2Raja-raja Uram 24

1Yoyakim Yehuda atei weik sienyi kiamwe talak ara Babel atei weik sienyi Nebukadnezar biryi mar bobmouci, Yehuda mutuk nirya arabdobmou. Ani, Yoyakim bira ilil kuboka kwalina uki winiryi er dam luknuboka kuramwe. Bok, uki tentok tum ara Yehuda atei weik sienyi Yoyakim biryi tamuboka Nebukadnezar bisi mar bobmou. 2Ura, Er Iya Erebdobnyi biryi Kasdim mutuk yin doun nang ab, Aram atei yin doun nang ab, Moab atei yin doun nang ab, Amon atei yin doun nang ab asi, “Yoyakim ibindarur,” eboka arukmou. Ara, Er Iya Erebdobnyi biryi nabi deici asi ebdeibmou to kunubmou. 3Ura, Er Iya Erebdobnyi ebmou to kuboka, Yehuda atei nang nirya Yehuda atei aryi yakdonokmai. A yakdonokmai ara weik sienyi Manasye biryi malyi dinyi ilinto kunuramwe deyok aryi ato kubmai. 4Ara, Manasye biryi Yerusalem atei ninyi asi sun ton malyi kimna kum bok talyi obnin yibinamuryi, Yerusalem atei ara ining ilinto sakdeiamwe. A deyok aryi Er Iya Erebdobnyi biryi Manasye malyi kun dinyi ara, “Er malyi kun dinyi kilina Ni li,” tenebmouci, ato kubmou.

5Yoyakim Yehuda atei weik sienyi kiamuryi, ibde baramwe dinyi ara Yehuda atei weik sien nang kibde binamnyi ba, sekdongobyi kerek sengna umbura sekdongobyi. 6Ura, Yoyakim dibmou ba, er abwe yabwe dongoamnyi tukwe dam dongobmai. Ba, Yoyakim er mi Yoyakhin aryi weik sienyi kibmou. 7Babel atei weik sienyi biryi Mesir mutuk weik sienyi mutuk nirya arabdoamwe. Ara, Mesir me duman aryi kuboka Efrat me duman nirya arabdoamwe deyok aryi, Mesir sienyi bira baitam sakweteboka ninyi mar bobman kum kuamwe.

Yehuda mutuk weik sienyi si Yoyakhin uram deyok

24:8-17

(2Taw. 36:9-10)

