2Samuel Uram 24

Daud biryi ninyi nukoka si kerek sekmou deyok

24:1-17

(1Taw. 21:1-17)

1Er Iya Erebdobnyi biryi malyito dinyi kunuramnyi ba, Israel nang asi tubto yu bobmou. Ura, Er Iya Erebdobnyi biryi, “Daud bisi er kubkwande to nun,” tenen aryi teneboka yanlobmou ba, Daud yuk kanya wengyanmou. Ura, Daud biryi, “Israel kobdoba nang si ab Yehuda yala nang si ab kerek sekwan,” tenebmou. 2Ura, weik sienyi Daud biryi Yoab yin doun nang sienyi ab, er miliramnyi yin doun nang ab asi ato ebmou, “Sun Israel nang yubwa nirya, ‘Ukubaryi kunung,’ tenen bikwan ati, sun kunung mutuk nirya si kerek sekde yibindarur. Ara, Dan yala nang kunung mutuk aryi kuboka Bersyeba mutuk nirya kerek sekde yibindarur,” ebmou. 3Ba, Yoab biryi sienyi bisi ato ebmou, “Nai sienyi, kan Nai Iya Erebdobnyi biryi Israel nang a talak kunmang ninyi yubwa ara tubto 100 baryi tabakdongobkwande. Ani, nai sienyi kan dina kum uca, kam tuba kunmaminyi talak aryi kunubci ba, kanbabyi asing eibkwandim. Ucab, nai kan unati ninyi si kereksekdarur ebmarim do?” ebmou. 4Uca, sienyi biryi er ebmou uram akwe talebnurubmou aryi, Yoab ab yin doun sien nang ab sienyi Daud ebmou to kunuboka Israel yala nang kankan dam asi ninyi si kerek sekde binmai. 5Ura, me Yordan kouboka otam kalimna binmai ura, Gad yala nang mutuk ban bisik dam ab, Yaezer mutuk ban bisik dam ab mutuk lu si Aroer atei aryi ninyi si kerek sekalibmai. 6Ninyi si kerek sekde binamnyi ani, Het nang mutuk asi atei si Gilead dam ab Kadesh dam ab bindoka kerek sekmai. Akiryi kuboka mutuk si Dan yala nang mutuk bindoka kerek sekmai ura, akiryi kuboka Sidon mutuk kerek sengbinmai. 7Ani, Sidon mutuk aryi kuboka mikib ilinto sasibdob atei Tirus dam binmai. Akiryi kuboka Hewi nang mutuk dam ab Kanaan mutuk dam ab kerek sekde binamnyi ani, Bersyeba dam Yehuda yala nang mutuk outam kuboka tingyanmai. 8A mutuk nirya kerek sekde yibaramnyi ani, wala toubnibaryi bisibmouci, uki 20 baryi tum ara tamuboka Yerusalem atei dam yanmai. 9Ura, Yoab biryi ninyi si a kerek sengbinamnyi dinyi ara sienyi dam karebmou. Ba, nungmou uca, Israel yala nang mikib yin doun nang ara yubwa 800.000 baryi kibmou. Ba, Yehuda yala nang asi yin doun nang yubwa ara 500.000 baryi kibmou.

10Daud ninyi yubwa nungmou ani, sirya nukmou talak ara er kanya nebneb en kanya bobmouci, “Ninyi si kerek sengman ara malyito kunman,” tenebmou. Ura, Er Iya Erebdobnyi bisi ato ebmou, “Nai, iya malyito dinyi kubman ati, Nai Kanci ni iya malyito dinyi kunubman dinyi asi libdobnurum,” eboka molobmou. 11Ura, Daud mabmou ani, belekuna bukokmou ura, Er Iya Erebdobnyi biryi Imtamnyi uram ermurunanyi nabi si Gad a kuramwe aryi ersi ato ebdeibmou. 12“Daud bisi biminyi ura, ato ebkwandum, ‘Er Iya Erebdobnyi bira wenen dinyi yala winiryi ebdeibman dinyi asi, erci tentok wibdobkwande. Ba, er wibdobci dinyi asi Niryi ersi karebkwan,’ ebkwandum,” ebmou. 13Ura, nabi Gad biryi Daud bisi yanmou ura ato ebmou, “Kan sienyi kiboka talebumwe mutuk asi kwalina winiryi kwaning utan talak berengna asi kan teleb do? Kan mar ordan nang aryi domakingnyi ba, ‘Obningnyei,’ tenen wala winiryi yuk mutuk barona asi kan teleb do? Uki winiryi ninyi din youn yisina asi kan teleb do? Kanci a yala winiryi asibmakir dinyi asi tentok wibdobdum. Ukuca wimdorum ba, a asina asibmakirci bokdonokmaniranyi bisi minob bindoka ebkwan ati,” ebmou. 14Ba, Daud biryi Gad bisi ato ebmou, “Ni kanya kankana kubnir ati, ninyi aryi onina ara malyito ati, eda Er Iya Erebdobnyi biryi nun nirya da obminiksurur. Ersi boukwe weik kubkwanda,” ebmou.

