2Samuel Uram 11

Daud ab, Batsyeba ab deyok

11:1-27

1Kwalina tentok asi co keta dobdongobne tok ara weik sien nang nirya aryi ninyi mar boramnyi. Ato kuboka mar boramnyi to akwe tubto ninyi mar bobkwamai ati, Daud biryi Yoab ab, er yin doun nang ab, sun Israel nang nirya ab asi, “Bulubdarur,” eboka arukmou. Ba, bulubmai ura, Amon nang asi mar boboka erebdobmaici, Raba atei arabdobmai. Bok, Daud bira er yuk Yerusalem atei kuroramwe.

2Uki tentok tum sintam ara Daud man sokon mabmou ani, bukoka weik sienyi ai aruma dub lamna yibauci diramwe uca, ner tentok urasin telebto ner nun me kengmou asi asing eibmou. 3Ura, Daud biryi er wa irmilinanyi tentok asi, “A ner ara unanyi ner da?” eboka asibmou. Ba, anyi biryi, “A ner ara Eliam nebnyi, er si ara Batsyeba bitiba,” ebmai. “Ba, er akenyi bira Het mutuknyi si Uria,” ebmai. 4Ato ebmai ura, Daud biryi, “A ner ara ni doyanindarur,” ebmou. Ba, a ner iniboka yanmai ura, Daud dobdobmouci, tonkwa kunmarei. Ani, er atei kobdob bindobmou. Ara, a ner Daud bisi yana kabul talak aryi, er bunga ining yibanmou ani, sirya kum danmou ura, me ilikdobmou. 5A ner er atei bindoka kunmou talak aryi mundu bobmou. Ura, Batsyeba biryi Daud bisi uram ebdeibmouci, “Mundu sirya bobman ati, weik sienyi Daud kekebdur,” ebmou.

6Ura, Daud biryi Yoab bisi bokdonokmouci, ato ebdeibmou. “Het mutuknyi Uria bira, ‘Daud bisi birum,’ ebminyi ba, ni dam yarur,” ebmou. Ba, Yoab biryi Uria bisi bindoka, “Daud bisi birum,” ebmou ba, Daud dam yanmou. 7Ura, Uria bira Daud dam sirya yanmou ba, Daud biryi Uria bisi, “Yoab ab, er yin doun nang ab aryi yuk atei nang asi obdanmang dara una kuboka obdanmang do?” eboka asibmou. 8Sirya asibdenmou ura, ato ebmou “Kan atei ur birum. Biminyi ura, kan ai bindoka il dona kumkum ur kuronmarum,” ebmou. Ura, Uria weik sienyi atei dam aryi sakweteboka bau talak aryok ninyi ton weik sienyi Daud biryi bona Uria biti deibmou ba, aminda bobinmai. 9Uca, Uria er atei barona kum kubmouci, Daud er kalingna nang ab atei lika bisik bublan dam bindoka a maronmai asi asing eibmai. 10Ura, Daud bisi ato ebmai, “Uria bira er atei kum binmar,” ebmai. Ba, Daud biryi Uria bisi ato ebmou, “Kan atei baronmom cok asi, a tuba kunmarim darib? Kan atei kum binmarim ara unati kubmarim do?” ebmou. 11Uca, Uria biryi ato ebmou, “Sun Israel yin doun nang ab, Yehuda yin doun nang ab mambul asa aryi Imtamnyi co sangkol bobkirikoka ninyi mar bonung. Ani, nun yin doun nang sienyi Yoab ab, er yin doun nang ab mutuk taram dam ai doboka mabmang. Ato kunmating bok asi, ni lilim atei minob bindoka, ni ner ab tonkwa teleb-teleb eboka, kwaning yibde, me yibde, tonkwa mabde kimna atikwe binkwamatinya kuma. Nai sienyi, kan ab, kan kalingnanyi ab sun kikwe takloboka basina kum kubkwaman. Eda, ni sun milibkwamasin,” iya dib uram aryi ebmou. 12Uca, Daud biryi Uria bisi ato ebmou, “Arub ara a kuronmaminyi ani, ambutum aryi, ‘Niryi ur birum,’ ebkinyi ura, binkwamarim,” ebmou. Ba, Uria a tum ara er atei barona kum kubmouci, Yerusalem atei a kunmou tok mabmou. 13Ura, Daud biryi Uria bisi nabmou ba, weik sienyi atei binmou ura, lub talen me kikniboka karebmou ba, yibmouci, walina talebmou. Ba, lukunda ara er atei barona kum kubmouci, Daud er kalingna nang ab tonkwa a mabmai.

