2Samuel Uram 7

Er Imtamnyi biryi Daud er ai ninyi ab, er weik sienyi kiboka taleamwe ninyi ab ati, “Niryi ukubkwansin,” en uram ebkatabdeibmou deyok

7:1-17

(1Taw. 17:1-15)

1Weik sienyi Daud a kuramwe talak ara Iya Erebdobnyi biryi kalingnamwe ba, ersi mar ton oryangana kum kuramnyi. Eda, teleb asa akwe kuramwe. 2Weik sienyi Daud biryi Er Iya Erebdobnyi ebmaci uram ermurunanyi nabi si Natan, bisi ato ebmou, “Nira sien nang kuraming atei dam co si aras aryi ai telebto kuboka dobde kunun. Ucab, Er Iya Erebdobnyi biryi, ‘Ukuna mem-ukubdarur,’ en kerek sengna deirin co sangkol ara keis ol ai tuba a deiboubwe tok ati, una kubtinyi do?” ebmou. 3Ba, Natan biryi weik sienyi Daud bisi ato ebmou, “Kan kanya tenebminyi to ur kunubdum. Er Iya Erebdobnyi biryi kansi milibkwankir,” ebmou.

4Ba, a lukunda aryok Er Iya Erebdobnyi biryi Natan dam asi ato ebmou, 5“Ni wa irmilininanyi Daud bisi ni ebdeibkun uram erbirum! Ura, ato ebkwandum, ‘Ni kunkwan ai ara kanci Ni ai dona kum kubkwanirim. 6Sun Israel ninyi Mesir dam aryi kuboka boyangaransise talak aryi kuboka arub ababyi, Ni ai iya kun ai ton dobdeibmanumunyi ba, akai dam iya ton kum kunun. Eda, tingyangan nang kuramingto, keis ol ai akwe o doabne ani, tubto dakoka yuk dikum bindoka dorkiringdarur ba, Ni ai kobdob ato kuboka iya ton kum kunun. 7Ni ab, Israel ninyi ab tonkwa mutuk nirya yibarkiringdamoubwe talak aryi, Israel ninyi kalingnanyi kankan aryi bintentoknyi biti, “Ni ai dobnurum,” ton kum eanse. Eda, “Ni mabwe Israel nang diboka kalingkwandum,” ena akwe eanse. Ani, “Ni ai co si aras aryi dobnindarur,” ena ton kum kuanse. 8A deyok aryi, Ni Iya Erebdobnyi, im ab tukwe ab kiknibsinyi biryi Ni wa irmilinanyi Daud bisi ato ebdeibman. Niryi Daud kansi bisam kalikoka borkiringnanyi kuramoumwe ara luknubdobnyi kuramoumwe bok, Niryi Ni mabwe Israel nang talebkwandim sienyi kibdeibmakin. 9A deyok aryi kan dantam-dantam yibanmaminya ab, dantam ninyi mar bobmaminya ab, kan kunmaminyi dikum nirya Ni milinkwankin. Ba, kanci kan ordan nang nirya orkirirum. Ani, kan si ara tukwetam a kunung yuk weik nang sun si erenung to akwe, kan si ababyi si erebdeibkinyi ba, ukura kan si erebkwanking. 10Ni mabwe Israel nang asi sun yuk ninyi aryi mar oryangana kum uca, mangkau asa iya kubkwaming mutuk sirya kiknibdeibse. Ani, minob kuramnyi to kuboka, “Yuk nang malyi dinyi kununung ninyi aryi mar oryandoka, mambul weik il dibingnyei,” tenen aryi sun mutuk yuk ebse. 11Ni mabwe Israel nang asi, kalikoka malyi dinyi lilin nang tikeibmase talak aryi kuboka ara mangkau dinyi karebmase ba, sun mar ordan nang aryi ton oryangana kum kuramnyi,’ ebmou. Ani, Er Iya Erebdobnyi biryi ton ato ebmou, ‘Niryi Daud kansi sienyi mi karebkwan. Ba, kan ab, kan deibdoba ab asi sien nang akwe iya tuba kibde bankwandum!#7:11 Er Iya Erebdobnyi biryi Daud bisi ato ebmou, “Ni kunkwan ai ara kanci Ni ai dona kum kubkwanirim. Eda, Niryi kansi kun ai dobkwankin,” ebmou. Ara, ato ati ebmou, “Kan yala nang akwe sien nang kibde binkwaming dinyi karebkwankin,” ati ebmou. 12Ba, kan kam tuba kunmaminci taleaminyi ani, sirya wisi dandoka kan abwe yabwe dibyi to akwe kanbabyi dibkwandim. Ura, kan mi kobdoba aryi kan minob weik sienyi kiboka taleaminyi to kan olong unuboka weik sienyi kiboka talebkwande. Ba, anyi er sienyi kiboka talebkwande mutuk ab, er sienyi kibkwande dinyi ab ara Niryi iya sasibdeianyi ba, sien nang oki-oki binkwaming. 13Ba, anyi biryi Ni kunkwanyi ai dobkwanir. Dobnici ura, er weik sienyi kiboka talebkwande mutuk nirya sasibdeibnyi ba, iya kubkwande. 14Ba, Nira er nai kibnyi ura, erda Ni mi kibkwande. Ba, Ni tenebmanyi to kum kunubci ura, ninyi sirik aryi sun mabwe asi tower aryi litungnaming to ersi litukoka wenebkwan. 15Bok, aminda sienyi kibkwandanyi bira tuba-tuba boukwe kun dinyi Saul bisi kan urasin dam aryi kum dandeibse to ara aminda sienyi kibdinyi bisi kum danardeirina kum kubkwan. Eda, Niryi ersi iya boukwe kimkwan dinyi ara er dam aryi waningna kum kubkwande. 16Kan weik sienyi kiboka talebmarim dinyi babyi, kan deibdoba aryi aminda sienyi kiboka talebkwaming nang babyi ara Ni urasin dam aryi, kum danana kum uca, odei-odei nirya mikib dinyi iya sasibdeibkwansin,’ ebkwandum,” ebmou.

