2Samuel Uram 18

Daud tam nang aryi, Absalom ab er yin doun nang ab obmai deyok

18:1-18

1Ura, Daud er milibmai yin doun nang yubwa asi wimou ara yin doun nang olong yubwa 1.000 baryi-1.000 baryi kiboka wibmou. Ani, a olong yuk-yuk sun sienyi kibkwamnyi nang tentok-tentok wibmou. Ba, tonda a yin doun nang yubwa 1.000 baryi olong ara 100 baryi-100 baryi kiboka wibmou. Ani, a nang sun sienyi kibkwamnyi nang olong yuk-yuk nirya wibmou. 2A nang yubwa nirya asi olong winiryi wibmou. Ara, Yoab taleboka olong ton, er weit Abisai taleboka olong ton wibmou. Tonda, Gat ateinyi Itai taleboka olong ton wibmou. Ba, sirya wibmou ura, Daud biryi ato ebmou, “Nibabyi kum takwamasin, milibsinyi ba, tonkwa mar ibinkwamab,” ebmou. 3Uca, a wibmou yin doun nang aryi ato ebmai, “Nai sienyi, kan ab tonkwa mar ibana kum kubkwayeb. Sangkuna nun obde yanganmasingnyi ani, dinatam nang ton obsingnyi ba, ton nang bai bukoka bindobibyi ura, sun mundu kum lobmaci aryi nai kansi, ‘Obtibyi,’ tenen ingkirikoka nun nirya obsingnyei. Nai sienyi, kan obmakingnyi ara yin doun nang yubwa 10.000 baryi obingiryi, mundu lorande ato kubkwansunung. Ati, nai sienyi kanda tonkwa mar ibana kum kubkwayeb. Eda, kanda atei kunmaminci, nun mambul kubsici dinyi asi kiknibdeibsiminyi ba, boyangankwansing,” ebmai. 4Uca, Daud biryi ato ebmou, “Sun tenebmarum to asi kunubkwan,” ebmou. Ura, sun sienyi Daud bira atei lika bublan dam tikoka dinmou ba, er yin doun nang yubwa 1.000 baryi kuboka nang, mer yuk-yuk dakoka binmai. Ba, yubwa 100 baryi nang mer yuk-yuk dakoka binmai. 5Ba, sun sienyi Daud biryi Yoab ab, Abisai ab, Itai ab asi ato ebmou, “Ni deyok ati, ersi deyok deiboka ni mi Absalom bisi dilaka sangdeirina ara mem,” ebmou. Ba, Daud er yin doun nang nirya a ebmou uram kekebmai.

6Ato ebmou ura, er Daud yin doun nang anaboka, dinatam Israel nang Absalom tam nang asi mar ibinmaici, Efraim mutuk taram bai kankan asi obdanmai. 7Ba, ordanmai ani, Daud tam Israel nang aryi Absalom tam Israel nang asi ilinto oboka erebdobmai. A obmai ninyi yubwa ara 20.000 baryi obmai. 8Ba, a mutuk dam obdanin banmai uca, era mutuk bai tikmaici, ninyi aryi obmai ninyi yubwa ara mitikto obmai bok, eda, a mutuk bai kankan dam aryi wanikdanmaici, bai keica aryi obkiribmou ba, da kum dansekmai nang yubwa ara yubwa ilinto dibmai.

