2Samuel Uram 17

Ahitofel biryi Absalom bisi arukmou dinyi asi Husai biryi uram sekmou deyok

17:1-14

1Ura, Ahitofel biryi Absalom bisi ato ebmou, “Nai sienyi, yin doun nang yubwa 12.000 baryi milibningnyi ba, arub lukunda aryok Daud bisi mar ibinkun ati, mundu lobnurum! 2Er Daud mitang asa aryi sulbalyi kubci talak aryi mar ibinkwaman. Bindoka mar ikaraknyi ba, er milinung nang ara bokwalwalabkabnyi ba, bai bukoka bangnyi talak ara Daud bikwe bindoka oboka yankun. 3Sun nai Daud obnyi ura, er milin nang ara ner te murubkwamangiryi iniboka er dobkwandinyi bisi iniboka kamdeiriraming to kuboka boyankwinkin. Ninyi nirya kum obkwaman eda, Daud tentok asi obdeibkwamakin,” ebmou. 4Ato eboka molobmou uram ara sienyi Absalom biryi, “Ur ukubdum,” eboka mundu lobmou. Ani, sun Israel nang wisi yoka nang ababyi mundu lobmai.

5Ura, Absalom biryi ato ebmou, “Kum binabmunyi talak ara Arki ateinyi Husai bisi asibdebibiryi, er ebkwande to nun ati, nabdarur,” ebmou. 6Ura, Husai bisi nabmai ba, Absalom dam yanmou ura, Absalom biryi ato ebmou, “Kanda Ahitofel ebmar to kunubkwayeb tenebmarim do? Una kubkwayeb tenebmarim? Kan tenebmaminyi to ur ebdum!” ebmou. 7Uca, Husai biryi Absalom bisi ato ebmou, “Ahitofel arub aryi arukmasir to dinyi ara malyito ebmasir,” ebmou. 8Ura, tubto Husai biryi ato ebmou, “Kan nai Daud ab, er milin nang ab ara mar ordana co biribwe nang bikmarim. Sunda bisam beruang aryi er mi ukula tomorongnyi ba, yu dongorande ato nang kunung ati ebman. Ani, kan nai bira ninyi ordana dukuta weiknyi kurur ati, er milinung nang ab tonkwa mana kum kubmanung. 9Eda, er yuk keil siling um kum, yuk dikum kum, da bindoka kalikmasirarya? Ati, sun mar ibamunyi asi kalikmasingnyi aryi anaboka ninyi mikbaryi kum obsingnyi ura, ato ebkwamasing, ‘Sienyi Absalom tam kibyi nang asi obkiribokib ba, mambul kanya boronga,’ ebkwamasing. 10Kan nai Daud bira mar ordana dukuta weiknyi kurur ara nun Israel ninyi nirya bingnub. Ani, kan nai Daud er milinung yin doun nang ababyi mar ordana co biribwe nang akwe milinung. Ati, mar ordana co biriboka dabub weik nang ababyi sirim talebkwansurur. 11Ati, niryi sienyi Absalom kansi arukwinkin dinyi ara ato kubdum: Israel nang kundarur tok nirya, Dan yala nang mutuk aryi kuboka, Bersyeba dam kunung tok nirya kan dam buluryangana teleb. Ba, weik me kwan kubkub aryi me wininga kilingnande to kubci ura, kanbabyi tonkwa obdankwayeb. 12Daud er kurur dikum asi mar ibinmabyi ura, er ab er milinung nang ab asi, mo doum-douma aryi mutuk nirya orlirande to kuboka, sunsi nirya obkiribkwayeb. 13Ani, Daud bira bai bukoka yuk atei bindobci ura, nun Israel ninyi a kunub tok nirya anaboka, a bindobmaici atei lika asi tabwe kwaburya diribdongoboka dalubkabokwayeb. Ba, akatei lika doamingnyi lika keil ara daluboka sungsunga ababyi nirya caboka me dongobkwayeb,” Husai biryi ebmou.

14Ura, Absalom ab, sun Israel ninyi nirya ab aryi ato ebmai, “Husai biryi ebmar uram asi kunubkwayeb. Ba, Ahitofel ebmar uram ara takwayeb,” ebmai. Ato ebmai dinyi ara Ahitofel ebmou uram asi kunubmating ura, Absalom ona kum kubkwamating uram ebmou. Bok, Ahitofel a ebmou uram asi kum kunubmai. Ara, Er Iya Erebdobnyi biryi, “Absalom bisi ur obnung,” tenen mundu lobmou deyok aryi Husai ebmou uram asi kunubmai.