17A uram nirya ara Er Iya Erebdobnyi biryi Natan dam asi lak ebmou to kuboka, Daud bisi bindoka nukmou.

Daud biryi Er Imtamnyi bisi molonmouci, “Nai teleb, ni babya,” eboka kibdobmou deyok

7:18-29

(1Taw. 17:16-27)

18Sirya ato ebmou ura, weik sienyi Daud biryi Er Iya Erebdobnyi co sangkol deiamnyi ai umbura dam wengbinmou. Ura, Er Iya Erebdobnyi urasin dam burbindoka ato ebmou. “Nai Iya Erebdobnyi, ni ab ni ai ninyi ab ara unato ninyi kunub ati, Kan teleb dinyi ni dam karenurum do? 19Nai Iya Erebdobnyi, nira Kan urasin dam yangana kikiman kumnyi kunun. Bok, Kanci nisi telebto akwe kurdeirinurum to ni ai ninyi ab ni ab asi, ‘Aminda ukubkwankin,’ eanoumwe dinyi sirya lak kibdeibmanirim.

20Nai Imtamnyi, Iya Erebdobnyi, Ni kun dinyi ab, ni tenen dinyi ab nirya ara Kan bikmanirim. Kansi una dinyi molobkitinyi do? 21Kan uram deici ab, Kan tenerandim dinyi ab aryi akwe ni kan wa inanyi bisi lak kimnurum.

22A deyok aryi Kanda, nun Nai Imtamnyi Iya Erebdobnyi kurum. Nun kekenub ara Kan kurum atonyi yuk ton da kurur ena ton kum kekenub. 23Ani, Nai Iya Erebdobnyi, im dangna tukwe dangna nirya Kan si erebkwankei ati, Kan uram keken nang Israel ninyi Mesir mutuk kuboka mambul weik wa dimnamnyi bok asi bindoka lebdeiamoumwe. Ani, Kan mabwe kobdoba kibdobumwe to ara yuk mutuk-yuk mutuk ninyi molonung kwemdeina aryi a ukubumwe to da ton kum ukunung. Ani, Kan mabwe sun urasin dam aryi ilil tenen dinyi ilinto kunuboka, yuk kwemdeina moloramnyi ninyi ab, yuk kwemdeina ab asi walwalabkabumwe to da ton kum ukunung. 24Ani, Nai Iya Erebdobnyi, Kan mabwe nermabwe Israel nang asi katabdeiboka, Kan mabwe kobdoba kibdobsumwe. Ba, Nai Kanda Israel ninyi sun Nai, Iya Erebdobnyi kibumwe ba, Kanda sun Nai kobdoba kiboka molokunung. 25Akiryi Nai Imtamnyi, Iya Erebdobnyi, Kanci ni ab ni ai ninyi ab asi, ‘Ukubkwansin,’ ebdeiansoumwe dinyi ukuca kunubdeibsurum. Ba, nun iya kubde binkwayeb. 26Ukubdeibsiminyi ura, im dangna tukwe dangna ninyi aryi Kan si iya si erebde binkwanking. Ba, yuk ninyi aryi, ‘Er Iya Erebdobnyi, imtam yin doun nang sienyi bira Israel ninyi sun Nai, sun molondarurnyi kurur,’ ebkwanking. Ati, Nai ni Kan wa inanyi Daud deibdoba aryi Kan urasin dam sienyi kiboka iya talebmuruanci tok asi iya kubde binkwande.

27Ara, Nai Iya Erebdobnyi, imtam yin doun nang sienyi, Israel ninyi molonungnyi, Kanci minob uca, ni Daud bisi ato ebdeianoumwe, ‘Kan deibdoba asi aminda weik sienyi ton kibkwaming,’ ebdeianoumwe. A deyok aryi ni ilil kum asa Kan dam yandoka molobmakin. 28A deyok aryi Nai Kanda Iya Erebdobnyi kurum. Ani, Kan uram ara diba dinyi kurur. Akiryi ni kan wa inanyi bisi iya telebto dinyi, ‘Ukuboka karebkwankin,’ ebdeibnoumwe ura, dib kunubdeibnoumwe. 29Nai Kanci, nunsi kanyi deiboka ni ab, ni ai ninyi asi kisal dangna dinyi karebsurum. Ba, ni ai ninyi Kan urasin dam iya kuna teleb. Ara, Nai Iya Erebdobnyi Kanci, ‘Ukuboka karebkwankin,’ ebdeibsoumwe to ni ai ninyi asi kisal dangna dinyi iya karebkwansirim,” eboka molobmou.

Currently Selected:

2Samuel Uram 7: MTG

Highlight

Copy

Compare