2Samuel Uram 21
21
Gibeon mutuk nang ab, Saul mabwe ab deyok
21:1-14
1Daud weik sienyi kiamwe talak kwalina winiryi ara kwaning utan li berekamwe ba, kuramnyi. A deyok aryi Daud biryi Er Iya Erebdobnyi bisi asirbinmou. Ba, Er Iya Erebdobnyi biryi ato ebmou, “Saul ab er ai ninyi ab aryi Gibeon ninyi asi obyi deyok aryi kwaning utasurur,” ebmou. 2Ura, Daud biryi Gibeon ninyi asi nabmouci, uram sisikmai. Gibeon nang ara Israel nang kuma, eda minob Amori yoka nang Israel nang orkiriramnyi ani, takdongoamnyi nang kuramnyi. A nang ara Israel yala nang aryi “Nunci sunsi ona kum kubkwansib,” eamiryi sun kankan tonkwa kuramnyi. Bok, Saul biryi Israel nang ab Yehuda nang ab deyok ati kuramuryi, obkiriamuryi, takloamwe nang asi Daud biryi nabmou. 3Ura, a nang asi Daud biryi ato ebmou, “Niryi sunsi una kubkwansin do? Ani, unatoa deksitinyi uca, Israel nang asi teleb kibdate ba, Er Iya Erebdobnyi biryi kisal daksute do?” ebmou. 4Ba, Gibeon nang aryi Daud bisi ato ebmai, “A deyok ara Saul ai ninyi aryi nunsi bona emas ab perak ab aryi dekwamasing dinyi ara kikiman kum kubkwamar. Ani, Saul biryi nun atei nang asi oanci atikwe Israel nang asi kisok dakwamab ababyi kikiman kum kubmar,” ebmai. Ura, Daud biryi tubto ato eboka asibmou, “Ato ebmarum ura, una kubsute tenebmarum do?” ebmou. 5Ato eboka asibmou ura, Gibeon nang aryi ato ebmai, “Nun obkiriansou ba, Israel nang kankan aryi nirya kum dansekyi. 6Ati, Saul er mabwe kobdoba akwe tabaryi karebsurum. Karebsiminyi ba, Er Iya Erebdobnyi urasin dam mutuk kon dam Gibeon mutuk aryi co dub tabwe biriboka dolobkwetebkwayeb,” ebmai. Uca, sienyi Daud biryi ato ebmou, “Yo teleb, sun ebmarum to Saul mabwe asi karebkwamasin,” ebmou. 7Uca, Saul mi Yonatan biryi deiamwe mi si Mefiboset bira sienyi Daud er ab Yonatan ab aryi, Er Iya Erebdobnyi si deici aryi dib en uram minob, “Boukwe kimdankwanim,” ebdanandei deyok aryi Yonatan mi Mefiboset bira er boukwe kubmou aryi kum dobkarebmou. 8Eda, Aya nebnyi si Rizpa bira Saul doamwe. Ba, Saul ner Rizpa biryi mabwe bitinyi deiamwe. A mabwe bitinyi sun si ara Armoni ab, Mefiboset ab deiamwe. A Mefiboset bira ton yuknyi kuramwe. Ani, tonda Saul er nebnyi si Merab bira Adriel dobmouci, mabwe amubaryi deiamwe. Adriel er nai si ara Barzilai Mehola ateinyi kuramwe. 9Akiryi Saul mabwe a tabaryi nang asi doboka Gibeon nang ati dobkarebmai. Ba, a tabaryi nang asi mutuk kon dam Er Iya Erebdobnyi urasin dam co dub tabwe deboka dolobkwetebmai ba, sun a nirya dibmai. A talak ara kwaning utan li kuramnyi ani, roti kikniraming keica gandum kouramnya du dakoka yirkalinmai talak aryi obmai. 10Ba, Saul ner aminda tabakoka doamwe ner ara Aya nebnyi doamwe. A ner ara amubaryi nang sun kwin si Rizpa bira gandum kin aling aryi kalubdaburyi, keil kon mutuk bindoka amuboka maramwe. Sun kwin a mabloamwe tok asi roti kikniraming keica du dakoka kiknibde yin li dobkaliamwe ani, mouryi, li dobmou. Ura, mo ceboka er mabwe tabaryi nang tabwe biriboka dolobkweteamya deici asi mo ceboka turubmou. Ba, sun kwin bira atei barona kum kuamwe eda lukunda kitingtam kalingmururamwe. Lukunda ara, “Bai kam yandoka yibcei,” tenen kalingdamwe. Ba, kitingtam ara, “Maka aryi er mabwe tukwi asi yandoka yibcei,” tenen kalingdamwe. 