2Raja-raja Uram 23

Sienyi Yosia biryi kwemdeina molon ai asi dalubkabmou uram deyok

23:1-30

(2Taw. 34:3-7; 35:1-27)

1A sirya ura, sienyi Yosia biryi Yehuda mutuk ab, Yerusalem mutuk ab ninyi talen nang nirya asi naboka, “Bulubdeibdarur,” eboka ninyi asi arukmou. 2Ba, bulubmaici er ab tonkwa Er Iya Erebdobnyi ai binmai. Ura, Er Iya Erebdobnyi ai aryi, Imtamnyi biryi, “Ukuna mem,” ebdeiamwe uram asi tubto dobmouci, sun a buluboka wengyanmai ninyi ati nukarebmou. A buluboka wekmai ninyi ara Yehuda mutuk ninyi ab, Yerusalem mutuk ninyi ab, Er Imtamnyi biti ninyi dama deirin nang imam nang ab, Er Imtamnyi uram ermurun nang nabi nang mer ab nirya buluboka wekmai. 3A sirya nukmou ba, kekebmai ura, sienyi biryi akai co abyokomna dam tingyanmouci, Er Iya Erebdobnyi urasintam aryi ato ebmou. Ara, “Niryi Er Iya Erebdobnyi bikwe iya milinkwan. Ani, Er ebdeibnou uram ara, ‘Ukubdarur-ukuna mem,’ ebdeibsou uram ab, yan memen uram ab, u dikum eteresurur ab asi ni nong ab, ni kanya ab nirya aryi koubtaleboka a kerek sengna sekeibwe to kununkwan,” ebmou. Ba, akatei ninyi nirya aryi, “Diba, Er Iya Erebdobnyi urasintam aryi sienyi ebmar to kuboka kununkwayeb,” ebmai.

