2Samuel Uram 22
22
Daud biryi ninyi oboka erebdobmouci, er mundu lobmou ba, Er Imtamnyi bisi si weik eboka mot sebmou deyok
22:1-51
1Ura, Er Iya Erebdobnyi biryi Daud bisi milibmou ba, er Daud mar ordan nang nirya ab, er mar iramunyi Saul ab oboka erebdobmouci, Er Iya Erebdobnyi bisi si weik eboka mot sebmou. 2Ura, Daud biryi ato eboka mot sebmou,
“Nai, Iya Erebdobnyi Kanda ni keil kon sasirande atonyi kurum.
Kanda nisi mar iyanganmaningnyi ba, sasiboka kalingnaming ai atonyi kurum.
Ani, Nai Kanda ni lemdeirinanyi kurum.
3Kanda ni Nai Imtamnyi kurum.
Kanda keil kon bukoka sasiranda atonyi kurum aryi nisi sasirdeirinurum.
Nai, Kanda ni duknurdaron dikum atonyi kurum.
Kanda ni ting mar lisingna atonyi kurum.
Kanci nisi lemdeirinin mikib ara Kan dam ilinto kukurur.
Kanda nisi keil lika doninto kuranirimnyi kurum.
Kanda ni domaningnyi ba, duknurorban dikum atonyi kurum.
Kanda ni obkwamaningnyi asi lemdoranirimnyi kurum.
4Nai, Iya Erebdobnyi Kansi, naboka molobmakise.
Ba, ni mar ordan nang aryi obmaninto kunmanei bok, lebdobmanoumwe. Ati, Kansi si weik ebmakin.
5Ni kam kuna kum danardeirinin dinyi aryi aknabmanou,
nisi obkwamaneici, ninyi yubwa ara me aryi walum-waluma dobde yangarande to kuboka nisi iyanganmanei.
6Nisi baron bisik ena eboka kalinglorande to kaliklobmanou.
Nisi diraming nang youboka dongon tabwe aryi tabwe demnaming ato kuanou.
7Ni mambul kanya boronmase talak aryi, ni Nai bisi uram dobmase,
Ni nai, Er Iya Erebdobnyi bisi uram doboka molobmase.
Ba, ni Nai Imtamnyi Er ai dam aryi kekebmanou.
Niryi, ‘Lemyanurum e!’ eboka uram dobmase ba,
Er Imtamnyi amol umbura wengbinmou ba, ni uram kekebmanou.
8Ura, Imtamnyi Er yu aryi tukwe lulukmou,
tukwe nirya eimlam-eimlam ebmou,
im deyok-tukwe deyok nirya sirim talebmou.
9Er u umbura bisik aryi tulum silim-silim eboka anabmou,
Er si umbura bisik aryi uk buk lengkerekmou,
Er deici aryi uk sirika kwekde sangmou.
10Im kwilikloboka yuryanmou,
Er yan tang amwetam ara kunuk akuma dakdongobmou.
11Erda, malaikat atoa si kerub ol deici bukoka, ola yibarande to, ola ling eryuryangarande,
Erda ilila kumwe deici aryi doboka yuryanmou.
12Kunuk aryi libdongobdandoka Er ai dobdongobdandobmou.
Duwa bum bukamto kuboka libdongobmou.
13Er deici aryi bebe ling ebmou,
Er deici aryi uk kwekoka uk buk lengkerekmou.
14Imtam aryi liman debmou,
Er Iya Erebdobnyi, Er uram, ‘Kekebnunung,’ tenen uram dobmouci, liman debmou.
15Er Iya Erebdobnyi biryi bebe ling eboka Er mar dobmou,
Ara, bebe ling eboka mar dobmou uca, ninyi obminikoka, yaksinibmou.
16Iya Erebdobnyi, Er yu aryi uram weikanun iboka dobmou.
Er u um bisik aryi isin uut ebmou.
Ba, me kwan sekdonokmou ba, me kwan dingiamwe amwetam tukwe asi lak kibmou.
Ilila me kwan dingiranda dikum lulu kobdob ababyi lak kibmou.
17Er iya erebdob sokon kurur aryi taruk dobkweteboka taleboka libdobmanou.
