1Raja-raja Uram 1

Daud sirya wisi danmou ba, er unubmai uram deyok

1:1-27

1Sienyi Daud kam kubde baramwe ani, sirya wisi danmou aryi, ersi tin bukam kaluna kalubdeibmana ababyi er nong bol ikib kiboka arum biriramwe. 2Ura, er wa irmilin nang aryi ersi ato ebmai, “Nai, nunci kansi ukuryok kabir ner ingkirikoka boyakibyi ba, kan ab tonkwa kurandurumci, kansi me ilikeiboka erci irironkwankir. Ani, er keil deici mabdeibkici ba, nai kan nong tin kubkwankir,” ebmai. 3Ba, er wa irmilin nang aryi Israel mutuk nirya yibinkirikoka kabir ner urasin telebto ner nun asi ingkiringmai. Ani, kabir ner tentok er si Abisag urasin telebto ner nun asi mutuk si Sunem dam aryi eiboka boyanmaici, er Daud bisi yandoka karebmai. 4A kabir ner er urasin ara iya telebto ner nun kuramwe. Ba, a kabir ner ara Daud ab tonkwa kurandeici, er Daud bisi kalikoka me ilingdeirin ner kuramwe. Uca, Daud biryi a ner ab tonkwa mana kum kurandei.

5Ba, Daud ner si Hagit mi Adonia biryi erebdeibdandoka erci ato ebmou, “Nira a mutuk sienyi kiboka talebkwan,” ebmou. Ura, erci kongkong eboka boyibaraming keica si kereta ab, bisam kuda bon nang ab, ninyi 50 baryi nang tukwe bisik ersi menekeiboka cungbinkwamai nang ab wibdeibmou. A wibmou ara er noutam bukeiboka menengna nang aminda kibkwabmai nang kiboka bobinkwamai ati wibdeibmou. 6Ura, Adonia er kam kuramwe talak ara er nai biryi, “Ato kubmarima ara malyito kubmarim,” eboka ton ersi erengdena kum kuramwe. Ara, dunyi Absalom bira sirya diamwe aryi Adonia ersi Daud er mi dunyi bitonyi kiboka kanyi deiriramwe aryi ato kuramwe. 7Ura, Adonia biryi, “Niryi akatei sienyi kiboka tikwan ati, sunci, ‘Nisi milibnururum,’ en uram,” ebkwamou ati, Zeruya mi Yoab ab, Imtamnyi biti dama deirinanyi Abyatar ab asi bindoka ebmou. Ba, a bitinyi nang aryi, “Adonia, kansi milibkwankinim,” ebmarei. 8Bok, Adonia tam kum kibdobmai nang ara Imtamnyi ai dam ninyi dama deirinanyi Zadok ab, Yoyada mi Benaya ab, Er Imtamnyi uram ermurunanyi Natan ab. Tonda, Simei ab, Rei ab ani, Daud er iya mikib yin doun nang ab ara Adonia er tam kum kibmai.

9Ura, Adonia biryi bisam domba ab, bisam lembu ab, minta ilila boamwe bisam akwe obmouci, keil si Zohelet bukamwa dam dinatam me si En-Rogel u dam tam kuboka asi bindoka anda bisam dama deibmouci, uk dabmou. Ura, sienyi Daud er mabwe ton nang ab, sienyi er wa in nang Yehuda yala deibdoba nang ab asi naboka bulubdeibmouci, a kwalina kwaliboka yibmai. 10Bok, Er Imtamnyi uram ermurunanyi Natan ab, Benaya ab, yin doun nang ab, er weit Salomo ab ara kum nabmou.