8Yoyakhin er yuma deiamwe talak aryi kuboka kubde baramwe, ani kwalina 18 baryi kimbinmou. Ura, Yehuda mutuk weik sienyi kibmouci, talebmou. Ba, erci Yerusalem mutuk weik sienyi kiamuryi, taleamwe uki ara wala winiryi taleamwe. Ba, er kwin si ara Nehusta. Ba, Nehusta er nai bira Yerusalem ateinyi si Elnatan. 9Ba, erci Er Iya Erebdobnyi biryi urasintam asi malyi dinyi akwe kunuramwe. Ara, er nai Yoyakim biryi malyito kuramwe to asi kunuramwe. 10A talak aryi Babel mutuk sienyi Nebukadnezar ab, er yin doun nang ab aryi Yerusalem atei ninyi asi mar bobmaici yandoka warikdongobmai. 11Ani, Babel atei sienyi Nebukadnezar bibabyi er yin doun nang aryi Yerusalem atei warikmai ai yandoka tonkwa waringyanmou. 12Ba, Yehuda atei sienyi Yoyakhin bira Babel atei sienyi taruk dam dobkarebdanmou. Ani, er kwin ab, er nermabwe mabwe ab, er wa in nang ab, yan dam bun nang mer nirya asi Babel sienyi taruk dam dobkarebmou. Ba, Babel sienyi biryi sun nirya asi taleboka tabwe debmou. Ara, Nebukadnezar biryi Babel atei sienyi kiboka taleamwe talak kwalina inbaryi talak aryi, Yoyakhin bisi talebmou. 13Ura, Er Iya Erebdobnyi ai deiramnyi dengna weik bona-bona ab, Yehuda mutuk sienyi ai deiramwe bona-bona ab nirya asi Nebukadnezar biryi dobdobmou. Ura, erci Er Iya Erebdobnyi ai ara emas aryi deneboka doamnyi dinyi ababyi nirya longokoka dobdobmou. Ara, minob uca Israel sienyi Salomo biryi emas aryi Er Iya Erebdobnyi ai asi deneboka doamuryi, emas aryi kikniamwe bona asi Er Imtamnyi ai deiamwe. Ara, Er Iya Erebdobnyi biryi ebdeiamwe to kuboka Nebukadnezar biryi a bona ab, emas ab nirya asi dalubdobmouci, bobde yanmou. 14Ani, erci Yerusalem atei ninyi nirya asi tabwe deboka Babel atei bobinmou. A bobinmou nang ara akatei sasiboka a kurande tenen nang ab, yin doun sien nang mer ab, etekdob yin douna bikdob nang ab asi taleboka bobinmou. Ani, etekdob ai dona bingni nang ab, besi teikoka ninyi ordan dinyi ab, wa in dinyi ab tonda yuk-yuk dinyi kiknin nang nirya asi bobinmou. Eda, ukutotoa bingna kum nang, talyi nang demang asi Yerusalem atei a taklobmou. 15Tonda, Nebukadnezar biryi sienyi Yoyakhin ab, er kwin ab, er nerabwe mer ab asi Yerusalem atei aryi tabwe deboka Babel mutuk bobinamwe. Ani, Yerusalem atei sasiboka a kuraming tenen nang ab, sienyi ai wa in nang nirya ab asi Babel mutuk bobinamwe. 16Sun Yerusalem atei nang asi Nebukadnezar biryi Babel mutuk bobinamwe nang ara yin doun nang sien nang ninyi 7.000 baryi bobinamwe. Ani, sun etekdob ai dona bingni nang ab, besi asi teikoka yuk-yuk dinyi kiknin nang ara ninyi 1.000 baryi bobinamwe. Tonda, sun mar ordana co biribdob nang nirya asi Nebukadnezar biryi bobinamwe. 17Ura, Babel mutuk weik sienyi Nebukadnezar biryi Matanya bisi Yehuda mutuk sienyi tikeibmou. Ara, Matanya biryi er du mi Yoyakhin unuboka Yehuda atei sienyi kibmou. Ba, Nebukadnezar biryi Matanya er uruma si ara Zedekia eboka si dobmou.

Yehuda mutuk weik sienyi si Zedekia uram deyok

24:18-20

(2Taw. 36:11-21)

18Zedekia er deiamwe talak aryi kuboka kubde baramwe ani, kwalina 21 baryi kimbinmou ura, Yehuda mutuk weik sienyi kiboka talebmou. Ba, erci Yerusalem mutuk weik sienyi kiboka taleamwe kwalina nungna ara kwalina koklombaryi taleamwe. Ba, er kwin si ara Hamutal. Ba, er nai bira Libna ateinyi si Yeremia. 19Erci Er Iya Erebdobnyi urasintam aryi iya malyi dinyi akwe kuramwe. Ara, Yoyakhin er nai Yoyakim biryi kuramwe to asi erbabyi neiktoto ato kuramwe. 20Ba, Er Iya Erebdobnyi biryi sun Yerusalem ninyi ab, Yehuda ninyi ab asi kereboka yu bobmouci, sun Er urasintam aryi bai donokmou. A deyok aryi Nebukadnezar biryi sunsi tabwe deboka Babel mutuk bobinamwe.

Ura, Yehuda mutuk weik sienyi Zedekia biryi er nai Babel mutuk sienyi Nebukadnezar bisi mar bobmou.

Currently Selected:

2Raja-raja Uram 24: MTG

Highlight

Copy

Compare