2Raja-raja Uram 22

Yehuda atei sienyi Yosia biryi, “Ukubdarur-ukuna mem,” en uram tubto eiboka dobmou uram deyok

22:1-20

(2Taw. 34:1-2; 2Taw. 34:8-33)

1Sienyi Yosia er kwin si ara Yedida, Bozkat atei yala ner kuramwe. Ba, Yedida er kwin si ara Adaya kuramwe. Yosia er deibmoua aryi kuboka nebkwamou talak kwalina inbaryi aryi wengbinmou ura, Yerusalem atei sienyi kiboka talebkalibmou. 2Ba, erci Yerusalem atei sienyi kiboka taleamwe talak aryi, Er Iya Erebdobnyi urasintam ara iya malyi dinyi ton kum kunuramwe. Eda, er abwe Daud biryi kwanimtam bisik siriktam bisik dirdena kumci, Er Iya Erebdobnyi bikwe dib teneboka, Imtamnyi wa akwe iramwe to kuramwe.

3Ba, Yosia Yerusalem atei sienyi kiboka taleamwe uki ara kwalina 18 baryi kimbinmou. A talak aryi erci er amwetam kuboka a weik mutuk kerek sengnanyi Mesulam mi Azalya. Ba, Azalya mi Safan bisi, “Er Iya Erebdobnyi ai dam erbirum,” ebmou. 4Ara, “Er Iya Erebdobnyi ai wa iboka ninyi dama deirin nang sienyi si imam besar Hilkia bisi birum. Biminyi ura, ‘Bisik wengban ai kalingdaming nang asi Yerusalem nang aryi bobindoka buluraming co bok nirya asi nukdum,’ ebkwandum,” ebmou. 5“Ba, sirya nukci ura, a co bok ara Er Iya Erebdobnyi ai luboka dangsangdura doraming ba, sunsi akai doraming nang sun sien nang asi karebkwandur. Ba, Er Iya Erebdobnyi ai doraming nang ati dekwanung. 6Ara, sun co yengdaming nang ab, ai don nang ab, akai weik lika don nang babyi dekwanung. Tonda, akai ati co ab, keil ab dekoka don nang ab ati dekwanung. 7Bok, ‘Sun akai don nang asi, “A co bok sirya yibmunyi ura, ato kuboka yibdoboubwe,” ebkwandarur,’ ena mem! Ara, sun akai donung nang ara tola dinyi ton kum enungci, sun kubmangnyi to akwe enung nang aryi donung.” Sienyi Yosia biryi, “Hilkia biti ato kubdur,” eboka Safan deici ebdeibmou.

