2Samuel Uram 14

Absalom er atei Yerusalem tamuboka binmou deyok

14:1-33

1Uki weikto kuramnyi talak ara Zeruya mi si Yoab biryi diramwe uca, sienyi Daud kanya ara, “Ni mi Absalom ab ebdatinimnyi,” teneramwe asi bikmou. 2Ura, Yoab biryi Tekoa atei ner tentok etekdob bingna bingnamwe ner nun asi nabmou ba, er dam iniboka yanmai. Sirya iniboka er dam yanmai ura a ner asi ato ebmou, “A ner, kanci teneboka boukwe asa kuramingiryi, kuraming to kisok kalun ongon aling ongobdobdum. Ba, tong teleb erande co yung lurdana ara mem. Eda, ur demang binkwandum. Ura, sun kanyi deiamingnyi ninyi dibmangnyi ba, bindoka engeraming nerabwe kuraming to kubkwandum. 3Sirya ukubminyi ura, sienyi Daud bisi bindoka ato ebkwandum,” ebmou. A uram ara Yoab biryi Daud bisi ebman to uram bok, a ner deici deibmou ba, Daud dam erbinmou.

4A ner sirya sienyi Daud dam ai wengbinmou ura, kanubdongoboka, sienyi Daud bisi kibdobmouci, ato ebmou, “Nai, sienyi nisi lebdobnurum!” ebmou. 5Uca, sienyi Daud biryi ato eboka asibmou, “A ner, kanda unati yarim do?” eboka asibmou. Ba, a ner aryi ato ebmou, “Ni akenyi dibdobwe ba, sulyi ner kunun ati, boukwe kibnurum. 6Ni kan wa irmilin ner ara mabwe bitinyi deibdanse bok, wa dam sun mamun obdanin yibanmarei uca, tonyi biryi tonyi bisi obwe ba, dibwe. 7Ba, ni ai ninyi nirya aryi mar ibnici, ato enunung, ‘Er kwit bisi obwe mi ara dobkwetebminyi ba, erbabyi talebdanin binkwanding,’ enunung. Ani, tonda ato enunung, ‘Tonyi bibabyi obkaboka sun bona talena ab mutuk ab nirya kum danabdeibokwayeb,’ eboka ni akenyi yala kum dandeibkwamingci ato enung ati molobmakin,” ebmou.

8Ba, sienyi Daud biryi a ner asi ato ebmou, “Kan a ebmarim to nirya kunubkwankin ati, kan atei ur birum,” ebmou. 9Ato ebmou ba, a Tekoa atei ner aryi sienyi Daud bisi, “A deyok nirya ara nai sienyi kan ab, kan ai ninyi ab asi kum kisibdongobkwamakin. Eda, a deyok nirya ni dam ner ab, ni ai ninyi ab deici kubkwande,” ebmou. 10Ura, sienyi biryi ato ebmou, “Kan dam asi ninyi ton tubto er yangakingnyi ura, a ukuryanmakirinyi bisi boboka ni dam ola boyankwandum! Ba, aminda tubto kum dumyankwanking ati,” ebmou. 11Ura, a ner aryi ton ato ebmou, “Nai sienyi, kan Nai Er Iya Erebdobnyi bisi molobliknibnurum. Ba, ni mi ton mi dibwe deyok ati, weik deyok kiboka kam tuba kurur mi asi obingnyi ba, ni mabwe yala kum dandeibingnyei,” ebmou. Ba, sienyi biryi a ner asi ato ebmou, “Er Iya Erebdobnyi, Kam kururnyi si deici aryi ebkun. Kan mi er otong lublub tentok ababyi ton a tukwe dam bumsangna ton kum kubkwande,” ebmou.

12Uca, a ner aryi ato ebmou, “Nai sienyi, uki ton lobdeiabnurum! Ni uram tentok kan dam ton ebkun,” ebmou. Ba, “Ur ebdum,” ebmou. 13Ura, ato ebmou, “Nai, sienyi kanci, Er Imtamnyi uram keken nang asi, ‘Ukuboka lebkwankin,’ ebmarim bok, kan mi dim kobdob asi yuk atei ton tingbiu ababyi, ‘Inirbindarur,’ eboka kum arukoumwe ba, kum iniboka yai cok asi ni deyok atikwe ‘Lebkwankin,’ ebmarim do? 14Ara, ato ati ebman, nun ninyi tukwetam a kunuba nirya ara dibkwayeb akwe kunub. Nun ninyi ara me tukwetam diklobmangnyi asi ton bulubde deiriranting akwe ura, kam iya kubkwantibyi. Eda, nun ninyi ara me tukwetam diklobingnyi ba, ananang erorande atoa kunub. Uca, Er Iya Erebdobnyi biryi nun ninyi asi ara kanya iya kum dororansir. Eda, Er Imtamnyi biryi, ‘Kam kibmaning dona kum kubkwan, eda, yukto bisik aryi dobkwan,’ tenesurur. Ato tenesurur to akwe nai kanbabyi bai donokumwe mi ara iya bai donongna mem. Eda, kan mi yuk atei bai donokumwe mi asi tubto iniboka yangana teleb. 15Nai sienyi, ni kan dam yanman ara nisi obmanto kununung ati, ni molona kekebkwanuruma tenen kan dam yanman. 16Ba, kanci, ni molona kekebniminci, ni ab, ni mi ab asi, obmanto kusunung dinyi asi lebdeibsurum. Ani, Er Iya Erebdobnyi biryi nun ai ninyi ati karebsou mutuk dam aryi, ‘Yakdonokwayeb,’ esunung dinyi asi nun lebdeibkwansirim ati, kan dam yanman. 17Ani, nai sienyi, kanda Imtamnyi uram erban nang aryi malyi dinyi babyi teleb dinyi babyi bikoka wimdaming nang bitonyi kurum. Akiryi ni kanya katabum ebdeibmanirim. Ati, Er Iya Erebdobnyi bira nai sienyi kan ab tonkwa kuna teleb,” ebmou.

