2Raja-raja Uram 10

Yehu biryi sun Ahab yala ninyi nirya asi obkabmou deyok

10:1-17

1Ura, Yehu biryi Ahab er yala ninyi Yizreel mutuk kuramnyi ninyi nirya obkiribmou. Ura, sun Ahab deibdoba yala ninyi Samaria mutuk dam ara ninyi yala 70 baryi kuramnyi ninyi ati kerek sekeibmou. Ara, sun Samaria wisi-wisi nang ab akatei ninyi talen nang ab ani sun Ahab yala ninyi taleamnyi nang ab asi kerek sekeibmou. 2Ara, ato eboka sekeibmou, “Sun Ahab yala ninyi talebdau nang kundarur ani, ninyi mar boboka ordan kereta ab, bisam kuda ab, ninyi ordan yin ab talendarur atei nang kundarur. Tonda, sunda mikib atei nang kundarur. 3Ati sun talebdau ninyi, sun sienyi Ahab yala ninyi sun kankan aryi ninyi tentoka asi wibokabmunci, sienyi tikeibmunyi ba, sun nai Ahab unubkwande. Ato kuboka tikeibmunci, sun sienyi Ahab mar dobdarur!” eboka sekeibmou. 4Uca, a sekeibmou kerek aryi sun kanyi iya ilil kubmouci, sun mamun ato ebdanmai. “Sun sien nang bitinyi Yoram ab Ahazia ab ababyi Yehu bisi ton kum lebesekoka obdenmakurungwe. Ati, nunda wanok Yehu bisi mar boboka obman kum,” ebdanmai.

5Ato ebdanmaici, sunci kuboka Yehu bisi er kerek sengna ato sekoka dekeibmai. “Nai, nunda kan mabwe ati, kanci nunsi ebdeibmasirim to kuboka kunubkwamab. Ani, nun kankan dam aryi ninyi tentok wiboka nun mutuk sienyi kum tikeibkwamab. Ati, ‘Nai kanci ato-ato ukubkwan,’ tenebmaminyi to ur ukubdum,” eboka sekeibmai.

6Ato kuboka sekeibmai kerek asi Yehu biryi sirya nukmou. Ura, Yehu biryi sunsi tubto ato eboka liki bitinyi dinyi sekeibmou. “Sunci ni sekeibmasunwe kerek sirya nukmarumci, ni tam nang kibdum. Ura, ambutum ara sunci sun sienyi Ahab yala ninyi yubwa 70 baryi ninyi nirya asi obokabmunci, sun kisok dakoka Yizreel atei boyandarur!”

7A eboka sekeibmou kerek sengna ara sun Ahab yala ninyi taleamnyi nang dam bobinmai ba, sirya nukmai. Ura, Yehu ebdeibmou to kuboka, Ahab yala ninyi 70 baryi nirya asi obmaici, kisok dakoka-dakoka keranjang umbura dongobyi ura, Yehu bisi Yizreel atei boyanmai. 8Ura, Yehu bisi, “Nai kan ebdeibmomwe to kuboka sirya obmangci boyanmang,” ebmai. Ura, Yehu biryi ato ebmou, “A obmang ba, boyanmarum ninyi sun kisok ara akatei weik bisik wengyangan dam asi olong bitinyi lelebdeibdarur! A leleboka deiblobmamunyi tok asi iniboka berekwamar!” Ebmou ba, olong bitinyi a leleloboka deiblobmai asi iniboka berekmou. 9Ura, Yehu ai aryi sakweteboka akatei weik bisik wengyang bublan dam bindoka tingyanmouci, sun akatei ninyi nirya asi ato ebmou. “Sienyi Yoram dibmou ara sunci ersi malyi kun deyok aryi kum dibmou. Eda, niryi obmounwe ba, dibmou. Bok, sun anda oboka leleblobmarum kisoka ninyi yubwa ara unanyi biryi obmar do? 10Anda ninyi yubwa ara Er Iya Erebdobnyi biryi nabi Elia deici aryi sun Ahab yala ninyi ara, ‘Ato kubkwande,’ eboka minob ebdeiamwe to kuboka kunubmar,” ebmou. 11Ebmouci, sun Ahab yala ninyi ab er kwit yabwe nong ab er wa in nang ab ani, er imam nang ab asi Yizreel atei kuramnyi ninyi nirya obkabmou.

