2Samuel Uram 13

Amnon ab, Tamar ab deyok

13:1-22

1Er Daud mi si Absalom er weit ner tentok urasin telebto ner nun neamwe. A ner si ara Tamar kuramwe. Ba, Daud mi akwe ton ner mi si Amnon bira er mining malner Tamar bisi er kanyi kuramwe. 2Er Amnon kanya ara er malner Tamar bisi, “Ni yobdobtinyi,” tenen kanyi aryi youn dobdobmou. Tamar bira ninyi ton yona kabul deyok aryi, Amnon biryi ato teneramwe, “Ni yobtinyi,” teneramwe. Ani, tonda “Yobkwaman ara ton ukubman kumto dinyi kunubkwan,” teneramwe. 3Amnon er kwit si Yonadab bira kanya isibdob kanya bonanyi nun kuramwe. Ba, Yonadab bira Daud er du Simea mi kuramwe. 4Ura, Yonadab biryi er kwit Amnon bisi ato ebmou, “Ami tuba-tuba kanda engen urasin akwe borum ara una tenerumci kurum do?” ebmou. Uca, Amnon biryi ato ebmou, “Ni kwit, nira nun malner Tamar bisi, ‘Yobdobtinyi,’ tenenun,” ebmou. 5Uca, er kwit Yonadab biryi ato ebmou, “U yinmana ato kuboka, kan man sokon asi a manmarum. Ba, kan nai Daud yandoka dirdongokici ura, ato ebkwandum. ‘Ni kwaning utanmanir ati, ni malner Tamar bisi arukminyi ba, ni roti kwaning ton boyanurur. Ba, Tamar yariryi, roti kwaning er taruk aryi karebnici ba, yibkwan,’ ebkwandum,” ebmou.

6Ato ebmou ura, Amnon tola ati, u yininto kuboka dobde maronmou. Ba, er nai sienyi Daud Amnon diryanmou. Ba, Amnon biryi sienyi Daud bisi ato ebmou, “Ni weit Tamar bisi mundu lobminyi ba, er taruk aryi roti kwaning kikniboka karebnici asi yibkwan,” ebmou. 7Ura, sienyi Daud biryi ninyi ton bokdonokmouci, ato ebdeibmou, “Tamar bisi, ‘Kan du Amnon atei er roti kiknirdeiriryarum!’ ebdum,” ebmou. 8Sirya bindoka ebmou ba, Tamar anaboka, Amnon ai yanmou ura, roti kikniraming keica doboka er a dinmou bok iniboka kiknibmou ura, uk dabmou. 9Uk deici deibmou ba, sirya kelkel ebmou ura, doboka Amnon dam deirirbau uca, a roti kum yibmou. Ura, Amnon biryi er malner Tamar bisi ato ebmou, “Ninyi ilinto wengmanga ara ni li, ‘Bindarur,’ ebdum,” ebmou. Ba, Tamar biryi anda wekmai nang asi yakmou ba, a ninyi nirya sakweteboka binsekdobmai. 10Ura, Amnon biryi Tamar bisi, “Ni roti kwaning man ai umbura boyandoka karebniminyi ba, yironkun,” ebmou. 11Ba, Tamar biryi, “Dib, Amnon roti kwaning karebnyi ba, yibkura,” tenen bowengbau asi Amnon biryi taleboka ato ebmou. “Ni weit, ni ab a maronkwinim,” ebmou. 12Uca, er weit Tamar biryi ato ebmou, “Kum nai du, ni talyi tatabde yonina mem. Nun Israel ninyi ara ato ton kum kurdanub to beterdongonkwamanirim. 13Ani, ukuboka betebdongobniminyi ura, dan mutuk inirdarorbinkwan ati ato kubkwinirim do? Ani, kanbabyi ikik eboka ina ngilikwamaking to enmarim. Kan ato tenebmarim ura nun nai sienyi Daud bisi molobminyi ba, mundu lobsici ura, dobkwanirim,” ebmou. 14Uca, Amnon bira er mining malner Tamar ato ebmou uram kekena kum kubmouci, Tamar bisi tatab-tatab eboka yobmou. 15Sirya yobmou ura, Tamar bisi, “Ni li,” tenebmou. Kum yobmou talak ara kilkil kanya dongobmoua ara mitiktoto. Ucab, sirya yobwe talak aryi li kanya kibkarebmou ara weikto kubmou. Ura, er weit asi ato ebmou, “Ni li, ola birum,” ebmou. 16Uca, er weit Tamar biryi ato ebmou, “Nai du, sirya malyito kubmanirim cok, yu asa talyi yangmanirim se, yuma ara teleb-teleb erabnumwe ani se!” ebmou. Uca, Amnon a uram kum kekebmou. 17Ura, er ai wa inanyi bisi nabmou ura ato ebmou, “A ner taleboka ai dam dorkweterbiminyi ura, bublan tirikdongobokdum!” ebmou. 18Ura, Sun Israel mutuk weik sien nang nermabwe, ninyi kum dobmangnyi talak ara cang ongon aling bol iya teleb aling ongoramnyi to kuboka Tamar bibabyi cang ongon aling ongoramwe. Amnon er ai wa inanyi biryi Tamar bisi yakdonokoka bublan tirikdobmou. 19Ato kubmou ba, Tamar bira sici kisok deici lubdanmouci, er ongon aling kwilikoka taruk urasin libdobmouci, malyi engena engebdoro binmou.