14Mabmai ani berekwe ura, Daud biryi Uria deyok ati Yoab bisi kerek sekeibmou. Ura, “Uria bisi bobirum,” ebmou ba, er mining deyok sekmou kerek sengna boboka Yoab dam bobinmou. 15Ara, ato eboka kerek sekeibmou, “Weik ordana ordanmamunyi dikum ara Uria bisi menekeibmunyi ba, er menengbaci asi obkwaming ati, nunukeibokwandarur,” eboka kerek sekeibmou.

16Ba, er mining kerek sengna sirya bobinmou ura, Yoab biryi Raba atei asi mar ibinmou. A talak ara Yoab bira sun mar ordan nang mikib dabdob ilinto nang tikmai biriman tam kuboka sirya er bikmou akiryi, Uria bisi ato ebmou, “Uria kanda otam kuboka mar ibinkwandum!” eboka wa karebmai. Ura, Yoab a ebmou tam asi kunuboka tingbinmou. 17Ba, akatei yin doun nang aryi anaboka Yoab tam nang asi mar iyanmaici, Yoab tam Daud yin doun nang asi ninyi mikbaryi obmai. Ani, Uria Het mutuknyi bibabyi obmai. 18Ato kuboka obmai ura, Yoab biryi Uria ab, yuk yin doun nang ab obmai ati, uram deibmou ba, Daud bisi ebde binmai. 19Er ebdeibmou uram ara ato ebdeibmou, “Sienyi Daud bisi bindoka, ‘Ato kuboka ordanmab uca, ato kuboka obsing,’ ebmunyi ba, kekebkwande. 20Ura, sunsi ato eboka kerebkwamasurur ake, ‘Unatoa ati Raba atei lika dam bobdanin banmandau ba, obmasing do? Lika amwetam mar ibana ara lika dub aryi dobkweteboka obsingnyei, kum tenebmandau do? 21Gideon er mi Abimelekh bira Tebes dam, ner tentok aryi ai dub akiryi keil dobkweteboka, oamwe ara kum bikdauci, luba kibdau do? Lika deyok dam bana ara ato kuansei dinyi bingdarur cok banmandau uca, obmasing ake,’ eboka erekdobkwansurur. Ato ebci ura, ato ebkundarur, ‘Kan wa irmilinanyi Het yalanyi Uria bibabyi obmang,’ ebkundarur,” ebdeibmou.

22Yoab biryi ato ebdeibmou ura, a arukmou nang ara sienyi Daud dam bindoka er ebdeibmou to nirya ebmai. 23“Sun atei nang ara mikib mitik kum aryi ola cungyandoka a mutuk lu dam oryanmasungwe. Uca, nunci sunbabyi dobde binmoubwe ani, sun atei lika bisik bublan dam binmoubwe. 24Ba, sunda lika dub tikoka mar dobkweteboka nun atei yin doun nang mikbaryi obmasing. Ani, nai Daud kan wa irmilinanyi Het yalanyi Uria bibabyi obmang,” ebmai. 25Ato ebmai ba, Daud biryi a uram erbinmai nang asi ato ebdeibmou, “Yoab bisi ato ebkwandarur, ‘Kan kanya surungkina mem. Ninyi ordana dam ara ninyi tub ukubde oraming to obmasinga. Ati, mikib asa aryi kaibmeboka akatei asi ur wengbindoka mar bobdarur,’” ebdeibmou.

26Sirya ebdeibmou ura, Uria er ner Batsyeba kekenmou uca, er akenyi, “Uria obmang,” ena kekebmou ura, ilinto engebmou. 27Ani, boukwe kiboka buramnyi talak sirya bisibmou ura, Daud biryi Uria doamwe ner asi, “Ni ner dobdobkwan ati inirbinindarur,” ebmou. Ba, iniboka yanmai ura, Daud dobdobmouci, sal mi tentok deibmou. Daud biryi malyi dinyi ato dinyi akwe kunuramwe dinyi aryi Er Iya Erebdobnyi kanya teleb kum kuramwe.

Currently Selected:

2Samuel Uram 11: MTG

Highlight

Copy

Compare