2Raja-raja Uram 8

Israel mutuk sienyi biryi Sunem atei ner asi milibmou deyok

8:1-6

1Ura, nabi Elisa biryi er mi u yiramwe asi kwetebdeiamwe atei Sunem kuramwe ner asi minob uca, ato eamwe. “Er Iya Erebdobnyi biryi a mutuk asi kwalina tabaryi nirya ara kwaning utan li karebkwande. Ati, anabdobminci kan ai ninyi nirya yuk mutuk da tingdorbindarur! ebdeiamwe.” 2Ba, a ner aryi nabi Elisa ebdeiamwe to kuboka anabminikdamwe. Anabdamuryi, er ai ninyi nirya Filistin mutuk tingdoryanamiryi, kwalina tabaryi nirya ara a mutuk kuramnyi. 3Kuramnyi ani, a eamwe kwalina tabaryi sirya bisibmou ura, Filistin mutuk aryi tubto tamuroryanmai. Sirya tamuryanmaici, a ner ab er mi ab aryi sienyi bisi, “Nun ai ab wa tukwe ab nunbiramnyi tamubkarebsurum,” ebkwamarei ati binmarei. 4Binmareici, Israel mutuk sienyi ai wengbinkwamareici, dirongkwe uca, sienyi biryi Gehazi bisi, “Nabi Elisa biryi ilil tenen dinyi kikniramwe dinyi nirya asi lak ebdum! ebmou. Ba, sienyi dam asi ato nabi Elisa bira, ‘Ato-ato ilil,’ tenen dinyi ukuramwe,” enmou asi eibmou. 5Ura, Gehazi biryi, “Sunem atei ner er mi ton diamwe asi kam bukeiamwe,” eboka sienyi bisi nungkarerabwe noutam aryi a Sunem atei ner ab, er mi a kam bukeiamwe mi ab a sisingmarei ai binmarei. Ara, “Nun ai ab wa tukwe ab nunbiramnyi tamubkarebsurum,” ebkwamarei ati binmarei. Asi Gehazi biryi a nang amse eibmouci, sienyi bisi ato ebmou. “Nai sienyi, a ner ab er mi ami ab ati ebmonwe,” ebmou. 6Ura, sienyi biryi a ner asi, “Nabi Elisa biryi er mi dibmou asi tubto kam bukeiamwe deyok ati, una kuboka do?” eboka asibmou. Uca, “Ato-ato kuboka bukeiamwe,” ebmou. Ura, sienyi biryi er wa inanyi tentok asi, “Kanci a ner milirbirum!” eboka arukmouci, ato ebmou, “A ner er wa tukwe ab, er ai ab yuk nang mutuk tingbinamwe ba, er wa tukwe aryi yiramunguryi, dekde doramungwe co bok ab nirya erbiramnyi tamubkarebkwamang!” ebdeibmou. Ato kuboka Israel mutuk sienyi biryi Sunem atei kuramwe ner asi milibmou.

Er Imtamnyi Uram ermurunanyi nabi Elisa Damsyik atei binmou deyok

8:7-15

7Ura, uki tentok tum ara nabi Elisa bira Damsyik atei binmou. Ba, Aram mutuk sienyi si Benhadad bira u yinmou. Ura, sienyi Benhadad biryi, “Nabi Elisa akatei yanmar,” en uram kekebmou. 8Kekebmouci, er wa inanyi Hazael bisi ato ebmou. “Nabi Elisa biti karebkwamarim dinyi bona-bona teleb ukutotoa nirya bobminyi ura, er yandoka bukmar dikum birum!” Biminyi ura, ersi ato ebkwandum! “Er Iya Erebdobnyi bisi, ‘Sienyi Benhadad yinmar u ara lobdobkwande do?’ eboka asibdenkwandum!” ebdeibmou. 9Ura, Hazael biryi nabi Elisa yandoka kunmou dikum binkwamouci, Damsyik atei aryi boramnyi bona-bona teleb nirya doboka, bona bon bisam si unta 40 baryi deici deibdongoboka anabmou. Binmou ani, nabi Elisa bukmou ai sirya binmou ura, ato ebmou. “Sienyi Benhadad biryi er dam bindoka, ‘Ni yinmanir u ara lobdobkwamanir do? ebmar,’ eboka asirbirum! ebmanir ati nai kansi asiryanman,” ebmou. 10Uca, nabi Elisa biryi Hazael bisi ato ebmou, “Er Iya Erebdobnyi biryi kunumna deib aryi ebkarebmanou ara, ‘Dibkwande,’ ebmou. Bok, er dam tamuboka biminyi ura, ‘Kum dibkwandim,’ ebmakir ebkwandum,” ebmou.

