2Raja-raja Uram 5

Naaman bisi kweterdeirin uram deyok

5:1-27

1Naaman bira Aram atei yin doun sienyi kuramwe. Ba, Er Iya Erebdobnyi biryi Naaman deici aryi Aram nang sun mar ordana atei nang asi oboka muna kirdongorongni dinyi kareamwe. Ati, Aram atei sienyi biryi Naaman bisi iya kanya deiboka boukwe kimdamwe. Bok, Naaman bira susa iyamwe. 2Ba, uki tentok talak aryi Aram nang aryi Israel mutuk nang asi mar boboka idaluamiryi, Israel mutuk kabir nebnyi tentok boyanamnyi. Ba, a nebnyi ara Naaman ner ati wa in kabir ner kibdeiamwe. 3Ura, uki tentok tum aryi a kabir ner aryi erti wa iramwe ner asi ato ebmou, “Sienyi biryi Samaria atei Er Imtamnyi uram ermurunanyi bisi binkwamaci ura, er eiburyi, yirur susa ara, ‘Lobdobkwankir,’ ebte aryok lobdobkwanta,” ebmou. 4Ba, Naaman biryi a ebmou uram sirya kekebmouci, Aram mutuk sienyi bisi, “Israel mutuk kabir nebnyi ara ato-ato kuboka ebmar,” erbinmou. 5Uca, Aram atei sienyi biryi, “Israel mutuk sienyi bisi birum! Niryi, ersi kerek sekeibkwaman,” eboka Naaman bisi arukmou.

Ba, Naaman biryi Israel mutuk sienyi biti, perak keil uang 30.000 baryi ab, emas keil uang 6.000 baryi ab, teleb ongon aling takubaryi ab bobmouci, Israel mutuk sienyi Yoram bisi binmou. 6Ura, a kerek sekeibmou ara, “A kerek sengna deici aryi kansi, Naaman bira ni yin doun sienyi bokeibman. Ati, kanci er talebwe susa asi kwetebdeibdum,” eboka Israel mutuk sienyi bisi molobmouci, ato eboka sekeibmou. 7Asi, Israel mutuk sienyi Yoram biryi a deibmou kerek sengna sirya nukmou. Ura, er ongon aling kwilikmouci, “Nira Imtamnyi darib! Akiryi, ninyi dibdeiabnyi ani, tubto kam bukeibkwaman tenebmanir do? Ati, niryi a susa talebunyi bisi kwetebdeibkwaman ati, anyi biryi niti a kerek sekoka deibmanira darib? Dirongmanuba ara yuk deyok ati koubkwamarci, kubmanira,” ebmou.

8Ura, Israel sienyi Yoram biryi er ongon aling kwilikmar en uram asi Er Imtamnyi uram ermurunanyi nabi Elisa kekebmou. Ura, Elisa biryi Israel sienyi bisi ato eboka kerek sekeibmou, “Unatoa ati, kan ongon aling kwilikmarim do? Israel mutuk ara Imtamnyi uram ermurunanyi ton a kurur tenebkwande ati Nisi yarur!” eboka sekeibmou. 9Ura, Naaman biryi er ninyi boyiban aia ab, bisam kuda ab Elisa bisi binmouci, er ai dam bisik wengban ai bindoka tiklobmou. 10Bok, Elisa biryi er wa inanyi deici asi ebdeibmou, “Kan talebkouci yikurur susa ara lobdobkwamakir ati, me Yordan kin biminyi ura kengmaminyi asi, liki tabaryi kekwandum!” Ato eboka Elisa biryi Naaman bisi ebmou. 11Bok, “Ato kubdum,” ebmou ati Naaman er malyi urasin bobdobmou. Ura, Elisa ai dam aryi sakweteboka anabdobmouci, ato ebmou, “ ‘Er molorurnyi, Er Iya Erebdobnyi si naboka molobdiryi, ni talebnouci yinurur susa deici asi talebdenir ba, lobdobkwamanir,’ tenebmonwe,” ebmou. 12“Damsyik mutuk me ara Israel mutuk me ato kumci, iya teleb-teleb me akwe yibardarur. Ara, Abana me ab, Parpar me ab yibiu. Akiryi, niryi anda me asi bindoka kekdobnyi ura, ni taleboka yinurur u ara lobdobkwanir,” ebmou. Ebmouci, yu kanya bobdaka tamuroryanmou.

13Ura, Naaman wa in nang aryi er dam yanmaici, ersi ato ebmai, “Nai, a Imtamnyi uram ermurunanyi bira, ‘Weikto il dibmakutwe ababyi ibkwamatum. Bok, ara me Yordan kekdobminyi aryok, kan talebkouci yikurur susa ara lobdobkwamakir,’ ebmakir. Ati, Imtamnyi uram ermurunanyi ebmakir to kuboka kum kunubkwamarim do?” ebmai. 14Ba, Er Imtamnyi uram ermurunanyi biryi, “Me Yordan kin yurbindoka liki tabaryi kekminyi ura, kan talebkou susa lobdobkwamakir,” eboka arukmou to kuboka, me Yordan kin yurbinmou. Ura, nabi Elisa biryi ebmou to kuboka kekmou ba, er taleamuryi, yiramwe susa ab, er nong mulonga kuramwe dinyi ab nirya asi kibdobmou.

