2Samuel Uram 1
1
Daud bisi, “Filistin nang aryi weik sienyi Saul obmang,” eboka eterebmai deyok
1:1-16
1Daud bira Amalek mutuk nang ab mar ordanmai ani, Amalek ninyi asi nirya obkiribmaici, tamuboka uki bitinyi Ziklag atei dam bindoka kunmou. 2Bindoka kunmou uca, uki winiryi tum ara Saul tamnyi yin dounanyi kamnyi tentok er ongon aling kwilikdandobmouci, er kisok dub tukwe lubdanmounyi ton, Daud dam binmou. Bindoka er kisok asi tukwe luknubdongoboka kibdobmou.
3Ura, Daud biryi a kamnyi bisi asibmou, “Kan dantam aryi yarim da?” eboka asibmou. Uca, anyi biryi, “Israel yin doun nang onmasinga kankan dam aryi bai bukoka yandobne,” ebmou. 4Ba, Daud biryi ersi tubto asibmou, “Una kubmasing? Ukubmasing to nukdum,” ebmou. Ba, anyi biryi ato ebmou, “Nun atei ninyi Israel yin doun nang ton nang ara bai bukoka da bindobmang. Ba, ton yin doun nang yubwa ilinto Filistin yin doun nang aryi obkiribmang. Ani, Saul ab er mi Yonatan ab ababyi obmang ba, dibmaring,” ebmou. 5Ura, Daud biryi a uram tol bobinmou kamnyi bisi ato ebmou, “Saul ab, er mi Yonatan ab, ‘Obmang,’ en uram tol ara dankiryi kekebmarimci, ebde yanmarim do?” ebmou. 6Uca, a uram ebde yanmou kamnyi biryi ato-ato eboka nukmou. “Nira mutuk Gilboa kon yandoka dinwe uca, Saul bira balang aryi dumuboka tikabwe bok, Filistin mar ordan ninyi ara bisam kuda aryi biribdongoboka kongkong eryibaraming keica deici bukoka ibangwe asi asing eibman. 7Ura, dirtamurdenwe uca, ni eibnuci nabdobnou. Uca, niryi ersi ato ebne, ‘Nai, uran do?’ ebne. 8Uca, erci nisi, ‘Kanda dan mutuknyi do?’ eboka asibno. Uca, niryi, ‘Nira Amaleknyi,’ ebwe. 9Ura, erci, ‘Ni dam yarum,’ ebno ba, er dam binwe ura, ato ebne. ‘Ni obmaning bok asi isin tuba nebneb enman ati, kanci tukwe taboka obnurum!’ ebwe. 10Ba, er dam yanwe ura, ‘Kam kum kubkwamar sirya obmanga,’ tenebne ura, ersi tukwe taboka obman. Sirya obne ura, sien nang kaluraming kisok kaluna kalubmoa langakdobnuryi, toubna er taruk dam ongoamwa kwiribdobmanci, yandobman. A dinyi kwiriboka bobman ara nai kan dam a boyan atiba,” eboka amubmou.
11Ato ebmou ba, Daud er boukwe aryi er ongobmou aling kwilikabokmou. Ani, er Daud ab tonkwa a kunmai ninyi ababyi, neiktoto sun ongobmai aling yuk-yuk kwilikabokmai. 12Ura, Saul ab, er mi Yonatan ab, Er Iya Erebdobnyi yin doun nang ab, sun Israel yala ninyi nirya obkiribmai deyok aryi, sun boukwe ati, yina si teboka engenmai tok asi kiting wekmou.