11Ebmouci, Hazael bisi uki weikanun bita dibluklobmou ani, engebkabokmou. 12Ato kuboka engebmou ba, Hazael biryi nabi Elisa bisi, “Nai, kan unato ati engebmarim do?” Ebmou uca, nabi Elisa biryi ersi ato ebmou, “Kanci sun Israel ninyi asi obminikwandim. Ara, anda sasiboka donung atei nirya uk dabkwandim ani, sun a mutuk kabir yin doun nang ab, ukuryok deibmangnyi mabwe ab mundu bon nerabwe ab asi obde binkwandim. A kubkwandim dinyi nirya sirya bikise ati engebman,” ebmou. 13Uca, Hazael biryi nabi Elisa bisi ato ebmou, “Bok, nai niryi kam kurande ato ilil kun dinyi ukubman kum,” ebmou. Uca, nabi Elisa biryi ato ebmou, “Er Iya Erebdobnyi biryi kunumna deib aryi ato ebdeibmanou, ‘Hazael kanda Aram mutuk sienyi kiboka talebminci, a ebman to kunubde binkwandim,’ ebdeibmanou,” ebmou. 14Ura, Hazael bira sienyi Benhadad dam tamuryanmou. Ba, sienyi Benhadad biryi Hazael bisi, “Nabi Elisa bira una kubkwande ebdeibmanir do?” eboka asibdenmou. Uca, Hazael biryi sienyi bisi ato ebmou, “Lobdobkwande, ebmakir,” ebmou. 15Bok, a maberekoka ara Hazael biryi ninyi me kilin kaluna doboka me likdongobwe ura, sienyi asok deici asi a kaluna deibdongoboka talebnurubmou. Ba, sienyi dibmou ura, Hazael biryi akatei sienyi kiboka Benhadad unubmou.

Yehuda mutuk sienyi si Yoram deyok

8:16-24

(2Taw. 21:1-20)

16Ura, Yosafat mi si Yehoram biryi Yehuda mutuk sienyi kiboka talebmou.#8:16 A talak aryi Ahab mi Yoram Israel mutuk sienyi kuramwe. Ba, Yosafat mi si Yoram Yehuda mutuk sienyi kuramwe. Ani, a mutuk bitinyi ara sien nang bitinyi neik si akwe doamnyi nang kurandei. A deyok aryi a pasal umbura Yehuda mutuk sienyi Yosafat mi si Yehoram eboka sekyi. Ara, Ahab mi si Yoram biryi Israel mutuk sienyi kiboka taleamwe ara kwalina amubaryi kwalibmou. A talak aryi erci Yehuda mutuk sienyi kiboka talebmou. 17Ba, sienyi Yehoram deiamwe aryi kubde yangaramwe kwalina ara 32 baryi kurbinmou. A kwalina kurbinmou talak aryi, erci Yehuda mutuk sienyi kiboka talebmou. Ba, erci Yehuda mutuk sienyi kiboka taleamwe ara kwalina inbaryi taleamwe. 18Ba, sienyi Yehoram bira Ahab nebnyi doamwe. Akiryi sienyi Yehoram bira Ahab er ai ninyi kuramnyi to akwe ukuramwe. Sienyi Yoram a ukuramwe malyi dinyi aryi, Er Iya Erebdobnyi urasintam malyi kun dinyi bordongoramwe. Ara, sun minob sien nang kiboka Israel mutuk talebde yangaramnyi nang aryi kuramnyi to asi ukuramwe. 19Ato kuramwe bok, Er Iya Erebdobnyi biryi ersi kum obkabokamwe. Ara, Er Imtamnyi wa inanyi si Daud bisi, Er Iya Erebdobnyi biryi, “Kan deibdoba yala ninyi Yehuda yala ninyi aryi, Israel mutuk sienyi kiboka talebde binkwaming,” eboka dib ati minob ebdeiamwe deyok aryi ersi kum obkabmou.

