2Samuel Uram 15

Absalom biryi, “Ni yuk sienyi kibkwan,” tenen duknuboka il doramwe deyok

15:1-12

1Er Absalom bira sienyi Daud dam binmou ani, sirya er atei tamuboka yanmou. Ura, bisam kuda asi biribdongoboka kongkong eboka bobaraming keica si kereta tentok kiknibdeibmou. Ura, ninyi 50 baryi nang miliboka menekwamai nang ababyi wiboka bobulubdeibmou. 2Ura, a berengnamwe uki nirya belekuna kobdob ara sienyi atei bisik wengban lika bublan dam asi tingbaramwe. Bindoka tikmaci aryi, sun deyok yuk-yuk sienyi biryi lilibkwamaci ati akai bublan dam wengbanmangnyi ninyi asi taleboka ato eboka asiramwe. “Kanda una ateinyi do?” eboka asiramwe. Uca, Israel nang aryi, “Nai, nira Israelnyi,” eramnyi. Ani, sun atei yuk-yuk si siboka, “Nai, nira akateinyi,” eboka sun atei si siramnyi. 3Ato ebingnyi ura, Absalom biryi sunsi ato eramwe, “Sunci, ‘Malyi deyok lilibdeibsurur,’ tenen er yanganmarum ara dib telebto kubmarum. Bok, sienyi biryi malyi deyok lilin nang ton wiboka wa karena kum kubwe. Akiryi sun malyi deyok lilibdeibkwamasiranyi sienyi dam ton a kum kurur,” eramwe. 4Tonda ato eramwe, “Nisi malyi deyok lilinanyi kiantinyi ura, sun malyi deyok liliboka sun mundu lobdobto akwe lilirdeiransitinyi,” eramwe. 5Ba, Absalom dam yandoka kisok luknubdongoboka kibdobdinyi bira erci taruk taleboka u kunkunuroramwe. 6Sun Israel ninyi aryi sun malyi kun deyok asi, “Sienyi Daud biryi lilibdeibkwansir,” tenen boyanganmangnyi uca, Absalom biryi ato kuboka, sun Israel nang kanya bisik sekoka dororamwe.

7Ato akwe ukuramwe ani, kwalina dumbaryi bisibmou. Ura, Absalom biryi sienyi Daud bisi ato eboka asibmou, “Nai sienyi, nisi mundu lobniminyi ba, ni iya dib en uram aryi Er Iya Erebdobnyi bisi ebse to Hebron atei dam kunurbinkwan. 8Ara, ni Aram mutuk dam Gesur atei bindoka kuranse talak aryi ato eanse, ‘Nai Kan Iya Erebdobnyi, Kanci bisik lobdeibniminyi ba, dib ni Yerusalem dam tubto tamurbindoka sienyi dam binkwanyi ura, niryi Kansi si weik eboka Hebron atei dam molobkwankin,’ eanse to kunubkwan,” ebmou. 9Ato ebmou ura, er nai sienyi biryi, “Ur birum,” eboka mundu lobmou. Ura, Absalom anaboka mutuk Hebron dam binmou.

10Binmou ura, duknuboka uram erbinkwamai nang wibmouci, sun Israel ninyi nirya asi bokdonokmou. Bokdonokoka ato ebdeibmou, “Kekenmamunyi ba, buu ena lilim asi enmaci ura, ato ebkwandarur. ‘Absalom bira Hebron atei dam aryi Israel sienyi sirya kibmar e!’ ebkwandarur,” ebmou. 11Ura, Yerusalem atei aryi Absalom biryi ninyi yubwa 200 baryi nang nabmou ba, ersi milibmai ura, Hebron mutuk dam tonkwa binmai. A milibmai ninyi ara, “A deyok ati banmab,” tenena kum kubmai. Ani, uram lilik ababyi mitik ton kum bikmai cok asi talyitam milibmai.

12Absalom Imtamnyi biti dama deibkou ura, ninyi ton Gilo atei dam bokdonokmou ba, Ahitofel bisi inirbinmai. Anyi bira sienyi Daud bisi kalikoka, “Ato-ato kubkwandum,” enanyi kiamunyi bisi nabmou ba, er atei aryi inirbinmai. Ato kuboka Absalom tam nang ilinto kibde baramiryi Daud bisi, “Dobkwetebkwayeb,” tenen mar ibmai.