12Nirya obkabmouci, sienyi Yehu biryi Samaria atei binmou. Ara, sun bisam domba kalingna nang demang kuramnyi atei Bet-Eked asi binmou. 13Binmouci, Yehuda mutuk sienyi Ahazia yala ninyi ab ebdanmai. Ebdanmai ura, Yehu biryi sunsi, “Sunda unanyi yala ninyi do?” eboka asibdenmou uca, sunci ersi ato ebmai, “Nunda sienyi Ahazia yala ninyi kunub. Akiryi, sienyi Ahazia er ai ninyi ab sien ner si Izebel er deibdoba nermabwe mabwe ati taruk taleryanganmab,” ebmai. 14Ato ebmai ba, Yehu biryi er milin nang asi ato ebmou, “A yala ninyi nirya talebdarur!” Ebmou ba, a 42 baryi nang nirya taleboka bobmaici, weik me kwan ato lokamya, Bet-Eked atei dam asi boyandoka a ninyi nirya obdongobmai. 15Ato kuboka sirya obdongobyi ura, bisik noutam yanganmai uca, Rekhab mi Yonadab biryi Yehu ab er milin nang asi bisik diryanmou asi ebdanmai. Ebdandoka sirya kibdandobmai ura, Yehu biryi Yonadab bisi ato ebmou, “Nira diba ati kan tamnyi kunun. Ati kanbabyi ni tamnyi kurum do?” Ebmou uca, Yonadab biryi Yehu bisi ato ebmou, “Diba nibabyi kan tamnyi kunun,” ebmou. Ba, Yehu biryi ersi ato ebmou, “Diba ati ni tamnyi kurum ura, taruk talebdankwanim,” ebmou. Ba, taruk talebdanmareici ni kereta dub weleyaminci, ni dam buryarum! 16Ebmou ba, weleboka er dam burbinmou ura, Yehu biryi Yonadab bisi ato ebmou. “Ni milibniminci, Niryi Er Iya Erebdobnyi biti mikib doboka kunun dinyi eibkwandim,” eboka Yehu biryi Yonadab bobinmou. 17Banmai ani, Samaria atei sirya binmou ura, “Er Iya Erebdobnyi biryi nabi Elia deici asi ebdeiamwe to kuboka kunubmou.” Ara, sun Ahab yala ninyi nirya asi bindoka obkabmou.

Yehu biryi sun Baal kwemdeina molon nang nirya asi obkabmou deyok

10:18-36

18Ura, Yehu biryi sun Samaria atei ninyi nirya asi naboka bulubdeibmouci, sunsi ato ebmou. “Sienyi Ahab bira Baal kwemdeina asi miliboka moloramwe bok, ‘Molorbinkun,’ tenebni tum demang molorbaramwe. Bok, nira Ahab kuramwe to kumci, Baal kwemdeina asi iya miliboka tuba-tuba molorbankwan. 19A deyok aryi, niryi Baal kwemdeina asi, ‘Ilila dama deibokabniryi, sun kum molondarur to kuboka molobkwaman.’ Ati, sun Baal kwemdeina uram ermurun nang nirya ab Baal kwemdeina molonung ninyi nirya ab sun Baal kwemdeina molon ai wa in nang nirya ab asi nabmunyi ura, sun nirya ni dam yanung! Unanyi biryi a ebdeibman uram kekeboka kum yanmarinyi bira kam kum kubkwamar,” ebmou. Ato ebmou ara sun Baal kwemdeina moloboka wa in ninyi nirya asi, “Obkabkwan,” tenen ati ato ebmou. 20Ura, Yehu biryi akatei ninyi asi tubto ato ebmou. “Baal kwemdeina ati nun neik tum buluboka molobkwayeb tum ara a tum asi buluboka molobkwayeb eboka wibdeibdarur!” Ebmou ba, sunci uram sisikoka a molobkwamnyi tum ara a tum aryi buluboka molobkwayeb eboka wibdeibmai. 21Ura, Yehu biryi sun Baal kwemdeina moloramnyi ninyi Israel mutuk kuramnyi ninyi nirya asi, “A tum ara nirya buluryankwandarur!” eboka kerek sekeibmou. A eboka sekdeibmou to kuboka sun nirya bulubmaici, sun Baal kwemdeina molon ai wekmai ba, akai nirya liknibdobmouci, tin ilila kubmou. 22Ura, Yehu biryi sun a kwemdeina molobkwamangiryi ongoraming ongon aling ai um kalingna nang asi ato ebmou. “Baal kwemdeina molobkwamangiryi ongoraming ongon aling dobkweteboka, a buluboka wengyanmang ninyi, sun Baal kwemdeina molon ninyi ati nirya bokeibdarur!” Ebmou to kuboka sun a Baal kwemdeina molon ninyi asi bokeibmou.

