2Samuel Uram 20

Seba biryi Daud bisi malyi kiboka tatabmou deyok

20:1-22

1Sienyi Daud ab, er milibmai nang ab aryi Gilgal yandoka kuramnyi talak ara Bikri mi si Seba a kunmou. Anyi bira Benyamin yalanyi kuramwe. Anyi Seba bira yu ilintonyi kuramwe aryi ninyi malyi kimnamunyi nun kuramwe. Anyi Seba biryi buu ena si sangkakala douboka, “Buu,” enmouci, ato ebmou,

“Nunda Daud mangna nang kunuba kuma.

Unati Daud bisi milibdobtibyi do?

Israel nang nirya sun atei yuk-yuk barondarur!” eboka yakmou.

2Ato ebmou ba, sun Israel nang nirya ara Bikri mi Seba ebmou uram kekebmaici, Daud tam ara takloboka sun atei yuk-yuk binsekdobmai. Ba, Yehuda yala nang akwe sun sienyi Daud tam kibmaici, Yordan kin aryi milibmai tok ani, Yerusalem atei binkwamai ati milibmai.

3Ura, Daud ab, er milibmai ninyi ab sirya Yerusalem atei sienyi kun atei dam binmai. Sirya binmai ura, sienyi Daud er nerabwe aminda dortabangni nerabwe atei kalikde kuramnyi asi bindoka ai yuk kibdeibmou. Daud biryi a nerabwe asi sun yina dinyi ab, ongon dinyi ab kiknibdeiboka kareramwe bok, a nerabwe ara er ab mana kum kuramnyi. Eda, akai dongobdeiboka kalingnamwe ba, sulyi nerabwe ato kuramnyi tok ani dibsekmai.

4Ura, sienyi Daud biryi Amasa bisi ato ebmou, “Yehuda yala nang asi uki winiryi akiryok bulunmaminyi ani, iniboka ni dam boyarum!” ebmou. 5Uca, Amasa biryi sienyi eamwe to kununa kum kubmouci, “O tum aryi bulubkwana-o tum aryi bulubkwana,” eramwe ba, uki winiryi ebdeiamwe tum sirya dakbisibmou. 6Uca, kununa kum kubmou deyok aryi sienyi Daud biryi Abisai bisi ato ebmou, “Absalom biryi yu boransou to ara mitikto ucab, Seba biryi nunsi yu weik bobmasir. Ati, kan nai tam kibyi nang, ni tam kibyi nang nirya bobulubminyi ura, Seba bisi doboka orbindarur! Ba, kum obmabyi ura, weik atei-weik atei lika doboka aknabdobiryi kunung atei da bindobcei,” ebmou. 7Ato ebmou ura, Abisai bira Yoab taleboka yin doun nang nirya ab, sienyi Daud er kobdob kalingna yin doun nang Kreti nang ab Pleti nang ab, tonda yuk mikib weik yin doun nang ab bulubmai. Sirya ukuboka bulubmai ura, Yerusalem dam aryi anaboka Bikri mi Seba bisi dombinmai.

8Dombinmai ani, Gibeon mutuk ilila keil bukwa dam bai ura, Amasa ab ebdanmai. A talak ara Yoab bira ordanmangiryi ongoraming aling ongobmouci, dongtam kuboka der arikna arikdongobmou. A der arikmou bisik asi ninyi on ya kin aling aryi, ninyi on ya kiboka mirikna bisik kikibdongobmou. Ba, Yoab er minob menengbau uca, a ninyi on ya ara yoksakoka kwanimtam taruk dingyanmou. 9Ura, Yoab biryi Amasa bisi ato ebmou, “Ni kwit, kanda una kunmarim do?” ebmou. Ura, er kwit Amasa ban otong talebdongobokaburyi, u kunkunurorbaninto kubmou. 10Uca, Yoab er kwanim taruk ara ninyi on ya doubmou aryi er kwit Amasa kalingdarona kum uca, mangkau erbabyi u kunkunurbau asi, Amasa mundu lukoka obmou. Ba, deisu yokaboka bukmouci, tukwetam kwanin-kwanin buboka dibmou. Liki bitinyi lungna ara sirya dibmou deyok aryi lik tentok akiryok lukoka obmou. Ato kuboka obmou ura, Yoab ab er weit Abisai ab ara anyi a deibloboka, Bikri mi Seba bisi dombinmarei. 11Ba, Yoab tamnyi tentok Amasa oblobmoua dam a kalikoka tikmouci, a banmai yin doun nang asi ato ebmou, “Unanyi bisi Yoab ab, Daud ab tam kibmar do? Sun tam kibmarinyi bira Yoab banmar asi milirbirur!” ebmou. 12Ba, Yoab biryi a oblobmounyi tukwi ara weika bisik noutam-tam asi ining alironmou tok mabmou. Ba, anyi kalikoka tikmounyi bisi diramwe uca, ninyi yibantok ara tikoka ngalungmai. Ngalungmai ura, Amasa tukwi kilibtaleboka bisik kubkub deirirbinmou ura, kaluna kalubdeibmou. Ara, a bisik yiban tok ara ngalungna akwe kimai ati ato kubmou. 13Baitam bisik kubkub deirirbinmou deyok aryi ninyi yiban tok ara amalakoka, Yoab banmoua dam milirbindoka, Bikri mi Seba dombinmai. 14Dombanmai uca, Seba bira Israel nang mutuk a nirya bisibkiriboka, atei si Abel-Bet-Maakha atei bindobmou. Ura, Bikri mabwe yuk nang nirya buluboka ersi milibmai ba, yangaronmai ani, tonkwa akatei bindobmai. 15Bok, Yoab ab er tam nang ab ababyi akatei Abel-Bet-Maakha dam ibinmai. Sirya binmai ura, akatei lika lilun baitam kuboka tukwe deibde welenmaici, lika dakde banmai.

