2Raja-raja Uram 6

Elisa biryi me wekeibmai ya asi dobmou uram deyok

6:1-7

1Uki tentok tum ara Elisa erci etereramwe Imtamnyi uram ermurun nang nabi mer aryi ersi ato ebmai, “A dibdesurum, kan kurum dam kunub bok, nun kuron ai ara iya mitik anun ee. 2Nun ai dobdobkwayeb ati, me Yordan kin kurur co asi, ‘Ton nuksurum.’ Ba, nunci bindoka anda co asi yuk-yuk kwebdobibyi ura, abyokomna luboka nun kuron ai dobdobkwayeb,” eboka molobmai. Ba, Elisa biryi, “Ur,” ebmou. 3Ba, sun kwit tentoknyi biryi Elisa bisi ato ebmou, “Nai, nun kan mabwe ab milibsurum,” ebmou. Ba, erci yo teleb, “Niryi, sun ab tonkwa binkwamab,” ebmou. 4Ebmouci, erci sunsi milibmou. Ba, me Yordan kin binmaici, sun tenebmai co asi kwebkalibmai. 5Kwebnin banmai noutam aryi, ninyi tentoknyi er ya luksakoka Yordan um wekmou. Ba, anyi biryi, “Nai, e! Ara, yuk nang ya asi, ‘Ni bobkwan,’ eboka boyanmonwe ya aca,” eboka uram ngalukmou. 6Uca, Elisa biryi ato ebmou, “A ya ara dansa sakoka wekmar do?” eboka, anyi bisi asibmou. Uca, anyi biryi, “Dam asa sakoka wekmar,” ebmou. Ura, Elisa biryi co sekdoba asi sekokaburyi, otam kuboka asi donokmou. Ba, a ya ara me deici anamtingyanmou. 7Ura, Elisa biryi anyi bisi, “Ur dobdobdum,” ebmou. Ba, anyi biryi er taruk donokokaburyi, a ya dobdobmou.

Elisa biryi Aram atei nang ab mar boboka obdankwamnyi asi sekminikamwe uram deyok

6:8-23

8Aram sienyi biryi Israel mutuk nang asi mar bobmou. Ati, er ab, er yin doun sien nang ab aryi bulubmaici, uram moun yibmai. Ura, sunsi, “A mutuk binkwandarur. Bimunyi ura, sakweteboka bisik sekwandarur!” ebmou. 9Bok, Er Imtamnyi uram ermurunanyi nabi Elisa biryi Israel atei sienyi bisi, “Aram nang aryi bisik sirya sekmang bisik asi bingnyob,” tenen ati ato ebdeibmou. “A bisik ara yibimunyei, sun Aram nang aryi sirya o bindoka bisik sekmasing,” ebmou. 10A deyok aryi, Israel sienyi biryi er atei nang asi ato ebdeibmou, “Nabi Elisa ebdeibmar mutuk asi bindarur!” Ebmou ura, sunci a mutuk bindoka kalingnamnyi. Ato kuboka liki tentok kum kuramiryi, eda tuba-tuba kalingnamnyi. 11Ba, a deyok aryi er Aram sienyi yu wekmou. Ba, er yin doun sien nang asi nabmouci, sunsi ato ebmou, “Nisi kum ebmanindau kum, nun atei nang bok, unanyi biryi Israel sienyi nang tam makibdobmar do?” ebmou. 12Bok, yin doun nang sienyi tentoknyi biryi ato ebmou, “Nai sienyi, kan ebmoumwe uram ara nunci kuma, eda Israel atei Er Imtamnyi uram ermurunanyi si nabi Elisa biryi ebmou. Ani, kan man ai umbura aryi ebmoumwe uram ara Israel sienyi dam asi ebmar,” ebmou. 13Ba, sienyi biryi ato ebmou, “Er kunmar ai ingkiringbindarur. Ba, niryi ninyi arukni ba, Elisa bisi talebkwaming!” ebmou. Ba, sunci ingkiringbindoka eibmaici, Aram sienyi bisi ato ebmai, “Elisa bira Dotan atei a kunmar,” ebmai. 14Ura, Aram sienyi biryi er bisam kuda aryi kongkong eboka ninyi bon ai ab, er yin doun nang mer ab bokdonokmou. Ura, sunci lukunda aryi bindokabiryi, Dalton atei asi aknabdongobmai. 15Ura, Elisa wa irmilinanyi bira berentam minob bukokaburyi, baitam sakoka dinmou uca, yin doun nang ilinto aryi bisam kuda ab mar boboka ordan kereta bobmaici, akatei asi aknabdongoboka warikmai asi eibmou. Ura, Elisa bisi bindoka ato ebmou, “Nai, yin doun nang ilinto yandoka warikmasing! Ati, nunci una kubkwamanim do?” ebmou. 16Uca, Elisa biryi ato ebmou, “Ilil kuna mem, nun kalingsin nang ara weik, ba sunda mitik,” ebmou. 17Ura, Elisa biryi Er Imtamnyi bisi molobmou, “Nai Iya Erebdobnyi, ni mi er asing kwelekeibdum ba, erci eibkwande,” eboka molobmou. Ba, Er Iya Erebdobnyi biryi er wa inanyi asing kwelekeibmou ba, akatei mutuk konkon ara bisam kuda ab, uk angmou kereta aryi langdibmouci, Elisa bisi aknabdongobmai asi eibmou. 18Ura, sun Aram nang aryi yuryandoka Elisa bisi iyanganmai talak aryi, Elisa biryi Er Iya Erebdobnyi bisi ato eboka molobmou, “Nai, Iya Erebdobnyi Kanci sun asing asi kubdeibdum,” eboka molobmou. Ba, Er Imtamnyi biryi Elisa molona kekeboka karebmou. Ara, sun a iyanganmai yin doun nang nirya asi asing kubdeibmou.