11Ba, Saul aminda dortabangni ner Aya nebnyi Rizpa a kuramwe dinyi asi Daud dam lak ebmai. 12Ebmai ura, Daud anaboka, Saul yok ab, Yonatan yok ab, Bet-San atei keta deibloamnyi asi dorbinmou. Ba, Filistin nang aryi a nang tabwe biriboka dolobkweteamnyi dikum aryi yok buluboka ukula dobinamnyi. Asi Daud biryi Saul yok ab Yonatan yok ab Gilboa dam aryi oamnyi yok borbinmou. 13Ara, Saul yok ab, er mi Yonatan yok ab, tabaryi nang tabwe youboka dolobkweteamnyi nang yok ab sirya buluboka boyanmou. 14Sirya boyanmou ura, sun nai yok ab er mabwe yok ab antaniboka Benyamin yala nang mutuk asi neik bisik umbura akwe tukwe dongobmou. A mutuk kobdob ara Zela dam asi Saul er nai Kish tukwe dongoamnyi bisik akwe dongobmai. Sienyi Daud biryi arukmaci to akwe kunubde baramnyi ba, a mutuk ara Er Iya Erebdobnyi biryi er molona kekeboka kisal dangnamwe.
Filistin nang ab Israel nang ab obdanmai deyok
21:15-22
(1Taw. 20:4-8)
15A kuramnyi ani, Israel nang ab, Filistin nang ab ordana mar deyok koubmaici ordaramnyi. Ura, Daud ab, er milin nang ab aryi Filistin nang asi mar ibinmai noutam aryi Daud er mitang weik kubmou. 16Mitang kubmou talak aryi Filistinyi er nong ara ililanyi si Yisbi-Benob biryi Daud bisi ninyi on balang ukuryok kiknibmai dinyi aryi mentebmou. A balang ikin ara 3,5 kilo aryi obmandanmou. 17Uca, Zeruya mi Abisai biryi Daud bisi yandoka lebdobmouci, a Filistin mutuknyi ililanyi bisi mar bobmouci, ersi obmou. Ura, er milibmai nang aryi ato ebmai, “Nai Daud, kan ab nun ab nirya obsingnyi ura, nun Israel nang yala kum dasicei ati, nai kanda nun ab mar ordana dam tonkwa ibana mem,” ebmou.
18Ato ebmai ura, Filistin nang asi Gob mutuk dam mar ibinmaici obdanmai. A ordanmai uca, Husa ateinyi si Sibkhai biryi ninyi nena ilila neamunyi si Saf bisi obmou.
19Ani, neik mutuk Gob dam akwe tubto Filistin nang asi mar bobmai. A ordanmai talak aryi Yaare-Oregim mi Elhanan Betlehem yalanyi biryi Gat ateinyi Goliat bisi obmou. Ba, a obmounyi er ninyi on balang bok ila ara ongon aling wiraming co las atoanun asi douramwe.
20Ani, tubto Filistin nang akwe mutuk si Gat dam mar bobmaici, obdanmai. A ordanmaia dam ara ililanyi nun asi mar ordana kilkil ilinto kuramunyi nun ton a ordanmaia kankan tikmou. Anyi er yan du babyi, taruk du babyi ara nabaryi akwe kuamwe. Ba, a lekamwa nirya yan babyi taruk babyi antaniboka nungna ara 24 baryi nungnamnyi. 21Anyi biryi sun Israel nang asi yandoka durungmou asi Daud er du Simea mi si Yonatan biryi anyi bisi obmou.
22A dumbaryi nang sun nong ara mutuk Gat nang ara ilila nang akwe asi Daud ab, er milin nang ab aryi obmai.
Currently Selected:
2Samuel Uram 21: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