15Ura, er yin doun nang nirya ab, nabi Elisa bisi tamuryanmai. Ura, nabi Elisa urasin dam tingyanmouci, “Ukura, niryi sirya bikne. Ara, tukwe dangna mutuk nirya aryi Imtamnyi da ton kum kurur. Eda, Israel mutuk a dem kurur. Akiryi, niryi kanti bobmakin dinyi asi dobdobdum!” Naaman biryi Elisa bisi ato ebmou. 16Uca, Elisa biryi ato ebmou, “Er Iya Erebdobnyi, iya kam kururnyi dam aryi, Er wa inanyi kibse. Ati, Er si deici aryi diba ati, kan karebmanirim dinyi niryi kum dobdobkwaman,” ebmou. Bok, Naaman biryi, “Ni karen dinyi dobdobte,” tenen tuba ati tatanmou bok, Elisa biryi kum dobdobmou. 17Ura, “Nai, ato kubmarim ura, bisam keledai bitinyi aryi borande ikin kikiman asi, Israel mutuk tukwe ton karebnurum. Ba, niryi yuk kwemdeina asi molonun ara taklobniryi, Er Iya Erebdobnyi biti dama deirina ati bisam domba oboka uk dana dinyi doboka molonkwan ati,” eboka Naaman biryi Elisa bisi Israel mutuk tukwe molobmou. 18Ara, “Er Iya Erebdobnyi biryi ni aminda tam malyi kun dinyi kilibkwanir. Ara, Aram mutuk nang molonung kwemdeina si Rimon bisi Aram sienyi biryi molorbarande talak aryi, nibabyi ni sienyi ersi miliboka molorbiniba, Er Iya Erebdobnyi biryi ni malyi kun dinyi kilibkwanir,” ebmou. 19Ba, Elisa biryi Naaman bisi ato ebmou, “Teleb asa aryi binmaminyi tok asi kan atei bindobkwamarim!” ebmou.

Ba, Naaman er atei binkwamouci, anabdobmou.

20Ura, Naaman anaboka er atei banmou ara mutuk luluna kum kuabwe bok, Elisa er wa inanyi Gehazi biryi ato tenebmou, “Se, Elisa biryi Aram ateinyi Naaman bisi boukwe weik kibmar. Ba, Naaman biryi ni nai Elisa biti boyanmou bona asi erci kum dobdobmar ara unatoa ati da?” tenebmou. Tonda, ato tenebmou, “Iya Erebdobnyi kam kururnyi si deici aryi, Naaman bisi aminda dombindokabniryi er botamuboka banmar bona asi moloboka dororbinkun,” tenebmou. 21Ura, Gehazi biryi Naaman aminda dombinmou. Asi, Naaman biryi dirtamurdenmouci, ninyi tentok er aminda cukoka dombanmou asi eibmou. Ura, Naaman er kereta dub aryi, olong sakweteboka Gehazi bisi ato ebmou, “Teleb!” ebmou. 22Uca, Gehazi biryi ato ebmou, “Teleb! Ni nai Elisa biryi, ‘Sun Imtamnyi uram ermurun nang asi kabir nang bitinyi Efraim mutuk kon tam aryi kuboka, ni dam yanabding. Ati, kanci sunti keil uang 6.000 baryi ab, teleb ongon aling bitinyi ab karebci ba, boyarum,’ ebmar ati, kanci karebdum,” eboka molobmou. 23Ba, Naaman biryi ato ebmou, “Yo teleb, ur keil uang 6.000 baryi dobdobdum,” eboka Gehazi bisi ato ebmou. Ba, “Keil uang 6.000 baryi ab, teleb-teleb ongon aling bitinyi ab kitiboka Gehazi er kabir nang bitinyi ati doboka karebdarur,” eboka, arukmou. Ba, er mabwe asi Naaman biryi arukmou. Ba, kitiboka Gehazi mabwe kabir nang bitinyi asi karebmai ba, menekoka bobanmarei. Ba, Gehazi bira sun aminda banmou. 24Ba, a bitinyi kabir nang aryi, “Elisa kuramwe mutuk si Karmel kon,” dam bobinmarei. Ura, Gehazi bibabyi sirya sun dam yanmouci, a karebmou bona doboka Elisa ai um deibdobmou. Ura, sun a bitinyi nang asi, “Bindobdurum,” ebmou ba, bindobmarei. 25Ura, Elisa biryi Gehazi ukuryok yangau asi, “Kan dantam binmarim, ani yangarim do?” eboka asibdenmou. Uca, Gehazi biryi, “Nai, niryi sakweteboka yuk mutuk da ton kum binman!” ebmou. 26Bok, Elisa biryi ersi ato ebmou, “Ni kanya kan ab tonkwa binmarurumwe ara kan kum bikmoumwe darib? Akiryi, kan ab ebdankwamarurumwe ati, Naaman bira er kereta dub aryi sakwetebmouci, ebdanmarurumwe ara sirya ebmasunwe. Tonda, perak co bok kanci sirya dobmarim. A dobmarim aryi, anggur wa ab, zaitun wa ab, bisam domba ab dekdobkwandim. Tonda, bisam lembu ab, sapi ab ani, kan, ‘Wa irmilikin nang ilinto,’ dobdobkwan tenebmarim. 27Bok, Naaman talebwe susa ara kan ab, kan deibdoba yala nang nirya asi iya ati talenkwansir,” ebmou. Ba, Gehazi bisi a talebkwansir erdongou aryok a susa talerdongorbinmou. Ba, er nong bol ara lumtaia kait ato kubmou.

Currently Selected:

2Raja-raja Uram 5: MTG

Highlight

Copy

Compare