2Samuel Uram 19

Yoab biryi Daud malyito kubmou dinyi lak kibmou deyok

19:1-8

1Ura, weik sienyi Daud er mi Absalom biti engebmou. Ba, yuk nang aryi Yoab bisi ato ebmai. “Sienyi Daud bira er mi Absalom biti engenmar ati kekebdum,” ebmai. 2A tum ara sun Israel nang Daud tam yin doun nang aryi Absalom tam nang asi oboka erebdobmai. Ucab, Daud tam yin doun nang kekenmai uca, “Sienyi Daud bira er mi Absalom biti kanya sungmar aryi engenmar,” ena kekebmai. Ura, sun nirya engen kanya akwe bobmai. 3Ato kanya bobmaici, Daud tam yin doun nang ara mar ibinmangnyi uca, ninyi ton ona kum kubingiryi, alyi asa atei yangaraming to kuboka, sunbabyi alyi aryi, der lamabdakde weik atei dam wengdoryanmai.

4Ukubmai, ura kekenmai uca, sienyi Daud bira taruk asok lilibdobmouci, “Absalom e! Absalom e! We ni mi e, we ni mi e!” eboka ngolokoka engenmou. 5Ura, Yoab bira sienyi Daud ai wengbindoka ato ebmou, “Arub ara kan engena aryi kan tam kibkei nang nirya alyi benerbunmarim. Kan ab, kan nerabwe yuma dobumwe nerabwe ab, aminda dortabangdum nerabwe ab, kan nermabwe mabwe ab asi lebdeibmasing. 6Bok, Nai kansi, ‘Li,’ tenerankunyi bisi kanyi deibmarim. Ucab, kansi boukwe kiboka kanyi deibkei nang ara kan, ‘Li,’ tenebmarim. Ato kubmarim dinyi aryi lak kibdanmarim asi sirya bikmakin. Kan tam yin doun sien nang babyi, sun milin nang babyi asi, kanya kum deibumwe. Eda, kanci sunsi yu bobumwe. ‘Absalom bisi kum obmatingiryi, yuk yin doun nang asi obmating ura, kan mundu lobmakute,’ tenebman. 7Ato deyok ati, ola anaboka kan yin doun nang asi kan uram ebkataboka, sun kanya berengdeirirbirum. Kanci, sun dam bindoka, uram ebkatabdeiboka, sun kanya berengdeirina kum kubmaminyi ura, kan mitik talak aryi mambul doramoumwe ani, uku talak ababyi, iya weik mambul akwe tuba-tuba dobde bankwandim. Ati, ato kuboka uram kum sekminyi ura, niryi Er Iya Erebdobnyi si deici aryi dib en uram ebkun: Ara, arub lukunda aryok kan yin doun nang ton kansi milina kum kubkwanking ati ebman,” ebmou. 8Ato ebmou ba, sienyi Daud weik atei bisik lika bublan dam bindoka bukmou. Ba, ton nang aryi, “Sienyi bublan dam yandoka bukmar,” ebmai. Ba, sienyi er tam Israel yin doun nang buluboka er dam yanmai. Ba, Daud biryi er yin doun nang asi uram lak eboka berekabokmou.

A talak akiryok Absalom tam nang mar ibinmai yin doun nang ara sun atei yuk-yuk barsengdonmai.

Daud Yerusalem dam tamuryanmou deyok

19:9-14

9Ura, sun Israel yala ninyi nirya bulubmaici, uram sisikoka kerebdanmai. Ara, ato eboka kerebdanmai, “Nun Israel nang asi Filistin nang yuk mutuk nang ab aryi obmasinto bok, Daud biryi lebdeiansou ba, nun teleb kuramoubwe. Ani, Absalom sienyi kibmo deyok aryi Daud bira nun mutuk a kuna kum kururci, yuk mutuk bindobwe. 10Uca, Absalom nun sienyi kiboka tikeibdamoubwe uca, sirya obmang. Ati, ura Daud bisi nunbabyi iniboka yandobibyi ura, tubto sienyi tikeibdobkwayeb,” ebdanmai.