Sienyi Daud Yerusalem dam aryi anaboka yuk atei duknurorbinmou deyok

15:13-37

13Ura, ninyi tentok sienyi Daud dam asi uram ton boyandoka ato ebmou, “Israel ninyi nirya Absalom tam akwe kibseking,” ebmou. 14Ato ebmou ura, sienyi Daud biryi er wa irmilin nang Yerusalem dam tonkwa a kunmai nang nirya bulubdeiboka uram sisikmai. Ura, sienyi Daud biryi ato ebmou, “Absalom biryi yandoka obsicei ati, anaboka yuk atei binsekdobkwayeb. Uki kunmabyi ura, Absalom ab, er tam nang ab aryi nunsi iyandoka akatei ninyi nirya ya sekoka obkiribsicei ati, ola bindobkwayeb,” ebmou. 15Uca, er wa irmilin nang aryi ato ebmai, “Nai sienyi, kan ebminyi tok, Nai nunbabyi anaronkwamab,” ebmai. 16Ato ebmai ura, sienyi Daud ab, er nerabwe mabwe ab, er wa irmilin nang ab, anaboka bindobmai. Bok, er nerabwe aminda dortabangni nerabwe takubaryi ara takloboka binmou ba, er atei a kalikmai. 17Ura, sienyi Daud ab, er nerabwe mabwe nirya ab, er wa irmilin nang ab anaboka banmai ani, sirya kubkub dorbinamnyi ai dam binmai. 18Ura, sienyi Daud er wa irmilin nang ara er dinatam tikoka lelebmai. Ba, er kalingna yin doun nang Kreti nang ab, Pleti nang ab ara leleboka menekoka banmai. Ba, yuk yin doun nang yubwa 600 baryi nang ara Gat nang dam aryi er urasin deibmou tam leleboka menekmai.

19Ura, sienyi Daud biryi dinmou uca, ninyi si Itai Gat ateinyi yin doun nang 600 baryi sienyi bibabyi sun milibmou ba, tonkwa sun ab banmai asi asing eibmou. Ura, ato ebmou, “Kanda, kan sienyi ukuryok tikeibdobmarumnyi bisi tamuboka bindobdum. Unati nun milibmasirim do? Kanda nun ateinyi kuma eda, yuk atei aryi tingyamwe cok nun milibmasirim ati, tamuboka weik atei birum! 20Kanda ambutum aryi tingyanabum cok asi, ‘Bindobkwanim ati, anabdobdum,’ ebmakina kuna talyi yanganmarim atiba. Tamuboka kan atei ninyi a yanganmarum nang ab nirya tamuboka Yerusalem atei bindobdarur. Tamubmamunyi ababyi, Er Iya Erebdobnyi biryi busul kiboka boukwe kimkurur dinyi kan dam karekina teleb,” ebmou. 21Uca, Itai biryi a uram dobdonokoka ato ebmou, “Nai sienyi, Er Iya Erebdobnyi kam kun dinyi deici ab, Daud kan kam kun dinyi deici ab aryi ebkun: Kanbabyi dibminyi to nibabyi dibkwan, Kanbabyi dantam baminyi to, nibabyi iya milinkwankin,” ebmou. 22Ura, sienyi Daud biryi ato ebmou, “Ato ebmarim ura, ur ou bandarur!” ebmou. Ato ebmou ura, Itai Gat ateinyi ab er milibmai nang ab, er ai ninyi nirya ab menekmai. 23Sienyi Daud ab, er yin doun nang ab anaboka sun atei Yerusalem atei takloboka yuk mutuk binkoui ati, tonkwa bana kum kubmai ninyi nirya ngolokoka engebmai. Ura, yin doun nang ab, sienyi Daud ab ara me si Kidron kilok dem asi kouboka yini mutuk bisik binmai.

