2Samuel Uram 16

Daud ab, Ziba ab ebdanmarei deyok

16:1-4

1Ura, Daud Zaitun yo mutuk kon sirya diniboka tingbau talak akiryok ninyi si Ziba yanmou. Ziba bira Mefiboset er wa irmilinanyi kuramwe. Ziba bira bisam keledai bitinyi deici asi, roti inin yubwa 200 baryi ab, kue kismis yubwa 100 baryi ab kiboka bobmouci, yanmou. A talak ara co du moun li deyok aryi co du yala amuma-amuma ton boyanmou. Ani, tonda anggur du me kin aling ilila aling aryi kiboka boyanmou. 2Ukuboka boyanmou ba, sienyi Daud biryi Ziba bisi ato eboka asibmou, “Kanda una tenebmarimci, anda keica boyanirim do?” ebmou. Uca, Ziba biryi ato ebmou, “Bisam keledai yim ton ner ton boyasin dinyi ara kan nerabwe ab, mabwe nermabwe ab, kan ab yini mutuk a kuramunci a bisam deici bukoka yibankwandum ati, boyanmasin. Ba, roti kwaning ab, co du ab ara sun yirona ati boyanmasin. Ba, anggur du me bobmasin ara mitang kubsici talak yironkwandum ati boyanmasin,” ebmou. 3Ura, sienyi Daud biryi ton ato eboka asibmou, “Kan nai sienyi Saul mi Yonatan biryi deiamwe mi Mefiboset bira dan kunmar do?” eboka asibmou. Uca, Ziba biryi Daud bisi, “Mefiboset bira, ‘Ni abwe Saul sienyi kiamuryi, iramwe wa ara nibabyi karebniting,’ tenen aryi Yerusalem atei dam kunmar,” ebmou. 4Ba, sienyi Daud biryi Ziba bisi, “Ato kubkwamaci ura, ni li kubmanir ati, Mefiboset talerur bona nirya ara kan dinyi akwe kibkwande,” ebmou. Uca, Ziba biryi ato ebmou, “Nai, sienyi kan ebminyi toka! Nai kanci nisi boukwe kibnirim ati, ni babya,” ebmou.

Simei biryi Daud bisi kereboka submou deyok

16:5-14

5Daud bira mutuk si Bahurim dam binmou ura, ninyi tentok Saul yalanyi Gera mi si Simei a mutuk dam aryi anaboka Daud dam yanmou. Ura, Simei biryi Daud bisi yandoka kereboka submou. 6A talak ara sienyi Daud bira er yin doun nang dina-dina tikmaia kankan noutumang tikmou bok asi Simei biryi Daud ab er yin doun nang ab asi keil donokoka kulabmou. 7Ura, Simei biryi Daud bisi ato eboka kereboka submou, “Yu ilintonyi! Ninyi oryin! Ola bindobdum! Ola bindobdum! 8Kanci, Saul sienyi kiamwe dinyi asi ukula araboka dobumwe! Saul er ai ninyi ab, er mabwe ab nirya obkiribumwe! Ato kubumwe deyok aryi, Er Iya Erebdobnyi biryi kan sienyi kibumwe dinyi ara kan mi Absalom bisi karebmar. Akiryi ukura talyi ur kubkwamarim. Ninyi oryin e! Kekebmarim do?” eboka submou. 9Ato ebmou ba, Zeruya mi Abisai biryi Daud bisi ato ebmou, “Nai sienyi, dianci kam atonyi biryi sumakir ati, ya ngang sekoka orbinkun. Ati, ur eboka, mundu lobnurum,” ebmou. 10Uca, Daud biryi ato ebmou, “A deyok ara Zeruya mabwe sun ab cabdandanya kuma, teleb aryi ur a submarur! Er Iya Erebdobnyi biryi, ‘Daud bisi subdur,’ tenen mundu lobmaci ba, sumanici ura, yuk nang aryi, ‘Daud bisi talyitam submarim,’ eboka asibkwamaranyi ton da kum kubmar,” ebmou. 11Ani, tonda Abisai ab, er wa irmilin nang ab asi ato ebmou, “Ni mi kobdoba ababyi, ‘Obkwaman,’ tenebmanou. Anyi bira yuk mutuknyi, Benyamin yalanyi bica ati, wanok yu bobkwamanoua. Ati, ersi uram sengsinina mem. Eda, er yuk ur a sumanurur. Sangkuna Er Iya Erebdobnyi biryi arukmaci ba, yandoka sumanurura nun ati, sengsinina mem. 12Simei biryi nisi subnou ba, mambul donun dinyi ara Er Iya Erebdobnyi biryi ni mambul donun dinyi asi, aminda lebdeiboka teleb dinyi karebkwanir,” 13Ato ebmou ura, er miliamnyi ba, tonkwa baramnyi nang ab, Daud ab ara barmururonmai. Ba, Simei bira Daud ayum banmai mutuk as tam kuboka akwe dinatam banmouci, Daud bisi kereboka subnin, keil dobnin, tukwe luboka aknin banmou. 14Ba, Daud ab, er milibmai ninyi ab ara banmai ani, mitang kubmou ura, me Yordan kin bindoka dikdik sebmai.

