1Samuel Uram 31

Er Saul obdanmouci, dibmou deyok

31:1-13

1A talak ara Filistin nang aryi Israel nang asi mar bobmai. Ura, Filistin nang aryi Israel nang asi mutuk kon si Gilboa dam aryi ninyi mitik kum obmai. Ba, Israel ninyi ton nang ara cukoka bindobmai. 2Uca, Filistin nang aryi Saul ab er mabwe ab asi aminda domyandoka weik sienyi Saul er mabwe Abinadab ab, Malkisua ab ani, Yonatan ab obmai. 3Ani, Saul dam ara ilinto yandoka onmaici, Saul er mar bisik en nang ab ebdandoka ordanmai uca, Saul bisi mar yariboka dilaka weik sakeibmai. 4Uca, Saul biryi er ninyi on ya doubmounyi bisi ato ebmou, “Den bam sengna kum ninyi aryi malyi keica asi oraming to kuboka obningnyei ati, kanci ni mining ya aryi lukeiboknurum,” ebmou. Ucab, a ninyi on ya doubmounyi bira, “Ni nai bisi niryi ona ara ni li,” tenen aryi kum obmou. Ba, Saul a ya lebtaleboka, erdamnyi ikeiboka lumubdandobmou. 5Ba, er ninyi on ya doubmounyi bira Saul ato kubmouci, dibmou asi eibmou ura, erbabyi neik ya urub akwe tubto lumubdandobmou. Ba, Saul ab, anyi ab sun neika dibmarei. 6Akiryi Saul ab, er mabwe winiryi ab, er ninyi on ya dounanyi ab, er Saul yin doun nang nirya a tum aryi obmai ba, dibsekmai. 7Ba, sun Israel nang a mutuk lu otam wekmai nang ab, Yordan kouboka dinatam wekmai nang ab aryi dinmai uca, “Israel yin doun nang ara cukoka bai bukoka bindobing ba, Saul ab, er mabwe ab asi obing,” tenebmai. Ura, sun kuramnyi atei deibloboka yuk-yuk binsekdobmai. Ato kubmai ba, Filistin nang yandoka akatei arabdobmai.

8Ambutum berekmou ura, Filistin nang Gilboa kon yandoka, Israel yin doun nang a obmai ba, dibmai nang sun bona-bona taklobmai dinyi bumdoryanmai. Yandoka anda bona bumdonmaici, dinmai uca, Saul ab er mabwe winiryi ab ababyi, a oblobmai ba, a dibmai asi asing eibmai. 9Yandoka Saul ya ngang dakmaici, er ninyi on dinyi nirya dalubdobmai. Ura, Filistin mutuk nirya kwemdeina molon ai babyi, ninyi dam babyi, “Israel sienyi Saul obmab, ebde yibindarur,” eboka arukmai. 10Ura, Saul douramwe ninyi on dinyi nirya ara kwemdeina molon ai si Asytoret ai deibmai. Ba, Saul er dibmoua tukwi nong buma ara weik atei si Bet-Sean ai abilinga deici laboka bing dakmai.

11Uca, mutuk si Yabesh-Gilead nang kekenmai uca, “Filistin nang aryi Saul oboka abilinga deici bing dakmang,” ena kekebmai. 12Ura, ninyi ordana co biriamwe nang akwe bulunmai ani, anaboka lukunda barmurunmai ani, weik atei Bet-Sean bindoka Saul tukwi ab, er mabwe tukwi ab ai abilinga deici baitam kuboka bing dakmai asi sibkweteboka boyanmai. Boyanmai ura, Yabesh dam yandoka uk dabmai. 13Uk dabmaia yok buluboka, Yabesh atei dam co si tamariska deyok tukwe aliboka dongobmaici, sun boukwe ati, engebde buramiryi, uki tabaryi yina si tebde buramnyi.

Currently Selected:

1Samuel Uram 31: MTG

Highlight

Copy

Compare