2Raja-raja Uram 4

Nabi Elisa biryi sulyi ner mambul dinyi asi milibmou uram deyok

4:1-7

1Uki tentok tum aryi, Er Imtamnyi uram ermurunanyi er ner tentok aryi Elisa bisi ato bindoka ebmou, “Nai, ni akenyi bira Iya Erebdobnyi uram asi ilil teneramuryok asi dibwe ara kan sirya bikmarim. Bok, erci yuk nang bona ati dengdeina kum kuburyok dibwe. Ba, a bona damnyi biryi ni mabwe bitinyi asi dobokabdiryi, er il wa arungni mabwe kibdeibkwande,” ebmou. 2Ba, Elisa biryi a ner asi ato ebmou, “Niryi kanti danto dinyi asi kubdeibkitinyi do? Kan ai deibmarim dinyi asi, ‘A dinyi-a dinyi deibdobman,’ ebdum,” ebmou. Uca, a ner aryi ersi ato ebmou, “Nai, nira ukutotoa ton kum deibman, eda mitik moyok minyak demang deibdobman,” ebmou.

3Ura, Elisa biryi a ner asi ato ebmou, “Kan kurandim ai dam ninyi asi ukutotoa kum kibdeibmangnyi moyok asi ton molororbirum. Bok, moyok ilinto molobdobkwamarum.

4Ba, kan mabwe ab sun ai wengbimunyi ura, bublan tirikdongobokabmunci, a mitik moyok minyak ara anda moyok asi dikdongobkwandarur. Ba, a dikdongobmamunyi ba, sirya langkibmaci moyok ara doboka erebdemunyi ura, yuk ai wibdeibkwandarur!” ebmou.

5Ba, a ner er ai binmou. Ura, er mabwe ab tonkwa ai bublan tirikdongoboka wekmaici, minyak kubdob moyok asi dobmouci, er mabwe aryi minyak kirdeina kum moyok karebmarei. Ura, a moyok mer asi dikdongobnin yibinmou ba, langdibmou.

6Ura, minyak anda dikdongobmou moyok ara sirya langdibmou. Ba, er mabwe asi, “Minyak kum kibdongobmanyi moyok ton karebdurum,” ebmou. Uca, er mabwe aryi, “Ton kum, sirya kum danmar,” ebmarei. Ato ebmarei ura, a dingdongonmou minyak ababyi cebdobmou.

7Ura, a ner tubto nabi Elisa bisi binmou. Uca, Elisa biryi a ner asi ato ebmou, “A minyak boboka dengdorbirum. Ba, kanci kan akenyi sun yuk nang bona bobloburyi, dibwe ati dekwandum. Ba, kablobminyi dinyi ara kan ab, kan mabwe ab yibde kuron dinyi kibdobkwandarur!” ebmou.