11Uca, sun Israel yala nang aryi ato ebmai uram Daud kekebmou. Ura, Er Imtamnyi biti ninyi dama deirin nang imam nang si Zadok ab, Abyatar ab asi ato eboka uram ebdeibmou. “Yehuda yala nang sun wisi yoka nang asi ato eboka ebdurum, ‘Minob talak aryi nabdanindate ura, kikiman. Ucab, ton Israel nang aryi, “Nun atei yandoka sienyi kibsurum,” eboka sirya nabmaning bok, sun Yehuda nang aryi aminda namyanganmanurum do?’ ebdurum,” ebmou. 12Ura, sienyi Daud biryi Zadok ab, Abyatar ab asi ninyi bokdonokmouci, ton ato ebdeibmou, “Nira, yuknyi kuma, nun neik weit yabwe silib kunub ara ton bikdau do? Minob namnina kum kuanindau ara unati kuanindau do?” ebmou. 13Ura, Daud biryi ton Amasa bisi ato ebdeibmou, “Amasa, kanda ni ining kurum deyok aryi, Yoab yin doun nang sienyi kiamwe dinyi ara kansi ni yin doun nang sienyi kibkwandim. A ebman dinyi kunuboka wa kum karebkinyi ura, Er Iya Erebdobnyi biryi nisi ikin dinyi karebkwanir,” ebmou. 14Ukuboka Daud biryi Yehuda yala nang sun kanya nirya takeiboka nenebdeibokmou ba, sun Yehuda yala mutuk nang aryi sienyi Daud bisi, “Nai sienyi, kan ab, kan mabwe silib ab, kan miliramingnyi yin doun nang ab nirya yandarur,” eboka nabmai ba, inirbinmai.

Sienyi Daud Yerusalem dam tamuboka yanganmou ba, Simei bisik diryanmou deyok

19:15-23

15Ura, Daud anaboka er atei yanganmou ani, me Yordan kin yanmou. Sirya yanmou ura, Yehuda yala ninyi nirya anaboka bisik dirbinmai. Ani, Gilgal dam binmai ura, sienyi me Yordan boboka koubmai. 16Ani, Bahurim ateinyi Benyamin yalanyi Gera mi si Simei biryi minob Yehuda yala nang ab tonkwa yanmaici, sienyi Daud yanganmou dam bisik dirbinmai. 17Ani, Benyamin yala nang yubwa 1.000 baryi nang ab, Simei ab tonkwa dirbinmai. Ani, tonda Saul er ai ninyi sun wa irmiliramunyi si Ziba bibabyi dirbinmou. Anyi bira er mabwe 15 baryi nang ab, er wa il dimni nang 20 baryi nang ab tonkwa sienyi Daud me Yordan kum kouabwe bok, sun minob ola me kouboka otam binmai. 18Binmai ura, sienyi Daud ab, er mabwe silib ab asi, a bisik dirbinmai ninyi ati, “Ato kubnindarur,” ebmou to kunuboka me boboka koubmai. Ba, sienyi Daud me Yordan koubde bau talak aryi Gera mi Simei biryi kisok luknubdongoboka, sienyi bisi ato ebmou. 19“Nai sienyi, kan Yerusalem dam aryi anaboka baronmoumwe tum aryi kansi malyito kuankise dinyi teneibdeniminyei. Ani, kanci, ‘Anyi biryi ukuanou,’ tenen teneiboka diblilibniminyei. 20Ara, niryi kansi malyi kiankise dinyi, ‘Ara malyi dinyi kunuanse,’ tenenun. A deyok aryi, nai sienyi, arub aryi Yusuf deibdoba yala nang#19:20 “Yusuf deibdoba yala nang,” ena ara Yehuda yala nang kuma, eda me utam kuramnyi Israel yala nang yala takubaryi eramwe. kankan aryi ni minob bisik diroryanmakin,” ebmou.

21Ato ebmou ba, Zeruya mi si Abisai biryi ato ebmou, “Simei bira Er Iya Erebdobnyi biryi me kisok likeiboka sienyi tikeibunyi bisi suamwe ati, ersi ona ara kikiman!” ebmou. 22Uca, sienyi Daud uram lelekdaburyi, ato ebmou, “Zeruya mabwe se! Ni sun mangna kuma, arub aryi yu bobmanurum ara unati da? Arub ara Israel sienyi kiabnyi tum aryok Israel ninyi ton obkwaman ara kikiman kum,” ebmou. 23Ani, tubto uram ton lelekdobwe ara Simei bisi ato ebmou, “Iya dib en uram aryi, Simei kansi kum obkwamakin,” ebmou.