18Uca, sienyi biryi a ner asi ato ebmou, “Ni asibkwinkin uram ara kilindongna mem. Eda, lak ebkwandum,” ebmou. Ba, a ner aryi, “Nai sienyi, ura ur ebderum!” ebmou. 19Ura, sienyi Daud biryi a ner asi ato eboka asibmou, “Kan a eryanmarim uram nirya ara Yoab ab tonkwa sisikmarurumci ni dam lak eryanmarim do?” ebmou. Uca, a ner aryi ato ebmou, “Nai sienyi kansi malyi kiboka inina kum dokwamakin eda lak ebkun. Kanci enmarim uram nirya ara tola uram ton kum enmarim eda, dib sirik dinyi akwe enmarim. Nai kan dam a eryanman uram nirya ni kubmanto ab ara ni kanya manunuk aryi kansi kum eryanman. Eda, Yoab biryi ni amol umbura ebdongobmanou to kuboka kan dam eryanman. 20Yoab kan wa inanyi bira ato tenebmo, ‘Sienyi Daud biryi er mi Absalom ninyi atei bindoka kurur ara tamuboka Yerusalem yarur,’ tenen ati, kebdeiboka ebdeibmar ba, sienyi kan dam eryanman. Uca, nai sienyi kanda Imtamnyi uram erban nang aryi duknubdob dinyi bingnaming atonyi kurum aryi a mutuk dam kubmar deyok sirya bikmarim,” ebmou.

21Ura, sienyi biryi Yoab bisi nabmou ba, er dam binmou ura, ato ebmou, “Yo teleb, a moloryanmarim uram sirya kekebman. Ati, Yoab kanci Absalom yuk atei bindoka kurur ara ur inirbirum!” ebmou. 22Ura, Yoab biryi kisok luknubdongoboka sienyi Daud bisi kisal dangna dinyi molobliknibmou. Ura, ato ebmou, “Nai sienyi, kanci ni molobman dinyi kunubnirim ati, nisi kanyi deibnoumwe dinyi ara arub aryi bikne,” ebmou. 23Ura, Yoab anaboka mutuk si Gesur dam binmou ura, Absalom iniboka Yerusalem atei boyanmou. 24Boyanmou ura, sienyi Daud biryi ato ebmou, “Ni ai dam boyankwamanumwa kuma, er ai nong asi o bobinkwandum,” ebmou. Ani, Absalom sienyi dam ababyi bobana kum kubmou. Eda, er ai kobdoba bindobmou.

25Sun Israel yala nang kuramnyi nang kankan dam ara Absalom boamwe to teleb urasin ara ton yuk nang ton da kum kuramnyi, eda er tentok urasin iya teleb boamwe. Er yan tang aryi kuboka kisok lublub ara ton tingkwanirdena ton kum kuamwe. 26Absalom er kisok otong ara cang aryi ikin kubne ura, kwalina tentok kwalibne tok kungnamwe. Er kisok otong ikin ara sienyi Daud biryi ikin kiklina keil deiamwe aryi kiklirderamwe ara kilogram bitinyi kuamwe. 27Absalom bira er mabwe winiryi deiamwe. Ba, ner tentok deiamwe ara er naiyong si akwe Tamar eboka doamwe. A ner Tamar bibabyi ner urasin telebto ner nun neamwe.

28Absalom Yerusalem atei yandoka kuramwe talak ara sienyi Daud atei ton bardena kum kuramwe tok asi kwalina bitinyi kwalibmai. 29Uki tentok tum ara Absalom biryi, “Yoab bisi sienyi Daud ai dam binkwandura,” tenen nabmou uca, kum binmou. Ani, liki bitinyi dinyi tubto nabmou ababyi, Absalom er dam kum binmou. 30Ura, Absalom biryi er wa irmilin nang ati ato ebmou, “Yoab wa, ni wa wiliba dam er roti kikniraming keica jelai asi uk ibdongobdarur,” eboka arukmou ba, uk ibdongobmai.

31Ba, Yoab bira Absalom ai binmou ura, ato ebmou, “Una deyok ati kan wa irmilikin nang aryi ni wa uk ibdongobmang do?” ebmou. 32Uca, Absalom biryi Yoab bisi ato ebmou, “Niryi kansi uram ebdeibnyi ba, sienyi Daud dam bindoka ato ebkwandum. ‘Absalom bira, “Ni biti Gesur dam kuroranse bok, talyitam iniboka yanindau. Ni biti o kuroranse,” ebmar,’ erbinkwanduma tenen namdekunun. Uca, kum yamwe ati, ‘Uk ibdongobdarur,’ eboka arukse ba, uk ibdongobkei. Ati, ukura bisik ingkiringmaminyi ani, sienyi dam minob ni uram erbinkwamanirim. Bindoka ebdeminyi ba, sienyi biryi, ‘Ato ebmar dinyi ara malyito ebmar,’ teneboka obnici ababyi teleb,” ebmou. 33Ato ebmou ba, Yoab anaboka sienyi dam binmouci, ato ebmou, “Absalom bira ato ebmar,” ebmou. Ura, sienyi Daud biryi Absalom nabmou ba, Absalom er dam bindoka kisok luknubdongoboka kibdobmou. Ura, sienyi biryi Absalom bisi urasin mulakoka kibdobmou.

Currently Selected:

2Samuel Uram 14: MTG

Highlight

Copy

Compare