Nisi ninyi aryi me oboka yirande to kubkwinei asi dobtaleboka lebdobmanou.
18Mar ordana kel birianci nang aryi obkwineia dam bok, Er Imtamnyi biryi lebdobnou.
Ni mar iranei nang aryi obkwinei bok,
sun mikib weik dongobmou bok, nisi lebdonou.
19Ni malyi kanya bobdobmase talak aryi mar iyanmanei.
Uca, ni kanya barironanyi bira Er Iya Erebdobnyi kurur deyok aryi Ersi kanya baribdobmase.
20Erda, nisi kanyi deiboka, teleb tenenurur deyok aryi,
tilib weik dikum aryi boboka lo dikum kamdeirirbinanou.
21Er Iya Erebdobnyi biryi nisi teleb kibdeianou ara nibabyi telebto dinyi akwe kunuranse dinyi asi kikliboka kareranou.
Ni taruk aryi malyi dinyi ton kum kunuranse deyok aryi, Erci nisi dengdeiriranou.
22Nira, Erci, ebdeibwe uram akwe kunuranse.
Ni Nai, Er uram ebdeibwe uram dangbisina ton kum kuranse.
23Nira, Erci, ‘Ato-ato kubkwandarur,’ eramwe uram nirya kunuranse,
Er uram kununa kum kuraming nang kuraming to ara kum kunuranse.
24Er uram asi tuba kekeboka kunununci, malyi dinyi ara kununa ni li tenenun ara Er bingnurur.
25Er Iya Erebdobnyi biryi teleb dinyi akwe kununun to kikliboka dengnanir,
niryi malyito dinyi Er urasin dam ton kum kunun to Erci dekeibde binkwanir.
26Nai Iya Erebdobnyi, Kansi iya busul kuranking nang ara Kanbabyi sunsi iya busul kuboka boukwe kimdum.
Kansi telebto akwe kuranking nang ara Kanci sunbabyi telebto akwe kurandim.
27Malyi dinyi talbalirdongordana kum uca, lek kanya akwe boramingnyi nang ara Kanbabyi sunti lek kanya akwe borandim.
Ucab, tingkwanibdob kanya boraming nang ara Kanci, sun tingkwanibdob kanya boboka malyi dinyi kunuramingnyi to kikliboka dengdeirirumnyi kurum.
28Nai, Kanda sun yuk ninyi aryi erebdandoka ton nang asi malyi kimnamingnyi nang asi lemdeirinanyi kurum.
Bok, sun si ererdaramingnyi nang asi luknubdeibkwaminyi ati asing dirlorongdum.
29Nai, Iya Erebdobnyi, Kanda ni dam berengdeirinin uk ubna atonyi kurum.
Ani, Kanci ni dam kunuk dakmanici asi berengdeirinurum.
30Nai, Kan miliranoumwe deyok aryi ilil kum asa yu ilinto nang yubwa asi wengbindoka oranse.
Nai Kan milibmaniminci, mikib karebmaniminyi deyok aryi sun keil lika doboka kalingnamingnyi asi kabliboka wengbanun.
31Er Imtamnyi bisik ara iya teleb bisik kurur.
Er Iya Erebdobnyi uram ara malyito dinyi ton talbalirdongona kum uram kurur
eda, u dikum akwe en uram kurur.
Er Imtamnyi dam duknurorbingnyi nang ara Er Imtamnyi biryi mar u lilirona ting ato kuboka limdeirirande.
32Yuk erebdobnyi da ton kum kurur, eda Er Imtamnyi tentok Iya Erebdobnyi kurur.
Erda erebdob mutuk kon sasiranda atonyi kurur.
Er a kurur atonyi bira da ton kum kunung.
33Er Imtamnyi bira ni inirdarorban dikum aryi sasibdob dikum atonyi kurur.
Ni kubde banun bisik lilirdeirinurur.
34Ni yan asi bisam rusa aryi ola cukoka, mutuk kon dam tingbarande yan ato kibdeibnici ba, ola cukoka mutuk kon dam tingdorbanunyi kurur.
Ni yan mikib kibdeiboka mutuk kon dam sasiboka tingnande ato kuboka tingdeirinurur.
35Erci mar dona etereranou.
