2Raja-raja Uram 7

1Ura, Elisa biryi Israel sienyi bisi ato ebmou, Er Iya Erebdobnyi uram ara ato ebdeibwe. “Ambutum ara a berekmar to talak aryi, Samaria atei bisik bublan dam ninyi aryi keil uang perak tentok aryok 3 kilogram baryi gandum teleb asi dekwamang. Tonda, 6 kilogram baryi yuk gandum si jelai dengna ababyi keil perak tentok akwe dekwamang,” ebmou. 2Uca, sienyi yan dam bunanyi biryi ato ebmou, “Er Iya Erebdobnyi biryi imtam ai asi dukdandoka dobkwande bok, a dinyi ara ukubman kum?” ebmou. Uca, nabi Elisa biryi anyi bisi ato ebmou, “Kan asing aryi a kunubkwande dinyi ara eibkwandim bok, kanci a kwaning ara ton kum yibkwandim,” ebmou.

3Ura, ninyi dumbaryi, susa youn taleamwe ba, weik bisik wengban ai asi buramnyi. A nang aryi ato ebmai, “Unatoa ati, nunda akikwe u dobde buramibnyi tok ani, dibkwayeb asi da?” ebmai. 4Ani, nunci weik atei o bindobibyi ababyi, weik atei ara kwaning atana li dobwe aryi, o bindoka dibkwayeb. Ani, nun atei a kuna ababyi dibkwayeb. Ati, Aram mutuk yin doun nang keis ol atei asi bindobkwayeb. Sunsi bindobibyi ba, sunci nunsi eibokabsingiryi, taklobsingnyi ura, nun kam kubdobkwamibiryi. Asi, eibokabsingiryi, obsingnyi ura, dibkwayeb ebdanmai. 5Ba, kunuk dangdongou ura, anabokabiryi Aram nang keis ol atei binmai. Aram nang keis ol atei bindokabiryi, atei kubkub tam kuboka bini dinmai uca, ninyi ton kum kunmai. 6Ara, sun Aram mutuk yin doun nang asi, Imtamnyi biryi sun kekena ara kereta lilim ab, bisam kuda lilim ab, yin doun nang yiban lilim ab akwe kibdeibmou. A deyok aryi, sunci ato ebdanmai, “Israel sienyi bira dib ati sun Het sien nang ab, Misraim sien nang ab asi dekmariba, oryanganmasing,” ebdanmai. 7Ebdanmaici, inibdoroban ara sun keis ol atei ab, bisam kuda ab, bisam keledai ab, nirya a deiblobokabiryi inirorbinmai.

8Ba, sun a susa taleamwe dumbaryi nang ara a keis ol atei kubkub tam bisik kuboka ai yandoka wekmaici, kwaning ab, me ab yandoka yinmai. Ani, sirya yibdobyi ura, sun emas ab, dengna weik keil perak ab, ongon aling ab deiblobinmai asi doboka bobdobmaici, inirdeirorbinmai. Ani, tubto yandoka yuk keis ol ai wekmaici, akai deibloboka binmai bona-bona nirya dobdobmaici boboka inirdeirorbinmai. 9Inirorbinmai cok, sunci tubto ato ebdanmai, “Ato kubmab dinyi ara iya malyito kubmab,” ebdanmai. “Ani, arub ara teleb uki tum bok asi, unatoa ati kilikloboubwe da. A kilikloboka buklobmabyi tok asi berentam kibci ura, ikin bon dinyi nun dam yankwamar. Ati, a talak aryok, nunci Israel sienyi bisi bindoka, ‘Aram nang ara sirya bindobmang,’ erbinkwayeb,” ebdanmai.

10Ura, weik atei bisik bublan dam kalingna nang asi binmaici, sunsi ato eboka nukarebmai, “Nunci Aram nang keis ol atei binmab bok, ninyi babyi, sun uram babyi ton kum kekebmab, eda sun bisam kuda ab, bisam keledai ab, atei demang a deibloboka bindobmang,” ebmai. 11Ba, sun weik atei bisik bublan dam kalingna nang aryi, a ebmai uram boboka Israel sienyi bisi erbinmai.

