2Samuel Uram 3

1Saul tam ninyi ab, Daud tam ninyi ab ara tuba yu bobdandoka mar ordaramnyi. Ukuramnyi uca, Daud tam ninyi ara mikib kibtabaknin baramwe. Ba, Saul tam ninyi ara mitang yukdongobnin baramwe.

Daud mabwe deyok

3:2-5

(1Taw. 3:1-4)

2Mutuk si Hebron dam aryi Daud yaldakmou mabwe si yuma mi ara Amnon deiamwe. Er kwin si ara Ahinoam Yizreel atei ner biryi deiamwe. 3Ba, bitinyi mi si ara Kileab deiamwe. Er kwin bira Abigail, a ner ara Nabal Karmel mutuknyi doamwe ner asi sulyi dakamwe ner aryi deiamwe. Ba, winiryi mi ara Absalom deiamwe. Anyi er kwin bira Gesur weik sienyi Talmai nebnyi si Maakha biryi deiamwe. 4Dumwe mi ara Adonia, er kwin Hagit biryi deiamwe. Amwe mi ara Sefaca, er kwin bira Abital biryi deiamwe. 5Ba, nabaryi mi ara Yitream deiamwe. Er kwin si ara Egla biryi deiamwe. A mabwe nirya ara Daud nerabwe aryi, Daud biti deibkareamnyi.

Abner bira Daud tam kibdobmou deyok

3:6-21

6Daud tam ninyi ab, Saul tam ninyi ab ara mar ibdandoka ordaramnyi. Akiryi, Abner bira Saul tamnyi kuramwe aryi ersi, “Saul tam nang weiktonyi kibtinyi,” tenen er mining damnyi erebdeibdanmou. 7Saul bira ner ilinto doramwe uca, tentok ner si ara Rizpa doamwe. A ner er nai si ara Aya kuramwe. Saul mi Isyboset biryi Abner bisi tola ati, “Kanda unati, ni nai doamwe ner asi yobmarim do?” ebmou. 8Ba, Abner er yu ilinto wekmou ura, ato ebmou, “Nira kam aryi er nai dinyi dobde yirande to kuboka ni nai er ner yobmatinyi do? Lukdandoka ni nai Saul tam kiantinyi ani, Daud tam kibmatinyi do? Nira kam kuma! Uku talak ababyi busul asa kan nai Saul tam kibsiryi, er ai ninyi ab, er weit yabwe ab, er kwit yabwe ab, kanbabyi, ‘Daud biryi obkicei,’ tenen kalingdokunun bok asi, ner deyok atikwe deyok deibnirim ara unatoa ati ebnirim do? 9-10Saul minob sienyi kiamwe wa ara Er Iya Erebdobnyi biryi Daud bisi minob ato eamwe. ‘Saul sienyi kibwe wa ara Daud kansi doboka karebkinyi ba, Israel nang ab Yehuda nang ab sun sienyi kiboka talebkwandim,’ minob eamwe. Ani, ‘Dan yala ninyi mutuk aryi kuboka Bersyeba mutuk nirya talebkwande,’ eamwe. Ati, Daud bisi sienyi kum tikeibmanyi ura, Er Iya Erebdobnyi biryi nisi obnicob,” ebmou. 11Ba, Isyboset bira Abner ilil ati, uram mitika babyi ton kum ebmou.

12Ura, Abner biryi Daud bisi ninyi bokdonokmouci, ato ebdeibmou, “A mutuk ara unanyi biryi talebkwande do? Ni ab kan ab aryi, ‘Ukubkwanim,’ ebdandoka sisiknimiryi, kansi milibdobkwankin. Ba, Israel ninyi a kunung ninyi nirya ara kan tam akwe kibdeibkwankin,” ebdeibmou. 13Ura, sirya bindoka ebmai ba, Daud biryi ato ebmou, “Teleb, niryi kansi, ‘Ukubnurum,’ ebkwaman dinyi ara tentok ebkwaman. Ara, kanda ni dam talyi yangana ara mem. Eda, ni dam yankwamaminyi ura, Saul nebnyi Mikhal iniboka boyankwamanurum. Ni dam kan urasin eibkinyi ara, ‘Ni ner a kunum boyanganir,’ tenebkwan,” ebmou.

