2Samuel Uram 2

Daud bira Yehuda mutuk weik sienyi kibmou deyok

2:1-7

1Ura, Daud biryi Er Iya Erebdobnyi bisi ato eboka asibmou. “Nai, Iya Erebdobnyi kan teneibmarim to ara Yehuda yala nang mutuk dam atei tentok asi wengbitinyi do?” eboka asibmou. Uca, Er Iya Erebdobnyi biryi, “Ur birum,” ebmou. Uca, Daud biryi, “Una atei asi binkwan da?” ebmou. Uca, Er Iya Erebdobnyi biryi, “Hebron atei asi birum,” ebmou. 2Ura, Daud ab, er nerabwe bitinyi ab tonkwa Hebron atei binmai. Er ner ton ner ara Yizreel mutuk ner si Ahinoam ab, Nabal Karmel mutuknyi doamwe ner asi sulyi dakamwe ner si Abigail ab tonkwa binmai. 3Ani, Daud er miliramnyi nang sun nerabwe ab sun nermabwe mabwe ab tonkwa binmaici, Hebron atei bindoka kuramnyi. 4Kuramnyi ba, Yehuda yala ninyi yandoka, Daud kisok me likeiboka kisal dakmaici, Yehuda yala nang sun weik sienyi tikeibdobmai.

Daud kekenmou uca, “Yabesh-Gilead ninyi aryi Saul oblobyi tukwi asi tukwe dongobmang,” ebmai ba, kekebmou. 5Ura, Daud biryi Yabesh-Gilead ninyi asi ton bokdonokmouci, uram ato ebdeibmou, “Sunci boukwe kimna dinyi lak kibdanmarumci, sun nai Saul tukwi asi tukwe umbura dongobmarum ati, sunsi Er Iya Erebdobnyi biryi kisal dakwansir. 6A deyok aryi Er Iya Erebdobnyi biryi sunsi tuba kisal dangna dinyi sun dam lak kibdeibkwansir. Ara, Saul bisi boukwe kiboka tukwe dongobmarum to akwe, nibabyi sunsi tuba boukwe kimkwansin. 7Sun nai Saul dianci ababyi, sun kanya mikib kuboka sasibdobmunci, ninyi dubse lein keil yanibmantoa akwe kibdandobdarur. Nira Yehuda yala ninyi aryi me kisok dikeiboka sun weik sienyi tikeibnei ati ebman.” Ato eboka Daud biryi Yabesh-Gilead ninyi asi ebdeibmou.

Daud ab, Isyboset ab mar ibdanandei deyok

2:8–3:1

8Ninyi si Ner er mi ara Abner bira Saul er yin doun nang sienyi kuramwe. Anyi Abner biryi Saul mi Isyboset bisi iniboka Mahanaim atei bobde binmou. 9Iniboka bobde binmou ura, Gilead mutuk weik sienyi tikeibdobmai. Ba, er sienyi kiboka talebkwamwe mutuk ara Asyuri yala ninyi ab, Yizreel mutuk ninyi ab, Efraim mutuk ninyi ab, Benyamin yala ninyi ab, ani, sun Israel ninyi yala nirya talebkwamwe ati, weik sienyi tikeibmai. 10Er Saul mi Isyboset bira er kwalina 40 baryi kwalibmai talak aryi weik sienyi tikeibmai ba, Israel nang asi kwalina bitinyok demang sienyi kibmou. Bok, Yehuda yala nang ara Daud biryi ebne to akwe kunuramnyi. 11Ba, Daud bira Hebron atei dam Yehuda yala nang asi weik sienyi kiboka taleamwe talak ara kwalina tabaryi kuboka wala nabaryi sirya taleboka sungbinmou.

12Ura, ninyi si Ner mi Abner ab, Saul mi weik sienyi Isyboset er yin doun nang ab Mahanaim mutuk aryi Gibeon mutuk mar boboka ibinmai. 13Ba, ner si Zeruya mi Yoab ab, weik sienyi Daud yin doun nang ab sunbabyi mar iyanmai. Mar iyanmai ani, me kwan si Gibeon kwan dam ebdanmai. Ebdanmai ura, ton tam ninyi ara otam lingkwa wekdobmai ura, ton tam ninyi ababyi dinatam lingkwa wekdobmai. 14Ura, Abner biryi Yoab bisi ato ebmou, “Kam nang demang asi lak kibingiryi, obdankwaming,” ebmou. Ba, Yoab biryi, “Teleb,” ebmou. 15Ura, Saul mi Isyboset tam nang, Benyamin yala nang nungmai ani, kam nang amolbaryi wibmai. Ba, Daud tam nang ababyi nungmai ani, kam nang amolbaryi wibmai. 16Uca, dinatam tikmai amolbaryi nang ab, dinatam tikmai amolbaryi nang ab akaboka kisok talebdandoka, barwe bin-bin lukdandobmaici dibsekmai. Ukubmai deyok aryi Gibeon mutuk dam asi, ukuboka lukdanmai mutuk si ara, “Ninyi On Ya Mutuk,” ena ati sun uram aryi, Helkat-Hazurim enung. 17Ato kuboka sirya obdanmai ura, dina-dina ninyi nirya malyi limdon obdanmai. Uca, Isyboset tam nang asi Daud tam yin doun nang aryi weik obkiribmai. Ba, Abner ab er tam Israel yin doun nang ab ara cukoka bindobmai.

