2Samuel Uram 5

Daud biryi weik sienyi kiboka Israel yala nang asi talebmou deyok

5:1-5

(1Taw. 11:1-3)

1Ura, sun Israel ninyi yala sien nang nirya Hebron atei dam Daud bisi yanmaici, ato ebmai, “Nai sienyi, nunda kan yala nang kunub. 2Saul biryi weik sienyi kiamuryi, taleansou talak ara Daud kanci, Israel yin doun nang a nirya bobde menengdamoumwe. Ba, Er Iya Erebdobnyi biryi kansi ato ebdeiankou, ‘Kanci, Ni mabwe Israel nang sun weik sienyi kiboka kalingkwandim,’ eankou,” ebmai. 3Ura, Israel sien nang nirya Daud bisi Hebron dam yanmai. Ura, Daud ab, Israel sien nang ab Iya Erebdobnyi urasin dam aryi, “Ukubkwansin-ukubkwanurum,” eboka uram sisikmai. Ura, Daud bisi me kisok dikeiboka Israel weik sienyi tikeibmai.

4Daud sienyi kimna kabul talak ara kwalina 30 baryi kwalibmou bok asi weik sienyi tikeibmai. Ba, weik sienyi kiboka Israel ninyi taleamwe talak aryi kwalibmai kwalina ara 40 baryi kwalibmou. 5Hebron mutuk kuramuryi, Yehuda yala ninyi asi weik sienyi kiboka taleamwe kwalina ara kwalina tabaryi kuboka wala nabaryi taleamwe. Ba, Yerusalem kuramuryi, Yehuda ninyi nirya ab, Israel ninyi nirya ab weik sienyi kiboka taleamwe kwalina ara 33 baryi kwaliamwe.

Daud biryi Yerusalem atei ninyi asi oboka arabdobmou deyok

5:6-10

(1Taw. 11:4-9)

6-8Weik sienyi Daud ab, er miliramnyi nang ab Hebron aryi anaboka Yerusalem dam binmai ura, Yebus yala ninyi, a mutuk yoka nang asi mar bobmai. Uca, a mutuk ninyi aryi Daud bisi ato ebmai. “Kanda a mutuk wengyangana kikiman kum. Ati, nunci mikib weik nang kansi okina ara kikiman kum. Eda, asing kubdob nang ab, yan camdingna nang ab sun mitang kurande nang ato nang aryi oboka yakdonokwankununga de!” ebmai. Ura, Daud biryi er yin doun nang asi ato ebmou, “Yebus nang asi li tenendarur nang ton a kunmarum do? Nibabyi li tenenun ati, Yebus nang ara asing kun nang ab, yan camdingna nang ab ato nang asi obkiribokdarur. Orbinkwamamunyi ura, me bisik umbura kiknibyi bisik wekoka binmamunyi ani, sun atei dam tingbimunyi ura, sunsi obkwandarur,” ebmou. Ara, minob ato eramnyi, “Asing kun nang ab yan camdingna nang ab ara Er Imtamnyi ai wengyangana mem,” eramnyi deyok aryi ato ebmou. Ba, akatei nang sun mar iyangana ati, sasiboka kalikde tingna ati, dukoka doamnyi dikum Sion dam asi arabdobmouci, “Daud Weik Atei,” kibdobmou.

9Ani, Daud biryi yaletam kuboka Milo#5:9 Daud biryi Yebus nang atei lika doamnyi asi, keil toto tukwe toto tabtabukoka, lika baitam sasirdongobde binamwe ati Milo enung. Ani, lika umbura tam weik atei dobmou. dam tam aryi lika dobde binamwe ani, ai umbura tam kuboka dobde yibinamwe ani, antanabdongoamwe. 10Ura, Er Iya Erebdobnyi, imtam yin doun nang sienyi biryi er Daud bisi miliramwe. A deyok aryi Daud weik sienyi kiamwe talak ara uki weikto kubde baramuryi, mikib ababyi tabakdongobnin baramwe.

Weik sienyi Daud kun atei dam ab, er ai ninyi ab deyok

5:11-16

(1Taw. 3:5-9; 14:1-7)

11Tirus mutuknyi si Hiram biryi Daud bisi ai don nang ninyi bokdonokmouci, yangamna co las ab, ai don nang ab, keil kiknin nang ab bokdonokmou. Ba, weik sienyi Daud ai dorbinmai. 12Ba, Daud biryi ato tenebmou, “Er Iya Erebdobnyi biryi Er uram keken ninyi Israel ninyi weik sienyi kibdeiboka erebdeibnou,” tenebmou.