14Ani, Daud biryi Saul mi Isyboset bisi uram ton ato ebdeibmou. “Ni ner Mikhal iniboka yanindarur. A ner ara Filistin ninyi yubwa 100 baryi oboka den bam sekoka ilinto dekse ati, iniboka boyanindarur,” ebmou. 15Ba, Isyboset biryi ninyi ton bokdonokmouci, ato ebdeibmou, “A ner er akenyi bisi bindoka iniyandarur,” eboka bokdonokmou. A ner er akenyi bira Lais mi si Paltiel doamwe. 16A bokdonokmou nang bindoka a ner iniboka yangai uca, er akenyi engeboka milibmou. Anyi engebde yanmou tok asi Bahurim dam yanmai. Ura, Abner biryi anyi bisi, “Tamuboka birum,” ebmou. Ba, anyi tamuboka er atei bindobmou.

17A talak ara Israel sien nang ab, Abner ab uram sisikmai. Ura, Abner biryi sunsi ato ebmou, “Minob Daud bisi weik sienyi tikeibdobibyi ba, nun talebkwansir tenebdau. 18A tenebdau to ara ukuca minob kunuboka tikeibdobkwayeb. Minob uca, Er Iya Erebdobnyi biryi Daud deyok ati ato eamwe, ‘Israel ninyi asi Filistin ninyi ab, sun mar ordan ninyi yuk atei ninyi ab aryi mar boramingnyi ababyi, Ni wa irmilinanyi Daud biryi lebdeibkwande,’ eamwe. Ati, Daud weik sienyi tikeibkwayeb,” ebmou. 19Ura, Abner biryi Benyamin yala nang ab Israel yala nang ab sisikmaici, “Ukuna teleb,” ebmai dinyi asi Hebron atei dam Daud bisi erbinmou.

20Ura, Abner ab ninyi 20 baryi nang Daud bisi atei Hebron dam yanmai. Yanmai ba, Daud biryi kwaliboka du dongobmou ba, Abner ab, er milibmai ninyi ab yibmai. 21Abner biryi Daud bisi ato ebmou, “Nai, Kanci, ‘Sienyi kibtinyi,’ tenerum to kunubkwandim ati, ni Israel nang nirya asi inirbinkwan. Ba, sun kan dam yangnyi ura kan ab sun ab uram tonkwa sisikwandum ati minob erbinkwan,” ebmou. Ba, Daud biryi, “Teleb ur inirbirum,” ebmou.

Yoab biryi Abner bisi obmou deyok

3:22-39

22Abner sirya Israel nang asi uram bobinmou talak ara Daud yin doun nang ab, Yoab ab yuk atei ninyi mar bobinmaici, bona ilinto dalubde bonmai nang yanmai. Uca, Abner bira Daud ab Hebron dam tonkwa tuba kum bukmarei. Eda, Daud biryi Abner bisi, “Israel nang dam asi ur erbirum,” ebmou ba, minob binmou talak a nang yanmarei. 23Ba, Yoab ab er milibmou yin dounanyi ab sirya yanmarei ura, yuk nang aryi Yoab bisi ato ebmai, “Abner bira Daud dam sirya yanmar. Ba, Daud biryi anyi bisi, ‘Kansi ona kum kubkwamakin ati, ur bindobdum,’ ebmar ba, bindobmar,” ebmai. 24Ato ebmai ura, Yoab weik sienyi Daud dam bindoka ato ebmou, “Kanda Abner yanmo ara una kubmarim do? Unati, ‘Ur birum,’ eboka mundu lobmarim ba, bindobmar do? 25Kanda Abner bira kum bingdum do? Abner yanmo ara kan kurandim to asi, ‘Bikwanuna,’ tenen meimyanmakou atiba.”