20Ba, uki tentok tum ara sun Edom mutuk ninyi aryi, “Nun yuk tikokwayeb,” eboka sienyi bisi waringbinmai. 21Ba, lukunda ara sienyi Yoram ab, er yin doun nang ab mar ordan kereta bobokabiryi, Zair mutuk binmai. Binmai bok, sun Edom yin doun nang aryi iyandoka warikdongobmai. Yandoka warikmai bok asi, sienyi Yoram ab er yin doun nang ab sun kereta ab aryi dangabkaboka sun Edom nang asi warikdongobmai ba, Edom mutuk yin doun nang ara sun keis ol ai binsekdobmai. 22Ato kuboka sun Edom ninyi aryi Yehuda sienyi bisi, “Nun yuk tikokwayeb,” eboka warikamnyi. Ani, tonda neik talak aryi sun Libna mutuk ninyi ababyi ato kuboka sienyi bisi, “Nun yuk tikokwayeb,” eboka warikamnyi.

23Er sienyi Yoram Yehuda mutuk sienyi kiboka taleamuryi, ukubde yanamwe to ara sun minob uca Yehuda mutuk sienyi kiboka taleamiryi ukubde yanamnyi to liliboka kerek sekeibwe kerek sengna umbura a sirya liliboka sekeibwe. 24Ura, sienyi Yoram biryi Yehuda mutuk sienyi kiboka taleamwe wisi dandoka dibmou. Ba, er abwe yabwe dongoramnyi mutuk tukwe dam Daud atei tukwe dongobmai. Ba, sienyi Yoram mi si Ahazia biryi a mutuk sienyi kiboka er nai unubmou.

Yehuda mutuk sienyi si Ahazia deyok

8:25-29

(2Taw. 22:1-6)

25Ura, Yehoram mi si Ahazia biryi Yehuda mutuk sienyi kibmouci, talebmou. Ba, Ahab mi si Yoram bira Israel mutuk sienyi kiboka talebmou. 26Ba, sienyi Ahazia er deiamwe aryi kuboka Yehuda mutuk sienyi kibmou ara kwalina 22 baryi kurbinmouci, a mutuk sienyi kiboka talebmou. Ba, erci Yehuda mutuk sienyi kiboka taleamwe ara kwalina tentok kwaliamwe. Ba, er kwin si Atalya bira Israel mutuk ner kuramwe. Ba, Atalya er abwe si ara Omri kuramwe. Omri bira Israel mutuk sienyi kiboka taleamunyi kuramwe. 27Ba, sienyi Ahazia bira Ahab er ka kuramwe. Akiryi, er ka Ahab ai ninyi malyi kun dinyi kuramnyi to miliboka ukuramwe. A ukuramwe dinyi aryi, Er Iya Erebdobnyi urasintam asi malyi dinyi bordongoramwe. 28Ba, uki tentok tum ara Ahab mi Yoram ab milibmou ba, Aram mutuk sienyi si Hazael bisi mar boboka Ramot-Gilead ordarbinmai. Uca, sienyi Yoram bisi Aram mutuk yin doun nang aryi marablobmai. 29Ba, tamuroryandoka Yizreel atei bindobmou. Ara, Aram mutuk sienyi Hazael yin doun nang aryi Rama atei dam marablobmai dilaka kwetebkwamou ati Yizreel atei bindobmou. Ba, Yoram mi Ahazia Yehuda mutuk sienyi biryi Ahab mi Yoram Yizreel atei a kweterdarbinmou ai dirbinmou.

Currently Selected:

2Raja-raja Uram 8: MTG

Highlight

Copy

Compare