2Samuel Uram 6

Er Iya Erebdobnyi biryi, “Ukuna mem-ukubdarur,” ebmou uram kerek sengna deirin co sangkol boboka Yerusalem atei deirirbinmai deyok

6:1-23

(1Taw. 13:5-14; 15:25–16:3)

1Daud biryi Israel ninyi kankan dam aryi nirya winmou ani, ninyi dubse aci tenena nang akwe yubwa 30.000 baryi wibmou. 2Ura, Daud ab, a wibmou nang nirya ab anaboka Er Iya Erebdobnyi co sangkol mutuk si Baale-Yehuda#6:2 Baale atei ara Yehuda yala nang mutuk asi minob eramnyi si ara Kiryat-Yearim eramnyi. A mutuk asi Er Imtamnyi co sangkol deiamnyi asi borbanmai. dam deiamnya asi borbinmai. Imtamnyi co sangkol ara si bitinyi eramnyi. Yuma si ara, “Er Iya Erebdobnyi biryi, ‘Ukuna mem-ukubdarur,’ eamwe uram deirin co sangkol,” eramnyi. Bitinyi si ara, “Er Iya Erebdobnyi, imtam yin doun nang sienyi Er co sangkol,” eramnyi. Ba, a sangkol deici malaikat atoa si kerub dina-dina kikniamnya noutam asi Er Iya Erebdobnyi a dikum burur. 3Binmai ura, bisam asi tabwe biribdongoboka kongkong eryibaraming dinyi si kereta ukuryok kiknibmai dinyi asi, Abinadab ai mutuk kon dam aryi boyanmai. Ura, a co sangkol a kongkong ena deici deibdongobmai. Ura, Abinadab mabwe Uza ab, Ahyo ab a kongkong ena dina-dina banmarei. 4Ba, Uza bira Er Iya Erebdobnyi co sangkol dinatam lingkwa banmou. Ba, Ahyo bira Er Iya Erebdobnyi co sangkol u deibanmou tam bomenekmou. 5Ba, Daud ab, sun Israel ninyi nirya ara Iya Erebdobnyi urasin dam menekoka mikib asa aryi sunukoka, luboka merebde banmai. A merebde banmaici, douboka mot sebde banmai keica si ara: kecapi ab, gambus ab, rebana ab, kelentung ab, ceracap ab douboka sebde banmai.

6Banmai ani, ninyi si Nakhon dinyi gandum du yalyi kweramnyi mutuk dam binmai. Ura, kongkong ena biribmai bisam lembu obmandanmou. Ba, Uza biryi taruk lakoka Er Iya Erebdobnyi co sangkol taruk talebmou. 7Talebmou ba, Uza bisi Er Iya Erebdobnyi biryi yu wekmou. Ba, Er Iya Erebdobnyi biryi, “Talena mem,” ebdeiamwe. Bok, mangkau teneirdena kumkum talebmou. Ba, ato kuboka dakbisibmou deyok aryi Uza bisi obmou ba, a co sangkol dam a dibmou. 8Ba, Iya Erebdobnyi biryi Uza bisi obmou ba, dibmou ati, Daud biryi Imtamnyi bisi kerebmou. Kerebmou deyok aryi a mutuk si ara, “Er Imtamnyi biryi Uza bisi obkabmou,” ena ati, “Peres-Uza,” eboka si doamnyi. A mutuk si ara ukubabyi tuba a si akwe enung. 9A talak ara Daud biryi Er Iya Erebdobnyi bisi ilil kubmou ura, ato ebmou, “Nai e, Kan co sangkol ara una kuboka bobinkwaman do?” ebmou. 10Ato ebmou ura, Daud er atei weik atei bobana ara dina ilil kubmou. Ba, a co sangkol er atei bobana kum kubmou. Eda, Gat yalanyi si Obed-Edom ai bobindoka deibmou.