26Sirya ato ebmou ura, Yoab kitikum eboka sakwetebmou. Ura, “Abner aminda dobde bindarur,” eboka ninyi bokdonokmou. Ba, aminda dombinmai ani, me kwena si Sira me kweramnya dam bindoka iniboka boyanmai. A deyok ara Daud bingna kum kubmou. 27Abner Hebron dam sirya iniboka yanmai ura, Yoab biryi Abner bisi lak ebman kum uram ebkwamangiryi likibna bukam asa yuk dikum iniboka bobaraming to kuboka, weik bisik bublan dam bobinmou. Ura, Yoab biryi Abner bisi mundu tam ya lukdongobmou ba, a dibmou. Ara, Yoab er weit Asael erbabyi oamwe ati kisok dakmou. 28Ura, a uram tol Daud kekebmou ura, ato ebmou, “Ni ab ni sienyi kiboka talebse mutuk Yehuda yala ninyi ab ara Er Iya Erebdobnyi urasin dam aryi Ner mi Abner a obde deyok ara iya kum bolibkwansir. 29Ati, a deyok ara Yoab er ab, er ai ninyi nirya ab sun dam deyok kubkwande. Ba, sunsi ikin dinyi karebkwamanga ababyi, sun dam kubmar. Ani, Yoab er ai ninyi odei-odei kibde binkwaming ninyi asi mambul weik susa talebde binkwande. Tonda bukam weik youn yiranci ba, kama dumuboka yiban ninyi ton kibkwande. Ani, ordanmangnya dam aryi sunsi obkwaming. Ani, tonda yina sun dam ton kum kubci ba, ur bulung bukwaming,” ebmou.

30Ukuboka Yoab ab, er weit Abisai ab aryi Abner obmarei. Ara, sun weit Asael bisi, Abner erci Gibeon dam mar ordanmaia kankan dam aryi oamwe deyok aryi erbabyi kisok dakmarei. 31Ba, Daud biryi Yoab ab, er ab tonkwa milibmai ninyi ab asi ato ebmou, “Sun ongobmarum aling nirya kwilikaboka sun nong asi kalubdobmunyi ura, Abner dibmarci tukwe mabmara dam asi bukoka engebdarur,” ebmou ba, kunuboka engebmai. Ura, Abner tukwi boboka tukwe umbura dongorbanmai ura, weik sienyi Daud bira aminda banmou. 32Ura, Abner tukwi ara Hebron dam tukwe umbura dongobmai. Ba, weik sienyi Daud bira tukwi dongobmaia dam bindoka ngolokoka engenmou ba, ninyi nirya ababyi engebmai. 33Ara, Daud biryi Abner biti urumna deib aryi ato eboka engebmou,

“Abner se, lubnyi bisi oraming to kuboka obmaking e.

34Taruk ara tabwe kum debmakungwe, yan ababyi tabwe kum birikmakungwe.

Yu aryi tulum kanya akwe bon nang aryi obnin biking e,” eboka engebmou.

Ba, ninyi nirya ababyi isin dakei-dakei Abner biti ilinto engebmai.

35Kiting dukduk en kibwe ura, ninyi nirya Daud dam yuk-yuk yandoka, “Yina roti kwaning yibkwayeb,” eboka titik-titik eboka moloryanmai. Uca, Daud biryi Er Iya Erebdobnyi bisi, “Kiting kum wengbinmaci talak ara yina si kum dongobkwaman. Yina si dongobnyi ura, Er Iya Erebdobnyi kanci nisi obkwamanirim,” ebmou. 36Ba, ninyi nirya ato ebmou dinyi ara, “Teleb,” tenebmai. Utotoa nirya weik sienyi Daud biryi ebmaci uram nirya, “Teleb,” akwe teneramnyi. 37Ato kubmou deyok aryi Israel ninyi nirya ab, yuk ninyi nirya ab a tum aryi, “Abner obmar ara Daud biryi, ‘Obkwan,’ teneboka mundu kum lobmo. Eda, Yoab biryok obmar,” tenebmai.

38Ura, weik sienyi Daud biryi er wa in nang asi ato ebmou, “Arub ara Israel yin doun nang sienyi, weiknyi dibmar ara kum bikmarum darib? 39Nira me kisok dikeiboka weik sienyi tikeibnei bok, nira mitang tuba kunururnyi kunun. Ati, a nang asi Er Iya Erebdobnyi biryi sunsi dekeibkwande ati ebman. Ner si Zeruya mabwe Yoab ab Abisai ab ara yu ilinto nang kururung. A yu kanya boramingnyi ninyi ara Er Iya Erebdobnyi biryi sun kunuramingnyi dinyi sunbabyi dekeibkwande,” ebmou.

Currently Selected:

2Samuel Uram 3: MTG

Highlight

Copy

Compare