11Ba, Natan biryi Salomo er kwin Batsyeba bisi bindoka ato ebmou, “Kan kum bikmarim do? Hagit mi Adonia, a mutuk sienyi kibdanmar. Bok, nun sienyi Daud bira kum bikmar do? 12A deyok aryi niryi sunsi ebkwinsin ara, ‘Kan ab, kan mi Salomo ab ara diboka kalikdankwandurum! Adonia obsicei,’ tenen ati ebman 13Ati sienyi Daud bisi biminyi ura, ato ebkwandum, ‘Nai weik sienyi, kanci minob uca ato eanoumwe, “Kan mi Salomo biryi ni sienyi kianyi olong unubkwande,” eanoumwe. Bok, ukura Adonia sienyi kibkwamar ara una deyok ati do?’ ebkwandum. 14Ba, Kan ab sienyi Daud ab a deyok ati uram sisingdurumnyi bok, niryi aminda yandokabniryi kan enmaminyi uram asi, ‘Ara, diba ati enmar,’ ebkwamakin. Ati, kanda sienyi dam minob birum,” eboka Natan biryi ersi ebdeibmou. 15Ura, Batsyeba biryi sienyi man ai wengbinmou. A talak ara sienyi bira iya wisi danamwe aryi, Sunem atei kabir ner si Abisag biryi ersi iriboka kalingnamuryi, me ilingdeiriramwe. 16Ura, Batsyeba biryi sienyi Daud urasin dam asi yan kutam ikdongoboka kisok luknubdongobmouci, ersi, “Ni nai,” eboka kibdobmou. Ba, Daud biryi asibdenmou, “Niryi kansi unatoa asi karebnute tenebmarim do?” eboka asibmou. 17Uca, Batsyeba biryi er Daud bisi ato ebmou, “Kanci kan Nai Imtamnyi Iya Erebdobnyi si deici aryi nisi minob ato eanoumwe, ‘Kan mi Salomo bisi ni buranyi sokon unuboka sienyi kibkwande,’ eanoumwe. 18Bok, nai kan kum bikmarim talak aryi Adonia bira sienyi kibmar. 19Sienyi kibmarci, erci bisam domba ab, bisam sapi yim ab, bisam sapi mi minta weik dinyi bobulubmararyi, kan mabwe nirya sun ab, Imtamnyi ai dam, dama deirinanyi Abyatar ab, Yoab kan yin doun sienyi ab asi nabmar bok, kan mi Salomo bira kum nabmar. 20Nai, sun Israel nang nirya ara kanci, ‘Anyi bisi ni olong unuboka sienyi kibkwande,’ ena ati dibde bukunung. 21Ba, ni ab, ni mi Salomo ara kan dibminyi talak aryi nunsi durukoka wenebsingnyei,” ebmou.

22A talak aryi er Batsyeba ab, sienyi Daud ab uram sisingnandei bok, Er Imtamnyi uram ermurunanyi Natan sun uram sisingmarei ai binmou. 23Ba, sienyi Daud bisi ato ebmai, “Er Imtamnyi uram ermurunanyi Natan yanmar,” ebmai. Ura, Natan biryi sienyi man ai umbura wengbinmouci, kibdobmou. Kibokaburyi, er urasin tukwe ikdongoboka sienyi dam burbinmou. 24Ura, Natan biryi ato ebmou, “Nai sienyi, Adonia bira akatei sienyi kibmar ara kanci, ‘Ni dibnyi talak aryi erci akatei sienyi kibokabdiryi ni buranyi sokon unubkwande,’ eamoumwe aryi do?” ebmou. 25“Akiryi arub tum aryi, Adonia bira bisam lembu ab, bisam domba ab, yuk-yuk bisam minta muruk-muruk eboka nebdob bisam akwe oboka kwalinmararyi, sienyi kan mabwe nirya ab, kan yin doun nang sien nang ab, Er Imtamnyi biti dama deirinanyi si Abyatar ab nabmar ba, buluboka tonkwa yinmang. A tonkwa yinmangci Adonia biti ato enmang, ‘Adonia, kanda sienyi dib iya tikwandim-dib iya tikwandim,’ enmang. 26Bok, nai, ni kan wa irmilinanyi ab, Imtamnyi biti dama deirinanyi Zadok ab, Yoyada mi Benaya ab, kan mi Salomo ab ara kum nabmasir. 27Ani, a kunmar dinyi ara nai kanci ebmarim ba, kubmar do? A kunmaci ura, unato ati nunsi er sienyi kimna kabul talak aryi, ‘A mi asi aminda sienyi kibokabdiryi ni buranyi sokon unubkwande,’ kum erdeiriransumwe do?” ebmou.