19Ura, Elisa biryi sunsi ato ebmou, “A bisik kuma, akatei kuma,” ebmou. Ebmouci, “Nisi milibnindarur, niryi sunsi sun ingkiringmarumnyi bisi bobinkwamasin,” ebmou. Ura, erci sunsi mitik atei Dalton aryi kuboka Samaria atei bobinmou. 20Samaria mutuk sirya bobinmou ura, Er Imtamnyi bisi ato eboka molobmou, “Nai Iya Erebdobnyi, ura a nang sun asing elekeibdum, ba sunci eibkwaming” ebmou. Ba, Er Iya Erebdobnyi biryi a nang sun asing elekeibmou. Ba, a binmai atei ara Samaria noutam binmai asi eibmaici, sun ilil dobdobmai. 21Ba, a tum aryi Israel sienyi bira Samaria atei a kuramwe aryi, Aram yin doun nang eibmouci, Elisa bisi ato eboka asibmou, “Nai, niryi a nang asi obkwan do?” ebmou. 22Uca, Elisa biryi ersi ato ebmou, “Mem! Kanci ninyi ordana ai aryi doantumwe nang asi, kan ninyi on ya ab, kan ninyi on yin aryi obtum do? Kum! Eda, kanci sunsi yina ab, me ab sunsi kiknibminikdum. Ba, yibingiryi sun sienyi bisi tamurorbinkwaming,” ebmou. 23Ura, Aram yin doun nang mer ati weik yina kiknibminikmou ba, me ab kwaning ab yibmai. Sirya yibmai ura, Samaria atei sienyi biryi ur sun sienyi bisi bindarur ebmou. Ba, a talak ara Aram ninyi aryi Israel mutuk ton kum wengderbaramnyi.

Elisa biryi sun Samaria atei nang aryi atei yandoka warikmai ba, kubminikmou deyok

6:24–7:20

24A sirya ura, Aram sienyi Benhadad biryi er yin doun nang nirya bulubdeibmouci, Samaria atei mar bobindoka aknabdongobmai. 25Ba, sun Samaria atei a mar bobindoka warikamnyi talak aryi, weik kwaning utana li dobmou. Ba, a talak aryi sun yina-yina dengna ara yibman kum yina bok asi dengna weik kibdeiamnyi ba, dengnamnyi. Ara, bisam keledai kisok asi dengna weik keil perak 80 baryi dengnamnyi. Ba, 200 gram baryi maka emnanyi dei ara dengna weik keil uang si perak amubaryi aryi dengnamnyi. 26Uki tentok tum aryi Israel sienyi bira akatei lika dub lingyibanmou. A tum aryi, ner tentok yandokaburyi, sienyi bisi ato ebmou, “Nai sienyi ni mambul kun dinyi asi milibnurum!” eboka molobmou. 27Uca, sienyi biryi ersi ato ebmou, “Er Iya Erebdobnyi bibabyi kan mambul dinyi asi kum karebmakir. Akiryi nira gandum du babyi, anggur me babyi ton kum aryi kan mambul kubmakir dinyi ara dan dinyi aryi milibkitinyi do?” ebmou. 28Ebmouci, sienyi biryi a ner asi ato eboka asibmou, “Kan unatoa asi mambul kubmakir do?” ebmou. Uca, a ner aryi ersi ato ebmou, “Ni ka biryi ato ebmanir: Arub ara nunci kan mi oyibdobmanimnyi ani, ambutum ara ni mi oyibdobkwanim ebmanir. 29Akiryi, ni mi asi oboka yibmanoumwe. Ba, a maberekoka ara niryi, ‘Ni ka, kan mi oboka yibdobkwanim,’ ebmonwe uca, er mi ara da inibdeibdobmou,” ebmou. 30Ura, a ner aryi sienyi dam yandoka nukmoua asi kekebmouci, se tenen kanya aryi er ongon aling kwiliklobmouci, lika dub asi lingyibanmou. Ba, ninyi ilinto aryi dinmai uca, sienyi bira ninyi dibmangi ba, ongoraming aling asi ongobmouci, yibanmou asi eibmai. 31Ura, sienyi biryi sunsi ato ebmou, “Elisa bira arub aryok obkwaman! Ba, Imtamnyi biryi nisi wenebkwanir, ara weik wenena asi da tabakdongoboka wenebnurur.” Ara, nabi Elisa biryi Aram ninyi asi ur obdum kum eanou deyok aryi ura nun mambul dinyi donub. 32Ura, sun wisi-wisi sien nang ab, Elisa ab, er ai a bunmai. Asi, sienyi biryi ninyi tentok asi, “Minob birum!” eboka arukmou. Uca, a arungnanyi Elisa atei minob bana kabul talak ara Elisa biryi a bunmai sien wisi-wisi nang asi, ato ebmou, “Sun bikmarum do? Ninyi onanyi biryi er arungnanyi arukeibmar ba, ni ya ngang sengyanganmanir. Ati, er arukmaranyi ai wengyasicei ati, er yangaci ura, minob bublan tirikoka taleblobkwanub,” ebmou. 33Ura, Elisa ab, akatei wisi-wisi sien nang ab uram tuba sisikde wekabyi bok asi, Israel sienyi yanmou ba, Elisa ab ebdanmarei. Ura, Israel sienyi biryi Elisa bisi ato ebmou, “Er Iya Erebdobnyi biryi a mambul kun dinyi karenurur. Bok, asi nira unato ati, ‘Er Iya Erebdobnyi biryi nunsi lebdeibkwansir,’ tenen ati tuba dibde bunun do?” ebmou.

Currently Selected:

2Raja-raja Uram 6: MTG

Highlight

Copy

Compare