Daud bira Mahanaim atei bai bukoka bindobmou deyok

17:15-29

15Sirya ato ebmou ura, Husai biryi Er Imtamnyi biti ninyi dama deirin nang imam nang Zadok ab, Abyatar ab asi a uram erbinmou. Sirya sun dam binmou ura, ato ebmou, “Ahitofel biryi Absalom ab, yuk Israel sien nang ab asi, ‘Daud tentok oboka yanyi ura, er milin nang ara ona kumkum ur iniboka yankun,’ ebmar. Uca, niryi a ebmar uram asi seksiniboka ato ebman, ‘Ninyi nirya buluboka tonkwa obdankwayeb,’ ebman. 16Ati, ninyi ton Daud bisi bokdonokminci uram ara ato ebdeibdum, ‘Absalom ab, er milin nang ab aryi tonkwa yandoka obkiribsingnyei ati, arub lukunda ara me Yordan dam yini mutuk baraming bisik dam ara mana mem. Eda, bisik dam me Yordan kouboka minola yuk dikum bindoka inibdobkwandarur,’ ebdeibdum,” ebmou. 17A talak ara Abyatar mi Yonatan ab, Zadok mi Ahimaas ab ara Yerusalem atei lika linkwa baitam kuboka, me si En-Rogel u anaramwa dam asi kurandei. Yerusalem atei wengbana ara ninyi eirina ilil aryi a kurandei. Ba, Daud moun-moun enmangnyi uram ara sun il arungni kam nerabwe aryi, Daud bisi erbinkwamangnyi uram minob sun dam eryangaramnyi to kuboka sun dam eryanmai. 18Uca, a tum ara mi tentok aryi a uram eryanmai asi asing eibmou ura, Absalom bisi bindoka lak eterebmou ba, bikmou. Ura, Yonatan ab, Ahimaas ab minob ola anaboka Bahurim atei bindobmarei. Ura, ninyi tentok asi er ai wekdobmareici, anyi er me kwena ati kikniamwe me umbura wengdoryurbinmarei. 19Ba, akatei damnyi er ner aryi, “Eiboka obingnyei,” tenen kaluna dobtaleboka a wengbinmarei bisik bublan dam kalubdeiboka siklibdongobmou. Ura, roti kikniraming keica du a kaluna deici yamubdeibokmou. 20Ba, Absalom milin nang ara akatei dam yanmaici a ner asi asibmai, “Ahimaas ab, Yonatan ab a ton yanmaring do?” eboka asibmai. Uca, a ner aryi a yanmai nang asi ato ebmou, “Me kouboka otam bindobmaring,” ebmou. Ba, ingkirikdenmai ura, a nang ara tamuboka Yerusalem atei bindobmai.

21A ingkiringyanmai nang tamuboka sirya Yerusalem atei bindobmai ura, a bitinyi nang me kwena umbura wekmarei ara anaboka bindobmarei. Banmarei ani, Daud bisi bindoka ato ebmarei, “Ahitofel biryi nai kansi, ‘Daud orbindarur,’ eboka arukmakir. Ba, oryankwamaking ati, minob anabdobminci a me kouboka, do tam bindobdum,” ebmarei.

22Ura, Daud ab er miliramnyi ninyi ab nirya kiting kum tingyanabwe talak aryok, me Yordan kouboka otam bindobmai bok asi kiting tingyanmou. 23Ba, Ahitofel dinmou uca, er ebmou uram asi kununa kum kubmaici, Husai ebmou uram asi kunubmai. A deyok aryi bisam keledai yangaboka buna tabwe biribdobwe ura, er atei Gilo dam bindobmou. Er ai binmou ura, er ner ab, er mabwe ab, er nermabwe ab asi sirya dukeiboka, ebkatabdeibmou ura, erdamnyi tabwe youbdanmou. Ba, a youbdanmou asi asing eibmai ura, lobkweteboka er nai tukwe dongoamnyi bisik akwe neik bisik tukwe dongobmai.

24Ba, Daud ab, er miliramnyi nang ab ara atei si Mahanaim dam sirya bindobmai. A bindobmai talak ara Absalom bira Israel yin doun nang nirya buluboka sun tonkwa me Yordan koubmaici, mar ibinmai. 25Minob Daud sienyi kiamwe talak ara Yoab bira yin doun nang sienyi kuramwe. Ba, ukuryok Absalom sienyi kibmou talak ara ninyi si Amasa bisi Yoab kuramwe olong unubdeibmou. A unubmounyi Amasa er deiamyi deyok ara ato: Yuma Nahas nebnyi si Abigail deiamwe. Ba, Abigail biryi Ismael yalanyi si Yitra doamuryi, Amasa deiamwe. Ba, er du ner Zeruya bira Yoab deiamwe. Ato kuboka deiandei aryi a nang ara weit ner mi, du ner mi kurandei. 26Ura, sun Israel nang ab sun sienyi Absalom ab ara Gilead nang mutuk dam bindoka keis ol ai doboka mabmai.

27Uca, a talak ara Daud bira Mahanaim dam sirya bindobmou. Binmou ba, ninyi winiryi sunsi kibdobmai ura, du dongobmou. Ara, a ninyi winiryi ara Amon yala mutuk Raba ateinyi si Nahas mi Sobi ab, Lodebar mutuknyi Amiel mi si Makhir ab, Gilead mutuk atei si Rogelim ateinyi si Barzilai ab kuramnyi. Sunci ato ebmai, “Daud ab, er milin nang ab yini mutuk bisik kuboka yina ab, me ab bulung-bulung yanmang. Ati, yina bulubdeibkwayeb,” ebmaici bulubdeibmai. 28-29Ani, sun man amsuna ab, roti kwaning ab, me ab yin meyok ab, yun kuali ab, roti kiknin keica gandum ab, jelai ab, gandum bama kibmaning dinyi ab karebmai. Ani, bisam sapi moum yung aryi kiknin dinyi dadih ab, keju ab, kacang mitik dinyi ab, weik dinyi ab, kwiryi me ab, bisam kambing domba mikbaryi ab sun yina totoa bulubdeiboka karebmai.

Currently Selected:

2Samuel Uram 17: MTG

Highlight

Copy

Compare