2Samuel Uram 4

Isyboset bisi obmai deyok

4:1-12

1Er Saul mi Isyboset kekenmou uca, “Abner Hebron atei dam aryi obmang,” en uram kekebmouci, er dabub kanya wengdamwe dinyi nirya kum dandobmou. Ani, sun Israel ninyi nirya ababyi lukdanmaici, sun mitang kubmou. 2Saul mi biryi deiamwe mi si Mefiboset er yin doun nang sien nang bitinyi kurandei. Sun si ara Baana ab, Rekhab ab kurandei. A bitinyi nang ara Benyamin yala nang atei si Beerotnyi Rimon biryi deiamwe mabwe kurandei. Beerot mutuk ara Benyamin yala nang mutuk kiboka nungnamnyi deyok aryi Benyamin yala ninyi mutuk kiamwe. 3Sun Beerot mutuk ninyi ara Gitaim mutuk tingdorbinsekiryi a mutuk tingyangan nang kibde tuba kunung.

4Saul mi Yonatan bira mi tentok deiamwe. A mi si ara Mefiboset kuramwe bok, a mi er yan ara bulakamwe. A yan bulakamwe deyok lilina ara ato. A mi kwalina amubaryi kwalibmai talak aryi atei Yizreel dam aryi Saul ab Yonatan ab obmai uram tol ebde yangai ati, er taramwe ner aryi a mi amakdaburyi, cungdorbau uca, langaksakoka obmouci, yan bulakamwe ba, yan malyi kuamwe.

5Isyboset er yin doun nang sien nang bitinyi ara Rekhab ab, Baana ab, Beerot aryi anaboka banmarei ani, kiting dukduk en ara sirya Isyboset ai binmarei. Bindoka dirandei uca, kitingtam ai wi mabmou asi bindoka asing eibmarei. 6Ura, Isyboset ai bublan dam kalingna ner ara roti kikniraming keica si gandum malyi dinyi wibde bunmou ani, wi dung eu ba, mabmou. A ner mabmou talak ara Rekhab ab, Baana ab ai umbura wengbinmarei. 7Ai wengbinmarei ura, Isyboset er man ai umbura man sokon mabmou asi bindoka, lukoka obmarei. Ura, kisok dakoka bobmareici, lukunda murub Araba-Yordan mutuk bisik binmarei. 8Ura, Isyboset kisok dakoka bobmareia ara Hebron dam Daud bisi bobindoka karereici, ato ebmarei. “Saul mi Isyboset kansi mar ibkouci, ‘Obkwan,’ tenerankunyi kisok ara a boyanim anun. Arub aryi nai weik sienyi kanti, Saul ab er yala ninyi ab aryi mar ibkei nang asi Er Iya Erebdobnyi biryi obdeibkir,” ebmarei. 9Uca, Daud biryi Rekhab ab, Baana ab asi ato ebmou, “Dib sirik aryi ebkun, Er Iya Erebdobnyi iya kam kururnyi biryi ni ninyi aryi obmaninto dinyi nirya lemdeinurur! 10Ara, ‘Saul sirya dibwe,’ en uram ni dam ebde yanmou asi, ninyi tol uram teleb boyanman tenebmou bok, a uram boyanmou uram dengninto kuboka, anyi bisi Ziklag dam aryi taleboka obmase. 11Ani, yu kanya bon nang aryi malyi dinyi ton kununa kumnyi bok asi, er ai umbura mangkau mabokmo bok, talyitam wengbindoka oyanmarurum deyok ati kisok dakwinsin. Obkabsinyi ba, a mutuk dam kam kuna kum kubkundurum,” ebmou. 12Ato ebmou ura, er yin doun nang asi, “A bitinyi nang asi ur obdarur,” ebmou ba, obmai. Ura, a bitinyi nang sun yan ab taruk ab sekoka, sun nong dibmareia tukwi ara Hebron dam me kwan kubkub asi tabwe biriboka diribkwetebmai. Ba, Isyboset kisok dakdoba ara boboka Hebron dam Abner tukwe umbura dongoamya bisik asi dongobmai.

Currently Selected:

2Samuel Uram 4: MTG

Highlight

Copy

Compare