Sunem atei ner ab er mi ab deyok

4:8-37

8Sunem atei ara bona weik taleramwe ner tentok kuramwe. Ba, a bona weik taleramwe ner aryi Elisa bisi, “Yina tonkwa yibkwanim ati yarum,” eboka namdamwe ba, Sunem atei ner asi bindoka a ner ab, er mabwe silib ab tonkwa yiramnyi. 9Ura, a ner aryi er akenyi bisi ato ebmou, “Nunsi a tuba yangarurnyi bira Er Imtamnyi, Iya Leknyi wa inanyi bica. 10Ati, nunci erti ai ton yuk dobdeibkwanim. Ba, aminda diryasiriryi, mabkwanci ai dobkwanim. Ara, eitam ai asi mitik ai nun bok, er man sokon ab, kerek sengna co lamna ab, er bun sokon ab, akai milil arana ab doboka kiknibdeibkwayeb. Ba, erci nunsi diryasici tum ara a yandoka mankwande,” ebmou. 11Ura, uki tentok tum Elisa bira sunti dirbinmouci, erti dobdeiamnyi ai asi welebindoka mabmou. 12Ba, erci er wa irmilinanyi si Gehazi bisi ato ebmou, “Sunem atei ner asi nabdum,” ebmou. Ba, sirya nabmou ura, yanmouci, Gehazi urasin dam yandoka tikmou. 13Ba, Elisa biryi Gehazi bisi ato ebmou, “A ner asi ato ebdum, ‘Kanci nunti ilila kuboka mambul kiringsiminci teleb kimdeisurum. Ati, nunci kanti una dinyi asi kubdeibkitinimnyi do? Kanda danto kuboka tenerum. Niryi kanti sienyi bisi kum, yin doun sienyi bisi kum kan deyok ati ton da ebdetinyi do?’ ebdum,” ebmou. Gehazi biryi a ner asi asibmou uca, a Sunem ner aryi ersi ato ebmou, “Ni teleb asa aryi ni atei nang kankan kuronun. Akiryi, ni yibde kuron dinyi ababyi ni taruk dam aryi ton kum danana kum kunurur,” ebmou.

14Ba, Elisa biryi Gehazi bisi ato ebmou, “Niryi erti danto dinyi asi kubdeibtinyi do?” ebmou. Uca, Gehazi biryi ato ebmou, “Er akenyi babyi sirya wisi dauci, er mi ababyi ton kum ner aca, ati malyi,” ebmou. 15Ura, Elisa biryi ato ebmou, “Ersi nabdum!” ebmou. Ba, Gehazi biryi a ner asi nabmou ba, yandoka bisik bublan dam tingyanmou. 16Ura, Elisa biryi a ner asi ato ebmou, “A kwalina kwalibloboka a berekmara ato tum ara sal mi deibdobminci, iribkwandim,” ebmou. Uca, a ner aryi Elisa bisi ato ebmou, “Nai, kanda Er Imtamnyi uram ermurunanyi bica, ati kanci nisi tola enina mem!” ebmou. 17Ura, nabi Elisa biryi ebdeiamwe to kuboka a ner mi mundu bobmou. Ani, Elisa biryi a ner asi, “A kwalina kwalibloboka a berekmar ato uki tum ara mi deiboka iribkwandim,” ebdeiamwe to kuboka mi deibdobmou.

18Ura, deiboka boramwe ani, a mi sirya nebdobmou talak ara er nai ab, er nai gandum wa iboka kirmilina nang ab kinmai dam bindobmou. 19Ura, a mi lukdandoka er nai bisi ato ebmou, “Nai e, ni kisok e, ni kisok e!” eboka ngolongdonmou. Ba, er nai biryi kabirnyi tentok asi ato ebmou, “Tomoboka er kwin bisi bobirum!” ebmou. 20Ebmou ba, er kwin bisi bobinmou. Ba, er kwin biryi a mi asi uki tentok tum a nirya ara iriboka buklobmou tok, ani a mi sirya dibmou. 21Ba, a ner aryi er mi tukwi boboka Er Imtamnyi sunti dirbinmanaryi maramwe ai dub asi bowelebinmouci, Elisa maramwe sokon bindoka mabdeibmou. A mi akai umbura a deibloboka bublan tirikdongoboka bindobmou. 22Ura, a ner aryi ato kubloboka er akenyi bisi nabmouci, ato ebmou, “Kabirnyi tentok asi arukdum ba, bisam keledai ner tentok boyanurur. Ba, ni Imtamnyi wa inanyi bisi ola binabnyi ani, tamuryankwan,” ebmou. 23Uca, er akenyi biryi ersi ato ebmou, “Unatoa ati arub aryi kanci ersi binkwamarim do? Arub ara ukuryok wala babyi, ba, uki Sabat tum kuma,” ebmou. Uca, er ner aryi ersi ato ebmou, “Malyi, kan kanya ilil kukina mem,” ebmou. 24Ura, a bisam keledai asi tabwe sirya koubdongobmou ura, er wa inanyi bisi ato ebmou, “Bisam keledai asi yan debdongobdum ba, ola cukwanim,” ebmou. “Ani, niryi kansi, ‘A dikum tiklobdum,’ eboka uram kum ebmanyi ura, kanci bisam keledai cungmanimnya mitik kimdeina mem!” ebmou.