Husai ab, Ahitofel ab aryi Absalom dam binmarei deyok

16:15-23

15A talak ara Absalom ab, Israel nang nirya ab Yerusalem dam yanmai. Ani, Ahitofel bibabyi sun milibmou ba, tonkwa yanmai. 16Yanmai ura, Daud er kwit si Husai, Arki mutuknyi bira sienyi Absalom ab ebdanmareici, ato ebmou, “Kan sienyi iya tikwandim! Kan sienyi iya tikwandim!” ebmou. 17Uca, Absalom biryi Husai bisi tamuboka ato ebmou, “Kan kwit Daud ab tonkwa kururum ara ato akwe erum do? Kan kwit sienyi Daud bisi bindobmatum ba, tonkwa kuronmatururum,” ebmou. 18Ato ebmou uca, Husai biryi Absalom bisi, “Er Iya Erebdobnyi ab, a wekmarum nang nirya ab, sun Israel yala nang a nirya ab aryi wiboka sienyi tikdeiantibyi sienyi bisi ni milibkwaman ara kikiman. 19Ati, ura dan sienyi bisi er wa irmilinkwanun do? Kanbabyi Daud mi akwe kurum. Kan yuknyi kuruma kuma. Sienyi Daud wa irmilinanyi kibmanyi ababyi, er mi kan wa irmilinanyi kibmanyi ababyi neiktoto wa akwa,” ebmou.

20Ura, Absalom biryi Ahitofel bisi ato eboka asibdenmou, “Kanda una kubkwayeb tenebmarim do?” eboka asibmou. 21Uca, Ahitofel biryi Absalom bisi ato ebmou, “Kan nai, Daud nerabwe, aminda dortabangni nerabwe atei a takloboka biu ba, ai kalikde kunung nerabwe asi, yobdobdum! Ba, Israel ninyi kan tam kibkei ninyi aryi, ‘Er nai Daud bisi dib mar ibwe,’ tenebingiryi, sun yu wekwande ati,” ebmou. 22Ato ebmou ura, ai im dub lamna deici asi keis ol ai dobmai. Ura, Absalom biryi er nai Daud nerabwe aminda dortabangni nerabwe nirya Israel nang dinmaia urasin dam yobde manmou. 23A talak ara Ahitofel biryi ebmaci to ara Imtamnyi biryi ebmar to ebmara, tenen er uram kunuramnyi. Ba, minob talak ababyi Daud biryi Ahitofel uram kekeramwe to akwe, Absalom bibabyi Ahitofel uram kekeboka kunuramwe.

Currently Selected:

2Samuel Uram 16: MTG

Highlight

Copy

Compare