2Raja-raja Uram 9

Yehu biryi Israel mutuk sienyi kibmou deyok

9:1-15

1Ura, a talak ara nabi Elisa biryi nabi tentok asi nabmou ba, er dam yanmou. Ura, nabi Elisa biryi a nabi asi ato ebmou, “Ramot mutuk Gilead atei zaitun me kweboka deibmang moyok nirya bobinkwamarim ati anabdobdum! 2Ramot mutuk Gilead atei sirya biminyi ura, Nimsi mi Yosafat mi si Yehu kunmaci ai ingkirikoka eibminyi ura, er kwit yabwe kankan aryi yarum ai umbura binkwanim ebkwandum. 3Ebminyi ba, ai umbura birurumnyi ura, a bobmaminyi me dobtaleboka er kisok deici dikeibkwandum. Dikeibminyi ura, Er Iya Erebdobnyi biryi ato ebmakir, ‘Ni Imtamnyi biryi kansi a me kisok likeiboka, Israel mutuk sienyi tikeibkin,’ ebkwandum! Ura, akai umbura bublan kukaboka olong cungdoryankwandum!” ebmou.

4Ebdeibmou ba, a kabir nabi Ramot mutuk Gilead atei binkwamouci, anabmou. 5Banmou ani, Ramot-Gilead atei sirya binmouci, dinmou uca, Yehu ab er kwit yabwe yin doun nang ab bulubmaici uram sisingmai asi eibmou. Ura, a kabir nabi aryi Yehu bisi ato ebmou, “Nai kanti ebdeibmakir uram boyanganmakin,” ebmou. Uca, Yehu biryi ersi ato ebmou, “Unanyi biti uram boyanganmarim do?” Ebmou uca, a kabir nabi aryi, “Kanti boyanganmakin,” ebmou. 6Ura, Yehu tikokmouci, ai umbura wengbinmarei. Sirya wengbirei ura, a kabir nabi aryi a bobmou minyak zaitun dobtaleboka Yehu kisok deici dikdongobmouci, ato ebmou. “Er Iya Erebdobnyi nun Israel ninyi molonanyi biryi ato ebdeibmakou, ‘Niryi kansi me asok likeiboka, Er Iya Erebdobnyi nermabwe mabwe sun Israel nang sienyi sirya tikeibkin. 7Ba, kanci Israel mutuk sienyi tikokabminci, kan sienyi Ahab ai ninyi nirya obkabkwandim. Ara, Izebel biryi Ni Iya Erebdobnyi uram ermurun nang ab, Ni wa in nang ab nirya asi oamwe to ati erbabyi dekwan. 8Ani, Ni Imtamnyi biryi Ahab yala sal ninyi, sun Israel kunung ninyi nirya asi kum danabdeibkwan. Ara, kabir sal ninyi aryi kuboka wisi sal ninyi nirya asi kum danabdeibkwan. 9Ani, Ahab yala ninyi nirya asi, Ni Imtamnyi biryi Nebat mi Yerobeam ab Ahia mi Baesa ab yala ninyi asi kum danabdeianse to kubkwan. 10Ba, Izebel bira Yizreel mutuk kurande bai kam mer aryi dong bai da oboka yibkwande,’ ebdeibmakou,” ebmouci, a me likeibmou. Ato eboka likeibmouci, akai bublan kukaboka cukdobmou.

11Ura, Yehu bira a kabir nabi ab bukmarei ai umbura aryi sakweteboka er kwit yabwe dam yanmou. Ba, er kwit yabwe aryi ersi ato eboka asibmai. “Anyi bira una uram boyanmakir do?” eboka asibmai uca, erci sunsi ato ebmou, “Anyi er nong babyi, er boyanmanir uram babyi ara sunbabyi sirya eiboka bikmarum,” ebmou. 12Bok, er kwit yabwe aryi ersi ato ebmai, “Tola ati enmasirim! Anyi ebmakir uram ara nun dam asi ato ebmanir,” ebsurum. Ebmai ba, erci sunsi ato ebmou, “Er Iya Erebdobnyi nun Israel ninyi molonanyi biryi ato ebdeimakou, ‘Niryi kansi me asok likeiboka, Er Iya Erebdobnyi nermabwe mabwe sun Israel nang sienyi sirya tikeibkin,’ ebmanir,” ebmou. 13Ba, er kwit yabwe aryi sun ongon aling Yehu urasin dam kwiribloboka ai bisik sangkurya dub a dikloboka, buu ena si trompet aryi buu eboka, “Yehu Israel mutuk nang sienyi, kiboka sirya tikmar,” ebkirikmai.