4Ura, sienyi Yosia biryi imam besar Hilkia ab, Imtamnyi ai dam dama deirin nang ab, Imtamnyi ai bisik bublan dam kalingna nang asi ato eboka arukmou. Ara, “Er Iya Erebdobnyi ai asi yuk kwemdeina si Baal ab, Asyera kwemdeina ati deiboka molonung bona-bona nirya dobkwetebdarur. Ani, kurya mer atoanun kiknibdeiboka molonung dinyi nirya dobkwetebmunci, Yerusalem mutuk aryi bobokabmunci, Kidron mutuk bobindoka uk dabdarur. Ba, a uk yibdoba er sici ara Betel mutuk bobindarur!” eboka arukmou. 5Ba, yuk atei ninyi kwemdeina ati Yehuda mutuk sien nang aryi, Yehuda weik atei-mitik atei aryi kuboka Yerusalem atei asi molobdanin banung kwemdeina ati dama deiboka uk daboka molon nang tikeiamnyi. Asi, sienyi Yosia biryi, “Sun a kwemdeina wa kum inkwandum,” ebmou. Ba, anda kwemdeina mer si ara Baal ab, kiting ab, wala ab, kurya ab, imtam kuboka yuk mikib dinyi ati dama deiboka moloramnyi. 6Ani, Er Iya Erebdobnyi ai umbura asi Asyera kwemdeina ati deiboka moloramnyi co abyokomna bai dobkwetebmou. Ba, Yerusalem atei aryi boboka anabmaici, me Kidron kin bobinmai. Ura, a bindoka uk dabmaici, teleboka mitik-mitik kiboka sici kibminikmai. Ura, a sici kibminikmaia ara ninyi tukwe dongon dam asi yamubnin yibinmai. 7Ani, Er Iya Erebdobnyi ai umbura tam bok asi, kwemdeina ati talyi yordan ai mitik-mitik wiliboka dobdanamnyi ai ab, Asyera kwemdeina ati ongordeirin aling wiramnyi nerabwe ai ab ati kikniboka dobdanin yibinamnyi asi dalubkabmou. 8Ani, anda kwemdeina ati bisam oboka uk daramnyi nang Yehuda atei nirya kuramnyi nang asi sienyi Yosia biryi naboka bulubdeibmou. Ura, sun anda kwemdeina ati dama deiboka uk daboka molorkiringdamnyi mutuk konkon ara Geba mutuk kon aryi kuboka Bersyeba mutuk kon moloramnya keica nirya asi daluboka malyi kibminikmou. Ani, minob akatei taleamunyi si Yosua, er si makmak Yosua eboka doamnyi bublan wengyangana dam kwanimtam kuboka doamiryi, moloramnyi kwemdeina ai ababyi dalubkabmou. 9Ba, sun anda kwemdeina ati bisam oboka uk daramnyi nang asi Yosia biryi, “Sunda Er Iya Erebdobnyi ai wa ina mem!” ebmou. Ara, sunci yuk kwemdeina mer asi moloramnyi deyok ati sunsi ato ebmou. Bok, “Yerusalem atei Imtamnyi biti dama deirin nang kankan dam aryi, sunda roti kwaning bungbung ena dongona kum roti asi ur yinkwandum!” ebmou. 10Ani, Yosia biryi Ben-Hinom atei kwemdeina molon ai si Tofet ababyi daluboka malyi kibminikmou. Ara, “Sunci a kwemdeina molon ai aryi, kwemdeina si Molokh biti ninyi mi boboka dama deiboka uk dabingiryi, molobingnyei,” tenen ati dalubkabmou. 11Ani, sun Yehuda mutuk minob taleramnyi weik sien nang aryi, sun kwemdeina si kiting ati moloramiryi, borkiringnamnyi kuda ab, kereta yubwa ab asi nirya uk dabmou. A kuda ab, kereta yubwa ara Er Iya Erebdobnyi ai bisik wengbana dam asi deiriramnyi. Ara, akai wa inanyi si Natan-Melekh ai dam dinatam keta asi deiriramnyi. 12Ani, sun Yehuda mutuk sienyi si Ahas ai aruma dub lamna ai asi kwemdeina ati bisam oboka uk dana deirin keil dungna doboka kikniamnyi ababyi dalubkabmou. Tonda, sienyi Manasye biryi Er Iya Erebdobnyi ai dam asi keta yuk liliamuryi, kwemdeina ati bisam oboka uk dana deirin keil dungna doboka kikniamnyi ababyi sienyi Yosia biryi daluboka sici kibdeibmou. Ba, a dalubdoba ara, “Me Kidron kin boboka donongbindarur!” ebmou. 13Ani, Yerusalem atei aryi yaletam kuboka asi, eitam mutuk kon si Lura mutuk kon asi Israel sienyi Salomo biryi iya malyito kwemdeina ati molon ai doamwe. A kwemdeina si ara Sidon nang kwemdeina ara Asytoret. Ba, Moab nang kwemdeina ara Kamos ba, Amon nang aryi moloramnyi kwemdeina si ara Milkom. Anda kwemdeina molon ai nirya asi sienyi Yosia biryi dalubkabmou. 14Ani, kwemdeina ati keil aryi dukdandoka dobdanamnyi molon ai ab, co aryi kwemdeina molona ati abyokomna nirya ab asi dalubkabmou. Ba, a doboka moloramnyi dikum ara Yosia biryi ninyi din nang yok boyandoka yamubmouci, tukwe asok eibman kumto kuboka malyi kibsinibmou.

15Ani, Nebat mi Yerobeam Yehuda mutuk minob sienyi kiamunyi biryi Betel atei dam asi, kwemdeina ati dama deiboka molon keil dungna doamwe. Anyi biryi doamwe keil dungna aryi, sun Israel nang asi malyi dinyi bobminikamwe. Asi sienyi Yosia biryi daluboka telem-telem ebminikoka sici kibdeibmou. Tonda, kwemdeina ati molon co abyokomna ababyi uk dabmou. 16Ani, Yosia biryi Betel atei mutuk kon kubkub aryi ninyi tukwe dongon ai asi eibmou. Eibmouci, ato eboka arukmou, “Ninyi dibdob nang yok nirya bulubdeiboka, kwemdeina ati dama deiboka molon keil dungna dub deiboka uk dongobdarur!” eboka arukmou. Ara, Er Iya Erebdobnyi biryi Er Imtamnyi uram ermurunanyi deici aryi ebdeiamwe to kuboka arukmou. 17Ani, Yosia biryi ato ebmou, “Ara, unanyi tukwe dongoamnyi asi eibman do?” ebmou. Uca, akatei nang aryi ersi ato ebmai, “Ara, Er Imtamnyi uram ermurunanyi tukwe dongoamnyi asi eibmarim. Ara, erda Yehuda aryi yandoka, ‘Betel atei kwemdeina ati dama deiboka molon keil dungna asi dalubkabkwande,’ eamwe. Akiryi anyi biryi minob a ebdeiamwe to kunuboka anda kwemdeina dalubmarim,” ebmai. 18Ura, sienyi Yosia biryi sunsi ato ebmou, “Er yok nirya ara sunci mitika ton talerdena mem!” ebmou. Ba, sunci Yehuda mutuk aryi yandoka Er uram ermurunanyi ab, tonda Samaria atei aryi yuk nabi yanamunyi er yok ara ton bolirdena kum kubmai.