24Ani, Er Iya Erebdobnyi biti ninyi dama deirin nang Zadok babyi, Abyatar babyi, Lewi yala nang Imtamnyi biryi, “Ukubdarur-ukuna mem,” ena uram deirin co sangkol bon nang babyi bobmai ba, tonkwa banmai. Akiryi Imtamnyi co sangkol asi Yerusalem weik atei lika bublan baitam kuboka deibdongoboka tikmai. Ba, Daud ab tonkwa binkwamai ninyi nirya Yerusalem atei lika bublan dam bisiboka binsekdobmai ura, a co sangkol dobtalebmai. 25Ura, Daud biryi Zadok bisi ato ebmou, “Imtamnyi co sangkol neik bisik tamuboka Yerusalem atei minob deiamungwe dikum bindoka deibdarur! Bindoka deiamunyi ba, Er Iya Erebdobnyi biryi nisi Er boukwe kubci ba, urasin dangubdeibnici ura, a co sangkol ab deiaminyi dikum ab asi yandoka asing eibkwan. 26Ucab, Imtamnyi biryi, ‘Niryi kansi kanyi ton kum deibkise,’ ebnici utiba kuma. Eda, Imtamnyi Erci, ‘Teleb,’ tenebci to da kunubci obnun ati ebman,” ebmou.

27Ani, sienyi Daud biryi Imtamnyi biti dama deirinanyi imam Zadok bisi tubto ato ebmou, “Kanci, ‘Akatei dam ukunmar,’ dinyi diboka bikmarim. Kanci ato dinyi eibmaminyi ura, kan mi Ahimaas ab, Abyatar ab, er mi Yonatan ab, inibdobminyi ura, ur Yerusalem atei bindandarur. 28Ba, nira me kouboka yini mutuk ban dikum a kunmaniryi uram kekebde kunkwaman ati, bikandarur. Ni moun-moun enmangnyi ura, minob ni dam eryankwanindarur,” ebmou. 29Ura, Zadok ab, Abyatar ab, Lewi yala nang Imtamnyi co sangkol boboka tamubmareici, Yerusalem atei yandoka deiandeici, kurandei.

30Ba, Daud bira er yan ongona ara ongorona kumkum kisok kalun aling kalubdobmouci, engebnin Zaitun kon welebinmou. Ani, er milibmai ninyi nirya ababyi, kisok kalun aling aryi kaluboka engebdoro mutuk kon welebinmai. 31Welebinmai ura, kekenmai uca, Daud bisi uram ton boyanmaici, ato ebmai, “Ahitofel bibabyi Absalom tam kibdobmararyi uram tonkwa sisikmang,” ebmai. Ura, Daud biryi Er Iya Erebdobnyi bisi ato eboka molobmou, “Nai, Iya Erebdobnyi, Ahitofel biryi Absalom bisi ebdongobmar uram ara kunubcei. Kanci, a uram asi seksinibdum,” eboka molobmou.

32Ba, Daud Zaitun kon dam ninyi aryi Er Imtamnyi bisi si weik eboka moloramnyi dikum binmou. Ura, ninyi tentok Arki mutuknyi si Husai ab ebdanmarei. Anyi cang dolengna ongon aling ara kwilikdamuryi, er kisok ara tukwe aliroramwe. 33Ura, Daud biryi anyi bisi ato ebmou, “Kan ni milibniminci, tonkwa a kunmabyi ura, ni sul kibdongobkwamanirim. 34Eda, atei tamuboka biminci, sienyi Absalom bisi ato ebkwandum, ‘Nira kan wa irmilinanyi kibkwankin. Minob ara kan nai Daud wa irmilinanyi kianse. Ani, ukura kan wa irmilinanyi kibkwan,’ ebkwandum. Ato ebminyi ba, Ahitofel biryi ni deyok ati, Absalom dam ebdongobmar uram asi ukuboka seksinibkwandum. 35Ani, Zadok ab, Abyatar ab Er Iya Erebdobnyi dama deirin nang imam nang ara sun ab tonkwa a kundarur. Ati, yuk-yuk uram sienyi atei dam aryi enmangnyi uram kekebminyi ura, Zadok ab, Abyatar ab dam asi yandoka ebkwandum. 36Ani, tonda ni talak donmaningnyi uram kekebminyi ura, Zadok mi Ahimaas ab, Abyatar mi Yonatan ab deici asi ebdeibminyi ba, ni dam minob eryankwandurung,” ebmou.

37Er Daud biryi er kwit Husai bisi ato ebdeibmou ba, Yerusalem atei binmou. Ura, Husai Yerusalem atei dam tingbau talak akiryok Absalom bibabyi Yerusalem atei yanmou.

Currently Selected:

2Samuel Uram 15: MTG

Highlight

Copy

Compare