14Ato kuboka Nimsi mi Yosafat mi Yehu biryi Israel mutuk sienyi kiboka talebkwamou. Ura, Israel mutuk sienyi Yoram bisi mar bobkwamouci, mar moun yibmou. A talak ara sienyi Yoram bira Aram mutuk sienyi Hazael ab mar boboka ordanmaici, sun Israel yin doun nang nirya ab Ramot mutuk Gilead atei kalikmai. 15Bok, sienyi Yoram bira a ordanmai mutuk dam aryi tamuboka Yizreel mutuk yandobmou. Ara, Aram mutuk sienyi Hazael ab, er yin doun nang ab mar boboka ordanmaici, marablobmai dilaka ati kweterdaroryanmou. A talak aryi Yehu biryi er kwit yabwe asi ato ebmou, “Sunci nisi, ‘Diba ati Israel sienyi kibte,’ teneanumunyi ura, sun kankan dam ninyi tentok ababyi akatei Ramot-Gilead aryi sakweteboka, Yizreel mutuk mar ordanmang ninyi asi, ‘A uram,’ lak erbana mem!” Yehu biryi er kwit yabwe asi ato ebmou.

Yoram ab Ahazia ab obmai deyok

9:16-29

16Ura, Yehu bira Israel mutuk sienyi si Yoram u yinmou ba, Yizreel atei kunmou ai dirbinkwamouci, anaboka er boyiban keica si kereta dub burbinmouci, binmou. Ara, sun Aram mutuk yin doun nang aryi marablobmai ba, u yinmou ati Yehuda mutuk sienyi Ahazia ab dirbinkwamarei ati anabmou. 17Ura, Yizreel atei bisik wengbana ai kalingnanyi biryi dinmou uca, Yehu ab, er yin doun nang mer ab banmai asi eibmou. Eibmouci, ato ebmou, “Yin doun nang mer yanganmang asi eibman,” ebmou. Ura, sienyi Yoram biryi ato ebmou, “Bisam kuda bonanyi tentok asi, ‘“Sunda teleb kurdana ati yanganmarum do?” erbirum!’ eboka arukdum,” ebmou. 18Ba, kuda bisam bonanyi tentok aryi Yehu ab, er yin doun nang ab dam binmouci, sienyi Yoram bira ato asibmasir, “ ‘Sunda teleb kurdana ati yanganmarum do?’ ebmasir,” ebmou. Uca, Yehu biryi anyi bisi ato ebmou, “Ara, kan ab sisingni dinyi kuma ati ni tamnyi kibdobdum!” ebmou ba, er tamnyi kibdobmou. Ba, akatei wengban bisik kalingnanyi biryi sienyi Yoram bisi ato ebmou, “A arukmananyi bira sun dam sirya binmar bok tamuryangana kum kubmar,” ebmou. 19Ba, tubto kuda bisam bonanyi tentok arukmou ba, sun dam binmouci, sienyi Yoram bira, “Sunda teleb kurdana ati yanmarum do? ebmasir,” ebmou. Uca, Yehu biryi anyi bisi ato ebmou, “Teleb kurdana ara kan ab sisingni dinyi kuma! Ati, kanda ni tamnyi kibdobdum! ebmou.” Ba, anyi bira er tamnyi kibdobmou. 20Ba, tubto akatei wengban bisik kalingnanyi biryi sienyi Yoram bisi ato ebmou, “A arukmananyi bira sun dam sirya binmar bok tamuryangana kum kubmar. Ba, o yanmang nang ara Yehu ab er yin doun nang atonun asi eibman. Ani, er ninyi ordan kereta atonun bobmar asi eibman,” ebmou.

21Ura, sienyi Yoram biryi er mabwe asi ato ebmou, “Ni ninyi ordan kereta kiknirdeinindarur,” ebmou ba, kiknibdeibmai. Sirya kiknibdeibmai ba, Israel mutuk sienyi Yoram ab, Yehuda mutuk sienyi si Ahazia ab sun boboka mar ordan kereta dub burbinmarei. Ura, anabdobmareici, Yehu bisi Yizreel ateinyi si Nabot er wa tukwe dam tikmou asi binmarei. 22Sirya binmareici, sienyi Yoram biryi Yehu bisi ato eboka asibmou. “Kanda teleb kurdana ati yanmarim do?” Ebmou uca, Yehu biryi ersi ato ebmou, “Kan kwin Izebel biryi yuk kwemdeina molorururci, ‘Tola ati aminda ara ato kuboka kunubkwande,’ en nang miliramwe. Ato kuramwe mutuk dam aryi, teleb kurdana ati yankwamatinyi kum!” 23Ebmou ba, sienyi Yoram er kereta dangubdaka baronkouci, Yehuda mutuk sienyi Ahazia bisi ato ebmou, “Tola ati enmar.” 24Ato eboka barou asi, Yehu er mikib nirya aryi, sienyi Yoram er yin liboka taklobmouci, er takonya dinatam-dinatam nirya bisik ebmou. Ba, er dukduk nirya kulubmouci, sakoka er kereta dub a dibmou. 25Ura, Yehu biryi er yan dam tingnanyi si Bidkar bisi ato ebmou. “Yoram er nong nirya dobokabminci, Yizreel mutuknyi si Nabot wa tukwe ai donongbirum! Ebmouci, tubto er yan dam tingnanyi bisi ato ebmou. Yoram er nai Ahab aminda bisam kuda deici neik dam-dam yanganmanoumwe tum aryi, Er Iya Erebdobnyi biryi Ahab bisi ato eamwe. 26‘Ambutum aryi unanyi biryi Nabot ab er nermabwe mabwe nirya ab asi obmaranyi bira Niryi sirya bikman. Akiryi Ni Imtamnyi biryi kanbabyi a neik wa tukwe dam aryi ikin dinyi karebkwankin,’ ebdeiamwe.” Ato ebdeiamwe deyok aryi, “Yoram er nong nirya doboka Nabot er wa tukwe dam donokdum! Ba, Er Iya Erebdobnyi biryi ebdeiamwe to kuboka kunubkwanim,” ebmou.