19Ani, Israel sien nang aryi, Samaria atei mutuk konkon dam aryi Er Iya Erebdobnyi kanya asi u yirsiniramnyi kwemdeina dama deiboka molon ai nirya ababyi dalubmou. Ura, Betel atei kwemdeina ati dama deirin keil lamna kubmou to kuboka akatei ababyi neiktoto ato kubmou. 20Ani, anda kwemdeina ai kalingna nang ati dama deirin nang nirya asi obmouci, sun yok ara a kwemdeina ati dama deirin keil lamna dub deiboka uk dabmou. Sirya ato kubmou ura, Yerusalem atei tubto yandobmou.

21Ura, sienyi Yosia biryi akatei ninyi nirya asi ato ebmou, “Er Imtamnyi biryi a kerek sengna umbura sekeiamwe to Er Iya Erebdobnyi, nun molonubnyi biti weik kwalina si Paskah kwalibkwayeb,” ebmou. 22Ara, minob uca sun Israel atei weik sien nang ab, Yehuda atei weik sien nang ab aryi, sien nang kiamiryi talebde baramnyi talak aryi, iya ato weik kwalina Paskah ara ton kum kwalirderamnyi. 23Bok, sienyi Yosia biryi Yerusalem sienyi kiboka talebwe ara kwalina 18 baryi kimbinmou ura, Er Iya Erebdobnyi biti teleb en weik kwalina si Paskah Yerusalem atei dam kwalibmai.

24Ani, Er Imtamnyi biryi, “Ukubdarur-ukuna mem,” eboka kerek sekeiamwe uram asi, Er Iya Erebdobnyi biti ninyi dama deirin nang sienyi si Hilkia biryi tubto eiboka doamwe. Ba, sienyi Yosia biryi Er Imtamnyi biryi a kerek sekeiamwe to ati, sun Yerusalem mutuk ab, Yehuda mutuk nang ab aryi yuk kwemdeina moloramnyi ai ab, keil dungna ab, kwemdeina molon co ab asi daluboka bai donokmou. Tonda, sun ninyi din nang kanya asi namdamnyi nang ab, “Aminda ara ato kubkwande-ato kubkwande,” en sambala namni nang ab asi obkabmou. 25Ba, minob talak sun akatei sienyi kiboka taleramnyi sien nang aryi, Er Iya Erebdobnyi bisi Musa biryi, “Ukubdarur-ukuna mem,” en uram, ebdeiamwe to kum kunuramnyi. Eda, sienyi Yosia bira Musa biryi Er Imtamnyi uram ebdeiamwe to kuboka kunuramwe. Erci er nong ab, er kanya ab, er mikib ab nirya Er Imtamnyi uram iya diboka kunuramwe. Sienyi Yosia dibmou talak ababyi er kunuramwe to ara yuk sien nang ton kum kuramnyi. 26Bok, Er Iya Erebdobnyi biryi sun Yehuda nang asi sun malyi kun dinyi siklibdongoboka kum libdobmou. Eda, Erci sunsi tuba ati yu boboka kerebmou. Ara, sienyi Manasye biryi Er urasintam aryi malyi kuboka, Er Imtamnyi kanya u yirminingnamwe deyok aryi, sun Yehuda ninyi asi tuba yu bobmou. 27Ura, Er Iya Erebdobnyi biryi ato ebmou, “Niryi Yerusalem atei asi ato eanse, ‘Ni si ara iya a kubkwande,’ eanse. Bok, Ni urasin dam ab, Niryi wibse atei Yerusalem dam aryi sun Yehuda nang asi, Israel nang bai donokse to kuboka bai donokwan!” ebmou.

