2Samuel Uram 23

Daud sirya uram ebmou deyok

23:1-7

1Daud sirya ebmou uram ara ato ebmou,

“Nira Isai mi Daud biryi ebman.

Nira, Er Iya Erebdobnyi biryi Israel nang sienyi tikeibnounyi biryi a uram ebman.

Nira, Yakub si weik eboka moloramunyi biryi me kisok likeiboka, tikeibnounyi kunun.

Nira Israel nang ati mot limnunyi kunun.

2Er Iya Erebdobnyi kanya aryi arungnurur.

Er Iya Erebdobnyi uram ni si bambul deici liknirdongonurur.

3Israel nang sun Nai Iya Erebdobnyi biryi ato ebmou.

Israel nang keil kon sasiranda atonyi biryi nisi ato ebdeibnou.

‘Ninyi tentok aryi sienyi kiboka iya u dikumto akwe kuboka talebkwande.

Er Iya Erebdobnyi bisi ilil kanya boboka talebkwande.

4Anyi bira belekuna aryi kiting urungnande ato kuboka talebkwande.

Belekuna aryi duwa ina kum kurande ato kubkwande.

Mo doubdobci talak aryi kiting labdanin baci ura,

co bok nirya lengleng ebdanin barande to kubkwande,’ ebnou.

5Co bok a lengleng eboka leblebek ebdanin barande to akwe ni deibdoba ababyi Imtamnyi urasin dam ukubkwaming,

Er Iya Erebdobnyi biryi nisi, ‘Ukubdeibkwankin,’ ebdeibnou uram ara tangna kum kubkwande,

eda utotoa nirya iya kunubde baranci tok asi dangbisina ton kum kubkwande.

Ara, Er Iya Erebdobnyi biryi nisi lemdeirinurur dinyi ab, ni ukubtinyi tenebmanyi dinyi ab kunurdeirinurur ati ebman.

6Ucab, Er Iya Erebdobnyi uram kununa kum kuraming nang ara,

tiling co asi uk dongoraming ato ninyi kunung.

Ba, ninyi talyi taruk talebman kum kurande ato nang kunung.

7Ato nang ara ninyi aryi talyi bolibman kumto nang kunung,

Eda, souna yaboka dobmanto nang kunung.

Sun ato nang nirya ara uk yibkwande.” Ato eboka Daud biryi sirya ato ebmou.

Daud tam yin doun nang asi obmai nang deyok

23:8-39

(1Taw. 11:10-44)

8Daud er miliramnyi yin doun nang dabub ilinto nang asi obmai nang sun si ara Hakhmoni ateinyi si Isybaal bira winiryi dinyi olong yin doun nang sienyi kiamwe. Anyi biryi tentok ordanmai tum aryi ninyi on balang aryi ninyi yubwa 800 baryi lukoka obmou. 9Ba, erci sirya obmou ura, Ahohi yalanyi Dodo mi si Eleazar bira olong winiryi dinyi nang tamnyi kibmou. Ura, Eleazar bira Daud bisi milibmou ba, Filistin nang mar obdankwamaici kikninmai bok asi mar ibindoka durungmarei. Ba, a talak ara sun Israel nang yuk nang ara tamuboka yandobmai. 10Uca, Eleazar yu dongobwe ura, yumkuna Filistin nang nirya obde banmou uca, er taruk mitang danmou. Ba, ninyi on ya talebnurubman kum aryi er taruk deici a tablaklobmaou tok a kubmou. A tum ara Er Iya Erebdobnyi biryi ninyi oboka ereron mikib karebmou ba, ninyi oboka erebdobmai. Sirya obmou ura, sun Israel nang ara aminda yandoka bona asi daluroryanmai. 11Sirya obmou ura, Harari yalanyi Age mi Sama biryi Filistin nang Lehi mutuk dam yandoka mar obdankwamaici kikninmai. Asi anyi Sama biryi wa tentok bol bi dang wa iboka ilinto kouamnya kankan dam iwengbinmou. Ba, sun Israel nang ara Filistin nang ilil ati, tamuboka yandobmai. 12Uca, Sama bira a bol bi dang kankan sasiboka tikokmouci, Filistin nang asi nirya oboka erebdobmou. Ato kuboka Er Iya Erebdobnyi biryi Sama deici liknibdongoboka ninyi ilinto oboka erebdeibmou.