27Ba, Yehu biryi Yoram bisi ato kuboka obmou asi Yehuda mutuk sienyi si Ahazia eibmouci, Bet-Hagan mutuk tam barou asi Yehu ab er yin doun nang aryi dombindokabiryi, “Erbabyi obdarur!” Ebmou ba, Gur mutuk Yibleam dam a bindoka er mining kereta dub a obdeibmai. Asi Megido mutuk binmouci, a dibmou. 28Ba, er wa in nang mer aryi boboka Yerusalem mutuk bobinmai. A bobinmaici, er abwe yabwe dongoramnyi dikum Daud atei a tukwe dongobmai. 29Ba, Ahab mi si Yoram biryi Israel sienyi kiboka taleamwe ara kwalina koklombaryi kimbinmou. A talak aryi, Ahazia biryi Yehuda mutuk sienyi kiboka taleamwe.

Izebel obmai deyok

9:30-37

30Ura, Izebel bira Israel sienyi si Yoram er kwin kuramwe. Ba, Yehu bira Israel sienyi Yoram ab Yehuda sienyi Ahazia ab sirya obmouci, Yizreel atei yanmou. Ba, “Yehu biryi sun sien nang bitinyi asi ato kuboka obmar,” en uram ara Izebel sirya kekebmou. Kekebmouci, er asimaka kilibdaka otong lelekoka memebdobmou. Memebdobmouci, er ai bisik botona aryi dibkwetebmou. 31Asi, Yehu bira er ai bisik wengbinmou ba, Izebel biryi Yehu bisi ato ebmou. “Zimri ninyi onanyi bitonyi e, una kubkwamarim ati ni ai wengyanganmarim do?” 32Ebmou ba, Yehu biryi dirweleramwe uca, bisik botona ei dibkwetebmouci, enmou asi eibmouci, ato ebmou. “Unanyi-unanyi ara ni tam nang do? Unanyi do?” ebmou uram kekebmaici, sun sienyi ai wa in nang ninyi winiryi aryi ai bisik kinkin botordeirina kuboka dirkwetereramnyi uca, Yehu banmou asi eibmai. 33Ba, Yehu biryi sun a winiryi nang asi ato ebmou, “Izebel taleboka dobkwetebdarur!” ebmou ba, dobkwetebmai. Dobkwetebmai ura, sakoka obmou ba, Yehu er kereta aryi Izebel nong asi yanisitabmou. Ba, Izebel er ining ara ai abilinga dub ab bisam kuda nong deici ab asi tilmiliknin yibinmou. 34Ura, Yehu bira akai wengbinmouci, kwaning ab me ab yibmou. Yibmouci, ato ebmou, “A subdob ner Izebel bira sienyi nebnyi kuramwe ati, er tukwi doboka tukwe dongobdarur!” 35Ebmou ba, er tukwi doboka dongobkwamaici binmai. Bok, er tukwi kum eibmai eda, sunci eibmai ara er kisok telebdoba yangkalyi ab yan yok ab er taruk bitinyi yok ab asi eibmai. 36Ura, Yehu bisi tamuryandokabiryi ato kubmab ebmai. Uca, erci sunsi ato ebmou, “Er Iya Erebdobnyi biryi Tisbe ateinyi si Elia deici aryi, ‘Izebel er tub ara Yizreel mutuk kam mer aryi bobcaboka yibkwaming,’ ebdeiamwe to kunubmar,” ebmou. 37Ba, Izebel er yok tukwi ara Yizreel mutuk dongtam bai kankan asi ceblobnin yibinmou. Ba, sun er tukwi doboka, “Tukwe dongobkwayeb,” tenen ingkiringmai ninyi aryi, “Ara, Izebel er tukwi nong,” tenen eiboka kum dobmai.

Currently Selected:

2Raja-raja Uram 9: MTG

Highlight

Copy

Compare