20Uca, er malnyi Absalom biryi er malner Tamar bisi asibmou, “Kan malnyi Amnon biryi yobkir ati ebde yangarim do? Kan du kobdoba aryi yobmakir ati, weik ebde yibana mem, alyi benebdaminyei ati kilikokdum,” ebmou. Ura, Tamar bira er du Absalom ai er yuk a kuroramwe. 21Amnon biryi ato kubmou deyok er nai sienyi Daud kekebmou ura, er yu mitik kum wekmou. 22Er Absalom bira er weit Tamar bisi Amnon biryi tataboka me yiamwe. A deyok aryi Amnon bisi yu boramwe akiryi malyi deyok babyi, teleb deyok babyi er ab tonkwa uram kum sisingnandei.

Absalom biryi Amnon obmou deyok

13:23-39

23Kuramnyi ani, kwalina bitinyi kwalibmai ura, Absalom biryi Efraim atei dam mutuk si Baal-Hazor dam aryi bisam domba otong kungmouci, kwalibmou. Ura, sun nai weik sienyi Daud mabwe nirya nabmou. 24Ura, Absalom bira er nai Daud dam binmou ura, ato ebmou, “Nai nira domba otong kungmaniryi kwalibkwaman kwalya tonkwa yibkwayeb ati, kan ab kan wa irmilikin nang ab yankwandarur,” ebmou. 25Uca, weik sienyi Daud biryi ato ebmou, “Nun nirya yangana ara kan sul kibdongobkibyei ati, nun kum yankwamab,” ebmou. Uca, Absalom biryi er nai bisi tatabokmou. Uca, er nai bira, “Ni kum yankwaman,” eda kan tenebmaminyi to ur ukubkwandum ena demang ebmou. 26Ba, Absalom biryi ato ebmou, “Nai kan kum binkwamaminyi ura, ni weit Amnon bisi mundu lobminyi ba, nun tonkwa kwaliboka yibkwayeb,” ebmou. Uca, Daud biryi ato ebmou, “Amnon bibabyi talyitam kan milibkute do? Erbabyi kum binkwamar,” ebmou. 27Uca, Absalom biryi tatabmou ura, Daud biryi Amnon ab er mabwe yuk nang ab asi, “Ur bindarur,” eboka mundu lobmou.

28Sirya binmai ura, Absalom biryi er wa irmilin nang asi ato ebdeibmou, “Me yinmabya dam ara Amnon me yibdiryi kanya walwalabci talak aryi, ya sekeibokwandarur. Sun ilil kuna mem. Sun mikib yabdobmunyi ura, anyi bisi obkwandarur. Niryi sunsi arukmasin,” ebmou. 29Ura, a kwalina yinmai talak aryi Absalom tam ninyi ara er ebmou to kuboka Amnon bisi obmai. Ba, Daud mabwe yuk nang ara kuda toto, keledai toto deici yuk-yuk burbindoka binsekdobmai.

30A bai bukoka binsekmai nang ara sun nai Daud dam minob kum binmai. Eda, bisik dam tuba banmai talak ara sun nai sienyi Daud dam minob ton bindoka ato ebmai, “Weik sienyi Daud kan mabwe nirya Absalom biryi obkiribde, tentok ababyi ton kum taklobde,” ebmai. 31Ba, Daud a uram kekebmouci, er boukwe aryi tikoka er ongon aling kwilikabokmou ura, nong baning tukwetam maboka litikde donmou. Ani, er wa irmilin nang er dam a tikabyi nang ababyi sun ongon aling kwilikabokmai. 32Uca, Daud er du Simea mi si Yonadab biryi ato ebmou, “Nai weik sienyi, kan mabwe a nirya kum obmar. Eda, Absalom er malner Tamar bisi tataboka me yiamunyi Amnon bisi minob uca, ‘Obkwan,’ teneamwe to aryi obmar. 33Ati nai sienyi kanci, ‘Ni mabwe a nirya obmararya?’ tenena mem. Eda, Amnon tentok ara dib obmar,” ebmou.

34Absalom bira bai bukoka bindobmou. Ba, weik sienyi Daud ai kalingnamunyi tentok aryi mutuk kon dirdonongmou uca, Horonaim mutuk bisik kuboka mutuk kon asi ninyi ilinto yuryanganmai asi asing eibmou. 35Ura, Yonadab biryi ato ebmou, “Kan mabwe ei yanganmang asi dibderum! Ni minob kansi, ‘Kan mabwe nirya kum obmarur,’ eabne tok dib kunubmar,” ebmou. 36Ato eabwe talak uki dangbisina kum uca, Daud mabwe ai umbura wengyangan-yangan kimnyi asi eibmai. A nang nirya sun nai Daud dam yanmai ura, sun nai ab er wa in nang ab tonkwa engena isin dakeiboka-dakeiboka engebwilwilibdanmai.

37Ba, Amnon bisi obmounyi Absalom bira cukoka Gesur mutuk sienyi Amihur mi si Talmai bisi bindobmou. A talak ara Daud bira Amnon bisi Absalom biryi oamwe ati boukwe tuba kuramwe. 38Ba, Absalom bira Gesur mutuk tingdorbinamuryi, kuroramwe ani, kwalina winiryi kwalibmou. 39Ba, sienyi Daud bira Absalom biryi Amnon oamwe ba, diamwe ati, Absalom bisi yu boamwe dinyi sirya kum danmou ura, er boukwe kubmou.

Currently Selected:

2Samuel Uram 13: MTG

Highlight

Copy

Compare