Mefiboset biryi sienyi Daud bisi bisik dirbinmou deyok

19:24-30

24Ani, Saul mi Mefiboset bibabyi Daud bisi bisik dirbinmou. Mefiboset bira er yan ab, er ongon aling ab ara me ton ilingdena ton kum kuramwe. Ani, er bana otong mitik ton kuruna kum kuramwe. Ara, yuma sienyi Daud anaboka yuk mutuk bai bukoka baronmou tum aryi kuboka da kuramwe talak nirya ur nining tukubde kuroramwe tok asi sienyi Daud tamuboka yanganmou ba, bisik dirbinmou. 25Sienyi dam sirya yanmou ura, sienyi biryi Mefiboset bisi ato ebmou, “Mefiboset kanda, ni ab tonkwa barona kum uca, unato ati takokamoumwe do?” ebmou. 26Uca, Mefiboset biryi ato ebmou, “Nai sienyi, nira yan camdinun ara kan bikmarim. A tum ara ni wa irmilinanyi Ziba bisi, ato eboka arukmase, ‘Sienyi milibkwan ati, bisam keledai ton kiknibdeiabnurum,’ ebmase. Uca, ni wa irmilinanyi biryi tola ati, kunusa dokmanou aryi nai sienyi, kansi kum milibmakise. 27Ani, ni wa irmilinanyi Ziba bira nai sienyi, kansi yu boankou aryi ni kum ebmase to kan dam yandoka, tola ati, ‘Mefiboset bira, “Ni abwe Saul iramwe wa nibiramnyi karebniting,” ebmarci Yerusalem atei kunmar,’ ebmakou. Uca, nai sienyi, kanda Imtamnyi uram eryuryangan nang atonyi kurum deyok aryi kanci, ‘Ukuna asi teleb,’ tenebmoumwe to ur kunubnurum. (kunubmoumwe.) 28Ati, Nai sienyi, ni nai sun mabsilib asi kanci obkwamarim ara da onmarum. Ucab, nira nai sienyi kanci, ‘Ni ab tonkwa a yibde bunkwanim,’ ebnoumwe ba, kan ab tonkwa kan ai a bukde yinunum. Ati, niryi nai sienyi kansi, ‘Ukubdum,’ eboka arukmanto kum,” ebmou. 29Uca, sienyi biryi ato ebmou, “Kanci uram ton da kum ebkwamarim. Eda, niryi sun nai Saul taleamwe tukwe asi noutam wilibdeibsinyi ba, binton dinatam-binton dinatam kibdeibkwamasin. Ba, Mefiboset kan dinatam kibdobminyi ura, kan kwit Ziba er dinatam kibdobkwamar,” ebmou. 30Uca, Mefiboset biryi ato ebmou, “Nai sienyi, kan sirya tamuboka yandobmarim deyok aryi, nun nai Saul taleamwe mutuk a nirya Ziba er kikwe ur talebdobdur,” ebmou.

