2Raja-raja Uram 25

Yerusalem atei asi dalubmou uram deyok

25:1-21

(2Taw. 36:13-21; Yer. 52:3b-11)

1Ura, Yehuda sienyi Zedekia biryi er nai Babel mutuk sienyi Nebukadnezar bisi mar bobmou. Ba, Nebukadnezar ab, er yin doun nang nirya ab aryi, “Nira er nai bisi unato ati ni arukman dinyi asi kum kunubmar da?” tenen ati Yerusalem atei sienyi Zedekia bisi tamuboka mar bobmai. Mar bobmaici, Yerusalem atei nang asi warikoka aknabdongobmai. Ara, Zedekia biryi Yerusalem atei sienyi kiboka taleamwe uki ara takubaryi ba, wala uki ababyi takubaryi ba, kwalina uki ara toubnibaryi kimbinmou. A talak aryi, Yerusalem nang asi Nebukadnezar biryi mar boboka sun atei warikmou. 2Ato kuboka Zedekia biryi Yerusalem atei sienyi kiboka taleamwe talak aryi kwalina koklombaryi kimbinamuryi, Nebukadnezar biryi ersi tuba ati mar boamuryi, warikamwe. 3A kwalina talak aryok asi Nebukadnezar biryi tuba ati mar boamuryi, warikamnyi noutam aryi akatei ninyi kwaning nirya kum danmou. Kwaning kum danmouci, ilila kwaning utan li dobmou. A kwaning utana li dobmou talak ara wala dumbaryi, uki toubnibaryi talak aryi doamwe. 4Ba, Yehuda atei yin doun nang aryi, sienyi ai dam tam kuboka aitam lika asi akmai. Ura, weik bisik wengbana lika bublan kukdonokmaici, sun nirya ara lukunda aryi me Yordan kin tam asi cukoka binsekdobmai. 5Ba, sun sienyi Zedekia bibabyi baronmou asi, Kasdim mutuk yin doun nang aryi aminda dombindoka Yerikho mutuk lu dam seknerbinmaici, talebmai. Ara, er yin doun nang nirya ara da tentok-tentok deibloboka binsekdobmai aryi, er yuk asi dam seknerbindoka talebmai. 6Ura, sunci a Yehuda sienyi talebmaici, Babel sienyi bisi mambul weik dinyi karebkwamnyi ati Ribla atei bobinmai. 7Ara, Zedekia er mabwe kobdoba asi, er urasin dam aryi obokabiryi, er asing kubdeibyi ura, tembaga tabwe si rantai aryi debokabiryi Babel mutuk bobinmai.

8Ura, Nebukadnezar biryi Babel sienyi kiboka taleamwe ara uki tabaryi ba, wala uki ara amubaryi ba, kwalina uki ara 19 baryi kimbinmou. A talak aryi, Nebukadnezar er yin doun sienyi si Nebuzaradan Yerusalem atei yanmou. 9Yanmou ura, erci Er Iya Erebdobnyi ai ab, akatei sienyi ai ab, Yerusalem atei weik nang ai ab nirya asi uk dongobmou. 10Ani, Yerusalem atei weik lika dinatam otam atam doboka aknabdongoamnyi lika nirya asi, yin doun nang sienyi Nebuzaradan ab, Kasdim mutuk yin doun nang erti miliboka iyanmai nang ab aryi dalubmai. 11Ba, sun Yerusalem atei a takdongoamnyi ba, tuba kuramnyi ur nang ab, “Nunsi sirya muna kibdongobsirim,” eboka Babel sienyi taruk dam karebdanamnyi nang ab nirya ara Nebuzaradan biryi tabwe deboka Babel mutuk bobinmou. 12Eda, sun akatei luknubdob nang demang asi deiblobmou. Ara, sun anda nang aryi akatei anggur wa kalingna nang ab, a mutuk kwaning wa in nang ab kibkwamnyi ati a takdongobmou.

13Ani, sun Kasdim yin doun nang aryi, Er Iya Erebdobnyi ai asi tembaga aryi kikniboka deiriramnyi bona nirya asi doboka Babel mutuk bobinmai. Ara, tembaga aryi kikniboka doamwe abyokomna ab, gerobak ab, ilila baskom sangkol atoanun me deiriramnyi ab asi dobmouci, telebkaboka tembaga asi Babel mutuk bobinmai. 14Ani, Er Imtamnyi ai Imtamnyi biti bisam uk daboka ining dingdeiriramnyi kuali ab, pisau ab, piring ab ani, uk ardeiramnyi dinyi pelita ab nirya ara tembaga aryi kikniamnyi asi dobdobmai. 15Tonda, emas ab, perak ab aryi kikniamnyi uk kalum deirina ab, me dingni moyok ab asi dobdobmai. 16Ani, sienyi Salomo biryi Er Iya Erebdobnyi ai ati tembaga aryi kikniboka doamwe abyokomna ab, gerobak ab, ilila me baskom sangkol atoanun er ikin ara nukman kum asi teleboka tembaga asi dobdobmai. 17Ba, a bitinyi abyokomna sun cang ara 8 meter baryi. Ba, er alib kalurdongona ara tembaga aryi kikniamwe ba, er cang ara 1,3 meter baryi kikniamwe. Ba, a tembaga alib kalurdongona dinatam-dinatam nirya ara co delima te ab, du ab ara tembaga aryi telebto kikniamwe.