25Ura, Elisa kuramwe mutuk Karmel kon dam binkwamouci, anabmou. Asi Imtamnyi wa inanyi nabi Elisa bira era mutuk aryi, a ner asi minob eibmou. Eibmouci, er wa irmilinanyi Gehazi bisi ato ebmou, “Sunem atei ner yanganmar, o dibderum!” 26Ebmou ba, cukoka a ner bisik dirbinmou. Dirbinmouci, Gehazi biryi a ner asi bindoka ato ebmou, “Kan ab, kan akenyi ab, kan mi ab sun nirya ara teleb akwa kundarur do?” Ebmou uca, a ner aryi ersi ato ebmou, “Nun nirya teleb akwa kunub,” ebmou. 27Ba, a mutuk kon dam sirya binmou ura, nabi Elisa bisi luknubdongoboka er yan asi taleboka iribdobmou. Bok, ato kunmou asi, Gehazi er kanyatam aryi ato tenebmou, “Mem,” eboka, “Dobdonokwan,” tenebmou. Uca, Elisa biryi, “Malyi, mem en kum! Er boukwe ati kum kubmar. Ara, Er Iya Erebdobnyi biryi a ner dam kubmar dinyi ni dam kum lak kibdeibmanou ati malyi,” ebmou. 28Ura, a ner aryi Elisa bisi ato ebmou, “Nai, niryi kansi, ‘Ni mi ton deibdobkwan,’ eboka ton kum moloankise. Eda niryi kansi ato eankise ara, ‘Tola ati ato dinyi erkarenina mem!’ eankise,” ebmou. 29Ba, Elisa biryi Gehazi bisi ato ebmou, “Ni kama doboka bobminyi ura, ola a ner atei birurum. Ba, bisik ai banmarumunyi noutam aryi ninyi ebdamunyi ati kanci sunsi, ‘Teleb,’ erdena mem! Ani, sunci kansi, ‘Teleb,’ ebkingnyi ati sunsi, ‘Teleb,’ eboka dengdeirina mem! Eda, a kama ara bobanmaminyi tok asi, a mi deici asi bindoka deibkwamarum!” eboka Elisa biryi Gehazi bisi ato ebdeibmou. 30Ba, a mi er kwin biryi Elisa bisi ato ebmou, “Er Iya Erebdobnyi, iya kam kururnyi si deici aryi, kan kam kun dinyi ati ara niryi kansi kum deiblobkunun,” ebmou. Ba, Elisa tikoka a ner atei tonkwa binkwamai ati anabdobmou.

31Ba, Gehazi biryi a kama bobmouci, Elisa ab a ner ab bisik noutam takloboka, a ner atei minob binmou. Binmouci, a mi deici asi a kama bindoka deibdenmou uca, a mi ara kum bukokmouci, uram kum ebmou. Ura, erci Elisa dam tubto tamuryanmouci, ato ebmou, “A mi ara kum bukokmar,” ebmou. 32Ba, Elisa sirya a ner ai umbura wengbindoka dinmou uca, a mi ara sirya dibmou. Ba, man sokon mabdeibmou. 33Ura, er yuk a mi mabdeibmou ai umbura wekmouci, bublan tirikdongobmou ura, Er Iya Erebdobnyi bisi molobmou. 34Molobmou ura, a mi deici maboka er si bambul ara a mi si bambul deici deibmou. Ani, er asing babyi, taruk tatang babyi ara a mi asing, taruk tatang deici ab asi deibmou. A mi deici asi ato kubmou aryi, a mi nong nirya asi tin kibdeibmou. 35A tin kibdeibmou talak ara Elisa a mi deici aryi sakweteboka akai umbura aryok asi otam binabna atam yanabna kibkirikmou. Ani, tubto yuma kubmou to kuboka a mi deici marwelebinmou. Ba, a mi bukokmouci, liki tabaryi miting debmouci, asing kwelekmou. 36Ura, Elisa biryi Gehazi bisi nabmouci, ato ebmou, “A mi er kwin, Sunem atei ner, nabdum!” Ebmou ba, a ner nabmou ura, er dam yanmou. Ura, Elisa biryi a ner asi ato ebmou, “Kan mi dobdobdum!” 37Ebmou ba, a ner aryi ai wengbinmouci, tukwe ai kisok luknubdongoboka Elisa bisi kibdobmou. Sirya kibmou ura, er mi dobdobmouci, akai aryi boboka sakwetebdobmou.