11Ba, wala winiryi nirya a co sangkol Obed-Edom ai a bindoka deiamnyi. Ani, Er Imtamnyi biryi Obed-Edom mutuknyi ab, sun ai ninyi nirya ab, akai umbura kuramwe dinyi nirya ab kisal dangnamwe. 12Weik sienyi Daud bisi ato ebmai, “Er Iya Erebdobnyi co sangkol Obed-Edom ai a deibyi deyok aryi Imtamnyi biryi Obed-Edom ab, er ai ninyi nirya ab asi kisal dangdur,” ebmai. Ba, Daud a uram kekebmou ura, er kilkil asa aryi Er Iya Erebdobnyi co sangkol Obed-Edom ai dam aryi boboka er atei deiriryanmou. 13Er Iya Erebdobnyi co sangkol boboka banmai nang ara yan yanina lang nabaryi yanirdongorbintok ara bisam lembu yim wisi ton, mi ton bingbing ebde nenmouci, minta bobmou lembu mi akwe oboka dama deibdongobnin banmou. 14Ba, Daud bira Imtamnyi ai wa in nang ongoraming aling lenan aryi wiraming aling si efod ongobloboka mikib asa aryi Er Iya Erebdobnyi urasin dam merebnin banmou.

15Ba, Daud ab, sun Israel ninyi nirya sun kanya kilkil asa aryi Iya Erebdobnyi co sangkol boboka sangkakala obnin banmai. 16Ani, Iya Erebdobnyi co sangkol Daud atei dam boboka wengbinmai. Ura, Daud er ner Mikhal Saul nebnyi biryi ai boton bisik dirkweteramwe uca, Daud bira Iya Erebdobnyi co sangkol dam asi im kurung-im kurung eboka, merebde yanganmou asi asing eibmou. Ura, a ner matan kubmou ura, er kanyatam aryi, “Malyitonyi biryi a merebde yanganmar,” tenebmou.

17Er Iya Erebdobnyi co sangkol sirya atei bobinmai ura, boboka Daud biryi keis ol ai doamwe ai dongobmai. Ara, a co sangkol deirin dikum minob kiknibdeibokamwe dikum bindoka deibmai. Ura, Daud biryi Iya Erebdobnyi biti bisam lembu yim oboka nong nirya uk daboka dama deirin dinyi ab, Er Iya Erebdobnyi biryi sunsi lemdamwe ati, “Nun Nai, Nun babya,” tenen bisam domba oboka, kob uk daboka, bisam tub ninyi tonkwa yinkwamnyi ati, dama deirina ab Er Imtamnyi biti dama deirin dinyi ab dama deinmou. 18Daud biryi uk daboka dama deirin dinyi ab, lemdarona dinyi ati, dama deirin dinyi ab sirya deibmou. Ura, sun Israel ninyi asi Iya Erebdobnyi imtam yin doun nang sienyi si deici aryi kisal dakmou. 19Ura, a dama deibmou dinyi ara sun a bulubmai Israel ninyi nirya nerabwe babyi, sal babyi, mabwe nermabwe babyi dama deibmou dinyi tub tentok ab, roti kwaning tokol tentok ab, kue kismis ab kuboka bokeibmou. Sirya bokeibmou ura, sun atei yuk-yuk bindobmai.

20Ba, Daud bira er nerabwe yabwe ab, er mabwe nermabwe ab, er ai ninyi ab asi, “Teleb ebkun,” tenen er atei dam binmou. Uca, er ner Saul nebnyi si Mikhal bira sakweteboka Daud bisi ato ebmou. “Arub ara Israel sienyi kan il dimna nerabwe ab, kan wa irmilikin ninyi ab dinmaning tenen wingdaronmarimci, ererdaronmarima de? Yuk ninyi li teneraming ninyi aryi alyi kum asa wingdaraming to kunmarim!” ebmou. 21Uca, Daud biryi Mikhal bisi ato ebmou, “Ni Iya Erebdobnyi urasin dam merenman ara kan nai ab, kan nai er ai ninyi nirya ab aryi li tenerandaunyi biryi Israel ninyi weik sienyi kibniryi, talebkwan ati merenman. 22Kanci anyi asing dina ara, ‘Malinyi,’ tenebmanirim ababyi, ni il dimnun nerabwe kan a ebmarim nerabwe ab ara ni kanyi deibkwamaning,” ebmou. 23Saul nebnyi Mikhal bira mi ton deina kum kuramwe. Eda, mi you ner kuramwe tok dibmou.

Currently Selected:

2Samuel Uram 6: MTG

Highlight

Copy

Compare