Salomo bisi me kisok likeiboka sienyi tikeibmou deyok

1:28-53

28Ba, sienyi Daud biryi Natan bisi uram dekeibmouci, ato ebmou, “Batsyeba nabdarur.” A ner ara ai wengyandoka sienyi urasintam tingyanmou. 29-30Ura, sienyi biryi dib en uram aryi ersi ato ebmou, “Er Iya Erebdobnyi, iya kam kururnyi, ni mambul kunmanici ababyi lemdeiriranirnyi si deici aryi arub aryok minob, Batsyeba, kansi, ‘Kan mi Salomo bisi sienyi kiboka ni olong unubkwande,’ eanse to kunubkwinkin. Ara, Er Iya Erebdobnyi, Israel nang sun molonungnyi si deici aryi, ‘Kan mi Salomo biryi sienyi kiboka ni olong a unubkwinir,’ ” ebmou. 31Ura, Batsyeba yanmouci, er yan kutam ikdongoboka er urasin tukwe ai luknubdongoboka, “Ni Nai,” eboka kibmouci, ato ebmou, “Ni nai sienyi, Imtamnyi biryi kansi kam kun dinyi tabakoka karekina teleb!”

32Sienyi biryi tubto ton ato ebmou, “Imtamnyi ai dam ninyi dama deirinanyi Zadok ab, Imtamnyi uram ermurunanyi Natan ab, Yoyada mi Benaya ab asi iniboka ni dam boyandarur,” ebmou. 33Ba, a nang sienyi dam yanmai. Ura, sienyi biryi sunsi ato ebmou, “Sun ab ni wa irmilin nang ab ni mi Salomo bisi bindarur. Bimunyi ura, Salomo bisi ni bisam keledai deici bukeibmunyi ura, boboka me Gihon u dam bobindarur. 34Er Imtamnyi ai wa iboka dama deirinanyi Zadok kan ab, Imtamnyi uram ermurunanyi Natan kan ab sunci ersi co yung me kisok likeiboka kisal dakdumunyi ura, ersi Israel mutuk sienyi tikeibdurum. Ersi sirya tikeibdumunyi ura, sunci buu ena si sangkakala buu eboka, ‘Salomo sienyi kibmar ara iya talebkwande!’ ebkwandurum. 35A sirya ura, sunci ersi noutam dongobdeibmunci yankwandarur. Ba, atei yamunyi ura, erci ni buranyi sokon asi yandoka bukwande. Ara, erci nisi unuboka ni buranyi sokon bukokabdiryi, Israel yala nang ab, Yehuda yala nang ab asi talebkwande ati niryi ersi wa karebkwan.” 36Ba, Yoyada mi Benaya biryi ato ebmou, “Iya dib uram ebmarim! Nai sienyi, kan molorumnyi Iya Erebdobnyi biryi kan ebmarim uram dib kunubdeibkwande. 37Nai sienyi, kan sienyi kiboka taleamoumwe ba, kan Nai Iya Erebdobnyi biryi kalingnankou to kan mi Salomo bibabyi Iya Erebdobnyi biryi kalikmurubkwande. Er sienyi kibmar dinyi ara kan sienyi kiboka taleamoumwe dinyi ara outam kibdeiboka ersi sienyi kiboka talebkwande dinyi ara iya erebdobto kubkwande,” ebmou.

38Ura, imam Zadok, ab, nabi Natan ab Yoyada mi Benaya, Kreti nang ab, Pleti nang ab aryi Salomo bisi er nai Daud bisam ner keledai deici asi bukeibmai. Ura, boboka Gihon mutuk dam bobinmai.

39Imam Zadok biryi domba kisok yang umbura dam teleb co yung dongoboka Imtamnyi molon ai deiamnyi asi dobmouci, Salomo bisi me kisok likeiboka sienyi tikeibmou. Ba, ninyi nirya aryi sangkakala buu ebokabiryi, “Er Salomo iya sienyi kibkwande!” ebmai. 40A sirya ura, tamuryanganmaici akatei ninyi sun kanyi karyi asa aryi Salomo menekeiboka er aminda dam deibmaici mot semaia sun uram lilim ara liman demnande to enmo.

41A kunmaia asi Adonia ab, erci nabmou ba, sun tonkwa yina yinmai nang ab kekebmai. A talak ababyi sun a kwalina yina sirya yiabyi. Er Yoab biryi a buu ena sangkakala uram kekebmou ura, ato ebmou, “Weik atei dam doura una kunmangci lilim weik enmang da?” ebmou.