9Ba, Absalom bira bisam keledai deici bukoka, mangkau asa yangau asi Daud tam yin doun nang ab ebdanmai. Ba, Absalom bira co kankan bisik kuboka cukoka barou uca, weik co tarbantin tikamuryi, taruk lekamwe aryi er kisok asi youbmou. Ba, er nong ara a co taruk deici youboka a dolobmou. Ba, er bisam ara a takloboka cungmou tok bindobmou. 10Ba, Daud tam nang ninyi tentok aryi diramwe uca, Absalom co taruk aryi ngang youboka bomtekmou asi asing eibmou ura, Yoab bisi ato ebmou, “Absalom co tarbantin kwa kisok deknebmararyi co dub bomtekmar,” ebmou. 11Uca, Yoab biryi Absalom ukubmoua asi asing eiabunyi bisi ato ebmou, “Una ebmarim da? Absalom asing eibmarim do? Ukuabwa asing eibumwe ura, bomtekmo asi tukwe taboka obtum ura, tukwetam oubloabtum ake! Ukuabtum ura, dengna weik keil si perak ikin kiklina takubaryi ab, der arikna tentok ab kuboka dekabkitinya,” ebmou. 12Uca, anyi biryi Yoab bisi ato ebmou, “Atei aryi yanganmoubwe ura, nun sienyi Daud biryi kan ab, Abisai ab, Itai ab ati, nun keken ai asi ato ebmasou, ‘Absalom bisi ni deyok ati, dilaka sangdeirina mem,’ ebmou. A deyok aryi dengna weik keil perak 1.000 baryi kareabnutum ba, ni taruk dam tuba douabtinyi talak ababyi sienyi mi asi kum obtinyi. 13Ani, niryi Absalom obtinyi ababyi, sienyi Daud bikoka onute ura, Yoab kanbabyi ni kum lebdobnutum,” ebmou. 14Uca, Yoab biryi ato ebmou, “Kan ab uram dakeiboka sisikde tingkwamanima kuma, uki dakbisibcei,” ebmou. Ura, Absalom co tarbantin kwa kisok dikmouci, kam tuba lulukoka, bomteng-bomteng enmou. Asi Yoab biryi ninyi on balang winiryi mirikna bisik dongoboka bobmoua dobtaleboka, lukoka obmou. 15Ura, Yoab er yin doun nang takubaryi nang aryi Absalom bisi kulaboka obmai ba, dibmou. 16Ura, Yoab biryi Daud tam Israel yin doun nang asi buu ena si sangkakala aryi, “Buu!” ebmou. Ba, Absalom tam Israel yin doun nang ati idombanmaia taklobmai. 17Ura, Absalom obmaia tukwi doboka a mutuk keil siling akamwe umbura dongobmai. Ura, keil ilinto maluk-maluk eboka alib siklibdongobokmai. Ba, Absalom tam Israel yin doun nang ara bai bukoka sun atei yuk-yuk binsekdobmai. 18Absalom er kam kuramwe talak ara er mi ton kum deiamwe. A deyok aryi, “Ni mi aryi aminda ni si bikwanira kuma ati, yuk ninyi aryi teneirdenkwanununga,” tenen a keica kikniboka er mining si akwe Absalom eboka si doamuryi, er asing dina kiknibdanamwe. A dinyi kikniamwe mutuk lu si ara Sien Nang Mutuk lu dam aryi kikniamwe. A kikniamwe keica ara uku talak ababyi tuba kubwe ba, a keica si ara, “Absalom asing dina,” enungci, a kikniamwe keica ababyi tuba kubwe.

Daud bisi, “Absalom obmang,” eboka tol eryanmai deyok

18:19-32

19Absalom sirya oboka keil buluboka maluk-maluk eboka siklibmai ura, Zadok mi Ahimaas biryi Yoab bisi ato ebmou, “Nira, sienyi Daud dam asi minob bindoka er mi obmanga tol erbinkun. Binyi ura, ato ebkun, ‘Nai kan mar ibkounyi Absalom bira Er Iya Erebdobnyi biryi obdeibmakir,’ erbinkun,” eboka molobmou. 20Uca, Yoab biryi Ahimaas bisi ato ebmou, “Sienyi mi asi obmang ati, kanci arub aryi er nai sienyi dam minob erbana mem. Eda, aminda aryi erbinkwanduma,” ebmou. 21Ura, Daud er wa irmilinanyi Etiopia mutuknyi bisi ato ebmou, “Ola bindoka sienyi Daud bisi kan asing eibmaminyi to liliboka ebkwandum,” ebmou. Ura, a Etiopianyi biryi Yoab bisi kisok luknuboka kibdobmou ura, cukoka erbinmou. 22Uca, Zadok mi Ahimaas biryi Yoab bisi ato ebmou, “Etiopianyi bokeibmarim ba, binmar dikum ni aminda binkun. Kerenmanici ababyi malyi, mundu lobniminyi ba, uram bobinkun,” ebmou. Uca, Yoab biryi ato ebmou, “Ami kanda unati titik-titik enmarim da? Kanci do bindoka una kubkwamarim do?” ebmou. 23Uca, a mi biryi ato ebmou, “Sangkuna kerenmanici ababyi malyi dirbinkwaman,” ebmou. Ura, er nai Yoab biryi Ahimaas bisi ato ebmou, “Ato ebmarim ura, ur birum!” ebmou. Ba, Ahimaas bira Yordan duman bisik kuboka ola cukoka binmou. Ani, Etiopianyi atei minob kum binmou bok, Ahimaas bisi minob atei binmou.