18Ura, Babel atei yin doun sienyi Nebuzaradan biryi imam nang sun sienyi Seraya ab, Seraya amwetam imam wa iramunyi Zefanya ab, sun Imtamnyi ai bisik bublan kalingna nang ninyi winiryi nang asi talebmou. 19Ani, Nebuzaradan biryi sun Yerusalem sienyi ai iboka, yin doun nang asi taleramunyi bibabyi talebmou. Tonda, akatei sienyi er kwit yabwe kobdoba sun ninyi amubaryi nang asi talebmou. Tonda, akatei nang aryi yin doun nang kibkwamingnyi nang ati sun si sengdamunyi ab, Yerusalem atei yuk ninyi talen nang 60 baryi ab asi talebmou. 20Ba, a ninyi nirya asi Nebuzaradan biryi taleboka bulubdeibmou. Ura, sunsi Babel mutuk bok Ribla atei asi tabwe deboka bobinmou. 21Ura, Babel mutuk sienyi biryi Ribla atei Hamat mutuk aryi, “Sun a bobinamwe nang asi obdarur,” ebmou. Ba, a nang nirya asi obmai ba, dibmai. Sun Yehuda atei nang asi Babel atei sienyi biryi Babel mutuk bobinamuryi, il weik wa dimnamwe.

Gedalya bira Yehuda mutuk kalingnanyi si gubernur kibmou deyok

25:22-26

(Yer. 40:5–41:18)

22Gedalya bira Nebukadnezar biryi Yehuda mutuk ninyi kalingnanyi si gubernur tikeibmou. Ara, Nebukadnezar biryi sun a takdongoamwe ninyi kalingkwamwe ati tikeibmou. Gedalya er abwe si ara Safan, ba, er nai si ara Ahikam kuramwe. 23Sun Yehuda yin doun sien nang ab, akatei ninyi nirya aryi, “Babel sienyi biryi Gedalya bisi akatei gubernur tikeibmar,” en uram kekebmaici, sunci Gedalya bisi Mizpa atei binmai. Sun a binmai nang ara Netanya mi Ismael ab, Kareah mi Yohanan ab, Netofa ateinyi si Tanhumet mi Seraya ab, Maakha ateinyi si Yaazanya ab ani sun wa in mabwe ab binmai. 24Ura, Gedalya biryi sunsi ato ebmou, “Sunci Kasdim mutuk sienyi wa in nang ati ilil kuna mem! Eda, sunci akatei kubmunci, Babel sienyi biryi, ‘Ato kubdarur,’ en dinyi asi kunubdarur. Ba, sun kam kuntam ara teleb asa akwa kubkwandum,” ebmou. 25Bok, tabaryi wala ara Yehuda sienyi ai ninyi aryi deibdobanyi si Ismael ab, yuk Yehuda yala nang sun ninyi takubaryi ab Gedalya bisi Mizpa atei binmai. Ba, Ismael er nai si ara Netanya kuramwe. Ba, Netanya er nai si ara Elisama kuramwe. Ura, sun Mizpa atei binmai nang aryi Gedalya ab, sun Yehuda mutuk ninyi ab, Kasdim mutuk ninyi er tonkwa Mizpa atei kuramnyi ninyi asi obmai. 26Ba, sun Yehuda mutuk ninyi nirya ab, yin doun nang sien nang ab ara Mesir mutuk binsekdobmai. Ara, Yehuda mutuk ninyi aryi Kasdim mutuk ninyi asi yandoka obsekmai to kuboka, “Nunbabyi obsingnyei,” tenen ilil aryi bindobmai.

Babel mutuk sienyi biryi Yoyakhin bisi boukwe kibdobmou uram deyok

25:27-30

(Yer. 52:31-34)

27Ura, Babel mutuk sienyi minob taleamunyi Nebukadnezar biryi Yehuda atei sienyi Yoyakhin bisi Babel mutuk tabwe deboka bobinamwe. Ba, a bindoka kuramwe ara kwalina 37 baryi kwaliamwe. Bok, tanggal 27 bulan 12 Yoyakhin bira Babel mutuk kuramwe talak aryi, Ewil-Merodakh biryi akatei sienyi kibmouci, Yoyakhin bisi boukwe kibdobmouci, malyi kun nang wenen ai aryi lobdeibmou. 28Ba, Ewil-Merodakh biryi Yoyakhin bisi teleb-teleb uram akwe eboka, erebdob wa asi karebmou. Ara, Babel atei aryi bobinamnyi yuk sien nang ati kareramwe wa ara outam kiboka erebdob wa asi karebmou. 29Ba, a talak aryi Yoyakhin bira malyi kun nang wenen ai ongoraming ongon aling ara sirya kwiriblobmou. Ani, er kam kunkwamwe talak ara akatei sienyi ab tonkwa kwaning yibde kunkwandei. 30Ani, Babel sienyi Ewil-Merodakh biryi er a kuboka yibde kunkwamwe dinyi nirya ara tuba-tuba kareramwe.

Currently Selected:

2Raja-raja Uram 25: MTG

Highlight

Copy

Compare