42Er ato erabwe talak aryi, Imtamnyi ai wa inanyi imam Abyatar mi Yonatan yanmou. Ba, Adonia biryi ato ebmou, “Kan yin dounanyi mikib weiknyi yanganmarim ara uram teleb nun boyanganmarimca ati, ur wengyarum,” ebmou. 43Bok, Yonatan biryi Adonia bisi ato ebmou, “Kum! Nun nai sienyi Daud biryi Salomo bisi sirya sienyi tikeibmar,” ebmou. 44Ba, “Sienyi Daud biryi Imtamnyi ai wa inanyi Zadok ab, Imtamnyi uram ermurunanyi Natan ab, Yoyada mi Benaya ab, Kreti nang ab, Pleti nang ab aryi, ‘Salomo bisi bisam keledai deici bukeiboka noutam dongoboka boyandarur,’ eboka sunsi arukmar to kuboka boyanganmang. 45Ba, Imtamnyi ai wa inanyi Zadok ab, Imtamnyi uram ermurunanyi Natan ab aryi, Gihon mutuk dam bindokabdingci, ersi kisal dakoka sienyi tikeibmaring. Sirya tikeibding ura, Yerusalem atei boyanganmangci akatei ninyi kanyi karyi asa aryi mot sebde yanganmang lilim aryi atei bukman kumto kunmara asi kekebmandau. 46Tonda, Salomo bira sirya sienyi kibmararyi, sien nang bun sokon ara er bukmar. 47Ba, sienyi er wa irmilin nang weik nang ababyi Daud bisi yandoka kibmangci ato ebmang, ‘Salomo er sienyi kibmararyi wa iboka talebkwande tam ara er nai taleamuryi, iramwe ara outamtoto kibkwande. Ba, er mi Salomo bira Er Imtamnyi biryi ersi iya dibniliboka erebdobto kuboka karebkwande.’ Ato ebmai ba, Daud bira er maramwe sokon dam aryi kisok luknubdongoboka Er Imtamnyi bisi si weik ebmar. 48Ara, ato ebmar, ‘Nai Iya Erebdobnyi Israel nang molokunubnyi, arub aryi sun Israel nang sienyi kiboka talebkwandanyi ni sienyi kiboka buranwe sokon sirya buryar ba, ni asing aryi sirya eibne ati Nai Iya Erebdobnyi. “Teleb!” eboka kibkin,’ eboka sienyi Daud biryi ebmar,” Yonatan biryi ato ebmou. 49Yonatan biryi ebmou ura, Adonia biryi nabmou ba, bulubmai nang nirya binsekdobmai. Ara, sun ilil kubmou aryi, sun yandobmai to da tentok-tentok tikala-tikala baronmai ani, nirya binsekdobmai.

50Adonia biryi Salomo bisi ilil kubmou ba, Adonia bindoka Imtamnyi biti dama deiboka molon keil dungna kubkub dina-dina bisam kisok yang atoanun belerdeirina dub talerbinmou. 51A ukubmou dinyi ara Salomo bisi, “Adonia bira ato ukubmar,” ebmai. Ara, “Adonia bira Salomo bisi er ilil kuramwe deyok aryi Imtamnyi dama deirina kubkub dina-dina belerdeirina talebdongoboka ato ebmou, ‘Salomo biryi nisi, “Aminda kum obkwankin,” eboka dib en uram ebnici akwa binkwaman,’ ebmou,” sunci Salomo bisi ato ebmai. 52Uca, Salomo biryi ato ebmou, “Erci yu aryi ato kubmaci ura, ersi obkwamang. Bok, yu kumci teleb kanyi bobmariryi, ato kubmaci ura, er kisok otong tentok ababyi mitika ton kum sekwanikwande,” ebmou. 53Ba, sienyi Salomo biryi, “Adonia Er Imtamnyi biti dama deiboka molon keil dungna dam tikmar asi boyandarur!” ebmou. Ba, boyanmai ura, Adonia ai wengyanmouci, sienyi Salomo urasin dam yandokaburyi, kisok luknubdongoboka kibmou. Ba, Salomo biryi ersi ato ebmou, “Kan ai ur bindobdum,” ebmou.

Currently Selected:

1Raja-raja Uram 1: MTG

Highlight

Copy

Compare