13Ba, Daud bira Hebron dam yanmou ura, Yerusalem atei nerabwe ton yandoka dobmou. Ara, er nerabwe kobdoba ton kibde doramwe ura, aminda dortabangni nerabwe ton kibde doramwe. Ani, aminda dortabangni nerabwe babyi, er ner minob don nerabwe babyi ilinto dobmou. Ba, a nerabwe aryi ner sal ilinto yaldakmai. 14A nerabwe aryi Yerusalem atei dam kuramiryi yaldakmai mabwe, nermabwe ara: Syamua ab, Sobab ab, Natan ab, Salomo ab, 15Yibhar ab, Elisua ab, Nefeg ab, Yafia ab, 16Elisama ab, Elyada ab, Elifelet ab ukuboka yaldakmai.

Daud biryi Filistin ninyi asi oboka erebdobmou deyok

5:17-25

(1Taw. 14:8-16)

17Sun Filistin ninyi kekenmai uca, “Daud bisi, Israel ninyi talebkwande ati, me kisok dikeiboka weik sienyi tikeibmang,” en uram kekebmai. Ura, Filistin ninyi nirya anaboka, “Daud talebkwayeb,” tenen iyanmai. Uca, Daud bira a uram kekebmouci, iya sasimdongoramwe ai dam bindobmou. 18Ba, sun Filistin nang yandoka Refaim mutuk lu nirya ara sun asok akwe tangkalaklobmou. 19Ura, Daud biryi Er Iya Erebdobnyi bisi ato kuboka asibdenmou, “Nai, Iya Erebdobnyi niryi sun Filistin nang asi mar bobnyi ba, Kanci sunsi ni taruk dam karebkwamanirim do?” eboka asibmou. Uca, Er Iya Erebdobnyi biryi Daud bisi, ato ebmou, “Yo, diba, sun Filistin ninyi asi kan taruk dam karebkwamakin ati, ur mar ibirum,” ebmou. 20Ba, Daud bira mutuk si Baal-Perasim mutuk bindoka Filistin ninyi asi oboka erebdobmou. Ura, ato ebmou, “Er Iya Erebdobnyi biryi nitiboka, me obde siklirande to kuboka, ni mar ordan nang asi oboka kum dandeibde,” ebmou. Ato kubmou deyok aryi a mutuk si ara sun uram deib aryi, “Baal-Perasim,” eboka si dobmai. 21Ba, sun Filistin ninyi sun kwemdeina kiknibdeiboka moloramnyi dinyi ara sun atei o takloboka yanmaia asi Daud ab, er milin nang ab aminda binmaici, daluboka bobde yandobmai.

22Sun Filistin ninyi tubto mar iyanmaici, mutuk Refaim lu yandoka Filistin nang asok akwe tangkalaklobmou. 23Ura, Daud biryi Iya Erebdobnyi bisi tubto asibdenmou. Uca, Er Iya Erebdobnyi biryi ato ebmou, “Kanda menekoka mar ibana ara mem, eda kan yin doun nang nirya aryi aminda tam kuboka aknabdongobkwandarur. Ura, sun Filistin ninyi dongdeibmangnyi tam kuboka, co si kertau lomdarura kankan bisik iyandoka mar bobkwandarur. 24Bindoka kekemunyi ba, co si kertau dubdub aryi ninyi mar ibangiryi yan bisal lilim erande to lilim ebkwaman. Ato enyi asi kekebmunyi ura, Filistin ninyi nirya obkiribkumunyi ati eniryi. Ati, a talak aryok mar ibinkundarur. Ni Iya Erebdobnyi sirya menekoka mar ibaniryi, a lilim ebkunun,” ebmou. 25Ba, Iya Erebdobnyi biryi Daud ersi ebdeibmou to kuboka kunubmou. Ura, Daud biryi Filistin ninyi asi mutuk si Geba dam aryi kuboka obde binmou asi mutuk si Gezer dam bindoka nirya obkiribmou.

Currently Selected:

2Samuel Uram 5: MTG

Highlight

Copy

Compare