24A talak ara sienyi Daud bira ai umbura wengban lika bublan kan, ai kobdob wengban bisik bublan kan noutam bukmou. A dikum ara im dub lamna weleban bisik dam bukmou. Im dub bukoka atei kalingnanyi tentok dinmou uca, ninyi tentok ton o cungyanganmou asi asing eibmou. 25Ba, im dub lamna tikmouci, kalikmounyi biryi ato ebmou, “Ninyi tentok o cungyanganmar,” ebmou. Ba, sienyi biryi ato ebmou, “Ninyi tentok yanganmaci ura, teleb uram tol nun ton boyanganmariryi,” ebmou. 26Ani, atei kalingnanyi biryi tubto dinmou asi ninyi tentok ton aminda o cungyanganmou asi asing eibmou. Ura, atei kalingnanyi biryi sienyi Daud bisik bublan dam bukmou asi tubto ato ebmou, “Nai tubto ninyi ton aminda o cungyangar,” ebmou. Uca, sienyi biryi neikto akwe ato ebmou, “A yanganmaranyi bibabyi teleb yuk uram tol nun ton boyanganmararya,” ebmou. 27Ba, a kalingnanyi biryi sienyi bisi ato ebmou, “Yuma kobdob menengyanmaranyi bira Zadok mi Ahimaas yangarande to yanganmar,” ebmou. Ba, sienyi Daud biryi ato ebmou, “Anyi bira ninyi teleb aca, ati uram teleb boyanganmararya?” ebmou. 28Ba, Ahimaas bira Daud dam sirya yanmou ura, sienyi boukwe dam tukwetam kisok luknubdongoboka, ato ebmou, “Teleb nai! Kan Nai Er Iya Erebdobnyi biryi kan mar ikunung nang asi kan taruk dam karekurur. Ati, Er Iya Erebdobnyi bisi kisal dangna teleb,” ebmou. 29Ba, sienyi biryi Ahimaas bisi ato eboka asibmou, “Kamnyi Absalom bira ona kum kubmang do?” ebmou. Uca, Ahimaas biryi ato ebmou, “Nai sienyi, Yoab biryi, ‘Dirbirum,’ eboka aruknou ba, dirbaranwe uca, lilim weik eboka sili-wali enmongwe asi asing eibmonwe. Sun kunmongwe to ara, ‘Ato kunmang,’ tenena kum kubne,” ebmou. 30Ato ebmou ura, sienyi biryi Ahimaas bisi, “Barwetam o tingyibirum!” ebmou. Ba, Ahimaas sienyi ebmou to kunuboka o tingyibinmou. 31Ura, Etiopianyi aminda yanganmounyi sienyi dam yanmou. Yandoka ato ebmou, “Nai sienyi, nira uram teleb boyan ara arub tum ara kan mar ikunung nang nirya asi, Er Iya Erebdobnyi biryi obkiribokdaryi lebdeibkir. Ati, nira kansi ebde yan,” ebmou. 32Uca, sienyi Daud biryi tubto anyi bisi ato eboka asibmou, “Kamnyi Absalom bira ona kum kubmang do?” ebmou. Uca, Etiopianyi biryi ato ebmou, “Nai, kan mar ikunung nang nirya obmang, ton tangdongona kum kubmang. Ani, kamnyi Absalom bibabyi kansi mar ibkou deyok aryi kum takmang,” ebmou.

Absalom obmai ati Daud er boukwe kubmou deyok

18:33

33Ato ebmou ba, kekebmouci, sienyi Daud er mi Absalom boukwe aryi weik atei lika bisik bublan dam aryi weleboka im dub ai binmou ura, isin dakei-dakei engebmou. Ara, ato eboka engebmou, “We ni mi Absalom e! Kobe, ni mi Absalom e! Nisi oaniting ba, kanda kam kubmanto bok, obking ba, minob dibdim a!” eboka engebmou.

Currently Selected:

2Samuel Uram 18: MTG

Highlight

Copy

Compare