2Samuel Uram 12

Daud biryi malyito kuramwe deyok ati, Natan biryi Daud bisi, “Ni malyito kunun, tenebdur,” tenen kebdeiboka ebmou deyok

12:1-25

1Er Iya Erebdobnyi biryi Er uram ermurunanyi nabi Natan bisi arukmou ba, Daud bisi binmou ura, ato ebmou, “Atei tentok dam asi ninyi bitinyi kururung. Tonyi bira bona bonanyi kurur. Ba, tonyi bira bona bon kumnyi kurur. 2Bona bonanyi bira domba ab, kambing ab, lembu sapi ab ilinto taleboka winirurnyi kurur. 3Ba, bona bon kumnyi bira domba mi ner asi tentok dekdoburyi, winirorur. A domba mi ner ab tonkwa yina tabdeiboka, tentok meyok tonkwa yiboka, er nebnyi kobdoba kuninto kuboka iribde marorurci, kwaknarorur ba, sirya nebdobwe. 4Ura, uki tentok tum aryi bona bonanyi bisi ninyi bun tentok er ai yanmo. Ba, a bona bonanyi bira er bisam yubwa ilinto winirur dinyi ara mutana aryi oboka yurdeirina kum kubmou. Eda, er kwit bona bon kumnyi domba ner asi ukula doboka, er ninyi bun ati oboka yubdeibmoci, du dongobmo,” ebmou.

5Ato ebmou asi Daud biryi kekebmou ura, er yu wekmou ba, Natan bisi ato ebmou, “A bona bonanyi ebmarimnyi bira iya malinyi biryi ato kubmo. Er Iya Erebdobnyi kam kururnyi si deici aryi ebkun. Anyi bira obkabnung. 6Ba, boukwe tenerdena kum uca malyito kubmo ati, a bisam domba ner tentok dobmo atikwe bisam mi kisok dumbaryi unubkwandur,” ebmou. 7Asi, Natan biryi Daud bisi ato ebmou, “A bona bonanyi ebman ara kanti kiklibmakinaryi ebmakin. Kanci kan kwit ner asi ukula dobumwe ati kebdeiboka ebmakin. Israel nang sun Nai Iya Erebdobnyi biryi kanti ato ebmakir, ‘Niryi kansi me kisok likeiboka Israel nang sienyi kibdeibkise. Ani, Niryi kansi Saul biryi obmakin to bok, lebdeibkise. 8Ani, Niryi kansi Saul weik sienyi kiamwe dinyi ab, er ai deiramwe dinyi ab, er nerabwe ab kansi dobkarebkise. Ani, tonda kansi Israel yala nang ab Yehuda mutuk kuraming Israel nang ab sun sienyi kibdeibkise. Uca, anda karebkise dinyi ara mundu kum loankici ura, “A dinyi asi talebtinyi,” tenebminyi dinyi asi tubto karebtabakwankin. 9Unatoa ati Ni en uram yan yaniboka, Ni Iya Erebdobnyi urasin dam asi malyi kimnurum do? Kan tenen dinyi ara karebkwankin bok, kanci, “Uria bisi Amon yala nang aryi obnung,” tenen mundu lobdeibumwe. Ba, Amon nang aryi Uria Het mutuknyi bisi obyi ura, kanci er ner asi dobdobumwe ara malyito kubumwe. 10Kanda Ni uram kum kunubumci, Het mutuknyi Uria ner dobdobumwe deyok aryi kanci yaldakwandim mabwe ara lo asa kum kubkwaming. Eda, a mabwe ara mar ordana deici aryi odei-odei nirya obde binkwaming. 11Niryi kansi iya dib sirik aryi ebkwinkin ara kan mining ai ninyi kankan dam aryi mambul weik dinyi karebkwamakin. Ara, yuk ai dikum duknuboka kuma eda, kandamnyi lak dinmaminya dam aryi kan nerabwe asi yuk nang kan ai dam nang ati, dobkarebkwaman. Dobkarebnyi ba, kitingtam berekmaci uki nirya lak tam kan din ai yobde maronkwamang. 12Ara, kanda Uria bisi duknuboka obumwe bok, Nira duknuboka kuma eda, ninyi ilinto dinmangnya urasin dam aryi ukubkwankin,’ Er Iya Erebdobnyi kansi ebmakir,” nabi Natan biryi ebmou. 13Uca, Daud biryi Natan bisi ato ebmou, “Diba, niryi Er Iya Erebdobnyi urasin dam manmalibse,” ebmou. Uca, Natan biryi, “Er Iya Erebdobnyi biryi kan malyi kun dinyi sirya kilibmakir ati, kanda dina kum kubkwandim. 14Eda, kanci Er Iya Erebdobnyi bisi, iya dib malyi kibumwe deyok aryi kan mi ukuryok deibminyi mi ara dibkwande,” ebmou.

15Sirya ato ebmou ura, Natan er atei bindobmou. Ura, Er Daud biryi Uria doamwe ner asi sulyi dakmou ner aryi deibmou mi asi u yinmou. Ara, Er Iya Erebdobnyi biryi tenebmou to kuboka a mi u yinmou. 16Ba, Daud bira er mi u yinmou deyok aryi yina si teboka, lukunda kitingtam nirya tukwetam mablikoka, Er Iya Erebdobnyi bisi molormurunmou. 17Ato kuboka molonmou asi er ai dam kuramnyi sien nang yandoka kamurdenmai ababyi burongna kum kunmou. Ani, bukoka yina sun ab tonkwa yina kum kunmai.