Barzilai biryi Daud Yerusalem dam tamuboka banmou asi bisik bongbinmou deyok

19:31-39

31Ani, Gileadnyi Barzilai bibabyi Rogelim dam aryi kuboka yanmouci, Daud er atei tamuboka banmoua dam milibmou. Ba, tonkwa binmai ani, Yordan kin bongbinmou. 32Anyi Barzilai bira iya wisi danamwe. Anyi er kam kuramwe talak kwalina ara 80 baryi kwaliamnyi. Barzilai bira bona bonanyi kuramwe deyok aryi, sienyi Daud ab, er mabwe silib ab, er yin doun nang ab Mahanaim dam kuramwe talak ara ercok yina kareramwe. 33Ba, Yordan kin sirya binmai ura, sienyi Daud biryi ato ebmou, “Tamuboka kum binkwindim. Eda, ni ab tonkwa ni atei Yerusalem atei binkwinim. Yerusalem dam binimnyi ababyi, kansi tanglokina kum kubkwankin. Eda, kansi tuba dirlilinkwankin,” ebmou. 34Uca, anyi Barzilai biryi Daud bisi ato ebmou, “Tonkwa binimiryi kam kuboka kwalina unabaryi kwalibkwan ati, Yerusalem dam binkwamanim do? 35Ni a kunman kwalina ara 80 baryi kwalibman. Kam tuba kurantiniryi eboka, ‘Ara, malyi dinyi, ara teleb dinyi,’ bikoka wibkwamatinyi akwe ara tonkwa binkwamatinimnyi ara kikiman. Ani, kam bol tuba kunmatinyi ura, me yina babyi, yuk dinyi yina babyi, ni yinmatinyi dinyi to ena diboka bikwamatinyi ura tonkwa binkwantinimnyi ara kikiman. Ani, a kunman talak ara sal aryi mot semangnya lilim babyi, nerabwe aryi mot semangnya lilim babyi, kekebman talak kunmana kuma. Tonkwa binimiryi nai sienyi kansi sul kimdongokina li ati, tonkwa kum binkwanim. 36Nai sienyi nira kanci dengna weik dekwamanirim ati, bongyanmakina kuma. Eda, nai sienyi, tonkwa baninto atikwe yan yanina tentok me Yordan tonkwa kouboka otam bindoka kabdeibkwinkin. 37Ni kan ab tonkwa kum binkwanim. Eda, ni atei tamuboka bindobkwan ati mundu lobnurum. Tamuboka ni atei bindobniryi dibnyi ura, ni nai ab, ni kwin ab tukwe dongoamnyi dikum akwe nibabyi a dikum dongobkwaning. Ati, nai sienyi, nitoa ara ni mi Kimham bisi milibkici ba, kan ab tonkwa birurum. Binandurumnyi ababyi kanci ersi, ‘Ukurdeirina asi teleb,’ tenebminyi to da kubdeibkwandum,” Barzilai biryi ebmou. 38Ura, sienyi Daud biryi ersi ato ebmou, “Yo teleb, Kimham bisi ni ab tonkwa binkwanim. Binimnyi ura, kanci, ‘Ersi a dinyi asi karena teleb,’ tenebminyi to ersi karebkwan. Ani, niryi kansi ukubdeibmakin to dinyi ara kan mi asi ukurdeirinkwan,” ebmou. 39Sirya ato ebdanmarei ura, ninyi nirya me Yordan kouboka otam binmai. Ani, sienyi Daud ab, Barzilai ab sirya bongdan u kunkununa, u kunkunubdandobmarei ura, Barzilai er atei tamuboka bindobmou.

Sun Israel yala nang dinatam nang ab, Yehuda yala nang ab, sienyi Daud deisuma kerebdanmai deyok

19:40-43

40Ura, sun Israel nang meici kukoka ab, Yehuda yala tam nang ab aryi sienyi Daud boboka Yerusalem atei banmai. Ani, sienyi Daud bira Gilgal dam sirya binmou. Ara, Kimham bibabyi sienyi Daud bisi milibmou ba, tonkwa Yerusalem binmai. 41Uca, Israel nang ton yala nang buluboka sienyi Daud dam yanmaici ato ebmai, “Nunci sienyi kansi bisik dirbinmakitibyi ura kikiman. Yehuda yala nang aryi kan ab, kan mabsilib ab, sun milibmasungwe nang ab asi bisik dirbinmaking ara malyito kubmang,” ebmai. 42Uca, Yehuda yala nang aryi yuk Israel nang asi ato ebmai, “Sienyi bira nun yala atiba, sienyi bisi bisik dirbinmoubwe ati, ton dekmasir ba, taleboka yibmab ati enmarum do? Sun unati kerenmasurum da?” ebmai. 43Ba, Israel nang nirya aryi Yehuda yala nang asi ato ebmai, “Sienyi bira nun sienyi kobdoba kurur, sun kikwe sienyi kuma. Kiklirden ura, nunda er ai ninyi dam kobdob kunub. Ucab sunda, neik yala kundarur bok, kiklirden ura, liki takubaryi dinyi kundarur ati, sunda keilar ninyi kundarur. Akiryi nun kanya manunuk aryi nun sienyi kibkwansou ati, sienyi yanganmoua dam bisik minob dirbinmoubwe. Unati nunsi malyi kimasurum do?” ebmai. A kerebdanmai uram ara Yehuda yala nang aryi enmai uram ara uram wisi akwe mitik kum debmai. Uca, Israel nang nirya tam nang ara dikum uram akwe eboka kerebmai.

Currently Selected:

2Samuel Uram 19: MTG

Highlight

Copy

Compare