18-19Ura, ner si Zeruya mabwe winiryi, Yoab ab, Abisai ab, Asael ab ara Daud tam kiboka ordanmai. Akiryi Asael bira bisam si kijang aryi mutuk lu cungnande to kuboka, Abner bisi kwanimtam dibde siriktam dibde bana kum uca, ol asa u deiboka dombinmou. 20Dombinmou asi, Abner biryi danguboka diramwe uca, a domyanganmou ura, ato ebmou. “Kanda Asael domyanganmanirim do?” ebmou. Uca, Asael biryi, “Yo, niti!” ebmou. 21Ura, Abner biryi ersi, “Nisi domyanganina mem. Dina-dina dibdeboka yin doun nang ton da taleboka er yin lebdobdum!” ebmou. Uca, “Bisik sekneblobnyi ba, bindobcei,” tenebmou ura, Abner biryi ebmou to kununa kum uca, er kikwe u deiboka dombana akwe kimou. 22Ura, tubto Abner biryi Asael bisi ato ebmou, “Ni obkinyob ati, domanirima taklobnurum. Tuba domyangana akwe kimaniminyi ura, obkiniryi kan du Yoab bisi bindoka una ebkwaman ati tuba domanirim do?” eboka asibmou. 23Ucab, Asael tinglona kum kubmouci, domyangana akwe kunmou. Ura, Abner biryi ninyi on mar dongtam kuboka dorongnamwe uca, Asael mundu tam lukmou ba, deici tam beleboka tikmou. Ba, Asael dalukoka tukwetam marbinmouci, dibmou. Ninyi nirya yanganmai tok nirya Aseal dibmoua dam yandoka lukdanmaici, bablobmai.

24Ucab, er du Yoab ab, Abisai ab ara Abner bisi dombinmarei. Dombinmarei ani, Gibeon mutuk keil kato demang mutuk dam tam kuboka, mutuk si Giah yaletam kuboka asi Ama kon dam dobde barei ura, kiting wekdobmou. 25Ba, Benyamin yala ninyi aryi Abner bisi mar dobmilibkwamai ati, aminda buluboka tentok mutuk kon dam asi leleboka yin deibmai. 26Ura, Abner biryi Yoab bisi ato ebmou, “Iya tuba obdan kurona asi kan teleb tenebmarim do? Mar ordana ara aminda mambul dinyi anarande dinyi ton bingdum do? Nun yuk yala nang kuma, nunbabyi kan yala nang akwe kunub. Bok, una talak aryi kan atei ninyi asi, ‘Nun mining yala ninyi asi mar ordanub ati taklobkwayeb,’ ebkwandim do?” ebmou. 27Ucab, Yoab biryi ato ebmou, “Er Imtamnyi si deici aryi ebkun. A ebdim to asi minob kum ebmomci, kiliklobokmomwe deyok aryi ni yin doun nang aryi a domasing tok berekde ake,” ebmou. 28Ura, Yoab biryi buu ena si aryi, buu ebmou ba, a mar iyanganmai ninyi nirya yandoka tiklobmai. Ura, domyanganmaia taklobmaici, sun Israel ninyi ab ordana ababyi taklobmai.

29Ura, Abner ab, er milibmai yin doun nang ab lukunda aryok Araba-Yordan mutuk bisik kuboka binmai. Banmai ani, ton tum berekmou ura, me Yordan kouboka a kitingtam noutam nirya barmurunmai ani, mutuk si Mahanaim binmai. 30Ba, Yoab bira Abner dobde banmou ara takloboka, er atei ninyi yin doun nang bobde bulurdeinmou. Uca, Daud tam nang ninyi 19 baryi da wanikmai. Ani, Asael bibabyi wanikmai. 31Daud tam yin doun nang aryi Abner tam yin doun nang, Benyamin yala nang asi ninyi yubwa 360 baryi obmai. 32Ba, Asael obmaia tukwi ara Yoab ab er yin doun nang ab aryi Betlehem dam bobinmaici, er nai dongoamnyi tukwe umbura akwe er mi ababyi neik bisik dongobmai. Ura, Yoab ab, er milibmai yin doun nang ab ara lukunda barmurunmai asi, Hebron mutuk binmai ura, berekmou.

Currently Selected:

2Samuel Uram 2: MTG

Highlight

Copy

Compare