23Ura, Yehu ab, Rekhab mi Yonadab ab Baal kwemdeina molon ai wengbinmareici, a kwemdeina molon ninyi mer a wekmai asi Yehu biryi ato ebmou. “Sun Baal kwemdeina molon ninyi a buluboka wekmarum kankan aryi Er Iya Erebdobnyi bisi molon ninyi ton da sun ab tonkwa wekmandarura ati sunci bita-bita dibdendarur!” 24Ato ebmouci, Yehu ab Yonadab ab Baal kwemdeina ati bisam domba dama deiboka uk dabkwamarei ati wengbinmarei. Tonda, Yehu biryi er yin doun nang ninyi 80 baryi nang asi ato eboka baitam kalikeibmou. “Sunda a wekmang ninyi anaboka yibindobingnyei ati baitam a kalikdarur! Kalikmamunyi ba, akai aryi anaboka yibarongnyi ninyi nirya ara obkwandarur! Asi taklobmunyi ba, bindobingnyi ura, sunsi obkwamasin!” eboka kalikdeibmou. 25Ura, Yehu biryi Baal kwemdeina ati sirya dama deiboka uk dabmou. Ura, Yehu biryi er yin doun nang ab er mabwe mer ab asi ato ebmou, “Ai wengyandoka a wekmang ninyi nirya obdarur!” Ebmou ba, wengyandokabiryi ninyi on ya aryi obminikmai. Sirya obminikyi ura, Baal kwemdeina molon ai um nong wekmai. 26Akai um wekmaici, Baal kwemdeina kikniboka deiamnyi asi doboka baitam dobkwetebmaici uk dabmai. 27Ani, Baal kwemdeina kikniboka deiamnyi ai um ababyi dalubkabmaici, a kwemdeina kikniboka deiamnyi ai um ara lin lamne ai kibyi. Asi ukubabyi tuba ninyi lin lamne dam kimnung. 28Ato kuboka Israel mutuk aryi, Yehu biryi Baal kwemdeina molon ai dalubkabmou. 29Bok, Nebat mi si Yerobeam biryi Betel atei ab, Dan atei ab asi emas aryi bisam lembu mabwe kiknibdeiamwe ba, sun Israel ninyi aryi tuba miliboka molorbaramnyi. A miliboka moloramnyi kwemdeina asi Yehu biryi kum dalubkabokamwe.

30Ura, Er Iya Erebdobnyi biryi Yehu bisi ato ebmou. “Ni Imtamnyi biryi, ‘Teleb,’ tenenun to kuboka Ni urasin dam aryi sirya kunubmarim. Ani, ‘Ahab yala ninyi nirya asi oboka kum danabdeibdum!’ ebdeianse to kuboka sirya kunubmarim. A deyok aryi kan yala ninyi aryi Israel mutuk sienyi kiboka talebde baramingnyi asi liki dumbaryi talebkwaming. 31Bok, Yehu kanda Ni Iya Erebdobnyi sun Israel ninyi molonindarurnyi yan memen uram asi kan kanya tentoka boboka iya kum kunubde binkwandim. Eda, Yerobeam biryi ukun deyok aryi sun Israel ninyi nirya asi malyi kun dinyi bobdongobwe. A bobdongobwe dinyi asi miliboka molobde binkwandim. Ara, Yerobeam biryi Betel atei ab Dan atei ab dam asi emas aryi bisam lembu mabwe kiknibdeiamwe ba, tuba molonung kwemdeina asi miliboka molobde binkwandim,” ebmou.

32A talak aryok Er Iya Erebdobnyi biryi Yehu er sienyi kiboka talen mutuk dikum mitik kibdeibmou. Ara, Aram mutuk sienyi si Hazael biryi sun Israel yin doun nang asi muna kibdongoboka Israel mutuk dinatam arabdobmou. 33A muna kibdongoboka ara yaletam me Yordan kin aryi kuboka Aroer mutuk me Arnon dam nirya asi arabdobmou. Ani, Gilead ab Basan mutuk sun Gad yala ninyi ab Ruben yala ninyi ab Manasye yala kuron mutuk nirya asi arabdobmou. 34Ba, Yehu biryi Israel sienyi kiboka taleamuryi, ukubde yangaramwe dinyi nirya ara sun minob Israel sien nang kiamiryi, ukubde yanamnyi to ati liliboka sekeibwe kerek sengna umbura a sirya liliboka kerek sekeibwe. 35Ura, sienyi Yehu dibmou ba, er abwe yabwe dongoramnyi tukwe dam Samaria atei dongobmai. Ba, er mi si Yoahas biryi Samaria atei sienyi kiboka er nai unubmou. 36Ba, Yehu biryi Israel mutuk bok, Samaria atei sienyi kiboka taleamwe ara kwalina 28 baryi taleamwe.

Currently Selected:

2Raja-raja Uram 10: MTG

Highlight

Copy

Compare