8Ura, Safan biryi imam besar Hilkia bisi binmouci, sienyi Yosia biryi erti, “Ato kubkwandur,” ebdeibmou to kuboka ebmou. Uca, Hilkia biryi Safan bisi ato ebmou, “Er Iya Erebdobnyi ai dam aryi, Er Iya Erebdobnyi biryi Musa deici asi, ‘Ukubdarur-ukuna mem,’ en uram kum eirinub asi sirya tubto dobman!” Hilkia biryi ato eboka sienyi kerek sengnanyi Safan bisi a eiboka dobmou kerek sengna akun karebmou. Ba, Safan biryi a eiboka dobmou kerek sengna sekeiamwe to kuboka nirya nukmou. 9Ura, Safan tubto sienyi Yosia dam tamuryanmouci, a kubmou to kuboka sienyi bisi ebmou. Ara, “Kan wa in nang aryi Er Iya Erebdobnyi ai deinung co bok ara sirya dobokabiryi, akai donung nang sun kalingna nang ati karebwe,” ebmou. 10Tonda, Yosia bisi ato ebmou, “Imam besar Hilkia biryi Er Iya Erebdobnyi biryi Musa deici asi, ‘Ukubdarur-ukuna mem,’ en uram asi tubto eiboka dobmararyi, karebmar,” ebmou. Ato ebmouci, a boyanmou kerek sengna sienyi urasin dam lelekoka nukarebmou. 11Ba, Yosia biryi a nukmou asi sirya kekebmouci, “Se, nai e,” tenen kanya boboka er ongon aling kwilik-kwilik ebkabokmou. 12Ura, Yosia biryi imam besar Hilkia ab, er wa in nang Safan mi Ahikam ab, Mikha mi Akhbor ab, er kerek sengnanyi Safan ab, Asaya ab asi ato eboka bokeibmou. 13Ara, “Nai Iya Erebdobnyi, Kanci a kerek sengna aryi, ni ab, Yehuda mutuk nang ab ati una kuboka ebdeibumwe do?” eboka Er Iya Erebdobnyi bisi molorbindarur. “Nun abwe yabwe aryi malyi kuramnyi dinyi ati, Er Iya Erebdobnyi biryi nunsi yu weik boboka kerebsou. Ara, nun abwe yabwe aryi minob uca a kerek sengna umbura aryi eboka sekeiamwe to kekeboka kum kunuramnyi deyok aryi, Erci nunsi yu weik kubmou aryi sekeiamwe,” ebmou. 14Ati, Hilkia ab, Ahikam ab, Akhbor ab, Safan ab, Asaya ab asi sienyi Yosia biryi ato eboka arukmou. Ara, “Sunci Er Imtamnyi uram ermurun ner si Hulda bisi bindarur. Hulda bira Yerusalem atei dam ukuryok dobmangnyi ai dam kunmar,” eboka arukmou. Hulda bira Salum ner kuramwe. Ba, Salum er nai bira Tikwa ba, Tikwa er nai bira sun weik sien nang ongon aling ati kiknirminingdamunyi si Harhas kuramwe. Yosia ato eboka ebdeibmou ba, Hulda bisi binmaici, sienyi ebmou to kuboka ebmai. 15Ba, Hulda biryi sunsi ato ebmou, “ ‘Tamuboka sun sienyi Yosia bisi ato ebdeibmar,’ erbindarur! 16Ara, Er Iya Erebdobnyi biryi, ‘Niryi akatei ninyi asi malyi kurminingni dinyi karebkwan,’ ebdeibwe. A kerek sengna umbura aryi, ‘Ato kuboka sunsi ikin dinyi karebkwansin,’ ebdeibwe dinyi nirya asi Yehuda mutuk sienyi Yosia biryi sirya nukmou to kuboka kunubkwande. 17Ara, ‘Sunci Nisi deiblobokabneici, yuk kwemdeina asi bisam uk daboka molorbanung. Sun kunuramingnyi dinyi nirya aryi Ni kanya u yibdeibnei. Ati, akatei ninyi asi Ni weik keren dinyi ara sengdena kum uca iya kubkwande,’ erbindarur,” ebmou. 18Ton ato ebmou, “Bok, Yehuda mutuk sienyi Yosia biryi, ‘ “Er Iya Erebdobnyi tenen dinyi ara una kuboka do?” eboka asirbindarur,’ ebmasounyi bisi ato ebkwandarur, ‘Er Iya Erebdobnyi biryi kansi ato ebdeibwe, “Ni Er Iya Erebdobnyi, sun Israel nang molonungnyi biryi kansi ato eboka ebdeibman. 19Ara, ‘Niryi a mutuk ab, akatei nang ab asi subokabniryi, mambul dona dinyi karebkwan,’ eboka kerek sekeibse dinyi sirya kekebmoumci, kanci, ‘Se, nai e,’ tenen kanya bobdobmomwe. Uca, kanci kan ongon aling kwilikloboka Ni Iya Erebdobnyi urasin dam asi engeboka luknubdongobmomwe. A kubmomwe dinyi ara Niryi sirya kekebmakunwe. 20A deyok aryi kan kam kuboka sienyi kiaminyi talak aryi Niryi a mutuk ab, akatei ninyi ab asi mambul dona dinyi kum karebkwan. Ani, Niryi, ‘A karebkwan,’ tenen sirya teneibse mambul ara kanci kum eibkwandim. Eda, kanda teleb asa aryi dibmimba, tukwe umbura dam bimimbok asi a mutuk ati a mambul kun dinyi karebkwan,” ebdeibwe,’ ebkwandarur,” ebmou. Ba, sienyi wa in nang aryi Hulda biryi, “Ato ati ebdeibwa,” ebmou to kuboka sienyi dam tamuryandoka ebmai.

Currently Selected:

2Raja-raja Uram 22: MTG

Highlight

Copy

Compare