13Ura, er Daud biryi a ninyi tol uram bobinmou kamnyi bisi ato ebmou. “Kanda dan mutuknyi do?” eboka asibmou. Uca, a kamnyi biryi ato ebmou, “Ni nai ab, ni ab ara Amalek mutuk nang. Bok, nai kan mutuk dam a yandoka kununumnyi,” ebmou. 14Ba, Daud biryi a kamnyi bisi ato ebmou, “Una ebmarim? Kanda, Er Iya Erebdobnyi biryi me kisok dikeiboka kisal dakamunyi bisi taruk lakoka obmarim ara kan talinyi nun e!” ebmou. 15Ura, er Daud biryi er milinanyi tentok, “A yarum,” eboka nabmou. Ba, er dam tingbinmou ura, erci, “Anyi bisi ya ngang sekabdum!” eboka arukmou. Ba, a kamnyi bisi ya ngang sekabmou ba, dibmou. 16Ura, anyi sirya dibwe bok asi, Daud biryi ato ebmou, “Kandamnyi biryi, ‘Er Iya Erebdobnyi biryi me kisok dikeiboka kisal dakamunyi bisi obman,’ ebmarim deyok aryi, kandamnyi obdarim,” ebmou.
Daud biryi Saul ab, Yonatan ab obmai ba, dibmarei ati, urumna eboka engebmou deyok
1:17-27
17A urumna ara Daud biryi Saul ab, er mi Yonatan ab obmai ba, dibmarei ati, urumna eboka engebmou. 18Ani, a urumna ara, “Nun yala Yehuda nang asi eterebdarur!” eboka a urumna si, “Yin Deyok Urumna,” eboka si dobmou. A urumna ara, “Teleb Dinyi Akwe Kunun Nang deyok Kerek Sengna,” umbura sekyi.
19“Israel ninyi o, sun atei yin doun nang obnin binmang e,
sun mining mutuk kon dam aryi obnin bising e.
Se, sun atei yin doun sien nang bitinyi, iya obnin binmanga e!
20Gat yala ninyi asi, ‘Ato kuboka obmang,’ ebde bana mem e.
Askelon mutuk lumun dam kunung ninyi asi, ‘Ato kuboka obmang,’ ebde bana mem e.
Filistin mutuk kam nerabwe, sebnin bingnyei e,
Imtamnyi uram keken kum nerabwe lubnin bingnyei e.
21Gilboa mutuk konkon e, kekebnindarur!
Sun nai yabwe bitinyi obnin binmang mutuk e,
sun nai yabwe ting mo tubnin bicob e,
Saul er ting kat keil aryi kiknin ting ara e,
co yung luna kum ting mur arabcei e.
A deyok aryi Gilboa mutuk konkon dub ai asi mo yasicei e,
Sun wa in dam aryi mo doun deibsicei e!
Ati, gandum kum, yuk yina kum sun wa dam moubsicei e!
22Ninyi din nang ining lingdaramoumwe,
mar on nang minta angdaramoumwe,
nai Yonatan e, kan mar talyitam mentena kum kuramoumwe.
Nai Saul e, kan ya talyi irongna kum kuramoumwe.
23Saul ab, Yonatan ab asi ara kanyi deiamoubwe e,
A nang susuk namin teleb nang e.
Kam kurandungwe kum tangdarandungwe e,
Dibding ababyi kum takdaring e.
Maka bib ola asa yibarande ababyi menekbisibnin biring e,
Bai kam si singa mikib ababyi souki kibdeibnin biring e.
24Israel kam nerabwe Saul biti engendarur e!
Sunsi bol teleb kaluna kirmizi sunti yuk wimdeiriransunyi obnin binmang e,
Dengna weik keil emas kweirya kareransunyi dibnin binmar e.
25Se, nun nai yabwe mar ordana mikib weik nang,
Sun nai yabwe bitinyi nirya obnin binmang e,
Sun mining mutuk kon Gilboa dam aryi Yonatan obnin binmang e.
26Ni kwit Yonatan e,
kanti ni kanyi sungnir e,
kanda nisi kanyi iya deianoumwe e,
nibabyi kansi kanyi iya deiankunwe e.
Er kwin, er deianci ner aryi kanyi deiraming to kuranumwe.
Sun doamingnyi ner asi kanyi deiraming to, iya boukwe weik kimdanumwe, ni kwit e.
27Se, nun nai yabwe mar ordana mikib weik nang obnin binmang e,
Sun ninyi ordan yin nirya kum dandeibnin bing e.”
Saul ab Yonatan ab obmai ba, Daud biryi urumna eboka engebmou.
Currently Selected:
2Samuel Uram 1: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