13Ton yuk tum ara roti kikniraming keica si gandum du kiramnyi li sirya dobmou talak aryi, yin doun nang olong winiryi bomenengnamnyi sien nang Daud bisi Adulam mutuk keil siling um kuramwe asi binmai. Ba, a talak aryok sun mar ordan nang Filistin nang ababyi Refaim lu yandoka keis ol ai doboka mabmai. 14A tum ara Daud bira mutuk kon ninyi iyangana sasiboka dibde tingni dikum kunmou. Ba, Filistin nang ara Betlehem dam kunmai. 15Ba, Daud er kanya ato wengyanmou ura ato ebmou, “Betlehem dam lika bisik bublan dam me lokya sangkol aryi kweboka ton karebniting ba, yibtinyi se!” ebmou. 16Ba, Israel nang a winiryi nang yanmai nang ara Filistin nang keis ol ai Betlehem dam yandoka ai dobmai dam kuboka tingyanmai. Ura, Betlehem atei lika bublan dam me kwena sangkol deiamnya asi me kweboka Daud bisi boyanmai. Bok, a me ara Daud kum yibmou, eda Er Iya Erebdobnyi biti, me dama deiboka dikeibmou. 17Ura, ato ebmou, “Nai Iya Erebdobnyi, a me ni kum yibkun. A me ara, ‘Nun da obsunung,’ tenen dabub deiraming nang ining yibnyob,” ebmou. Ura, Daud a me kum yibmou.

18Ba, Zeruya mi Yoab er weit Abisai bira yin doun nang 30 baryi nang sun sienyi kiamwe. Uki tentok tum ara Abisai biryi ninyi on balang aryi ninyi yubwa 300 baryi lukoka obmou. Ato kuboka obmou deyok aryi 30 baryi nang kankan aryi Abisai bisi si erebdeibmai. 19Ninyi 30 baryi nang kankan aryi Abisai bisi si ererdeiriramnyi. Anyi bisi noutam deiboka sun kisal dangnamnyi bok, olong winiryi nang ara ersi mangkikibman kum tonyi nun kuramwe.

20Ani, tonda mikib ilintonyi Yoyada Kabzeel mutuknyi mi si Benaya bira dabub weiknyi biryi Moab mutuk yin doun sien nang bitinyi obmou. Tonda, uki tentok tum aryi minob ton Benaya erci lumtaia deiramwe talak aryi keil siling um wengbindoka yu kam si singa tentok oamwe. 21Ani, tonda minob ton Mesirnyi ninyi ona dabub ilintonyi nun aryi ninyi on balang doubmou asi lebtaleboka er mining balang aryi lukoka oamwe. 22Yoyada mi Benaya biryi ato kuboka obmou. Ba, Benaya er yin doun nang 30 baryi nang kankan aryi ersi si erebdeibmai. 23A 30 baryi yin doun nang kankan dam aryi Benaya bisi erebdobnyi kibdeibmai. Uca, anyi bira 30 baryi nang sien nang sun mikib bisibkaboka dabub weiknyi kibmou. Ba, Daud biryi anyi bisi er kalingna nang sienyi tikeibmou.

24Ura, sun yin doun nang sien nang sun si ara Asael Yoab er weit ab, Betlehem ateinyi Dodo mi si Elhanan ab, 25Harod ateinyi si Sama ab, tonda Harod ateinyi bikwe Elika ab. 26Palti ateinyi si Heles ab, Tekoa ateinyi Ikesh mi si Ira ab. 27Anatot ateinyi si Abiezer ab, Husa ateinyi si Mebunai ab. 28Ahohi ateinyi si Zalmon ab, Netofa ateinyi si Maharai ab. 29Ani, Netofa ateinyi bikwe Baana mi Heleb ab, Benyamin yala nang mutuk asi Gibea ateinyi Ribai mi si Itai ab. 30Piraton ateinyi Benaya ab, Gaas mutuk lu dam ateinyi si Hidai ab. 31Bet-Araba ateinyi si Abialbon ab, Bahurim ateinyi si Azmawet ab, 32Saalbon ateinyi Elyahba ab, Guni ateinyi Yasyen ab, Yonatan ab, 33Harari ateinyi Sama mi Yonatan ab, Harari ateinyi bikwe tonda Sarar mi Ahiam ab. 34Maakha ateinyi Ahasbai mi Elifelet ab. Gilo ateinyi Ahitofel mi si Eliam ab. 35Karmel mutuknyi Hezrai ab, Arbi mutuknyi si Paerai ab. 36Zoba mutuknyi Natan mi Yigal ab, Gad yalanyi si Bani ab. 37Amon yala nang mutuknyi si Zelek, Beerot mutuknyi Naharai bira Zeruya mi Yoab er ninyi on balang ab ya ab bonanyi kuramwe. 38Ira babyi Gareb babyi ara Yetri mutuk nang akwe kurandei. 39Het mutuknyi Uria ab a nirya nungna ara 37 baryi kuramnyi.

Currently Selected:

2Samuel Uram 23: MTG

Highlight

Copy

Compare