindoka, akatei ninyi aryi ebmangnyi to sienyi bisi erbindoka kimnanyi tikeiamwe. 17Ba, Ahitub mi Zadok ab, Abyatar mi Ahimelekh ab ara Imtamnyi biti ninyi dama deirin ai wa in nang imam nang kiandei. Ba, Seraya bira a mutuk nirya kerek sengnanyi kiamwe. 18Ba, Yoyada mi Benaya bira Kreti mutuk ab, Pleti mutuk nang sienyi kiamwe. Ba, a nang ara Daud er kalingna nang kiamnyi. Ba, Daud mabwe ara Imtamnyi ai wa in nang imam nang kiboka wa iramnyi.

Currently Selected:

2Samuel Uram 8: MTG

Highlight

Copy

Compare