Ilil tenen dinyi bitinyi deyok

4:38-44

38Ba, Israel mutuk nirya kwaning utan li dobmou. A talak ara nabi Elisa tubto Gilgal mutuk tam kuboka binmou. Ura, Elisa biryi Er Imtamnyi uram ermurun nang mikbaryi asi eterebmou. A eterenmou karin aryi er ai wa irmilinanyi bisi ato ebmou, “Ilila kwaning ongon meyok aryi a nang ati kwaning ton buna ton ongobdeibdum,” ebmou. 39Ura, Imtamnyi Uram ermurunanyi nabi tentok anabdobmouci, bai buna ingkiringbinmou. Ingkirikde baramwe uca, bai kurande dakit meyok kisok moudaramwe asi eibmouci, ilinto dakoka atei boyanmou. Bok, a dakmou dakit meyok kisok ara bita bingna kum cok kubkub eboka yubmou. 40Sirya obwe ura, nabi nang mikbaryi ati bokdeibmou. Ba, Imtamnyi uram ermurun nang a dakit meyok kisok sirya yibdei uca sik ura, Elisa bisi ato ebmai, “Nai! A yina yibmab ara sik aryi nun dibkwamab,” ebmaici, nirya kum yibmai. 41Bok, Elisa biryi ato ebmou, “Tepung mitikanun dikdongobdum. Sirya ura, tubto bokeibdum,” ebmou. Sirya a dakit meyok kisok yubmou umbura tepung mitikanun dikdongobwe ura, a dakit meyok kisok yubmou ara tubto lukoka bokeibmou ba, telebto akwe kuboka yibmai.

42Uki tentok tum ara sal tentok Baal-Salisa mutuk aryi Elisa biti gandum ukuryok kibmai yina ab, roti kwaning 20 baryi ab bobmouci, yanmou. Ura, nabi Elisa biryi er ai wa irmilinanyi bisi ato ebmou, “A kwaning ara nabi nang nirya ati karebdum,” ebmou. 43Bok, Elisa ai wa irmilinanyi biryi ato ebmou, “Nai, a roti kwaning aryi ninyi 100 baryi nang yibkwamang ara kikiman kum kubkwamar,” ebmou. Bok, Elisa biryi ato ebmou, “Er Iya Erebdobnyi biryi ato ebdeibwe, ‘Ninyi kwaning yibmangnyi bok, nirya yina kum uca ton tuba kubkwande,’ ebdeibwe. Ati, ur a nang asi bokeibdum,” ebmou. 44Ura, Elisa ai wa irmilinanyi biryi a kwaning roti bokeibmou ba, sun nirya yibmai. Bok, Er Iya Erebdobnyi ebdeiamwe to kuboka kubmou, Ara, a roti kwaning nirya kum dandeirina kum kubmai eda, ton tuba kablobmai.

Currently Selected:

2Raja-raja Uram 4: MTG

Highlight

Copy

Compare