Ba, mikib ilinto mar dortalena co birianou.
36Nai Kanci, lemdaron ting kiningdeirinurum.
Nai Kan ni molobnyi to kunurdeirinurum deyok aryi ninyi nirya aryi ni si bingnunung,
37Kanci ni binkwamanyi bisik asi, telebto yardeirinurum ba, teleb akwe banun.
Ni bisik banmanyi asi yan dum ton kum dungnurur.
38Ni mar ordan nang dombanmanyi ani, ninyi nirya orkiriranse.
Ni mar ordan nang asi oboka kum danardeirina kum kubmaniryok, mambul ati, takloboka atei yangarona kum kuranse.
39Ni mar ordan nang asi oboka kilim-kalim kirkarongnanse ba, kam bukokman kum kuramnyi.
Yaniboka kusungmanyi ba, ni yan amwetam asi maramnyi.
40Nai, Kanci mar ibinkwamanyi ati, sabya ongobdeiboka mikib kimdeiriranoumwe.
Kanci nisi mikib karebmaniminyi ba, ni mar ordan nang ara ni amwetam kibdeiboka ereronun.
41Ni mar ordan nang nisi iyanganmaningnyi asi,
Kanci ilil kibdeibminyi ba, ni dam aryi tamuboka baramnyi.
Nisi li teneranei nang asi nirya kum danardeiriranse.
42Ni mar ordan nang aryi, ‘Nun lebdobsindarur e!’ enmangnyi ababyi, yuk nang aryi ton lemdoryangana kum kuramnyi,
Er Iya Erebdobnyi bisi, ‘Nun lebdeibsurum e!’ eboka namangnyi ababyi kum kekeana ato kuboka kum lemnamwe.
43Ni mar ordan nang asi sici kiboka orburanse.
Niryi oboka bulubdeibnyi ura, yanisitaboka mintal aryi bisik dam liliraming to kuranse.
44Nai, ni kalingnun ninyi Israel ninyi aryi malyi kimaningnyi asi lemdeirinurum.
Kanci nisi kalingnurumci, yuk-yuk mutuk nang sun sienyi tikeibnoumwe.
Ni kum bingnun nang asi ni wa irmilin nang kimdeirinurum.
45Yuk mutuk nang ara ni ebmanyi to akwe lamlamak eboka kunuraming.
Ukuryok a erdongon talak ababyi ni uram enmanto kekenmaningci, ni ebman to akwe kununmang.
46Yuk-yuk mutuk nang ara mitang dululung eryibankung,
Sun weik atei dam aryi anaboka sirim birbir ebde yibaronmang.
47Er Iya Erebdobnyi bira iya kam kururnyi kurur! Erda keil kon burande atonyi kurur aryi nisi lemdeirinurur.
Er Iya Erebdobnyi bira ni iya mikib ting eboka sasiron keil kon atonyi kunurur ati, Ersi si weik erebdarur.
48Er Iya Erebdobnyi biryi nun tam nang obmasingnyi asi kisok dangdeiriransirnyi kurur.
Nisi, Imtamnyi biryi yuk-yuk mutuk nang asi ni amwetam nang kibdeiboka, sun sienyi kimdeirinurur.
49Nisi yuk mutuk nang aryi oryanganmaningnyi asi lemdeirinurum.
Nai Kanci, nisi erebdeibnoumwe ba, ni mar iyanganmaningnyi nang asi bisik sengsininun.
Nai kanci nisi amwetam kiboka tiklim dararanei asi lebdeibnoumwe.
50A deyok aryi niryi yuk-yuk mutuk ninyi kankan aryi, Nai Kansi, ‘Ni Nai, ni babya,’ eboka si weik eboka mot sebmakin.
Nai Kanti si weik en mot sebmakin.
51Er Iya Erebdobnyi biryi me kisok likeiboka sienyi tikeianci ura, anyi bisi busul kuboka iya boukwe kimnande.
Ani, erci a sienyi bisi boukwe kiboka lemdeirirande.
Ni Daud ab, ni mabwe odei-odei kibde binkwaming mabwe ab ati,
Er Imtamnyi biryi iya boukwe kibde bankwansir,”
eboka mot sebmou.
Currently Selected:
2Samuel Uram 22: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