16Uca, akatei ara etekdob ner nun tentok akatei kuramwe aryi ato eboka uram dobmou, “Kekendarur a! Kekendarur a! ‘Yoab bira ni ab uram sisikwanim ati, “Ni dam yarur!” eboka nabmakir,’ ebdarur,” eboka uram dobmou. 17Ura, Yoab bira a ner dam binmou ba, a ner aryi ato eboka asibmou, “Kanda Yoab do?” eboka asibmou. Ba, Yoab biryi, “Yo diba, Nira Yoab,” ebmou. Ba, a ner aryi ato ebmou, “Ni uram ebkwinkin asi biti kekerum!” ebmou. Ba, Yoab biryi, “Yo, teleb,” ebmou. 18Ura, a ner aryi ato ebmou, “Nun nai yabwe Israel nang minob nang ara ato kuramnyi. Sun dam deyok kubmaci ba, walwal ati, ‘ “A deyok biktinyi,” tenebmunyi ura, Abel atei asi bindobibyi ba, lak eterebkwansunung,’ eramnyi. Ato eramnyi atei ara kan ton bingdum do? Ato eramnyi ara nun atei, akatei Abel atei ati eramnyi. 19Ato kuboka Israel nang busul kuboka mangkau kunung ena bingdum cok asi, unati dalubkwamarimci, kunmarim do? Akatei ara Er Iya Erebdobnyi nunti karebsou atei bok asi yandoka dakabkwamarimci, kunmarim. Ara, telebto kunman tenebmarim do?” eboka erekdobmou. 20Uca, Yoab biryi ato ebmou, “Nira kan atei dakwamakinci, yandoka kunmana kuma. 21Eda, Efraim mutuknyi Bikri mi si Seba biryi sienyi Daud bisi yu borurnyi bisi a yanmar ati domyanman. Ati, Seba bisi dobkarebniminyi ba, akatei dam aryi tamuboka bindobkwan,” ebmou. Uca, a ner aryi Yoab bisi ato ebmou, “Anyi kisok ngang sekoka akatei dam aryi baitam o donokwamaking ati, baitam o bindoka kalikabdum,” ebmou. 22Ura, a ner tubto atei wengbindoka akatei ninyi nirya asi etekdobto kuboka, “Ukubkwayeb,” ebmou. Ura, Bikri mi Seba ngang sekmai ura, kisok doboka Yoab bisi donokmai. Donokmai ura, Yoab biryi sangkakala aryi buu ebmou. Ura, a yanmai ninyi nirya ola akatei dam aryi anaboka sun atei yuk-yuk binsekdobmai. Ba, Yoab bira sienyi Daud dam Yerusalem atei binmou.

Daud er wa in nang deyok

20:23-26

(2Sam. 8:15-18; 1Taw. 18:14-17)

23Ura, sienyi Daud biryi Yoab bisi Israel nang yin doun nang sienyi kiamwe. Ba, Yoyada mi Benaya bira Daud kalingna yin doun nang, Kreti nang ab Pleti nang ab sienyi kiamwe. 24Ba, Adoram bira sun wa il dimna nang sienyi kiamwe. Ba, tonda Ahilud mi Yosafat bira a mutuk nirya sun uang deinanyi kiamwe. 25Ba, Seya bira a mutuk nirya kerek sengnanyi kiamwe. Ba, Zadok ab, Abyatar ab ara Imtamnyi ai wa in nang imam nang kiamwe. 26Ba, Yair ateinyi si Ira bira sienyi Daud atei dam Imtamnyi biti dama deirinanyi imam kiamwe.

Currently Selected:

2Samuel Uram 20: MTG

Highlight

Copy

Compare