18A mi u yinmou ani, uki tabaryi tum ara dibmou. Ba, er Daud wa irmilin nang ara, “Kan mi dibmar,” ena ara sun ilil kubmou deyok aryi lak kum ebmai. Ura, sunci ato ebmai, “Er mi kum dibmou talak aryi minob kamurdenmoubwe uca, kekena kum kubmasou. Er mi dibmar bok, ‘Kan mi dibmar,’ eramibyi ura, erdamnyi obdacei,” tenebmaici, Daud bisi lak kum ebmai. 19Ba, Daud a mabmouci, dinmou uca, er wa irmilin nang ara ngurngururdanmai asi asing ebmou ura, “Ni mi dibmar ati kunmang,” tenebmou. Ura, Daud biryi er wa irmilin nang asi ato ebmou, “Ni mi dibmar do?” ebmou. Uca, er wa irmilin nang aryi, “Yo diba, kan mi sirya dibmar,” ebmai. 20Ba, sirya kekebmou ura, Daud me kekoka ongon aling unuboka ongobdobmou ura tong ena lubdobmou. Ura, Er Iya Erebdobnyi ai wengbinmouci, kisok luknubdongoboka molobmou. Sirya molobmouci, atei yanmou ura, roti kwaning molobdobmou ba, karebmai ura, yibmou. 21Ura, er wa irmilin nang aryi Daud bisi ato ebmai, “Nai, kan mi kam tuba bukmote ura, yina si teboka molonkwamatum bok, kan mi sirya dibmar bok asi yina si teboka molonmarim ara talyitam kunmarim. Ati, ur bukoka roti kwaning yirorum,” ebmai. 22Uca, Daud biryi ato ebmou, “A mi tuba u donmo ati, ‘Er Iya Erebdobnyi biryi nisi boukwe kiboka, ni mi kwetebkwamar,’ tenen yina si tebmonwe. 23Ucab, ukura sirya dibmar ati, yina si tena kum kubkwaman. Niryi yumkuna kam bukeibkwamana kuma. Er dibmar to akwe nibabyi aminda dibniryi, er binmar dikum asi nibabyi aminda binkwan. Er a dibmar mi aryi ni dam tamuboka kum yankwamar,” ebmou.

24Ura, Daud er ner Batsyeba bisi onobdeibmou. Ura, er ner ab tonkwa kunmarei ani, er ner mundu bobmouci, sal mi tubto deibmou. Ba, Daud biryi a mi si ara, “Salomo,” eboka si dobmou. 25Uca, a mi ara Er Iya Erebdobnyi biryi boukwe kuramwe deyok aryi, nabi Natan biryi uruma si dobmou ara, “Er Imtamnyi biryi ersi boukwe kimdur,” ena ati, Ibrani uram aryi, “Yedija,” eboka si dobmou.

Israel nang aryi Amon mutuk Raba atei asi mar boboka arabdobmai deyok

12:26-31

(1Taw. 20:1-3)

26Yoab biryi Amon nang mutuk weik atei si Raba arabdobkwamouci, mar bobmou. 27Ura, Yoab biryi Daud bisi ninyi bokeibmouci, ato ebdeibmou, “Weik atei Raba atei lika dobiryi, sasiboka kunung atei asi mar bobkwaman. Ani, me kweraminga dam atei ab asi arabdobman. 28Ati, niryi Raba atei nirya mar bona ara, ‘Ni, Yoab biryi mar bobwe,’ tenen aryi akatei si ara nisi makmak dobningnyei. Ati, kan yin doun nang mar ordana dam yangana kum kubmang nang buluboka yandarur. Ba, a weik atei asi yandoka mar bobminci, arabdobsurum,” ebmou.

29Ba, Daud biryi yin doun nang buluboka akatei asi mar bobmouci, ninyi oboka akatei arabdobmou. 30Ura, Daud biryi akatei sienyi kisok kaluramwe kaluna dobdobmou. Ba, a kisok kaluna ikin ara emas keil ikin 35 kilogram baryi kikliraming ikin atoa kuamwe. Ba, a kisok kaluna ara dengna weik keil emas ab yuk-yuk bol keil aryi deneamyi asi doboka Daud kisok kalubdobmou. Ani, yuk-yuk bona a weik atei ninyi taleramnyi bona ababyi nirya daluboka dobdobmai. 31Ba, a weik atei nang ton nang asi co cangni keica gergaji ab, tukwe alin keica besi ab, kat ya kala ab bobdeiboka arukmaici, il weik wa dimna nang kibdeibmai. Tonda, yuk nang asi keil uk daboka kikniraming wa in nang kibdeibmai. Ani, Amon yala nang weik atei anda kuramnyi atei nang nirya neiktoto akwe er il weik wa in nang kibdeibde yibinmai. Sirya ukubmai ura, Daud ab er yin doun nang ab ara Yerusalem atei bindobmai.

Currently Selected:

2Samuel Uram 12: MTG

Highlight

Copy

Compare