15Ato ebmou ura, Er Iya Erebdobnyi biryi Israel ninyi nirya din youn karebmou ba, belekuna aryi youn yinmou asi a talak sirya yibkwande tenebmou to yirsungbinmou. Ba, Israel ninyi nirya Dan yala nang mutuk aryi kuboka Bersyeba mutuk ninyi nirya, ninyi yubwa 70.000 baryi dibmai. 16Ara, Er Imtamnyi uram eryuryangananyi tentok aryi Yerusalem atei ninyi asi taruk iboka, obkiriboknin bau asi, Er Iya Erebdobnyi biryi Er boukwe weik kubmou ura, mundu lobmoua takloboka, “Sirya obdim e! Ura, taruk irongmarima taklobdum,” ebmou ba, taklobmou. A talak ara Er Imtamnyi uram eryuryangananyi bira ninyi obde banmou ani, Yebus ateinyi si Arauna er gandum yalyi kweramwe dam tikabwe asi asing eibmou. 17Daud biryi dinmou uca, Imtamnyi uram eryuryangananyi biryi Israel ninyi ilinto obde bau ura, Er Iya Erebdobnyi bisi ato ebmou, “Niryi dib malyi dinyi kunubse ati, yuk ninyi asi ona ara mem. Ukura sirya obdim se. Eda, ni ab, ni ai ninyi ab asi ur obsurum,” ebmou.

Yerusalem atei dam Er Iya Erebdobnyi biti dama deirin keil lamna labmai ba, ninyi diramnya kum danmou deyok

24:18-25

(1Taw. 21:18-27)

18A tum aryi Er Imtamnyi uram ermurunanyi Gad bira Daud dam yanmou ura, ato ebmou, “Yebus ateinyi Arauna er gandum yalyi kwen dam asi, Er Iya Erebdobnyi biti dama deirin keil lamna kiknibdum,” ebmou. 19Gad biryi Er Iya Erebdobnyi ebdeibmou to sirya ebmou ura, Daud anaboka bindobmou. 20Daud sirya ninyi Arauna ai dam binmou ura, Arauna diramwe uca, Daud ab, er wa irmilin nang ab er ai dam binmai asi asing eibmou. Ura, Arauna sakweteboka sienyi Daud dam yanmou ura, er kisok luknubdongoboka kibdobmou. 21Ura, Arauna biryi ato eboka asibdenmou, “Nai, kanda unati ni atei yarim do?” eboka asibmou. Uca, Daud biryi ato ebmou, “Ni kan gandum yalyi kwen dam asi dekinyi ura, Er Iya Erebdobnyi bisi dama deirin dungna a dikum kiknibkwan ati kan dam yanman. Imtamnyi dama a dikum deibnyi ba, Israel ninyi dibde banmang dinyi kum dankwande ati yanman,” ebmou. 22Ura, Arauna biryi ato ebmou, “Teleb, dengna kum kubkwanirim. Eda, ur doboka kanci, ‘Teleb,’ tenebminyi to da ukurum. Bisam lembu asi biribdongoboka, wa inun co a deibmana ab, co las gandum yalyi kwenun dinyi a deibmana ab doboka, uk dabminyi ura, bisam lembu a kunmara obminci, dama deiboka uk dabdum!” ebmou. 23Arauna biryi anda dinyi nirya Daud bisi nukmou ura, ton ato ebmou, “Nai, kan Nai, Iya Erebdobnyi biryi kisal dangna dinyi karekina teleb,” ebmou. 24Uca, sienyi Daud biryi Arauna bisi ato ebmou, “Ur karenin kum, eda dekwamakin. Ni Nai, Er Iya Erebdobnyi bira dengna kum dekmakiniryok dama deibkwaman ara ni li ati ebman,” ebmou. Ura, Daud biryi Arauna er gandum yalyi kwen dam ab bisam lembu ab anda keica asi dengna weik keil perak yubwa 50 baryi dekmou. 25Sirya dekmou ura, Er Iya Erebdobnyi biti dama deirin dungna labmouci, bisam lembu oboka, nong nirya uk dan dinyi ab, malyi kuna ati lemdaron dinyi ab dama deibmou. Ba, Er Iya Erebdobnyi biryi a dama deibmouci, molobmou to kunuboka Israel ninyi dinmai dinyi ara kum dandeibmou.

Currently Selected:

2Samuel Uram 24: MTG

Highlight

Copy

Compare