28Yosia biryi Yehuda atei sienyi kiboka taleamuryi, kubde binamwe to ara minob Yehuda atei sien nang kiboka taleamiryi kubde binamnyi to ati liliboka kerek sekeibwe kerek sengna umbura a sirya liliboka sekeibwe. 29A talak aryi, Mesir mutuk sienyi Firaun Nekho biryi Asyur mutuk sienyi bisi mar bobmouci, Efrat me kin kubkub ai asi ordarbinmarei. Ura, sienyi Yosia bibabyi, “Asyur mutuk sienyi biti milibdobkwan,” tenen er yin doun nang bobmouci, a mar bobdandoka ordarbinmarei ai binmou. Bok, Mesir mutuk sienyi Firaun Nekho biryi ersi eibmouci, Megido atei aryi obmou. 30Obmou ura, Yosia er wa irmilin nang aryi, er dibmoua tukwi Megido atei kereta dub deibdongoboka Yerusalem atei boyanmai. Ura, akatei nang aryi er dibmoua tukwi yuk sien nang kankan aryi tukwe ukoka dongobmai. Ba, akatei nang aryi er mi Yoahas bisi kisok me dikeiboka akatei sienyi tikeibmai. Ba, er nai unubmouci, akatei sienyi kiboka talebmou.

Yehuda sienyi Yoahas deyok

23:31-35

(2Taw. 36:1-4)

31Yoahas er deiamwe aryi kuboka kwalina 23 baryi kimbinmou bok, Yehuda atei sienyi kiboka talebmou. Ba, erci akatei sienyi kibmouci, talebmou uki nungna ara wala winiryi akatei sienyi kiboka talebmou. Ba, er kwin si ara Hamutal kuramwe. Ba, Hamutal er nai si ara Libna atei yalanyi Yeremia kuramwe. 32Ba, er abwe yabwe aryi Er Iya Erebdobnyi urasintam aryi malyi dinyi akwe kunuramnyi to kuboka erbabyi ato kuramwe. 33Ba, Mesir atei sienyi Firaun Nekho biryi, “Yoahas biryi Yerusalem atei tamubindoka, akatei sienyi kiboka talebcei,” tenen ati ersi tabwe deboka sun mar ordana nang dongoramnyi ai dongorbinamwe. Ara, weik atei Asyur bok, Hamat mutuk Ribla atei asi dongorbinamwe. Ba, Mesir atei sienyi Firaun Nekho biryi Yehuda nang asi muna kibdongoboka tukwe dengna moloamwe. Ara, sunsi, “Dengna 34 kilogram emas baryi ab, 3.400 kilogram perak baryi ab asi dekwanurum,” eboka moloamwe. 34Ba, Mesir atei sienyi Firaun Nekho biryi Yosia mi Elyakim bisi Yehuda atei sienyi tikeibmou ba, akatei sienyi kibmouci, er nai unubmou. Ura, a mi si ara Elyakim eramnyi bok asi yuk si Yoyakim eboka dobmou. Ani, Mesir atei sienyi Firaun Nekho biryi Yoyakim er du Yoahas bisi Ribla atei aryi kuboka Mesir atei bobinmou ba, a bindoka dibmou. 35Ura, Mesir atei sienyi Firaun Nekho biryi emas ab, perak keil ab moloamwe to kuboka sienyi Yoyakim biryi dekmou.

Yehuda mutuk sienyi Yoyakim uram deyok

23:36–24:7

(2Taw. 36:5-8)

36Yoyakim bira er yuma deiamwe aryi kuboka kubde yangaramwe asi kwalina 25 baryi kimbinmou. Ura, erci Yehuda atei sienyi kiboka talebmou. Ba, er kwin si ara Zebuda kuramwe. Ba, Zebuda er nai si ara Ruma atei yalanyi Pedaya kuramwe. 37Ba, Yoyakim er akatei sienyi kiboka taleamwe talak aryi, Er Iya Erebdobnyi urasintam ara er abwe yabwe aryi malyi kuramnyi to kuboka erbabyi malyi dinyi akwe kunuramwe.

Currently Selected:

2Raja-raja Uram 23: MTG

Highlight

Copy

Compare