12Ba, lukunda bok sienyi bukokmouci, er wa in nang asi ato ebmou, “Teleb, ura niryi sunsi Aram ninyi aryi kuboka nunsi ato tenesunung dinyi asi ebkwansin. Ara, nun kwaning utana li dobsou ba, bukubwe ara sunci sirya biksei. Akiryi sunci teneboka, ‘Sunci una kubkwaming do?’ tenebmasingci, sun ai deiblobokabingci bai inirorbinsekmang. Ara, Israel nang ton da sakweteboka yibangnyi asi kam kibmaning taleboka weik atei a boyankwanuba tenen kubmasing,” ebmou. 13Uca, Israel sienyi er wa inanyi tentok aryi ato ebmou, “Teleb, nunda atei a kunmab ba, nun kwit yabwe ara o obmang ba, sirya dibmang. Ati, nunci, ‘Bisam kuda amubaryi asi doboka Aram nang mutuk dokunmang to asi dirbindarur,’ ebkwayeb. Ba, nunci a kunmangnyi to asi, ‘Ato-ato kunmang,’ tenen bikwayeb,” ati ninyi ton dibkwayeb ebmou.

14Ura, Israel sienyi biryi er yin doun nang asi, “Aram yin doun nang, sun keis ol ai doboka kunung ai asi bindoka do kubmar to asi dirbindarur!” eboka arukmou. Ba, kuda bisam amubaryi asi kereta bitinyi deici biribdongoboka bukmaici dirbinmai. 15Ura, sunci Aram yin doun nang aminda dombindoka, me Yordan kin binmai. Bindoka dinmai uca, sun binmai bisik ai nirya ara sun ongon aling babyi, bona-bona nirya babyi ara ilil aryi cungdorbanmaici deiblobnin binmai asi eibmai. Ura, sienyi bisi tamuryanmaici, a eibmai to kuboka sienyi bisi yandoka nukarebmai. 16Ura, Samaria atei kuramnyi ninyi aryi sakweteboka Aram yin doun nang sun keis ol ai dam asi bindokabiryi, sun bona-bona nirya doboka dalubdobmai. Uca, Er Iya Erebdobnyi biryi, “A tum aryi, 3 kilogram baryi teleb kum, enam kilogram yuk kwaning gandum kum asi keil perak tentok akwe dekwaming,” ebdeiamwe to kuboka kunubmou. 17Ani, tonda Israel mutuk sienyi biryi Imtamnyi uram ermurunanyi si Elisa biti diryanamwe tum aryi, “Sienyi yan dam bunanyi bisi, weik bisik wengban ai bublan dam kalikmaici asi, ninyi mer aryi yaniboka sitabkwaming ba, dibkwande,” ebdeiamwe to kuboka kunubmou. 18Ani, nabi Elisa biryi sienyi bisi, “Ambutum a tum aryi 6 kilogram baryi yuk kwaning gandum kum, 3 kilogram baryi tepung teleb kum, asi keil perak tentok akwe Samaria atei weik bisik wengbana bublan dam aryi dekwaming,” ebdeiamwe to kuboka kunubmou. 19A talak aryi, Israel atei sienyi er yin doun sienyi biryi Imtamnyi uram ermurunanyi Elisa bisi ato ebmou, “Er Iya Erebdobnyi biryi mo cemna li karebsou akiryi uki tentok kum, bitinyi kum aryi nun wa in dinyi asi weikto kuboka da kum karebsurur,” ebmou. Uca, Elisa biryi ersi ato ebmou, “Kan asing aryi a kunubkwande dinyi ara eibkwandim. Bok, a kunubdeibokabdiryi lak kibdeibkwande yina ara kanda kum yibkwandim,” ebmou. 20Anyi bisi ato kuboka akatei nang aryi, weik bisik wengbana bublan dam aryi yan yaniboka sitam-sitam eblobokmai ba, dibmou.

Currently Selected:

2Raja-raja Uram 7: MTG

Highlight

Copy

Compare